Gɛlaɠaa 24 - Yálá laawoo hɛɓɛ (dc)Ɉuifəɠaa di Polə mąą ɲąba lɔ 1 Hvóló lɔɔli kulaa, ɉaláá laa həli mun gɛnɛ̨ Ananiasə ə nɔi kalanɉon daɠaa həɠə da Tɛrtulusə ŋɛ̨i kɛ a nu mąąloohaamun, də li di Polə kalamąɓo gbahalanąmą ɓa. 2 Di Polə təli, Tɛrtulusə ə gbɛn ɉəɠə, yɛ kɛ mą: «Ŋą́ mɛ̨nį nąmu, ə́ wɔ lúwɔ́ háálai, da nɔi hon bələi yáá ɉon na, ya ku kaa la liilaa yɛnɛ̨ɛ̨ hu. 3 Ku wɔ mɛ̨nį nąmu Felisə! Mɛ̨inɛ̨ɛ̨ɠaai kpɔ kwa ɉɔlɔɓo kɛɛnąą kəlee, a yələ kəlee, ə́ yəi, ku yili hukɔlɔn. 4 Kɛlaa yaamun, və́ bɔ və́ ə́ hvįikpɛɛ. Mɛ̨nįi gɛ́ ŋį́ mo, hvo kwɛa li; Gáá ɉu hvɛlii ə́ wɔ wɛlikɛmąąlaa ɓa, ə́ ə́ wəli tɔɔ kuɔ yɛ bələi yá gɛ la a bɔlɔ. 5 Kwaa gaa kuɔ ɉulɔnui ŋɛ̨i kaa a lɔi kala ɲɔ̨n gbɔkpɔɔ, Ɉuifəɠaai kpɔ yɛnɛ̨ɛ̨ nąą kəlee a di ɲąą hee di kee ɓa. Nuąi da kɛ diɛ: Nazarɛtə lɛɛ kalan gɛ nuą, di nwun nąmu ta li. 6 Ə kɛlimun hɔlɔɔ kɛ ə Yálá hee pɛlɛ́ laa pu, yili ɓə gɛ kuɔ ɉon. Ku kɛli kɛ ku gití tee yɛ bələi kuɔ tɔ́n a mo la. 7 Kɛlaa, ɉolahi nwun namun Lisiasə, ə naa too ɉu, ə gulɔ ku yəi a huwalawalalaa kɛnɛ̨. 8 Ɛlɛɛ, ə mo galamąɓo nuą diɛ yɛ hvo kɛli da paa la ə́ lii la. Yɛ́ kpinįlee yá mąąnįn kɛ, mɛ̨nįɠaa kpɔ ku kaa ɉeei nwuɔ̨, ə́ kaa pai dɛ̨ą kaai.» 9 Ɉuifəɠaai kəlee di tɔɔ nwoo pulu, diɛ mą: Bələ ɓə ə kɛ la. Polə ə nwoo hukulɔ Felisə lii la 10 Gbahanąmą ə ɲee lɛ Polə ɓa, yɛ mą: Ə́ kaa kɛi lə? Polə yɛ diɛ: «Gíli kaa ɉu gɛ́, yáá kwɛlan damąą kɛ, yɛ́ ku wɔ lɔi ŋɛ̨i ɲąąwooɓo a tələnmolaa. Yili ɓa, gíli la təɠɛɛi kpɔ ŋį́ nwóó hukulɔ ə́ ɲɛ̨i ɓa. 11 Yá kpinįi, yá pɛli ə́ mɛ̨nįi ŋɛ̨i hukpɛ, Níɛ Ɉerusalɛmə gɛ́ kwɛli hvilɛn Yálá ɓa, hvo kpɛli ni lɔwɔ́ hveelɛ kulɔ li. 12 Ə kɛ a Yálá hee pɛlɛ́ mu, ə kɛ a Yálá hvɛli pɛlɛ́ɠaa mu, ə kɛ a daa kwəi, və́ kɛ nuą ɲąą hee li gee ɓa. 13 Mɛ̨nįɠaai kpɔ nuą ŋɛ̨i bɛlɛi nwúɔ̨ yiihu, di hva pɛli dɛ̨ą lɛi kpɔ tíikpə kpɛli. 14 Kɛlaa, yii gíli kaa ɉu, ya ka: Gáá ku nąnni di wɔɔ Yálá ŋą kóló ɓa, yɛ bələi Gbaalə nįnɛ̨i ŋɛ̨i a mo la, yai di wɛi, di kaa gaai a: Lɛɛ kpaalə. Mɛ̨nįɠaa kpɔ dɔn ɉɛɓɛ́ hu da yiiɠaai kpɔ Yálá kwəi mɛ̨nį hukulɔ nuą di bɛ̨ɛ̨, náái gəlee la. 15 Gílitɔɔi ɓə Yálá ɓa, diɛ kpɛlimąn gili tɔ̨nɔ̨i tii kaa lɔ di kwəi, ya ɓaa tələnmo nuą-o, wɛa nuą, di kaa pai pənəi di nwun. 16 Yili mąą mɛ̨nį ɓa, ŋį́ gbinįlee, ŋą́ tɔɔ a nwąnąi gɛ́ níi laa hɔnmo, mąąkulɔi hva kɛ mą, Yálá da nu kanŋaa di ɲɛ̨i ɓa. 17 «Gwɛlan damąą kulaa ɉu, ŋą pənə ŋį́ pa nwɔ́ nuąi pɔ a mɛ̨inɛ̨ɛ̨ wali da Yálá kɔ wali. 18 Nąąlɔwai ɓə nuą ŋɛ̨i di gáá la Yálá hee pɛlɛ́ mu, ŋą́ą́ kɛ kpɛɛ a mą́ą́həɠə halaa kulaa, nu kpulu hvo kɛ laa, ɉuwu-ɉuwu mɛ̨nį hvo kɛ laa. 19 Kɛlaa, Ɉuifəɠaai ŋɛ̨i Asi lɔi hu, akɛ di hon gaa mą́ą́, diɛ ɓə kɛ mąąnɛ̨ɛ̨ di pa ɓɛ ə́ lii la, di ɉón tii too yɛ́. 20 Yii di hvo ɓɛi, nuąi ŋɛ̨i ɓɛi, mɛ̨nį ɲɔ̨nwɔ̨ɔ̨i kpɔ di gaa a ɉón, ɓɛlɔwai ŋį́ kɛ la giti haɠa ɓa tɔ́n vili nąmįną lii la, di mo. 21 Hvo kɛli lɔ kan mɛ̨nį tɔ̨nɔ̨ ŋɛ̨i ŋą́ mo, a nwóó kɛnɛ̨, ŋį́ ɓo tɔɔni di hɛ̨ąi, gɛ́ kɛ diɛ: ‹Haa nuą nwun mɛ̨nį ɓə, gáá la háákələi kiti ɓa, ká liila?›» 22 Felisə ə kɛ a Gbaalə nįnɛ̨i tii mąą mɛ̨nį kpaɠala kɔlɔn gbɔ a nɛlɛɛ, yili ɓə gɛ ə mɛ̨nįi tii mąą hon, yɛ diɛ: Gáá pai ká wɔɔ mɛ̨nįi ta ɓoi, ɓɛlɔwai ɉolahi nwun nąmu Lisiasə a paa la. 23 Ə mo ɉolahi nwun dɔ̨nɔ̨ nąmu ɓa, ə ɲɛ̨i kɛ Polə ɓa gaho ŋą, kɛlaa ə da wolo lɛɛ gbɔwɔ ɓa, ɛlɛɛ, nwɔ nuą da kɛ di mąą mɛ̨nį ɲɛ̨i kulɔ ə di lɛɛ laa di gɛ. Polə kɛɛ gaho ɲą 24 Yíi kuu hveelɛ kulaa ɉu, Felisə da nɛ̨ą Drusilə Ɉuifə mun, di Polə təli, diɛ kɛ mą, nu laa mɛ̨nį Jesus Kristə la, mɛ̨nį ŋɛ̨i yá kɛ moi, kuɔ ku da mɛ̨n. 25 Kɛlaa, yii kɛa nono woo ə hvilɛn, tələnmo yíí ɓa, da nu kpɔwɔ huhon mɛ̨nį, ɛlɛɛ, gitii gaa nuą tɔwɔ; Felisə ə ɲɔw, yɛ mą: «'Li kɛa, gáá pai ə́ təlii a yələ takpɛli.» 26 Ə kɛ gwəi yɛ kɛ, Polə kaa pai kɛ wali tɛɛi bɔ, mɛ̨nįi ə kɛli dəli la kɛlɛ-kɛlɛ da yaa diɛ lono kɛ, yaa li. 27 Kwɛlan veelɛ kulaa ɉu, Porsiusə Fɛstusə ɓə Felisə mąąhvalin nɔi nwun nąmu laa hu. Kɛlaa kɛi Felisə ə mo bɔ ə Ɉuifəɠaa lii hon, ya ɓə gɛ, ə Polə lɛɛ gaho ŋą. |