Gɛlaɠaa 22 - Yálá laawoo hɛɓɛ (dc)1 «Ną́n nonnii da ną́nni, ka ká wəli tɔɔ, mɛ̨nįi gaa ná yiihu gɛ́ gbɔ́ɔ́ mąąkɔ̨nwɔ̨ la, ká mɛ̨n.» 2 Ɓɛlɔwai di gaa la diɛ Polə kaa di pɔ taai woo ɓoi, di di laa pilɛ kpɔ kɛa tin. Polə ə mo diɛ, yɛ diɛ: 3 «Gáá a Ɉuifə, di gáá Talisə daai, Silisi lɔi hu. Kɛlaa, Ɉerusalɛmə ɓɛ ɓə ŋį́ kɛnɛ̨ laa, nui ŋį́ lakwəli kɛ ɲəi, naa ɓaa: Gamaliɛlə. Ya ɓə mą́ą́ kwɛli gu kalaɓɔlɔni di wɔ tɔ́n ɓa kpɔ tɛhvɛ-tɛhvɛ. Yálá mąą mɛ̨nį kɛɛ ŋą hvaŋą lɔ ə kɛ ɉú, yɛ pələi gaa la ka yəi háákələi. 4 Nuąi kɛ di hvilɛnŋąą kɛ bələi mɛ̨i, ŋį́ kɛli di mɔ̨nɔ̨ɓo, gɛ́ daɠaa paa, ŋį́ kɛli hinąą da nɛ̨ąą di pu yɛli ɓa, gɛ́ di too gaho ŋą. 5 Galanɉonŋaa da di wɔ ɉaláá laa həli mun gɛnɛ̨ɛ̨, da pɛli di yili dɛ̨ą ɓo. Diɛi ti ɓə hɛɓɛ́ tɛɛ bɔ́, diɛ ŋą́ li Damasə, ku nąn nonnii di kaa laa, ŋą́ di yili ŋį́ pa a diɛ Ɉerusalɛmə, di hutɔɔ mɛ̨nį ɓa.» Bələi Polə ə ɲee hee la Jesus mąą mɛ̨nį mu ( Gɛlaɠaa 9.1-19 ; 26.12-18 ) 6 «Ɓɛlɔwai ŋį́ kɛ la bələ pɔ, nɛ́ɠɛɛ kɛa Damasə daa kwɛlɛ, ə kɛ a hvoló tɛɛ nwun ma lɔwai. Kpɔlɔ ti ɲąąɓa, kɛɛ pono kɛnɛ̨ɛ̨ ə həɠə yələi, ə mą́ą́ tinɛ̨n. 7 Ŋą́ too nɔi ɓa, ŋį́ woo ta mɛ̨n yɛ kɛ mą́ą́: ‹Solə! Solə! Lə mɛ̨nį ɓa, ə́ kaa mɔ̨nɔ̨ɓoi?› 8 Ŋą́ mąnįn gɛ, gɛ ma: ‹Ŋą́ mɛ̨nį Nąmu, gbɛɛ ɓaa yɛ?› Nwooi ti ə pənə yɛ mą́ą́: ‹Ɲą́ą́ Jesus Nazarɛtə mun ga ti, ə́ kaa mɔ̨nɔ̨ɓoi.› 9 Nuąi ti kɛ bɔ́, di gɛɛ ponoi ti kaa, kɛlaa, nwoo ti kɛi mɛ̨nį ɓo mą́ą́ di hvo mɛ̨n 10 Gɛ́ mą: ‹Ną́mu! Ɲą́ą́ ká! Lə ɓə yɛ́ ŋį́ gɛ?› Ya ɓə gu Nąmu a kɛ mą́ą́: ‹'Ə́ muhəɠə, 'tɛ́ Damasə, mɛ̨nįi mąąnɛ̨ɛ̨ ə́ gɛ, di kaa lii nɛi yɛ́.› 11 Gɛɛ ponoi ti ŋį́ gaa, ə ɲɛ̨́i pu, nuąi ŋɛ̨i kɛ bɔ́, di ɉón a ɲee ku tɛ Damasə. 12 «Ananiasə laamun da ə kɛ laa, a Yálá mąąwiɛ mun, yɛ dɔ́n pɔ yíiɓo, naa lɛlɛɛ lɔ ɓə kɛ Ɉuifəɠaai kpɔ kɛ heeni Damasə, di la. 13 Ə pa, ə gáá, ə hee gwɛ́lɛ́, yɛ mą́ą́: ‹Ną́n non Solə, 'kɛɛ kaa!› Nąąlɔwai ti hu, ɲɛ̨́i ə hvoloon. Gɛ́ kɛɛ kaa. 14 Yɛ nwɔ̨nɔ̨ mą́ą́: ‹Gu nąnni di wɔ Yálá ə gbɛa ə́ həɠə ɉu, ə ə́ kɛ a niiɓa kɔ́lɔn mun; ə́ dələnmomun ti kaa, ə́ nwoo mɛ̨n. 15 Mąąnɛ̨ɛ̨, mɛ̨nįi ə́ gaa da yii ə́ mɛ̨n, ə́ kɛ a mąą kɛla, nu kəlee ɲɛ̨i ɓa. 16 Lə mɛ̨nį ɓa gaa ə́ hu? 'Ə́ muhəɠə ə́ li, di ə́ mąąwaa, ə́ mąą ə həɠə ə́ wɔ nɛ̨ŋɛ̨nŋaai yəi, a Naa hvɛlii yá mo.›» Bələi Polə ə li la huwu takpɛliɠaa pɔ 17 «Pənəi ŋį́ mo ŋį́ pa Ɉerusalɛmə, gɛ́ɛ́ Yálá hvɛlii Yálá hvɛli la, Yálá hee pɛlɛ́ mu, a yələ ta, ɲɛ̨́i ə kwɛlɛɛn gɛɛ ta kaa. 18 Ŋą́ gu Ną́mu kaa yɛ kɛ mą́ą́: 'Ə́ mąąhulɔ, 'kulɔ ɓɛ Ɉerusalɛmə. Mąąhɔlɔɓo, mɛ̨nįi ə́ kaa pai moi yɛ hvilɛn na mą́ą́, di hvo pai di yee heei mu 19 Ŋą́ nwoo ɲąąpənə gɛ́ mą: ‹Ną́mu, di kili kaa ɉu diɛ: ŋį́ kɛli lɔ Yálá hvɛli pɛlɛ́ɠaa mu, nuąi kɛi laa ə́ la, gɛ́ di hon, gɛ́ di kɛlɛ, gɛ́ daɠaa too gaho ŋą. 20 Ɛlɛɛ, ɓɛlɔwai di kɛi ə́ wɔ tələnmomun Etiɛnə paa la, ku kəlee ɓə kɛ laa. Ŋą́ hvaa baa mɛ̨nį ɓa. Ɲą́ą́ ɓə ɲee kɛ baa nuą kwąną-həɠə ɓa.› 21 Kɛlaa, yɛ mą́ą́: ‹'Li! Gáá ə́ tɔɔi kpɔ kwɛaala nuąi di hvo a Ɉuifəɠaa di pɔɔli.›» 22 Ɉuifəɠaa wəli tɔɔ kɛ Polə woo ɓa, ə lɛɛ ɉu, ə həli nwooɠaa tii ɓa, nuąi kɛli nwoo mɛ̨n di tómą, diɛ kɛ: Nu ɲɔ̨nwɔ̨mą taaləi ŋɛ̨i, mąąnɛ̨ɛ̨ ə həɠə lɔi mɛ̨i, mąą hvo nɛ̨ɛ̨li hvo lɛɛ yɛnɛ̨ɛ̨. 23 Di kɛi tomą, diɛ di kwąną-həɠə hukpɛŋɛ̨n, diɛ muluun bili yələi. 24 Ɉolahi nwun nąmu ə mo, yɛ diɛ: 'Ka Polə hon, ka li la bɛlɛ lon mu, 'ka gɛlɛ, ə gɛ, mɛ̨nįi nu kpului ŋɛ̨i kaa tomąi la mɛ̨i, gu nwun gaa. 25 Di kɛli pa Polə pɛlɛi gɛlɛ mɛ̨nį ɓa, ya ɓə a kɛ ɉolahi nwun dɔ̨nɔ̨ nąmui tii ɓa: «Akɛti, ká pɛli ka Romə kaalon da kɛlɛ a galakpa, yii di hvo ni mąą mɛ̨nį hukpɛ li?» 26 Nwoo ti mɛ̨n ɉolahi nwun dɔ̨nɔ̨ nąmu ə mo, ə li yɛ di nwun nąmu ɓa: «Lə ɓə ŋɛ̨i ə́ kɛli pa gɛi a kuɔi? Ɉulɔnui ŋɛ̨i ə́ dɛɛ ku pɔi, Romə kaalon da li.» 27 Ɉolahi nwun namui ti, ə pa, ə Polə mąąni kɛ, yɛ mą: «Tɛ̨ą ɓo mą́ą́, Romə kaalon da kpɔ ɓaa a yɛ́?» Polə yɛ mą: «Ee! Da ɓaa a ɲą́ą́!» 28 Ɉolahi nwun nąmu tii yɛ nwɔ̨nɔ̨ mą: «Nwɛ́i, wali kɛnɛ̨ ɓə ŋį́ gulɔ, gɛ́ gaalon naa tii ya la.» Polə yɛ mą: «Nwɛ́i, ŋį́ ɉɔlɔɓo gáá pələ hu.» 29 Ɲąąɓa, nuąi kɛi kɛ di kaa Polə kɛlɛ, di tɛ di pulu. Ɉolahi nwun nąmu nwɛi, ə ɲɔw kpɔ kɛnɛ̨, gaai ə mo yɛ kɛ Polə kaa a Romə kaalon, ɛlɛɛ, aa mo daa ɲili a yɔwɔn. Polə ə nwoo hukulɔ dɔ́n ɉaɠa ɓa 30 Ɉolahi nwun nąmu ə kɛ kpɔ bɔ, mɛ̨nįi di kaa moi a Polə laa, ə gulɔ ɉu kɛɛ kaa; yili ɓə gɛ, mąą yələ laa ɓoɔ, ə Polə hvólóon, ə mo ɉaláá laa həli nuą kpɛa-kpɛaa diɛ, da tɔ́n vili nąmįną, di di ɲąąkpɔn. Yili pulu, ə pa a Polə di lííla. |