Gɛlaɠaa 20 - Yálá laawoo hɛɓɛ (dc)

Polə ə li Masedoanə lɔi hu da Grɛkə lɔi hu

¹ Yii kɛa di nu kpulu ɲąąyɛɛ, Polə ə galan nɛa təli, ə di hvaŋąlɔ, ə yələ wala too diɛ, yɛ li Masedoanə lɔi hu pələ.

² Ə nɔi ti hu ɓɔ, yɛ galan nɛa liɛwoo kɛ kpɔ a ɉu kwɛaa; ə li Grɛkə lɔi hu pələ.

³ Ə ɲąnįn ɉaaɓa kɛ nɔi ti hu. Ɓɛlɔwai ə kɛli pa tɛi la gələn ɉu yɛ li Siri lɔi hu pələ, Ɉuifəɠaa di lɔgilii kɛ mą, yili ɓə gɛ, ə naa gwəi ə yali bulu ə pənə yɛ li Masedoanə lɔi hu pələ.

⁴ Nuąi da diɛni di kɛli ɉiɛ kulɔ, diɛ ɓaa: Sopatrɔsə, yai kɛ a Pirusə lon, a Bere daai mun, Aristarkə da Sekundusə yai kɛ a Tesalonikə daai mun, Gaiusə yai a Dɛrbe mun, da Timote, ɛlɛɛ nwɔ̨nɔ̨, Tisikə da Trofimə, diɛi a Asi lɔi hu nuą.

⁵ Nuąi ti kəlee di li ku tɔwɔ, di ku mąąkpɔn Troasə.

⁶ Ku wɛi, ku həɠə Filipə daai kələn ɉu, nɛɠɛi dɛ-hɛn və ɉu mąą hɛli puɔ pulu, ɛlɛɛ, hvoló lɔɔli kulaa ɉu, ku həli diɛ Troasə, ku lɔwɔ́ tɔ̨nɔ̨ kɛ laa.

Polə ə yələ wala kɛ Troasə nuą diɛ, ə haamun da nwun

⁷ Nɔwɔ nwɔ hvoló dɔlɔɔ yələ, ku ɲąąkpɔnŋąąi kɛ nɛɠɛ mįi mɛ̨nį ɓa, yii Polə ə kɛli pa lii a mąą yələ laaɓoɔ, ə kɛli galan nɛa kalan, ə lamun gbɔ pələ ɓoi diɛ, ə lɛɛ ɉu kwii hąą ə mɛlaɓo.

⁸ Ɲələ pɛlɛ́i ti ku ɲąąkpɔnŋąąi kɛ mu, labon damąą di kɛ laa.

⁹ Laŋą lon da ə kɛ laa diɛ kɛ naa ɓaa Eutikə, ə kɛ heeni vinɛɛtɛlɛ la, yii kɛa Polə ə lamun galan gɛɛ hu, yii ə tɛɛ la, ə kulɔ ɲələi pɛlɛ́ ɉaaɓa nąą hu, ə too, di pa di gaa, aa haa.

¹⁰ Polə ə hvilɛn, ə nwun ɉɛlɛn mɛ̨i, ə ɉon a ɲee yɛ mą: «Ka hvo ka liihɛlɛn gaa a vulú.»

¹¹ Yili pulu, di pənə di tɛ, di nɛɠɛ ɲąąkwɛlɛ di mįi, ə lɛɛ kpɔ nwɔ̨nɔ̨ bələɓoi ə lɛɛ ɉu yələ ə ɓo. Yɛ kɛa li.

¹² Di naŋąlon ti hon di paa la, yɛ ɓo a vulú. Yili ə kɛ a nuą kəlee hvaŋą lɔ mɛ̨nį.

Polə ə li Milɛtə daai

¹³ Ku wɛi, kwə li tɔwɔ ku tɛ kələn da ɉu yɛ li Asɔsə, nąą ɓə gu Polə kpəɠə laa. Yili ɓə nwɛli ə kɛ mą, mąąhɔlɔɓo, ə kɛ bɔ ə tɛɛ gɔwɔ ŋą pələ.

¹⁴ Ɓɛlɔwai kɛa ə tɛ la ku pɔ gələn ɉu Asɔsə daai, kwa diɛni kwə li Mitilɛnə.

¹⁵ Yələ ɓoɔ ku həɠə laa, kwəli gu həli Sio taa tənən ma. Bulu yələ laa ɓoɔ, kwəli Samɔsə daai, lɛɛlɛ poɔ hveelɛ kɔw nąąn tɛɛ, ku tɔɔ koloɓo Trogiliɔn, ku pa kɛa Milɛtə daai.

¹⁶ Yaan, Polə ə naa gwəi ə Efɛsə taa mąąlaa, hva tɔɔ kɛ laa, ə gɛ, hvo pa lɔwai tamąą kɛ Asi lɔi hu. Ə mąą hulɔ ə gɛ Pantəkotə hɛli ə ɉɔlɔɓo Ɉerusalɛmə.

Polə ə yələ wala too Efɛsə kalanɉonŋaa diɛ

¹⁷ Polə kɛɛ Milɛtə daai, gbɔn ŋɛ̨i gaa Efɛsə daai, ə ɉu kalanɉonŋaa təli.

¹⁸ Ɓɛlɔwai yiliɠaai di paa la, ə mo diɛ, yɛ diɛ: «Gu kɛɛ ɓɛ gu kee ɓa, bələi ŋį́ túwɔ́ la, ə gɔwɔ tɔɔ volói ŋį́ lɔ la ɓɛ Asi lɔi hu, ka gbaɠala kɔ́lɔn.

¹⁹ Ŋą́ kólo kɛ gu Ną́mu ɓa a kpɔɔmąąyɛɛlaa ɲɛ̨́iyá hu, bələi mąn Ɉuifəɠaa di kɛi lɔ la mą́ą́kili, ɲąąhɛŋi mɛ̨nįɠaa tamąą yɛ həli mą́ą́, gɛ́ mɔ̨nɔ̨ mįi.

²⁰ Mɛ̨nįɠaai da pɛli di kpɔnmąą tɛɛ ka pɔ, və́ da mąąhvįikpɛɛ too li. Kɛlaa, ɲą́ą́ mun, ŋį́ kalan na kpɔn ɉu, da bɛlɛ́ɠaa mu.

²¹ Nwɔ́ kɛla hvaa ə kɛli Ɉuifəɠaa da nuąi di hvo a Ɉuifəɠaa di təli, ə gɛ, di pa Yálá pɔ pələ, di laa gu Ną́mu Jesus la.

²² Yiihu kɛa, gáá a Kili-Mąąhəɠɛɛ ŋą gaho nąmu, ɲą́ą́ ka lii Ɉerusalɛmə, mɛ̨nįi lii laai mą́ą́, və́ gɔlɔn.

²³ Kɛlaa gílí kaa ɉu, gɛ́ Kili-Mąąhəɠɛɛ kaa moi mą́ą́ daa tɛitɛi hu, yɛ, yɔwɔn da mɔ̨nɔ̨ ɓə mą́ą́ kpɔn ɉi.

²⁴ Nwɔ́ kɛ yɛnɛ̨ɛ̨ hvəə gánąnŋąą mą kpɛli tíikpə, yiimun gánąnŋąą mą, ya ɓaa: gólói gu Ną́mu Jesus ə dɔ́ɔ́ mą, ŋį́ gɛ, ŋį́ naakulɔ. Góloi ti ɓaa: Ŋą́ Yálá nwɔ mɛ̨inɛ̨ɛ̨ mąą wəlɛɛ lɛlɛɛ mąą kɛlahvaaɓo.

²⁵ «Ŋą́ kɛi tɛɛ ka kəlee ka lɔwai, gɛ́ Yálá-taa tɔɔlaa laa həli. Kɛlaa, gílí kaa ɉu gɛ́ diɛ, ə həɠə kɛa yiihu ɓa, ká hvo kɛa pai ɲɛ̨́ilaai kaai.

²⁶ Yili ɓə gaa mą, gáá háákələi moi káá gɛ́ káá: Ka tɔ̨nɔ̨ kpɛli nwun na pili nwulu hvo nwúɔ.

²⁷ Gbala ə tɔɔ, ŋį́ Yálá nwɔ mɛ̨nį pɛliɛ kəlee lɛ kaa, və́ dɔ̨nɔ̨ kpɛli loo li kaa.

²⁸ 'Ka ká kpɔɔ mɛ̨i kaa, nu kpului ŋɛ̨i Kili-Mąąhəɠɛɛ aa ká hee a mɛ̨i kaa nuą, 'ka ká kili kɛ ɉu, 'ká gbɔn ɲąąkɔn a nɛlɛɛ, yai ə ɲá a gbɔkpɔɔ ɲąmąi.

²⁹ Gili kaa kpɔ ɉu, gɛ́, ŋą́ pa həɠəi ɓɛ, kwɛli kpəɠiɛɠaa kaa pai lɔi ká lɔwai, di hvo pai daatɛlɛɛɠaa ɲɛ̨imąąwɛli kaai.

³⁰ Ə mą kɛ ka lɔwai, nu taɠaa kaa pai kɛi lɛɛ kɛi, ə gɛ di laa na nuą nwun dinɛn, di di hvilɛn di pulu.

³¹ Ka ka kili lɛɛ ɉu kaa diɛ kwɛlan ɉaaɓa kuu mu, hvóló da kpinį ŋį́ kɛi ka kili pu mɛ̨nįɠaa hu, gɛ da kɛ kpɔ a ɲɛ̨iyá wɔlɔ.

³² «Yiihu kɛa, gáá ka lɛɛi Yálá yəi da nwɔ nɛ̨ɛ̨laa woo, yaa ɓə huwalawala kaa ɲəi yɛ pɛli bɛlɛ́ tɔɔi, yɛ mąąhəɠə nuą kəlee kwɛlin dɛɛ di pɔ.

³³ Ɲɛ̨́i hvo kɛ kulɔ li, wali pɔ, hɛni pɔ, ə mą kɛ, nu nwɔ həɠə.

³⁴ Káá kpinįilee ka gɔlɔn kaa diɛ, ŋį́ kólo kɛ a gbɔwɔ yee, ə gɛ, yii a ku mąąkpaan gbɛɛ kwa mɛlaani, ku ɉɔlɔɓo.

³⁵ Mɛ̨nį kəlee hu, yii ŋį́ nɛ kaa ya ɓaa: Mąąnɛ̨ɛ̨ nu kəlee di kólo kɛ, ya ɓə a gɛ gu kpɔnmąą tɛɛ mąąwɛli nuą pɔ. Ka gu gu kili lɛɛ gu Ną́mu Jesus woo hu, yii ə mo yɛ diɛ: ‹Nui kɔ́ɓo kɛi, gwəinɛ̨ɛ̨i ə tɛɛ nui di kaa gɔi mą.›»

³⁶ Yii kɛa Polə ə nwooɠaai ti ɓo diɛ, ə pu gbəlin na, da diɛni di Yálá hvɛli.

³⁷ Di kəlee di ɲɛ̨iyá ə too diɛ, di yili Polə ɓa, da diɛni di yələ wala gbəli-kpəli too di kee ɓa.

³⁸ Yii kpɔ liihɛlɛn doo diɛ, ya ɓaa: Kɛi Polə ə mo diɛ: «Di hvo kɛa pai ɲɛ̨ilaai gaai.» Yili pulu, di lɛɛ bulu dəli di dɔɔ pələi ɓɛi da gələn ɉəɠə laai.