Gɛlaɠaa 19 - Yálá laawoo hɛɓɛ (dc)Polə ə pa Efɛsə daai 1 Ɓɛlɔwai Apɔlɔsə ə kɛ la Korɛntə daai, nąąlɔwai ɓə Polə ə paa la Efɛsə, yɛ həɠə ɲá nwuɔ̨ lɔi hu pələ. Lii ə mo, ə kalan nɛa taɠaa kaa laa. 2 Ə di mąąnin kɛ, yɛ diɛ: «Ká yee heei ká mo Jesus mąą mɛ̨nį mui, 'ka Kili-Mąąhəɠɛɛ hɔlɔɓo?» Di nwoo ɲąąpənə diɛ mą: «Kpaa-o! Ku hvo ta Kili-Mąąhəɠɛɛ mąą mɛ̨nį bələ mɛ̨n ni kpɛli.» 3 Polə ə di mąąni kɛ yɛ diɛ: «Mąąwaa ləi ɓə kani ká ɉɔlɔɓo?» Di nwoo ɲąąpənə diɛ mą: «Ɉaan nwɔ mąąwaai ə kɛi gɛ, ya ɓə ku ɉɔlɔɓo.» 4 Polə ə pənə, yɛ diɛ: «Ɉaan ə kɛli nu hɔn mąą pənə mɛ̨nį ŋą mąąwaa kɛ a yá, yɛ kɛ nuą diɛ, mąąnɛ̨ɛ̨ di laa nui kɛli pa lɛɛi bulu yɛ pa, na, ya ɓaa a Jesus.» 5 Yili mɛ̨n di mo, di di mąąwaa gu Ną́mu Jesus laa hu. 6 Polə ə ɲee pɛlɛ di mɛ̨i, di Kili-Mąąhəɠɛɛ hɔlɔɓo; diɛ kɛa hvaa a woo nįnɛ̨ɠaa, diɛ Yálá kwəi mɛ̨nį hukulɔ. 7 Da pɛli kɛ nu pow kɔ́w hveelɛ kulɔi. 8 Polə ə kɛli li Yálá hvɛli pɛlɛ́ mu, ɛlɛɛ, ɲąnįn ɉaaɓa yee mu, yɛ Yálá nwɔ tɔɔlaa mąą mɛ̨nį hukulɔ a kilitɔɔmąąlaa kɛnɛ̨, nuąi kɛi di wəli tɔɔ nwoo ɓa, yɛ tɔɔ a nwąnąi, yɛ tɛ̨ą lɛ diɛ; 9 Kɛlaa, nu taɠaa di kɛli di kili walawala, di hvo kɛli tí, di hvo nwoo kaa a tɛ̨ą, yaamun, di kɛli Yálá nwɔ pələi laa ɲɔ̨nwɔ̨ɔ̨ɓo ɲąąkpɔn ɉu; yili ɓa, Polə da nuąi tii di taɠa. Yili pulu, ə galan nɛa həɠə, yɛ kalan gɛ diɛ hvoló tɛitɛi yee mu Tiranɔsə nwɔ lakwɛli kələi mu. 10 Ə gɛ tii kwɛlan veelɛ yee mu. Gɛ pələi ti, nuą kpɔ kɛ Asi lɔi hu, ə kɛ a Ɉuifəɠaa, ə kɛ a Grɛkə, di pɛli gu Nąmu laawoo mɛ̨n ɉii. Skeva lonnii mɛ̨ihveelɛi di mąą mɛ̨nį 11 Yálá ə kɛi kpalo mɛ̨nį tamąą kɛ a Polə yee. 12 Gɛ pələi tii, nuą di kɛli kpɔ ɓɔlɔɠaa da həɠə-ɓɛlaɠaai kɛ daa túnwɔ̨n Polə kɔlɔ ɓa, ɉəɠə, diɛ di pɛlɛ ɲɔ̨n-gɛ-nuą mɛ̨i, di kɔ́lɔi yɛ pono, ɲįnɛ̨nŋaa diɛ həɠə daɠaa pulu. 13 Ɉuifə taɠaa di kɛi lɛa tɛɛ, diɛ ɲįnɛ̨nŋaa kpɛ nuą pulu. Di kɛ bɔ diɛ gɛ Jesus laa hu. Di kɛi kɛ ɲįnɛ̨nŋaai ti diɛ: «Jesus ŋɛ̨i Polə a kɛ mąą mɛ̨nį laa həli nuą diɛ, naa hu, ɲįnɛ̨n! 'Həɠə nui ŋɛ̨i pulu!» 14 Nuą ti kɛi mɛ̨nį kɛ, di kɛ a Ɉuifəɠaa di wɔ haláá laa həli mun gɛnɛ̨i ŋɛ̨i da kɛ mą: Skeva, non ɉinaa, di kɛ a nu mɛ̨iheelɛ. 15 Kɛlaa, ɲįnɛ̨n ti ə di woo ŋąapənə yɛ mą: «Ŋą́ Jesus kɔ́lɔn, nui ɓaa Polə, ŋį́ gɔlɔn. Kɛlaa, káá ŋɛ̨i, gbɛɛ nuą ɓaa a káá?» 16 Nui ŋɛ̨i ɲįnɛ̨n ə kɛ bulu, ə wolo nu mɛ̨ihveelɛi ti ɓa, ə di laa nɔ̨nwɔ̨ɓo kpɔ a vaŋą, di kulɔ ɲəi bɛlɛ́n a di kpuwulu, di mąą tee-teɛ. 17 Efɛsə nuą kəlee, da Ɉuifəɠaa, ə mą kɛ Grɛkəɠaa di mɛ̨nįi ti bələ mɛ̨n, di ɲɔw kpɔ kɛnɛ̨, diɛ gu Nąmu Jesus laa mąąwiɛ. 18 Nuą ti kɛ a laa na nuą, damąą di kɛi pa, mɛ̨nįi kpɔ daa gɛ, diɛ mo nu kpɔn ɉu. 19 Pə́nə́n gɛ nuą kpulu tamąą di kɛi pa a di wɔ pə́nə́n gɛ hɛɓɛ́ɠaa, diɛ gələn nu kəlee ɲɛ̨i ɓa. Ɉɛɓɛ́ɠaa ti di hɔ̨nwɔ̨ kwɛdɛnŋąą a pɛli kɛ kɛi yɛ: wali kwələ waa pow lɔɔli. 20 Bələ ɓə gu Ną́mu la woo hu ə kɛli kɛnɛ̨ la, vaŋą yɛ tɛ. Efɛsə nuą di hvaa kɛnɛ̨ ta pɛlɛ Polə ɓa 21 Mɛ̨nįɠaa ti tɛɛ pulu, Polə ə kɛ bɔ ə Masedoanə huɓɔ da Akaiə taa, yɛ li Ɉerusalɛmə. Ə mo yɛ diɛ: «Ŋą́ pa həlii la, hvo kɛli ŋį́ li Romə kpɛlimąn.» 22 Polə ə mąą kpɔnmąą ɓo nuą hveelɛ tɛɛ: Timote da Erastə, diɛ li Masedoanə lɔi hu. Kɛlaa, nwɛi, ə lɛɛ Asi lɔi hu ə yíi kuu ta wolo kɛ laa. 23 Nąąlɔwai, gu Ną́mu Jesus nwɔ pələi mąą mɛ̨nį ɓa, hvaa kɛnɛ̨ ə too nuą lɔwai. 24 Vaa ti kpala ə tɔɔ hɛni-pɛlimun da ɓa, diɛ kɛ naa ɓa: Demetriusə. Ə kɛli Artemisə hvɛli pɛlɛ́ɠaa mąąnįnįn bɛli a wali kwɛli. Gólói tii kɛ nuą di kɛli hɛn gɔw kpɛa-kpɛaa hɔlɔɓo ti ɉaalai. 25 Demetriusə ə nwɔ tínuą ɲąąkpɔn, da mɛlaa yiiɠaai di kɛ kóló kaa tanɔ̨n, yɛ diɛ: «Ną́nni! Ká kili kaa ɉu, káá, gu yəi hɛn gɔw a kulɔ gólói ŋɛ̨i hu; 26 ɛlɛɛ yaan, ya ka tii ka káá nąą kaai, awala kɛ tii, káá bələ mɛ̨n, hvo lɔ a Efɛsə yaa tɔ̨nɔ̨, kɛlaa Asi lɔi nąą kəlee, Polə aa pili nu kpulu kɛnɛ̨ɛ̨ wəlii a nwɔ kalan nwooi, yai a kɛ la diɛ: ‹Ɲáláɠaai gwa kɛ di pɛlii a gu yee, di hvo a yáláɠaa.› 27 Gu wɔ kólói ŋɛ̨i lɔ hvəə diɛ di pa tɛɠɛɓo ɉu, kɛlaa ɲálá nɛ̨ɛ̨nu kɛnɛ̨i Artemisə hvɛli pɛlɛ́ yaa kpɛli mąn, yɛ ə pa lɛɛ a vowolo, a ɲálá nɛ̨ɛ̨nui ŋɛ̨i, yai Asi lɔi kəlee da yɛnɛ̨ɛ̨ piliɛ geemɛ̨i da kɛ mąąwiɛi, mɛlɛ hva kɛa lɛɛ mą.» 28 Ɓɛlɔwai mɛlaa di nwooɠaai ti mɛ̨n na, di líí ə holi kpɔ kɛnɛ̨, diɛ tomą, diɛ kɛ: «Artemisə ɓə gɛnɛ̨ɛ̨ Efɛsə nuą ɲɛ̨i ɓa.» 29 Gɛɛ tii, daa kəlee ə kɛ lɔ ɉuwu-ɉuwu, nuą di wɛan, di li a di kpulu ɓɛi di kɛli ɲąąkpɔn gɛ laa a bɔlɔ-pɔlɔ, di Gaiusə da Aristarkə hon a yee tɛɛ mąą laa, di li a diɛ, nu hveelɛi ti di kɛ a Masedoanə lɔi hu nuą, ɛlɛɛ, da Polə ni ɓə kɛ ɉiɛ hu. 30 Polə ə kɛ kpɔ bɔ ə li ɲąąkpɔn ti hu, kɛlaa, laa na nuą di hvo hvaa mą. 31 Asi lɔi hu nuą taɠaa a Polə mɛlaa, diɛ, di hvo nɛɛ laa, hvo nwun nɛ kpɛli gɛɛnąą ti ɓa. 32 Nuą tomą woo hvo kɛ di la tanɔ̨n, nąą ə kɛ lɔ ɉuwu-ɉuw, ɛlɛɛ, tamąą di kɛ laa, di hvo mąn kɛ di ɲąąkpɔn nwun gɔlɔn. 33 Gbɔn tii hu nuą taɠaa, di mɛ̨nįi ti hukulɔ Alɛsandrə laamun da ɓa, yai kɛ Ɉuifəɠaa daa dɔɔ di ɲɛ̨itɔwɔ. Alɛsandrə ə ɲee tɛ, yɛ kɛ ə nwoo hukulɔ nu kpɔn ɲɛ̨i ɓa. 34 Kɛlaa, yii kɛa di gɔlɔn diɛ yaa kpɛli gaa a Ɉuifə, nu kpului ti di tomą kpɔ a ɉu kwɛa, lɛɛlɛ hveelɛ yee mu, diɛ mą: «Artemisə ɓə gɛnɛ̨ɛ̨ Efɛsə nuą ɲɛ̨i ɓa.» 35 Yili pulu, daa hɛɓɛ́ kɛ mun mə ɲee ə pɛli nu kpulu ɲąą yɛɛi, yɛ diɛ: «Efɛsə nuą! Nu ta kaa mɔ̨ɔ̨ laa, kili hvo ɉu yɛ kɛ, Efɛsə taa kaa a Artemisə kɛnɛ̨ɛ̨, da mąąnįnįn kulɔ yələi pələ yɛ too, di wɔɔ taa mąąhəɠɛɛ? 36 Nu ta hva pɛli yili ɉɛa tooi, yili ɓa, mąąnɛ̨ɛ̨ ka ka laa pilɛ, ka hvo mɛ̨nį ta kɛ lɔ ti a ɓowo pələ. 37 Nuąi ŋɛ̨i kaa di hon kaa pa a diɛ ɓɛ, di hvo gu wɔ yálá nɛ̨ɛ̨nu Artemisə ɓɛɠɛ too li, a di túwɔ́ pələ, awala kɛ tii a di hvaa woo. 38 Demetriusə da ɲɛlɛkɛ nuąi da diɛni di tɔɔi, hvaa a kɛ di lɔwai da nu ta, mɛ̨nįɓo yələɠaa kaa laa, nɔi ɲąąwooɓo nuą di ɓo ɓɛ; vaa kɛ nuą 'də li kani giti haɠa ɓa. 39 Akɛ mɛ̨nįɓo takpɛliɠaa da kɛ laa, yiiɠaa ɲɛ̨i kaa pai kulɔi ɲąąkpɔn gɛnɛ̨ɛ̨ hu. 40 Mɛ̨nį ŋɛ̨i háákələi aa kɛ, a pɛli ə gu kɛ yɛ kwɛli tee nuą. Ɲąąkpɔn ŋɛ̨i too nwun neelee hvo mą yii kwa pɛli ku ɉukulɔ ə kɛ a viɛlaɓoɔ.» 41 Yii kɛa ə kpɛɛ a nwooɠaai ti ɓoɔ, yɛ nuą diɛ; 'ka taɠa ɓɛ! |