Gɛlaɠaa 18 - Yálá laawoo hɛɓɛ (dc)

Polə ə nu tamąą hɔlɔɓo Korɛntə

¹ Həɠəi Polə ə mo Atɛnə daai, Korɛntə daai ɓə ə li laa.

² Niɛ, ə kwiɛn a Ɉuifə ta, diɛ kɛ mą: Akilasə; ə kɛ a Pɔn lɔi hu mun. Ə pa lɔ tii a nįnɛ̨, da nɛ̨ą Prisilə daa həɠə kɛ Itali lɔi hu, mąąhɔlɔɓo, Klodə aa kɛ mo, yɛ: Ɉuifəɠaa kəlee di kulɔ Romə daai; da Polə ni di di yee lɔ kee hu.

³ Ɛlɛɛ, da Polə ni di kɛ kóló ə kɛ tanɔ̨n, di kɛ a həɠə-pɛlɛ́ pala nuą. Polə ə lɛɛ yiliɠaai pɔɔli da yaa diɛ kólo kɛ gee ɓa.

⁴ Hvįįtɔɔ yələ həli pələ tɛitɛi, Polə ɓə pələ ə kɛ na Yálá hvɛli pɛlɛ́ mu; yɛ tɔɔ a nwąnąi, yɛ, Ɉuifəɠaa da Grɛkəɠaa di kiliŋą pono pələ kwɛli.

⁵ Kɛlaa, yii kɛa Silasə da Timote di həɠə la Masedoanə lɔi hu di pa, Polə nwɛi, ɲee ə kɛ lɔ Yálá lawoo laa həli kóló ɓa, yɛ nɛ tii Ɉuifəɠaa diɛ, yɛ kɛ: Jesus ɓə a Nwun mąąɓomun Yálá ə naakwɛlanmo.

⁶ Di tɔɔ pələ na, diɛ nalan, Polə ə nwɔ həɠəi hu kpɛŋɛ̨n diɛ, yɛ diɛ: «Ká ɲąmą wulu a lɛɛ ká nwuɔ̨, nwulu hva lɛɛ nwúɔ; ɛlɛɛ, ə həɠə kɛa yiihu ɓa, nuąi di hvo a Ɉuifəɠaa, diɛ ɓə gáá lii di pɔ pələ.»

⁷ Ɉəɠɛɛ laa, ə li hulɔnu ta pɔɔli diɛ kɛ mą: Titiusə Ɉustusə yili ə kɛ a Yálá mąąwiɛmun, nwɔ pɛlɛ́i ə kɛ Yálá hvɛli pɛlɛ́ kwɛlɛ.

⁸ Krispusə, yai a Yálá hvɛli pɛlɛ́ nwun nąmu, ə laa gu Ną́mu Jesus la da ɲee bɛlɛ́n nuą, ɛlɛɛ, Korɛntə daai nuą tamąą, diɛi kɛi di wəli tɔɔ Polə woo ɓa, di laa Jesus la, di di mąąwaa.

⁹ Kwii hɛ̨ą ta, Polə ə hįi kaa, gu Ną́mu yɛ mą: «'Hvó ɲɔw, 'kɛ́ lɔ naa həlii, 'hvó ə́ laa pilɛ,

¹⁰ gáá ə́ pulu, nu ta hva pɛli ɲee pɛlɛi yɛ́, yɛ ə́ yagalanmo. Hvo gaai, nu kpulu kɛnɛ̨ɛ̨ kaa daa ŋɛ̨i hu a nwɔ́ɔ́.»

¹¹ Polə ə kwɛlan dɔ̨nɔ̨ ɲąnįn mɛ̨ida kɛ Korɛntə daai, yɛ nuą kalan a Yálá lawoo.

Di li a Polə kiti haɠa ɓa Galiɔn lii la

¹² Galiɔn nwɔ ɲąąwooɓo yələ, Akaiə lɔi hu, Ɉuifəɠaa di wɔɔ yowolaa ə hvilɛn Polə ɓa, di ɉon di li la gití haɠa ɓa.

¹³ Diɛ kɛ diɛ: «Ɉulɔnui ŋɛ̨i, kaa nuą ɲąątɔɔi a kwɛli hvilɛn bələ Yálá ɓa huwu takpɛli ɓa, yii hvo a ku yíí pələ.»

¹⁴ Polə ə kɛli kpɔlɔɔ pa hvaai, Galiɔn yɛ Ɉuifəɠaa woo pulu pənə, yɛ kɛ diɛ: «Káái a Ɉuifəɠaa, ə li kɛ, lɔi mąą tɔn da ɓə nui ŋɛ̨i ə gala, a wala kɛ ti, túwɔ́ pələ ɲɔn da ɓə ə gulɔ, ŋį́ li kɛ nwə́li tɔɔ ká woo ɓa, yɛ bələi mąąnɛ̨ɛ̨ ŋą́ gɛ la.

¹⁵ Kɛlaa, yii ká wɔɔ hvaai hvilɛnŋąąi kalan mɛ̨nį ɓa, da laaɠaa, ɛlɛɛ, da ká yíi pələ mąą tɔn mɛ̨nį, ká mąą mɛ̨nį li, ka li kaa kpinįi ka ɲɛ̨i kulɔ, nwɛ́i və́ bɔ və́ kɛ a mɛ̨nį huwui tii ɓomun.»

¹⁶ Ə di kpɛ gití pɛlɛ́ mu.

¹⁷ Nąąlɔwai, di kəlee di wolo Sostɛnə ɓa, yai a Yálá hvɛli pɛlɛ́ nwun nąmu, di ɉu gɛlɛ laa gití pɛlɛ́ laaləi. Galiɔn ɲɛ̨i hvo mąn kɛ nąą bələ.

Polə ə li nwɔ̨nɔ̨ kalan ɉiɛ ta ɓa

¹⁸ Polə ə yíi kuu ta wolo kɛ nwɔ̨nɔ̨ Korɛntə daai, yili pulu, ə yələwala too galan nɛa diɛ, ə tɛ kələn da hu yɛ li Siri lɔi hu, yaa, Prisilə ə lɛɛ da Akilasə. Ə mo di nwun gɛlaan Sankre daai, gbala ə tɔɔ, aa ta kɛ yili laakwɛlanmo Yálá ɓa

¹⁹ Di li Efɛsə daai, nąą ɓə Polə da ɓɛlaa di di ɓɛlaɓo laa. Nwɛi, ə li Yálá hvɛli pɛlɛ́ mu, yɛ pə́lə́ ɓo laa Ɉuifəɠaa diɛ.

²⁰ Yiliɠaai diɛ mą: Gu yíi kuu ta wolo kɛ ɓɛ gu kee ɓa, Polə hvo hvaa mą.

²¹ Kɛlaa ə ɲələ wala too diɛ a nwoo ŋɛ̨i, yɛ diɛ: «Gáá pai pənəi ŋį́ pa ká pɔɔli, a yələ takpɛli, akɛ Yálá a hvaa mą.» Polə ə tɛ gələn ɉu, ə həɠə Efɛsə daai.

²² Ə kulɔ gələn ɉu Sesare daai, ə li ə gbɔn túwɔ́ɓo. Yili pulu, ə yɛɛ Antiɔsə daai.

²³ Ə yíi kuu ta wolo kɛ laa, yili pulu, ə tɛɛ yɛ li; ə tɛɛ kpɔ Galatə lɔi da Frizi lɔi hu, yɛ galan nɛa kəlee hvaŋąlɔ.

Apɔlɔsə ə li Efɛsə da Korɛntə

²⁴ Ɉuifə mun da, diɛ kɛ naa ɓaa Apɔlɔsə, gaa taa ɓaa Alɛsandri; aa kɛ pa Efɛsə daai. Mɛ̨nį kɔlɔnmun gɛnɛ̨ ta li kɛ, ə ɓo a Yálá lawoo hɛɓɛ́ kɔ́lɔnŋąą kpɔ kpąąn.

²⁵ Daa kɛ mąąkwɛli gu Ną́mu nwɔ pə́lə́i ɓa, ɛlɛɛ, kalan mɛ̨nį kɛ pələ níí hu, bələi mąn Ɉaan nwɔ Mąąwaa mɛ̨nį lɔ ɓə ə kɛ a gɔlɔnŋąą la, ə kɛli nuą mąąkwɛli, yɛ Jesus mąą mɛ̨nį hukulɔ kpɔ a ɉąŋąnŋąą.

²⁶ Ə kɛli nuą kalan gwəi tɔ̨nɔ̨ mɛ̨i Yálá hvɛli pɛlɛ́ mu. Ɓɛlɔwai Prisilə da Akilasə di nwoo mɛ̨n na, di dəli, da diɛni di hee, di Yálá nwɔ pələi mąą mɛ̨nį hukulɔ kpɔ ma tɛhvɛ-tɛhvɛ.

²⁷ Yɛ bələi ə naala gwəi, yɛ kɛ, ə li Akaiə, gu nąn nonnii di hvaa nwoo ti ɓa, di hɛɓɛ́ tɛɛ nąą kalan nɛa diɛ, diɛ kɛ diɛ, di di yee Apɔlɔsə mu a nɛlɛɛ. Ɉəliɛ laa, ə kpɔnmąą tɛɛ kpɔ nąą kalan nɛa pɔ kɛnɛ̨, Yálá ŋą lúwɔ́ háálai.

²⁸ Mąąhɔlɔɓo, nwɔ mɛ̨nį hukpɛ pələ, ə kɛli Ɉuifəɠaa laa pɛlɛ mą nu kəlee ɲɛ̨i ɓa; yɛ nɛ diɛ a Yálá lawoo hɛɓɛ́ hu wooɠaa yɛ kɛ: Jesus kaa a nwun mąąɓomun Yálá ə naakwɛlanmo.