Gɛlaɠaa 17 - Yálá laawoo hɛɓɛ (dc)Polə da Silasə də li Tesalonikə 1 Polə da Silasə di tɛɛ Amfipolisə daai, da Apoloni daai, di həli Tesalonikə ɓɛi Yálá hvɛli pɛlɛ́ ta ə kɛ laa. 2 Yɛ bələi Polə a gɛ la a bɔlɔ, ə li ə Ɉuifəɠaa kaa di wɔ Yálá hvɛli pɛlɛ́ mu. Hvįįtɔɔ yələ haaɓa yee mu, lɔ ti gee la, ə kɛli pələ ɓo diɛ, yɛ kulɔ Yálá lawoo hɛɓɛ́ hu. 3 Ə gɔwɔ hvilɛn Yálá laawoo hɛɓɛ́ mɛ̨i, yɛ ɉukulɔ diɛ, yɛ diɛ: Mąąnɛ̨ɛ̨ kɛ Nwun mąąɓomun Yálá ə naakwɛlanmo, ə mɔ̨nɔ̨ mįi, ə haa, ə pənə ə nwun ə kulɔ haa nuą lɔwai, ɛlɛɛ, ə kɛli kɛ diɛ, nwun mąąɓomun tii ɓaa a Jesus ŋɛ̨i gáá mąą mɛ̨nį ɓoi káá. 4 Ɉuifə taɠaa di Polə da Silasə di nwoo kaa a tɛ̨ą, ə pɛlɛ la Grɛkəɠaa tamąą diɛ, diɛi kɛi kwɛli hvilɛn Yálá ɓa, da nɛ̨ąą tamąą, a laa-nąmįną kpɛa-kpɛaa. 5 Kɛlaa, Ɉuifəɠaa di tolo kulɔ a diɛ, di nu-kpoloonŋaa yɛɠɛ daa pɔ, di di ɲąąkpɔn a di kpulu; di daa kɛ lɔ ɉuwu-ɉuwu. Di li Ɉasɔn yəi bɛlɛ́ laaləi, diɛ Polə da Silasə di kwɛli, diɛ kɛ di li a diɛ kiti haɠa ɓa daa lonnii lii la. 6 Lii di mo di hvo di kaa laa, di Ɉasɔn hon da galan nɛa taɠaa, di pa a diɛ daa nąmįną lííla. Diɛ tomą, diɛ kɛ: «Nuą ŋɛ̨i daa lɔi kəlee kulɔ bihɛi, diɛ ka ɓɛ yiihu. 7 Ɉasɔn ɓə kɛ a di nwɛ̨ą nąmu. Nuą kpɔ ŋɛ̨i ka káá di kaai, gəlee túwɔ́ pələ kaa tanɔ̨n, di hvo túwɔ́i yɛ bələi Romə lɔi nwun nąmu nwɔ tɔ́n kaa la, mąąhɔlɔɓo, di kaa kɛi diɛ: Tɔɔmun dakpɛli kaa laa diɛ kɛ mą: Jesus.» 8 Di tomą wooɠaa ti di daa lonnii da daa nąmįną kwəi pili diɛ. 9 Di tɔn bili Ɉasɔn da galan nɛa yiiɠaa ti diɛ, di gbɛɛ, gɛɛ di hvo ɓo diɛ. Bere nuą di di yee hee Polə da Silasə di mu 10 Yii kɛa kpinį ə pɛlɛ, kalan nɛa di Polə da Silasə di tɔɔ bələi diɛ li Bere, di həliɛ laai, də li Ɉuifəɠaa di wɔ Yálá hvɛli pɛlɛ́ mu. 11 Yiliɠaa lii lɛlɛɛi kɛ di kwəi, ə tɛɛ Tesalonikə Ɉuifəɠaa diɛ. Di di yee hee Yálá lawoo mu a di kwəi kwəlɛɛ, ɛlɛɛ, hvóló tɛitɛi yee mu, di kɛli Yálá lawoo hɛɓɛ́ mąą kpɛɛ, akɛ, mɛ̨nįi di kaa nɛi diɛ, gaa kpɔ ti a tɛ̨ą. 12 Di tamąą di laa Yálá la, ə mą kɛ Grɛkə nɛ̨ąą kpɛa-kpɛaa da hinąą, di kpulu kɛnɛ̨. 13 Kɛlaa, yii lɔ Tesalonikə Ɉuifəɠaa di bələ mɛ̨n diɛ Polə kaa nwɔ̨nɔ̨ Yálá lawoo laa həli Bere, di pa laa, nuą muhəɠə mɛ̨nį ɓa, da di hu pu mɛ̨nį ɓa diɛ. 14 Galan nɛa di nɛɛ mą di mo Polə ɓa, ə li gboloyá kwɛlɛ pələ; Silasə da Timote di lɛɛ laa. 15 Nuą ti li Polə tɔɔi bələi, da diɛni də li kpɔ di həli Atɛnə daai. Yili pulu, di yali di pulu, di pa a Polə nwɔ wɛlɛɛ Silasə da Timote di pɔ, ə gɛ, yiliɠaai di laŋąn mą, a mąąhulaa. Polə da Atɛnə mɛ̨nį kɔlɔn nuą 16 Ɓɛlɔwai Polə ə kɛi Silasə da Timote di mąąkpɔn na Atɛnə daai, nii ə kələn gwəi, daai tii kaa ə mo naahvɛɛ a haliɠaa. 17 Ə kɛli mɛ̨nįɠaa ɓo Ɉuifəɠaa, da Grɛkəɠaai kɛi kwɛli hvilɛn Yálá ɓa, diɛ, di wɔ Yálá hvɛli pɛlɛ́i mu; hvoló tɛitɛi yee mu, ə kɛi da ɓo nuąi pa laa diɛ. 18 Mɛ̨nį kɔlɔn nuą di kɛ laa, diɛ ɓaa: Epikuri da Stoisi di wɔ kalan nɛa da Polə ni di kɛli lono kɛ, daɠaa di kɛli, kɛ diɛ: Ɛ̨i, naanɛ̨ɛ̨mąąmun ŋɛ̨i, yɛ lə? Daɠaa diɛ kɛ: Gaa kpɔ kiɛ yɛ yálá takpɛliɠaa mąą mɛ̨nį laa həli mun. Hvo gaai, Jesus mąą mɛ̨nį da nwun mɛ̨nį ɓə Polə ə kɛi naa həli. 19 Di Polə hon də li la nɔi ɲąąwooɓo nuą liila diɛ mą: «Galan nįnɛ̨i ŋɛ̨i ə́ kaa gɛi, yá pɛli ɉukulaa lɛi kuɔ, ku gaai? 20 Mąąhɔlɔɓo, ə́ kaa ku wəlii woo ɲąąnwąnąi a nwɛ̨ą mɛ̨nįɠaa, ɛlɛɛ, ku kaa kpɔ bɔ, ku mukulaa kɔlɔn.» 21 A tɛ̨ą, Atɛnə nuą da nwɛ̨ąąi kɛ daa hee laa, di wɔ mąą tíi lɔɓa kɛ, a mɛ̨nį nįnɛ̨ hukulaa, da di wəli tɔɔ mɛ̨nį nįnɛ̨ ɓa. 22 Polə ə muhəɠə ə tɔɔ nwundɔɔ kɛɛnąą, di lɔwai, yɛ diɛ: «Atɛnə nuą, ká kaai gáá moi, ká káá a Yálá kwɛli nuą pələ pɛlɛ-pɛlɛɛ kəlee hu, káá ka yee ɓɔ ɉu. 23 Gɛ́ɛ́ tɛɛi ká wɔɔ pələɠaai pɔ, ŋą́ haláá kulɔi tamąą kaa, ɛlɛɛ, ŋą́ haláá kulɔi ta kaa, bɛ̨ɛ̨ mą, diɛ mą: Yálái di hvo gɔlɔn, gɔi ka! Ɉɛn ka kwɛli hvilɛn mą, ká hvo gɔlɔn, ya ɓə ŋą́ pa nɛi káá. 24 Yálái yɛnɛ̨ɛ̨ bili-bili geemɛ̨i kəlee pɛli, da ɉu hɛnŋaa, yai a yələkɔlɔn da lɔi di Nąmu, hva hee pɛlɛ́i nu kan a dɔɔ a ɲee mu. 25 Ɛlɛɛ, di hva nwɔ̨nɔ̨ mąą mɛ̨nį ɲɛ̨i kulɔ a nu kan ɲee, yɛ hɛn da mąąkpaan a kɛ mą, yá pa, yaa tii ɓə a: hɛn nɔpee gəlee tɛɛ nu pɔ, kɛ-yɛnɛ̨ɛ̨, ə mą kɛ nu nɔ̨ɔ̨. 26 Ə nu huwu kəlee kulɔ nu tɔ̨nɔ̨ hu, diɛ hee lɔi mɛ̨i nąą kəlee. Ə nuąi ti di wɔ yɛnɛ̨ɛ̨ ɲɛ̨nnaa, ə di heeiɠaa ɲɛ̨nnaa. 27 Ə gɛ ti, diɛ pɛli Yálá kwɛlii; gbəli hu kiɛ, da pɛli kɛ di lɛɛ di yee pɛlɛi ɓɛ-ɓɛ ə lɛɛ ɉú di kwiɛn na. Yá pa, yaa ti, a tɛ̨ą, mąą hvo kwɛa li gu ta lɔpee ɓa. 28 Hvo gaai: Yaa tii ɉu ɓə, gwa yɛnɛ̨ɛ̨ kɛ laa, guɔ gu tumun, guɔ nɔ̨ɔ̨; yɛ bələi ka wɔ mɛ̨nį kɔ́lɔn nuą taɠaa di bɛ̨ɛ̨ la, diɛ kɛ: Gu kaa a ɉuwu ta.» 29 «Yii kani gu kaa a Yálá huwu, mąą hvo nɛ̨ɛ̨li, gu hvo kɛ diɛ, Yálá kɛ pələ kaa yɛ hɛni, yɛ wali kwɛli, a wala kɛ ti, yɛ kwɛni, a hɛn da ɉaɠa a yɛlɛ́, a nu kanŋaa di wɔɔ kilikɛɲəi laa. 30 Kɛlaa, ɓɛlɔwai ti nuą kiliŋą hvo kɛ pono li la, Yálá hvo gili lɛɛ li yili hu, yiihu kɛa, gaa moi nu kanŋaa diɛ, yɛ nu kəlee, ɓɛi lɔpee nąą kəlee, di di hɔn mąą pənə. 31 Hvo gaai, aa kuu ta hee, yɛ gaa pai yɛnɛ̨ɛ̨ nuą kəlee kiti teei a ɉaŋąa, a Nui ə ɉəɠə ɉu. Ə nɛ nu kəlee ɓa, yɛ mɛ̨nįi tii hvo pai ɉəɠəi mą, a nui ə nwun, ə gulɔ haa nuą lɔwai.» 32 Yii lɔ Polə ə nu nwun mɛ̨nį yɛ kulɔ haaɓɛlaa lɔwai mɛ̨nį ɓo, di taɠaa di kɛli yɛlɛ mą; daɠaa diɛ kɛ: «Ku kaa pai ku wəli tɔɔi ə́ woo ɓa a yələ takpɛli.» 33 Yili ɓə gɛ Polə ə di lɛɛ laa, ə li. 34 Kɛlaa, ə mą kɛ ti, nu taɠaa di hvilɛn bulu, di kɛ a laa na nuą. Denisə ə kɛ a di ta, ə kɛ a giti teemun da, ɛlɛɛ, nɛ̨ɛ̨nu ta diɛ kɛ mą: Damarisə, da nu takpɛliɠaa. |