Gɛlaɠaa 14 - Yálá laawoo hɛɓɛ (dc)

Polə da Barnabasə di kɛ Ikoniumə

¹ Ikoniumə daai kpɛlimąn, di nwɛlɛɛ tanɔ̨n ti laa həli lɔ laa; Polə da Barnabasə di lɔ Yálá hvɛli pɛlɛ́ɠaa mu, bələ ɓo pələi ti kɛ di yəi, Ɉuifəɠaa da nuąi di hvo a Ɉuifəɠaa, di laa Yálá la.

² Kɛlaa, Ɉuifə yiiɠaa lɔwai, di hvo gɛ di hvo laa di woo la, di nu takpɛliɠaa ɲąątɛ a yowolaa gu nąn nonnii ti diɛ.

³ Polə da Barnabasə di yíikuu ta wolo kɛ laa, di kilitɔɔi kɛ gu Nąmu ɓa, gu Nąmu kpinįi ə kɛli tɔɔ, nwɔ nɛ̨ɛ̨laai mąą kalan di kɛli kɛ bulu, a gwɛlɛɛn mɛ̨nįɠaa da kpalo mɛ̨nį tamąąi ə kɛli mąą laa tɛɛ di pɔ, diɛ gɛ.

⁴ Daa ə mɛlaɓo ɉu hveelɛ, bələ tɔ̨nɔ̨ tɔɔ Ɉuifəɠaa pulu, bələ tɔ̨nɔ̨ tɔɔ gɛlaɠaa pulu.

⁵ Ɉuifəɠaa da nuąi di hvo kɛ a Ɉuifəɠaa da di nwun nąmįną di naa di kwəi diɛ kɛ di bili nwɛa mɛ̨nį hu ɛlɛɛ, di gɛlaɠaa paa a kwɛnį.

⁶ Yiliɠaa di gbaɠala kaa, di di mąąkilɛ Likaoni taaɠaa hu: Listrə da Dɛrbe, da nąą kwɛlɛ taaɠaa.

⁷ Lii nwɔ̨nɔ̨ di mo laa, di kɛli nwəlɛɛ lɛlɛɛ laa həli laa.

Polə da Barnabasə di nu ta kɔlɔi pono Listrə daai

⁸ Hulɔnu ta ə kɛ Listrə, hva pɛli kɛ tɔɔi gɔwɔ mɛ̨i, di gaa lɔ gbɛlɛɠɛlɛŋąa, hvo ta kɛ pɛli li hiɛi.

⁹ Ɉulɔnui ti ə nwəli tɔɔ kpɔ Polə woo ɓa a nɛlɛ. Polə ə gaa yɛ diɛ laa na laa kaa ɲei, yɛ pɛli gɔlɔi ponoi.

¹⁰ Polə ə mo mą a nwoo kɛnɛ̨ yɛ mą: «'Haŋą ə́ tɔɔ ə́ kɔ́wɔ mɛ̨i!» Ɉulɔnui ti ə muhəɠə, ə teen ə hvilɛn, yɛ hiɛ.

¹¹ Mɛ̨nį ti Polə ə gɛ, gaai nu kpulu ə mo, di tomą kpɔ Likaoni woo hu, diɛ mą: «Yáláɠaa daa nu ɲɛ̨ilai ɉəɠə, daa yɛɛ ku lɔwai!»

¹² Di Barnabasə laa hee a Ɉeusə, di Polə laa hee a Hɛrmɛsə, hvo gaai, ya ɓə bələ ə kɛ na.

¹³ Ɉeusə mąąwiɛ pɛlɛ́ a kɛ daa kpala, nwɔ haláá laa həli mun ə pa a niŋɛ̨ hilɛɠaa di mąąyiliɛ a wulu powa lɛlɛɛɠaa, daa kpala; da daa nuą di woo ə laa mą, diɛ kɛ di halaa kulɔ la gɛlaɠaa diɛ.

¹⁴ Nąą kaai gɛlaɠaa Barnabasə da Polə di mo, di di kwąną həɠəɠaa ɓɛla, di kpuluun də li nu kpulu hu, diɛ tomą, diɛ kɛ diɛ:

¹⁵ «Kué! Gbɛɛ nuą ɓəi! Lə ɓə ŋɛ̨i ka káá gɛi? Nuą lɔ ɓaa a kuɔ, ku kɛ pələ ə ɓo lɔ yɛ káá! Nwɛlɛɛ lɛlɛɛi ku pa moi káái, ya ɓaa, 'ká ká yee kulɔ mowo mɛ̨nįɠaa ŋɛ̨i hu, ka ká ɲɛ̨i tínɛ̨n Yálá hvulúmąą pɔ pələ, yai yələkɔlɔn, lɔi da gboloyá da di hu hɛnŋąa kəlee pɛli.

¹⁶ Tɔwɔ-tɔwɔ yələ, Yálá ə nuą lɛɛ laa, diɛ ɉon a di liiɓa pələ.

¹⁷ Ə mą kɛ ti, hvo kɛli kpɛla nwɔ mɛ̨inɛ̨ɛ̨ɠaa kɛi diɛ, hvo gaai, ə kɛli túlɔ́ kulɔ yələi yɛ pu ka mɛ̨i, yɛ nɔi ɲąąnɛ̨ɛ̨, əgɛ ɉihɛnŋaa diɛ lɛlɛ, yɛ ká pilɛ a kɔ̨nɔ̨n da kwəinɛ̨ɛ̨.»

¹⁸ Kɛlaa, bələi mąn Polə da Barnabasə di kɛli nwooɠaa ti ɓo la diɛ, di kili həɠə laa ə wala ɉalaa kulɔ mɛ̨nį pɔ.

¹⁹ Nąąlɔwai Ɉuifəɠaa di həɠə Antiɔsə da Ikoniumə, di nuą ɲąąhee diɛ, di pɛlɛ Polə ɓa, diɛ ɉɔɔ a kwɛni; di lɛɛ ɉɔɔi di nɛɠɛ həɠə di kulɔ la daa kpala, ə kɛ di kwəi, aa haa.

²⁰ Kɛlaa, pai galan nɛa di mo di mąątínɛ̨n, ə muhəɠə da diɛni di tɛ taai. Mąą yələ laa ɓoɔ, da Barnabasə di tɛɛ diɛ li Dɛrbe.

Polə da Barnabasə di pənə di li Antiɔsə

²¹ Polə da Barnabasə di nwəlɛɛ lɛlɛɛ laa həli Dɛrbe, di kalan nɛa tamąą hɔlɔɓo laa. Di yali di pulu, di tɛɛ a Listrə pələ, Ikoniumə da Antiɔsə.

²² Di kɛli laa na nuąi ti kɛ laa, di hvaŋąlɔ gɛɛnąąɠaa ti ɓa, diɛ di liɛwooɓo di kanąn mɛ̨nį ɓa laa na pələ ɓa. Di kɛli kɛ diɛ: «Hvo kɛli gu mɔ̨nɔ̨ tamąą mįi, guɔ pɛli lɔi Yálá ŋą tɔɔlaai hu.»

²³ Galan gbɔn tɛitɛi hu, di di yee lɛ nu taɠaa diɛ, a kalanɉonŋaa; di kɛli Yálá hvɛli, diɛ hin nɔ, di di kalihva ɓo gu Ną́mu ɓa, a Ɲálái ti di di yee hee mąą mɛ̨nį mui.

²⁴ Di Pisidi lɔi hu ɓɔ, də li Pamfili lɔi hu.

²⁵ Di Yálá lawoo laa həli Pɛrsə, diɛ li Atalia daai.

²⁶ Di həɠə laa diɛ li Antiɔsə kələn ɉu, ɓɛi di ɉiɛ kɔwɔ tɔɔ laa, ɓɛi di di kalihva ɓo laa Yálá nwɔ mɛ̨inɛ̨ɛ̨ ɓa gólói ti kɛ mąą mɛ̨nį ɓa.

²⁷ Həlii di mo Antiɔsə, di gbɔn ɉu nuą ɲąąkpɔn, yii kpɔ Yálá ə gɛ di yee hu, pələi nwɔ̨nɔ̨ ə pələ laa ɓo la huwu takpɛliɠaa tɔwɔ, əgə di laa na laa hɔlɔɓo, di yili kəlee hukulɔ diɛ.

²⁸ Da laa na nuą di yíikuu tawolo kɛ laa di kee ɓa.