Gɛlaɠaa 13 - Yálá laawoo hɛɓɛ (dc)

Di Barnabasə da Solə di tɔɔ hiɛ ɓa

¹ Gbɔn kɛ Antiɔsə daai, Yálá kwəi mɛ̨nį hukulɔ nuą di kɛ ɉu da mąąkwɛlikɛ-nuą. Diɛ ɓaa: Barnabasə, Simeɔn (yai da kɛ naa mɛ̨i hee ɓaa: Hulɔn-dɛɠi), Lusiusə Sirɛnə mun, Manaɛn, yai da Herodə nɔi-nwun nąmu di di lɛapɛlɛɛ pə́lə́ kɛ gee ɓa, da Solə.

² Yələ ta, ɓɛlɔwai di kɛi kwɛli hvilɛn na Yálá ɓa, diɛ hin nɔ, Kili-Mąąhəɠɛɛ ə di kilaa pono yɛ diɛ: «'Ká Barnabasə da Solə di tɛɛ bɔ́, gáá di tɔɔi kólo ta ɓa.»

³ Nąąlɔwai, yii kɛa di kpɛɛ a hin nɔ da Yálá hvɛliɛ, di di yee pɛlɛ di mɛ̨i, di di tɔɔ bələi.

Barnabasə da Solə də li Siprə

⁴ Yii kɛa Barnabasə da Solə di gaa diɛ Kili-Mąąhəɠɛɛ aa di tɔɔ hiɛ ɓa, də li Seleusi, nąą ɓə di hee laa gələn ɉu, diɛ li Siprə.

⁵ Di həliɛ Salaminə, də li Yálá hvɛli pɛlɛ́ɠaa mu diɛ Yálá lawoo laa həli diɛ. Ɉaan-Markə ə kɛ di pɔ, yɛ kpɔnmąą tɛɛ di pɔ.

⁶ Di ɲá hąąi lɔi hu ɓɔ, di həli Pafɔsə. Di pənəngɛmun da kaa laa, diɛ kɛ mą Barə-Ɉesu, Ɉuifə li kɛ, ə kɛli gbɔwɔ kɛ yɛ Yálá kwəi mɛ̨nį hukulɔ mun.

⁷ Nɔi nwun nąmu, Sɛrziusə Polusə ə kɛ a kilimąą mun. Ya ɓə Barnabasə da Solə di tə li, ə kɛ bɔ ə Yálá lawoo mɛ̨n.

⁸ Kɛlaa, Elimasə, pənəngɛmun. Hvó gaai, naa tii mukulaa ka ti. Ə kɛ bɔ ə tɔɔ di la, ə kpɛ̨ɲɛ̨n nɔi nwun nąmu ŋą laa na laa tɔwɔ.

⁹ Kɛlaa, Solə, yai naa ɓaa kɛa a: Polə, Yálá ə gili ɲą pono, ə ɲɛ̨i hee kpɔ Elimasə ɓa hįį, yɛ mą:

¹⁰ Hulɔnu yɛ́ ɓə! Yɛ́i ə́ laahvɛɛ a gbąną-gbąną huwu kəlee da nwąnąlɔɔ, ə́ nąnį lon tii, tələnmolaa ɲowo kɛnɛ̨, hvó mɔ̨ɔ̨ pai kpɛlai ku Ną́mu Yálá nwɔ pələ haŋąai hukpinįn ɉi, a bələ haŋąnŋąąi ti?

¹¹ Yiihu kɛa, Ną́mu Yálá yee kaa ə́ mɛ̨i, ə́ ɲɛ̨i pu hiɛ ka, ɛlɛɛ, yíikuu hveelɛ yee mu, hvó kɛa pai hvóló kaai. Ɲąąɓa, Elimasə ɲɛ̨i ə nɛɛmą ə pu; yɛ tínɛ̨n, yɛ nu kwɛli mą, əgɛ, ə dənən dɔɔ.

¹² Yii kɛa nɔi nwun nąmu ə yili kaa la, ə laa Yálá la. Gu Ną́mu Jesus mąą kalan di kɛli gɛ, yili ə nii hon.

Galan Polə ə gɛ Antiɔsə Pisidi lɔi hu

¹³ Polə da mɛlan di həɠə Pafɔsə diɛ li Pɛrsə daai, Pamfili lɔi hu. Nąą ɓə Ɉaan-Markə ə həɠə laa di pɔ yɛ li Ɉerusalɛmə.

¹⁴ Kɛlaa, ɓɛlɔwai di həɠə la Pɛrsə daai, də li Antiɔsə daai Pisidi lɔi hu. A hvįįtɔɔ yələ ta, di lɔ Yálá hvɛli pɛlɛ́ mu, di hee;

¹⁵ Dɔ́n ɉɛɓɛ́ da Yálá kwəi mɛ̨nį hukulɔ nuą di wɔ hɛɓɛ́i ɓoɔ pulu, Yálá hvɛli pɛlɛ́ nwun nąmįną di nu tɔɔ di pɔ, diɛ kɛ diɛ: «Ku nąn nonnii, liɛwoo a kɛ ka la, káá kɛ ká mo nuą diɛ, bələ kaa ká yəi.»

¹⁶ Polə ə muhəɠə ə tɔɔ, ə ɲee lɛ diɛ, yɛ diɛ: «Israɛlə lonnii, ɛlɛɛ, kaai ka ɲɔw Yálá ɓa, ka ka wəli tɔɔ nwóó ɓa.

¹⁷ Gu huwui a Israɛlə, nwɔ Yálá, ə ku kalaɓɔlɔni həɠə ɉu a dee, ə di kpulu hu kɛnɛ̨, ɓɛlɔwai di kɛ la Eziptə lɔi hu. Yili pulu, ə di kulɔ laa a ɲeekɔ̨nwɔ̨n ɉuwalawalaa.

¹⁸ Kwɛlan bow nąąn ɲee mu, ə di kɔ̨nɔ̨n gɛ nɔi pun ɉu.

¹⁹ Ə lɔi mɛ̨ihveelɛ hu nuą kpɛ Kanaan lɔi hu, ə di wɔ lɔiɠaai tɛɛ nwɔ nuąi pɔ a di hee lɔi,

²⁰ kwɛlan nwun nąąn ɲee lɔɔli ɲee mu mɛ̨nįɠaa ka tii. Yili pulu ɓə ə nɔi mąąkɔ̨nwɔ̨ nuą həɠə la ɉu ə dɛɛ di ku kalaɓɔlɔni pɔ, ə lɛɛ ɉu ə həli la Yálá kwəi mɛ̨nį hukulɔ mun Samuɛlə nwɔ yələi ɓa.

²¹ Nąąlɔwai di tɔɔmun ɉu hvɛli, Yálá ə Kisə lon Saulə tɛɛ di pɔ, yai a Bɛnɉamɛn huwu ta, ə kwɛlan bow nąąn dɔɔlaa kɛ di mɛ̨i.

²² Yálá ə Saulə kulɔ dɔɔlaa hu, ə Davidə tɛɛ di pɔ a tɔɔmun. Davidə tii, mąą mɛ̨nį ɓə ə mɛ̨nįi ŋɛ̨i ɓo la, yɛ kɛ: ‹Ŋą́ą́ Ɉɛse lon Davidə kaa a nííɓamun, ya ɓə pai nííɓa mɛ̨nįɠaa kəlee kɛi.›

²³ Davidə huwu hu ɓə Yálá ə Jesus kulɔ laa, yɛ gɛ a Israɛlə nwun mąąɓomun yɛ bələi ə naakwɛlanmo la.

²⁴ Ɉaan ə gbɛa pa Jesus tɔwɔ, yɛ nu hɔn mąą pənə mɛ̨nį mąą kalan gɛ Israɛlə nu huwu kəlee ɓa.

²⁵ Ɛlɛɛ, ɓɛlɔwai Ɉaan ə kɛli pa ɲee laa kulɔi la gɛ kóló ɓa, ə kɛli kɛ diɛ: ‹Nui gaa ká kwəi, káá kɛ ya ɓaa a ɲą́ą́, və́ a mąą nui ti. Kɛlaa, mąą nu kaa búlú yɛ pa, ɲą́ą́ ŋɛ̨i, mą́ą́ hvo kpɛli nɛ̨ɛ̨li a gɔwɔɲą kɔ́lɔ yɛli hvólóonmun.›

²⁶ «Nąn nonnii, káái a Abrahamə huwu, káái ɓɛ, káá ɲɔw Yálá ɓa, ká gu mąą mɛ̨nį ɓə di nu ɓalo woo ŋɛ̨i tɛɛ la.

²⁷ Kɛlaa yaamun Ɉerusalɛmə nuą da ɲɛ̨itɔwɔ nuą, di hvo Jesus kɔ́lɔn ni, di baa. Yálá kwəi mɛ̨nį hukulɔ nuą wooɠaai da moi a vįitɔɔ yələ tɛitɛi, diɛ di pɔ mɛ̨nį kɛ la tii.

²⁸ Bələi mąn di hvo baa mɛ̨nį nwun da lɔpee kaa la mą, kɛlaa, ə mą kɛ tii, di giti kala mą, di ɉuhvɛli Pilatə ɓa, diɛ baa.

²⁹ Ɛlɛɛ, mɛ̨nįɠaa kpɔ di mo a naa, di gəlee pɔ mɛ̨nį kɛ, di gulɔ nwulu ɓa di naa kámą hu.

³⁰ Kɛlaa, Yálá ə nwun ə gulɔ haa yəi ə gɛ a vulú.

³¹ Nuąi da diɛni di həɠə Galile lɔi hu, diɛ pa Ɉerusalɛmə, ə gbɔwɔ lɛ yiliɠaa diɛ hvoló tamąą yee mu, diɛi ti ɓə mąą kɛla hvaaɓoi nuąi a Israɛlə nuą diɛ.

³² Kuɔ kpɛli, nwəlɛɛ lɛlɛɛ ti ɓə ku paa la ka pɔ, yii wɔlɔ Yálá ə naakwɛlan mo ku kalaɓɔlɔni diɛ.

³³ Aa bɔ mɛ̨nį kɛ kuɔi a di lonnii kuɔ da hvo lɛɛ li pulu, a Jesus nwun ə mo haa nuą lɔwai, yɛ bələi bɛ̨ɛ̨i la Yálá mąątɛ̨nɛ̨ wələ hɛɓɛ́ veelɛnąą hu, yɛ mą: «‹Nón maa yɛ́, ɲą́ą́ kpɔ ɓə ə́ kaa háákələi.›

³⁴ «Yálá ə nwun ti, ə gulɔ haaɓɛlaa lɔwai, əgɛ, gɔlɔ hvo luwun lɔi mu. Ə gbɛa yili kəlee ɓo, yɛ kɛ la diɛ: «‹Ɉɛn ŋą́ naakwɛlanmo Davidə ɓa, gáá pai dɛɛi ka pɔ; ɉɛn mąąhəɠɛɛ, a yɛnɛ̨ɛ̨ hɛn neelee.›

³⁵ «Yili mąą mɛ̨nį ɓə nwɔ̨nɔ̨, ə mo la kɛɛnąą takpɛli, yɛ mą: «‹Hvó pai yɛ́ nu mąąhəɠɛɛ lɛɛi laa, yɛ luwun.›

³⁶ «Davidə nwɛi, nwɔ yɛnɛ̨ɛ̨ kəlee hu, ə kɛi tí Yálá ɓa, yii kpɔ Yálá ə kɛ bɔ, ya ɓə ə gɛ. Ə haa, di naa nąnni kwɛlɛ, ɛlɛɛ, gɔlɔ ə luwun.

³⁷ Kɛlaa, nui ŋɛ̨i Yálá ə pənə ə gɛ a vulú, gɔlɔ hvo kala kámą hu.

³⁸ Ną́n nonnii, ká kili ə pu kani ɉu káá, Jesus ti háálai ɓə nɛ̨ŋɛ̨n mąąhvaalɛɛ mɛ̨nį laa aa həli la káá, da dələnmolaa ti ká hvo pɛli ɉɔlɔɓoi Moisə nwɔ tɔ́n hu.

³⁹ Jesus háálai, nui lɔpee a mąą mɛ̨nį kaa a tɛ̨ą, mąą nu a dələnmolaai ti hɔlɔɓo, yɛ pɛli ɉu.

⁴⁰ Ka gɛ kani a nɛlɛɛ, ə gɛ, mɛ̨nįi ŋɛ̨i Yálá kwəi mɛ̨nį hukulɔ nuą di mo, hvo pa nei həli kaa, yai di kɛ mą:

⁴¹ «‹'Ka ká ɲɛ̨i hee tai, káái a tɛɠɛɓo ɉu nuą, ká hu ə pu káá, 'ká ɲɛ̨i ə paa kpɔ tɛ̨ɛ̨tɛ̨ɛ̨?! Ká kaa ni lɛɛi yɛnɛ̨ɛ̨, gɛ́ pa mɛ̨nį ta kɛi, nu ta a mo káá, ká hva pɛli gaai a tɛ̨ą.›»

⁴² Di kulɔi lɔwai, di Polə da Barnabasə di huhvɛli, diɛ kɛ, di pənə nwɔ̨nɔ̨, di mɛ̨nį tɔ̨nɔ̨i ti ta ɓo diɛ, a bulu ɓa hvįįtɔɔ yələ yii pai.

⁴³ Yii kɛa nuą di taɠa, Ɉuifəɠaa tamąą da nuą takpɛliɠaai kɛi Moisə nwɔ tɔn pɔ yíiɓo, di hvilɛn Polə da Barnabasə di pulu, yiliɠaa diɛn, di kɛli di liɛwooɓo di lono woo hu, di yee kanąn mɛ̨nį ɓa Yálá nwɔ mɛ̨inɛ̨ɛ̨ ɓa.

Polə da Barnabasə di di ɲɛ̨i tínɛ̨n huwu takpɛliɠaa pɔ pələ

⁴⁴ Bulu ɓa hvįįtɔɔ yələ həliɛ nwɔ̨nɔ̨, daa nuą mɔlɔɓɛlaa di di ɲąąkpɔn, ə gɛ, di Ną́mu Yálá lawoo mɛ̨n.

⁴⁵ Yii kɛa Ɉuifəɠaa di nu kpului ti kaa, di kɛli hvɛɛ a lííholi, diɛ Polə laa hɛatoo, diɛ nalan.

⁴⁶ Polə da Barnabasə di mo kpɔ diɛ a ɲɛ̨i walawala, diɛ mą: «Káá ɓə kɛ tɔlɔɔ-tɔlɔɔ mąąnɛ̨ɛ̨ Yálá lawoo ə həli káá. Kɛlaa, yii káá lənə mąi, ɛlɛɛ, yii ká hvo ká kpɔwɔ kaai a nuąi mąąnɛ̨ɛ̨ di ɓalo hva kpɛɛ hɔlɔɓo, ku kaa kani ku ɲɛ̨i tínɛ̨n ɉii huwu takpɛliɠaa pɔ pələ.

⁴⁷ Ɛlɛɛ yaan, mɛ̨nįi kpɔ gu Ną́mu Yálá ə ku tí la, yaa li yɛ kɛ diɛ: «‹Ŋą́ą́ ə́ hee a huwu takpɛliɠaa di wɔ kɛɛpono yɛ́, ɲɛ̨nɛ̨ɛ̨i kpɛɛ hvo mą laa həli kpɔ lɔi kpon ɉeei.›»

⁴⁸ Nwoo tii ə huwu takpɛliɠaa kwəinɛ̨ɛ̨ kpɔ kɛnɛ̨, diɛ Yálá laawoo mąątɛ̨nɛ̨, ɛlɛɛ, nuąi kpɔ kɛ di təliɛ ɓalo hva kpɛɛ ɓa, di di yee hee Yálá laawoo.

⁴⁹ Gu Ną́mu lawoo ə taɠa-taɠa nɔi ti hu nąą kəlee.

⁵⁰ Kɛlaa, Ɉuifəɠaa di pili Yálá mąąwiɛ nɛ̨ąą kpɛa-kpɛaa, da daa kalanɉonŋaa wəlii, ə gɛ, di hvaa kɛnɛ̨ pɛlɛ Polə da Barnabasə diɛ, di di kpɛ di wɔɔ lɔi hu.

⁵¹ Polə da mɛlan di di kɔ́wɔ ɓa muluun kpɛŋɛ̨n diɛ mɛ̨i, di tɛɛ diɛ li Ikoniumə.

⁵² Galan nɛai di wɛi, di kɛ kwəinɛ̨ɛ̨ hu kpɔ kɛnɛ̨, Kili-Mąąhəɠɛɛ yɛ ɓo di yəi.