Gɛlaɠaa 11 - Yálá laawoo hɛɓɛ (dc)

Piɛrə ə nwoo hukulɔ Ɉerusalɛmə, gbɔn ɲɛ̨i ɓa

¹ Gɛlaɠaa da nąn nonnii yiiɠaai kɛ heeni Ɉude lɔi hu, di mɛ̨n diɛ huwu takpɛliɠaa daa di yee hee Yálá lawoo mu.

² Ɓɛlɔwai Piɛrə ə pənə ə paa la Ɉerusalɛmə, gɛ̨nɛ̨lɛa di hvaa pɛlɛ mą.

³ Diɛ kɛ mą: Lə ɓə kɛ, yai ə́ lɔ kɛ́nɛ̨ kpolowaɠaa yəi bɛlɛ́n, ɛlɛɛ, ka diɛni kaa kɔ̨nɔ̨n mįi gee ɓa?

⁴ Ya ɓə Piɛrə ə mɛ̨nįi ti həɠə kpɔ gɔwɔ tɔɔi lɔwai ɓa, ə ɉukulɔ diɛ kpɔ tɛhvɛ-tɛhvɛ, yɛ diɛ:

⁵ «Ŋą́ kɛ Ɉope daai, gɛ́ Yálá hvɛli, ŋį́ kwɛlɛɛn gɛɛ ta kaa, hɛn da ə həɠə yələi yɛ yɛɛ mɛ̨́i. Ə kɛ yɛ kpɔlɔ kɛnɛ̨ ta, yɛli nąąn gbulɔn ŋąą mą, ə yɛɛ gwɛ́lɛ.

⁶ Ŋą́ ɲɛ̨i hee kpɔ mą, ŋį́ mąąkpɛɛ a nɛlɛɛ, huwɔ huwui kpɔ gɔwɔ kaa mu nąąn, lɔwɔ huwɔɠaa, tala huwɔɠaa, ɛlɛɛ, yələi nwɛ̨nįɠaa, diɛ ɓo gbɔlɔi ti hu.

⁷ Ŋą́ woo ta mɛ̨n yɛ kɛ mą́ą́: ‹Piɛrə! 'Ə́ muhəɠə, 'ə́ da paa ə́ mįi.›

⁸ Kɛlaa, ŋį́ nwoo ɲąąpənə gɛ́ mą: ‹Oo Ną́mu! Və́ hvaa li mą, mąąhɔlɔɓo, hɛnŋąąi tɔ́n dɔɔ mą, gɔhɔɓoɔ, və́ ta da mįi li.›

⁹ Nwooi ti ə pənə nwɔ̨nɔ̨ ə tɔɔ ɲələi pələ, a veelɛnąn, yɛ mą́ą́: ‹Hɛn Yálá ə mąąhəɠəi, hvó kɛ mą, gɔhɔɓoɔi!›

¹⁰ Ə gɛi kɛ ti geemɛ̨i haaɓa, yili pulu ə pənə ə tɛ.

¹¹ Nɔwai tanɔ̨n ti hu, hinąą haaɓa di pa ɓɛi ku kɛ laa bɛlɛ́n, di di tɔɔ bɔ́ɔ́li, diɛ həɠə Sesare.

¹² Kili-Mąąhəɠɛɛ yɛ mą́ą́: 'Ka diɛni ka lí, ɲįnɛ̨n-ɲįnɛ̨n və kɛ ə́ hu. Ną́n nonnii mɛ̨idai lɛɛ bɔ́ kwa diɛni kuɔ pa ɓɛ, kwa diɛni lɔ ɓə li Sesare, kwa diɛni kəlee ku lɔ nu kpɔ, ɲəi bɛlɛ́n.

¹³ Bələi ə malaka kaa la ɲəi bɛlɛ́n, yɛ kɛ mą: Nu ta tɔɔ Ɉope ə mo Simɔn, naa mɛ̨iheɛ a Piɛrə mą, ə pa, ɉulɔnui ti ə ɉukulɔ kuɔ.

¹⁴ Mɛ̨nįɠaai pai pai ə́ wɔ pɛlɛ́i pɔ a ɓalo mɛ̨nį, a pa, gaa pai ɉukulɔi yɛ́.

¹⁵ Ɓɛlɔwai ŋį́ gɔwɔ tɔɔ la gɛ́ pələ ɓo diɛ, Kili-Mąąhəɠɛɛ ə yɛɛ di mɛ̨i, yɛ bələi ə yɛɛ la gu mɛ̨i a gɔ́wɔ tɔɔ yələ.

¹⁶ Nwooi gu Ną́mu ə mo, naa kili ə too ɲą́, yai ə kɛ mą: Ɉaan ə nuą mąąwaa yái, ɉu hvo kwɛa li, di kaa pai ká mąąwaai Kili-Mąąhəɠɛɛ hu.

¹⁷ Akɛ mɛ̨inɛ̨ɛ̨i Yálá ə gɛ guɔ, ɓɛlɔwai gu laa la Ną́mu Jesus la, ə yili ɲɔ̨nwɔ̨mąn gɛ diɛ kpɛli diɛ. A kɛ ti, gbɛɛ ɓaa ɲą́ą́ yai, ŋą́ li kpɛ̨ąn ɉii Yálá kɛ mɛ̨nį tɔwɔ?»

¹⁸ Yii kɛa di nwooɠaai ti mɛ̨n, ə di liilaa, diɛ Yálá hɛɠɛɛɓo, diɛ kɛ mą: «Hvó gaai, nuąi di hvo a Ɉuifəɠaa, diɛ kpɛlimąn, Yálá aa di kɔ a di hɔn mąąpənə kili, diɛ yɛnɛ̨ɛ̨ hva kpɛɛ hɔlɔɓo.»

Gbɔn kɔwɔ hvilɛn mɛ̨nį Antiɔsə

¹⁹ Gɔi di bɛlɛ Yálá ŋą kpɔn ma, Etiɛnə paa mɛ̨nį hu, nuąi ə di hu taɠa, daɠaa də li kpɔ Fenisi, daɠaa də li Siprə, daɠaa də li Antiɔsə; kɛlaa, di hvo Yálá lawoo laa həli nu takpɛli ɓa, ə kulɔ lɔ Ɉuifəɠaa.

²⁰ Kɛlaa, ə mą kɛ ti, di taɠaa, di kaa-lɔi ə kɛ a Siprə da Sirɛnə, pai di mo Antiɔsə di wɛi, Grɛkəɠaa lɔ ɓə di kɛli nwəlɛɛ lɛlɛɛ laa həli diɛ, yai vilɛn ŋąąi gu Ną́mu Jesus ɓa.

²¹ Gu Ną́mu ə kɛ di pɔ, nuąi di ɲɛ̨i tínɛ̨n gu Ną́mu pɔ pələ, diɛ hvilɛn bulu, di kpulu ə kɛli kɛnɛ̨.

²² Mɛ̨nįi ti bələ ə pa ə hɛli gbɔn ɓa Ɉerusalɛmə, di nɛɛmą di Barnabasə tɔɔ Antiɔsə.

²³ Lii kɛa ə mo, ə Yálá nwɔ nɛ̨ɛ̨laa kɛ kóló kaa, gwəi ə nɛ̨ɛ̨, ə di hvaŋąlɔ yɛ diɛ; 'Ká kanąn gu Nąmu ɓa a ka lii kəlee.

²⁴ Barnabasə, ə kɛ a nu haŋąą, Kili-Mąąhəɠɛɛ yɛ ɓo bɔ, da laa na laa. Nu kpulu kɛnɛ̨ ə hvilɛn gu Ną́mu pulu.

²⁵ Yili pulu, Barnabasə ə li Tarsə Solə pulu.

²⁶ Ɓɛlɔwai ə gaa la, ə ɉəɠə da yaa di pa Antiɔsə. Da yaa di kwɛlan dɔ̨nɔ̨ kɛ laa, di gbɔn ti mąąkwɛli kpɔ kpaan a Yálá mɛ̨nį. Antiɔsə daai ɓə di kalan nɛa laa hee laa tɔlɔɔ, a: Kristalɛa.

Yeelɔ gee hu yɛnɛ̨ɛ̨

²⁷ Nąąlɔwai ti ɓə Yálá kwəi mɛ̨nį hukulɔ nuą di həɠə la Ɉerusalɛmə, diɛ li Antiɔsə.

²⁸ Di tɔ̨nɔ̨ ə kɛ laa diɛ kɛ mą: Agabusə, ə muhəɠə ə tɔɔ, Yálá ə gilaa pono, yɛ kɛ: «Pulu kɛnɛ̨ kaa pai tooi lɔi mɛ̨i nąą kəlee.» Yaan, bului ti ə too a Klodə nwɔ tɔɔlaa yələ.

²⁹ Galan nɛa di di nwun dɔɔ, kpɔnmąą tɛɛ mɛ̨nį ɓa galan nɛa yiiɠaai kɛ Ɉude lɔi hu, di pɔ.

³⁰ Bələ ɓə di gɛ la, Barnabasə da Solə ɓə di di tɔɔ diɛ li a ɉąmą pilɛi tii gbɔn ɲɛ̨itɔwɔ nuą pɔ.