Galatə 3 - Yálá laawoo hɛɓɛ (dc)Moisə nwɔ tɔ́n a wala kɛti laa na laa 1 Ee kə! Galatə nuą, ɓowo kpɔlɔɔ ɓe tii ká moi! Gbɛɛ ɓə ŋɛ̨i wulu kɛ káái? Ka ɲɛ̨i ɓa, di Jesus Kristə haa mɛ̨nį kolɔwa ɓa ɓo káá a ɉuponoɔ. 2 'Ká gílaa pono mɛ̨nįi ŋɛ̨i hu, akɛtii dɔn bɔ yíi háálai ɓə mɔ̨ɔ̨ ká Yálá nwɔ Kilii hɔlɔɓo la, awala kɛ tii, laa na laa mąą wɛlɛɛ lɛlɛɛi ká ká wəli tɔɔ mą ya ɓə? 3 Akɛtii, ká ɓowoɔ kpɔlɔ ɓə tii mɔ̨ɔ̨i! A káái ká gbala tɔɔ a Yálá nwɔ Kilii, akɛtii nu túwɔ́ pələ ɓə mɔ̨ɔ̨ pai ká mąą mɛ̨nį laa kulɔi? 4 A kati, mɛ̨nį tamąąi ti ka tɛɛ ɉu, aa lɛɛ lɔ a kpɛli? Mąą hvo nɛ̨ɛ̨li kpɔ kɛ hvo lɛɛ a kpɛli-kpɛli! 5 Yálái ŋą Kili tɛɛ ká pɔ, ɛlɛɛ, yɛ kwɛlɛɛn mɛ̨nįɠaa kɛ ká lɔwai, gaa mɔ̨ɔ̨ gɛi tii, gbala ə tɔɔ, ká káá dɔn bɔ yíiɓoi? Awala kɛ tii, mąąhɔlɔɓo, ká ká wəli tɔɔ, laa na laa mąą wɛlɛɛ ɓa? Abrahamə laa na mun, ɛlɛɛ, huwu takpɛliɠaa tələnmo mɛ̨nį a laa na laa 6 Yii kpɔ Abrahamə ə laa Yálá la, yili ɓə gɛ a tələnmomun. 7 Káá kpinįi ká mɛ̨nįi tii gɔɔn mąą kɛ tai, laa na nuą ɓə a Abrahamə lonnii. 8 Hɔlɔɔ mun, ɉɛɓɛ́ ə mo yɛ: Yálá kaa pai huwu takpɛliɠaa kɛi a tələnmo nuą laa na laa háálai. Yili pɔ pələ ɓə gɛ, yɛ nwoo kwɛlɛ la Abrahamə ɓa, yɛ kɛ mą: Huwu kəlee kaa pai lúwɔ́ hɔlɔɓoi ə́ háálai. 9 Yili ɓa tii, nuąi a laa na nuą, da lúwɔ́ hɔlɔɓo da Abrahamə ni, yai a laa na mun. 10 Gbala ə tɔɔ, dɔn bɔ yíiɓo nuą kəlee, di kaa dɔn ŋą nąŋɛ̨n naa yee mu, hvo gaai, ɉɛɓɛ́ yɛ diɛ: Nui hvo pai Yálá nwɔ tɔ́nŋąą ŋɛ̨i bɛ̨ɛ̨, bɔ yíiɓoi, nɛ̨ŋɛ̨n naai! 11 Yaan gaa a tɛ̨ą, nu hva pɛli kɛi a tələnmomun Yálá ɲɛ̨i ɓa, dɔ́n tii ɉáálai. Mąąhɔlɔɓo, tələnmomun a yɛnɛ̨ɛ̨ kɛ laa na laa háálai. 12 Tɔ́n hva hɔlɔɓo laa na laa hu, Hvo gaai, dɔn nwɛi, nui a bɔ liɛwooɠaa hon, a yɛnɛ̨ɛ̨ kɛ, dɔ́n ɉáálai. 13 Kristə aa gu nwun mąąɓo dɔ́n ŋą nɛ̨ŋɛ̨n naa yəi a hɔ̨nwɔ̨ kɛnɛ̨, a yaa kpinįi ti kɛi ə mo a nɛ̨ŋɛ̨n naa gu mąą mɛ̨nį ɓa. Mąąhɔlɔɓo, bɛ̨ɛ̨i ɉɛɓɛ́ hu, yɛ mą: «Nui daa ɉɛlɛn wulu ɓa, nɛŋɛ̨n naai!» 14 Yili ə kɛ ti, ə gɛ, núwɔ́i Yálá ə naakwɛlanmo Abrahamə ɓa, huwu takpɛliɠaa di da hɔlɔɓo, Jesus Kristə hu pələ, ɛlɛɛ, a kɛ tii, laa na laa háálai, Gilii kɛ naakwɛlanmo, gu ɉɔlɔɓo. Moisə nwɔ tɔ́n da Yálá ŋą mɛ̨nį laakwɛlanmoɔ 15 Ną́n nonnii, ká gu mɛ̨nįi ŋɛ̨i gɔɔnmąą həɠə gu yíi pələ hu; nu a nwoo kwɛlɛ, ə gwəi woo ɓo, vilɛnŋąą ginɛ̨ ɓa a neelee, di hva da həɠə mą, di hva da pɛlɛ mą. 16 Akɛ yili kaa tii, Abrahamə ɓə di mɛ̨nį laakwɛlanmo mą, ɛlɛɛ, da gwəi lon, hvo kɛli mą: da gwəi lonnii, yɛ a kɛ a nu kpulu mɛ̨nį; kɛlaa, gwəi lon mə, yili ka tii, a Kristə. 17 Yii gɛ́ ŋį́ mo káá, ya ka: Yálá ə mɛ̨nį ta laakwɛlanmo, ə vilɛn ginɛ̨ ɓa, kwɛlan nwun nąąn ɲeehaaɓa kulaa ɉu ɓə təɠa, dɔ́n ə paa la. Kɛlaa, dɔ́n tii hvo pa li mɛ̨nįi tii həɠəi mą, a ɉəɠə mąi, akɛtii, Yálá ŋą mɛ̨nį laakwɛlanmoɔ, mɛlɛ hva lɛɛ mą. 18 Mąąhɔlɔɓo, akɛ dɔ́n ɉáálai ɓə kwɛlin a hɔlɔɓo lai, akɛ tii, mɛ̨nį Yálá ə naakwɛlanmo ya hvə li. Ya pa, Yálá ə ŋą mɛ̨inɛ̨ɛ̨i kɛ Abrahamə ɓa, mɛ̨nįi ə naakwɛlanmo mą, ɉáálai. 19 Lə ɓə dɔ́n ə pa kani gɛi? Dɔ́n ə pa, ə nuą hɔn doo pono ɲą, ə lɛɛ ɉu, Abrahamə kwəi lon ti, di mąą mɛ̨nį laakwɛlanmo mąi, ə pa. Malakaɠaa ɓə pa dɔ́n ɉu woo laa həlii, Moisə yɛ ɓo a di lɔwai-kpəlin da nuą. 20 Yaan, lɔwai-kpəlin mɛ̨nį hva ɓo, akɛ nu tɔ̨nɔ̨ lɔ ɓə, Yálá yaan, ə ɓo lɔ tanɔ̨n gbən. 21 Akɛ tii dɔ́n a kɔ pɛlɛ mɔ̨ɔ̨ Yálá ŋą mɛ̨nį laakwɛlanmoɔ ɓa? Kpaa-o! Akɛ dɔ́n a pɛli kɛ yɛnɛ̨ɛ̨ tɛɛi, ɛlɛɛ, ə li kɛ, nu kanŋaa di dɔ́n ɲili hɔlɔɓo kɛi, yɛ mą dɔ́n ə li pɛli mą, nu kanŋaa tələnmoi. 22 Kɛlaa, ɉɛɓɛ́ ə mo yɛ: Nu kəlee kaa nɛ̨ŋɛ̨n ŋą huwalawala yee mu, ə gɛ, nuąi da laa Jesus Kristə la, mɛ̨nįi Yálá ə naakwɛlanmo, di ɉɔlɔɓo. 23 Gɛɛ kɛ laa na laa nwɔ yələi hvo ɉəli, gu kɛ luwɔ́laa hu dɔ́n ɲee mu, ə lɛɛ ɉu, laa na laa yɛ pa tooi pono ŋą. 24 Yili mąą mɛ̨nį ɓa, dɔ́n ə kɛ a gu mɛ̨ikaamun, guɔ Kristə mąąkpɔn na; guɔ pɛli tələnmolaa hɔlɔɓoi laa na laa háálai. 25 Kɛlaa, yii kɛa laa na laa ə pa, gu hvo kɛa gu mɛ̨ikaa tɔ́n tii yee kɔnma. 26 Mąąhɔlɔɓo, ká kəlee kpun, laa na laa háálai, káá kɛ kɛa a Yálá lonni Jesus Kristə hu. 27 Gəlee ə mą kɛ, káái kpɔ daa ká mąąwaa Kristə hu, káá Kristə too ká kwɛną. 28 Ɉuifə mɛ̨nį hvo kɛa ɉu, Grɛkə mɛ̨nį hvo kɛa ɉu, luwɔ mɛ̨nį hvo kɛa ɉu, lɛɛgbɔwɔ ɓa mɛ̨nį hvo kɛa ɉu, hulɔnu mɛ̨nį hvo kɛa ɉu, nɛ̨ɛ̨nu mɛ̨nį hvo kɛa ɉu; gbala ə tɔɔ, ká kəlee káá kɛ kɛa tanɔ̨n Kristə hu 29 Ɛlɛɛ, akɛ, káá kɛ kɛa a Kristə nwɔɔɠaa, akɛ tii, káá ɓə a Abrahamə kwəi lon, yɛ bələi di naakwɛlanmo la, káá ɓə a gwɛlin ɉəɠə nuą. |