Galatə 1 - Yálá laawoo hɛɓɛ (dc)

Túwɔ́-woo

¹ Ɲą́ą́ Polə, Jesus Kristə ŋą tímun; nu ta hvei gɛ́ la, ɛlɛɛ, və́ mąą laa hɔlɔɓo li nu ta yəi. Kɛlaa, ŋį́ ɉɔlɔɓo Jesus Kristə kpinįi kpɔ ɓə ɲəi, da gu Nąn Yálái gulɔ haa yəi, ə gɛ a vulú;

² ɛlɛɛ, nąn nonnii kwa diɛni ku kaa ku kee pɔ, kuɔ ɓə ɉɛɓɛ́i ŋɛ̨i tɛɛi Yálá nwɔ Yálá ŋą kpɔnŋaai diɛ, diɛi di kaa Galatə lɔi hu, kuɔ diɛ:

³ Gu Ną́n Yálá da gu Nąmu Jesus Kristə di wɔɔ nɛ̨ɛ̨laa da liilaa, ə kɛ ka pɔ;

⁴ gu Nąmui tii ɓə gbɔwɔ kulɔ a haláá gu wɔɔ nɛ̨ŋɛ̨nŋaa mąą mɛ̨nį ɓa, ə gɛ, ə gu kulɔ ɲɛnɛ̨ɛ̨ ŋɛ̨i hu mɛ̨nį ɲɔn ɲee kɔnma, yɛ bələi Yálá liiɓa kaa la, yai a gu Nąn.

⁵ Mąąwiɛ ə kɛ yaa tii mą a yələ kəlee! Mįiną!

Nwɛlɛɛ lɛlɛɛ kaa tanɔ̨n gbən

⁶ Yálá ə ká təli kpɔ a nɛ̨ɛ̨laa Kristə háálai, kɛlaa, ká pulu tɔɔ mɛ̨nį mą kpɔlɔɔ ti ɉa, káá ká ɲɛ̨i tinɛ̨n, kaa ɉee wɛlɛɛ lɛlɛɛ takpɛli ɓa, yili aa gwə́i pili mą́ą́.

⁷ Ə kɛ ŋɛ̨i, nwɛlɛɛ lɛlɛɛ takpɛli ɓə laa, yili hvəə, nuą lɔ ɓə ka ɓowoi, diɛ kɛ di Kristə mąą wɛlɛɛ lɛlɛɛ ɲɛ̨ilai ɲɔ̨nwɔ̨ɔ̨ hee mą.

⁸ Kɛlaa, ə kɛ a nui lɔpee, ə mą kɛ a ku ta, a wala kɛti, yələkɔlɔn ɉu malaka ta ɓə, a pa ə nwɛlɛɛ lɛlɛɛ takpɛli laa həli káá, ə kulɔ yii ku naa həli káá bulu, nɛ̨ŋɛ̨n ə laa.

⁹ Kwaa gbɛa mo káá, gáá nwɔ̨nɔ̨ pənəi ŋį́ mo yiihu, gɛ́ káá: Akɛ nu ta a wɛlɛɛ takpɛli laa həli káá, ə kulɔ yii ká ɉɔlɔɓo bulu, nɛ̨ŋɛ̨n ə laa.

¹⁰ Gaa ká kwəi nuą di di ɲɛ̨i lɛlɛɛ hee mą́ą́ mɛ̨nį ɓə, a wala kɛ tii, Yálá nwɛi? Gaa ká kwəi nu liiɓa ɓə gáá gwɛlii? Akɛ yili ɓə, vá pɛli kɛ kɛi a Kristə ŋą tímun.

Bələi Polə ə kɛ la a Kristə ŋą tímun

¹¹ Gbala ə tɔɔ, Ną́n nonnii, gáá moi káá: Nwɛlɛɛ lɛlɛɛi ŋą́ naa həli káái, hvo a nu yəi mɛ̨nį;

¹² ɛlɛɛmun hɔlɔɔ! Və́ ɉɔlɔɓo li nu ta yəi, nu ta hvo nwɔ̨nɔ̨ mą́ą́kwɛli mą. Kɛlaa Jesus Kristə kpinįi ɓə nɛ mą́ą́ pono ŋą.

¹³ Mąąhɔlɔɓo, bələi dúwɔ́ pələ ə kɛ la Ɉuifəɠaa di wɔ kalan bələ mɛ̨i, káá ta bələ mɛ̨n. Ká gɔlɔn bələi ŋį́ kɛli gbɔn mɔ̨nɔ̨ɓo la a váŋą; gɛ́ ɉukala pələ kwɛli mą.

¹⁴ Ɉuifəɠaa di wɔ kalan bələi hu, ɲéé tɛɛi kɛ mɛ́laa kəlee diɛ; ku huwu la mɛ̨nįɠaa hu; váŋą kɛnɛ̨ɛ̨ kɛ dɛ́ɛ́ diɛ.

¹⁵ Kɛlaa, nui ɉə́ɠə ɉu, néé kwəi, ə ɉéé a déé, yai də́li ŋą nɛ̨ɛ̨laa pɔ pələ, ə naa gwəi,

¹⁶ ə Non nɛ mą́ą́, ə gɛ, ŋį́ mąą wɛlɛɛ lɛlɛɛ laa həli huwu takpɛliɠaa diɛ, və́ nwún dɔɔ a nui lɔpee ta;

¹⁷ ɛlɛɛ, və́ kpɛli tɛ Ɉerusalɛmə, nuąi gbɛa kɛ a gɛlaɠaa dɔ́wɔ́, di pɔ; ŋą́ nɛɛ ɲąąɓa, ŋą́ li Arabə lɔi hu, yili pulu, ŋį́ pənə ŋį́ pa Damasə.

¹⁸ Yili pulu, kwɛlan ɉaaɓa kulaa ɉu ɓə ŋį́ tɛ la Ɉerusalɛmə, ə gɛ, ŋį́ Sefasə kɔ́lɔn. Ŋį́ hvólo pow kɔw lɔɔli kɛ laa bɔ.

¹⁹ Və́ kpɛli gɛlaɠaa yiiɠaa ti tanɔ̨n gbɛli kaa, ə kulɔ lɔ, Ɉakə gu Nąmu kaayɔwɔ.

²⁰ Mɛ̨nįɠaai ŋɛ̨i gáá moi káá ɉɛɓɛ́ hu, gəlee kaa a tɛ̨ą; gáá moi Yálá ɲɛ̨i ɓa, və́ lɛɛ kɛi.

²¹ Yili pulu ŋį́ li Siri lɔi da Silisi lɔi hu.

²² Kɛlaa, Yálá ŋą kpɔnŋaai kɛ Ɉude lɔi hu, di hvo kɛ ɲɛ̨́ilai kɔlɔn.

²³ Di mɛ̨n nɔ nuą la, diɛ kɛ: «Nui wɔlɔ kɛi ku mɔ̨nɔ̨ɓo, gaa kɛa yiihu laa na mɛ̨nį laa həlii, a yai wɔlɔ ə kɛli ɉukala,»

²⁴ ɛlɛɛ, diɛ Yálá hɛɠɛɛɓo mą́ą́ mɛ̨nį hu.