Filipə 4 - Yálá laawoo hɛɓɛ (dc)1 Yili ɓa tii, nąn nonnii, nwɛ́likɛmąą nuą, gáá kpɔ bɔ ŋą́ ɲɛ̨́i tɔɔ kaa, káái a nwɔ́ kwəinɛ̨ɛ̨ da nwɔ́ɔ́ ɲɛ̨i pono, 'ká tɔɔ kpɔ tii gbąą, gu Nąmu nwɛi hu, nwɛ́likɛmąą nuą. Woolaa mąą, kwəinɛ̨ɛ̨ da liilaa 2 Nɛ̨ą hveelɛi ŋɛ̨i, Evodi da Sɛntikə, gáá nɛ̨ɛ̨mąą hvəə diɛ, gɛ́, di nɛ̨ɛ̨ a di kee, gu Ną́mu hu. 3 Yɛi ɓaa mɛ́lan, gɛ́ ə́ kpɔnmąą tɛɛ di pɔ ə di yee lɔ gee hu, mąąhɔlɔɓo, nɛ̨ąąi ti, kwa diɛni ku wɛlɛɛ lɛlɛɛ mąąkɔ̨nwɔ̨, ə mą kɛ, Kleman da mɛlaa yiiɠaai kwa diɛni ku kɛi kólo kɛ gee ɓa, diɛi di laa kaa yɛnɛ̨ɛ̨ kpɛɛ hvo mą hɛɓɛ́ hu. 4 Ká ká kwəinɛ̨ɛ̨ gu Ną́mu hu, gáá kpɔ pənəi ŋį́ mo, 'ká kwəinɛ̨ɛ̨ kulɔ. 5 Mąąnɛ̨ɛ̨ nu kəlee di ká wɔ túwɔ́ pələ lɛlɛ kaa, gu Ną́mu pai lɔwai mąą a kpuɔ. 6 'Ká hvo ka liihɛlɛn a mɛ̨nį lɔpee ta, kɛlaa mɛ̨nį kəlee hu, ká ká mąąkąnŋaa laa həli Yálá ɓa, a nɛ̨ɛ̨mąą woo, 'káá mąąnɛ̨ɛ̨, 'káá mąątɛ̨nɛ̨, káá ɉɛɠɛɛ ɓo. 7 Yálá nwɔ liilaa gɛnɛ̨ɛ̨, ɲee tɛɛ, mɛ̨nį kɔ́lɔn mɛ̨nį kəlee ɓa, ə ɲee kɛ ka niiɓa da ka wɔ kiliŋąhiɛɠaa Kristə laa hu. 8 Yili ɓa, ną́n nonnii, mɛ̨nįi lɔpee a tɛ̨ą, a kaa-lon-naa, ɉaŋąą, bɛliɛ ɉu, nu yɛ pɛli nwɛli la kɛi, diɛ mąąwiɛ, yii kpɔ mɛlɛ kaa mą, yii kpɔ mąątɛ̨nɛ̨ kaa mą, 'ká yili kəlee kɛ, a ká nwɔɔ mąątíi. 9 Mɛ̨nįɠaai kpɔ ká kalan na, ká ɉɔlɔɓo ɲə́i, ká mɛ̨n ná, ká gáá, gɛ́ gɛ, ká gəlee pɔ mɛ̨nį kɛ; Liilaa Yálá ə kɛ ká pɔ. Polə ə Filipə nuą hɛɠɛɛɓo di wɔ mɛ̨inɛ̨ɛ̨ mąą mɛ̨nį ɓa 10 Gwə́i ə nɛɛ kpɔ kɛnɛ̨ gu Ną́mu hu: gɛ mɛ̨nį ka pɛli nwɔ̨nɔ̨ ka ka kili lɛɛ Ɉú. Ka kɛi kpɔ ka kiliŋąhiɛ mą́ą́, kɛlaa, pələi kɛ ka gulɔ la pono ŋą, bələ hvo kɛ ka yəi. 11 Və́ moi ti kaa ə gɛ ka pənə ka hɛn da tɛɛ mą́ą́, mąąhɔlɔɓo, yii gaa ɲə́i, a níí hon nɔ a yələ kəlee. 12 Nwɛ́i, hɛn ə kɛ ɲə́i hɛn və kɛ ɲə́i, ɓɛi lɔpee gáá laa, ŋą́ pɛli gbɔ́ɔ́ mu. Ɲíi yili ɓə ŋą́ mą́ą́ kwɛli mą. 13 Kristə háálai, ŋą́ pɛli ŋį́ nííkpələ mɛ̨nįɠaai ti kəlee hu. 14 Kɛlaa yaamun, ka gɛ a nɛlɛɛ, ka ka kiliŋąhiɛ ká vilɛn mą́ą́, ŋą mɔ̨nɔ̨i hu. 15 Káái a Filipə daai nuą, ka gɔlɔn kaa diɛ: ɓɛlɔwai ŋį́ həɠə la Masedoanə lɔi hu wɛlɛɛ lɛlɛɛ laa həliɛ kɔ́wɔ tɔɔi lɔwai, kaai a Yálá ŋą kpɔn Filipə daai kaa tanɔ̨n gbən lɔ ɓə kaa mą́ą́ kpɔn mąą ɓo, kaa tɔ̨nɔ̨ gbən ɓə kaa yili kɛ. 16 Ə mą kɛ, ɓɛlɔwai ŋį́ kɛ la Tesalonikə, káá lɔ ɓə kpɔnmąą tɛɛ bɔ́ geemɛ̨i tamąą. 17 Və́ moi ti gɛ́ kɛ nwɔ̨nɔ̨ ká hɛn da tɛɛ bɔ́, yii gáá bɔ ya ɓaa: ka kɛnɛ̨ Yálá mɛ̨nį hu. 18 Hɔlɔɔmun, yii a pɛli mą́ą́, gaa ɲə́i, da laa mɛ̨i. Ɉamą pilɛi ká dɛɛ Epafroditə pɔ, yɛ paa la, aa nwɔ̨nɔ̨ da kɛ mą, aa kɛ a wulɔ kun nɛ̨ɛ̨, a hálaai nwɛlikaa Yálá ɓa 19 Ɛlɛɛ, nwɔ́ Yálái kaa pai ka mąą kpaan gəlee kpɛɛi yɛ pələi nwɔ hɛn Ną́mu laa kaa la Jesus Kristə hu. 20 Mąąwiɛ ə kɛ gu Ną́n Yálá ɓa, a yələ kəlee, ɲɛ̨n deei hvo mą! Amįįną! Yələwala too woo 21 Gáá Yálá nwɔ nuą kəlee túwɔ́ ɓoi Jesus Kristə hu. Gu nąn noni kwa diɛni ku kaa ɓɛ, di hvaa káá! 22 Kristalɛai di kaa ɓɛ, di kəlee diɛ ka tuwɔ ɓo, gəlee ə mą kɛ ləi, diɛi di kaa Sesarə yəi bɛlɛ́n. 23 Gɛ́ gu Ną́mu Jesus Kristə nwɔ mɛ̨inɛ̨ɛ̨ ə kɛ ká kəlee ká pɔ! |