Filipə 3 - Yálá laawoo hɛɓɛ (dc)

Tələnmo laa leelee

¹ Yili ɓa, nąn nonnii, 'ká kwəinɛ̨ɛ̨ kulɔ gu Ną́mu hu. Nwoo tɔ̨nɔ̨i ŋɛ̨i pɛ̨ɛ̨ mɛ̨nį hva vįi kpɛɛ, yili ɓə viɛlaɓoɔ ka mąą mɛ̨nį ɓa.

² 'Ká gɛ a nɛlɛɛ yilɛɠaa ti mąą mɛ̨nį ɓa, ka gɛ a nɛlɛɛ nɛɛ góló ɲɔ̨nwɔ̨ɔ̨ kɛ nuą tii mąą mɛ̨nį ɓa, 'ká gɛ a nɛlɛɛ, nɛɛ kɛ́nɛ̨lɛai ti mąą mɛ̨nį ɓa.

³ Guɔ ɓə gu kaa a gɛ́nɛ̨-lonni leeleeɠaa, mąąhɔlɔɓo, gwa tí Yálá ɓa, Yálá nwɔ Kilii háálai, a guɔi gu wɔ kwəinɛ̨ɛ̨ kaa Jesus Kristə hu, gu kili hvo tɔɔ li gu kpɔwɔ ɓa.

⁴ Ya pa, gílitɔɔ mɛ̨nį gbɔ́wɔ́ ɓa, nwunŋaa kaa mą, akɛ nu ta a gaa, yɛ kɛ, gaa gilitɔɔi kpɔwɔ ɓa, nwɛ́i tɛɛi nwɛi ɓa, kpɔ kɛnɛ̨.

⁵ Hvo gaai, néé da ną́n di kaa a Hebreu di ɓo a Israɛlə lonni, Bɛnɉamɛn yəi bɛlɛ́n nuą. Di ɉéé kɛ́nɛ̨ ɓa a voló mɛ̨ihaaɓa yələ. Yii hvilɛn na tɔ́n gɔlɔn mɛ̨nį ɓa, gáá a dɔ́n galamɔ̨ɔ̨.

⁶ Yii hvilɛn na dɔ́n mąąkɔ̨nwɔ̨ mɛ̨nį ɓa, ŋį́ kɛi Kristə nwɔ nu kpului ɓɛlɛkpɛɛ diɛ, yii hvilɛn na dɔ́n ɉan haaɓa, hɔn və kɛ mą́ą́.

⁷ Kɛlaa, mɛ̨nįɠaai ti kɛ ɲɛ̨́i ɓa yɛ tɔ̨nɔ̨ kɛnɛ̨ɛ̨, Kristə mąą mɛ̨nį ɓa, ŋą́ą́ yiliɠaai kaa kɛa yɛ yee lɛɛ ɉu;

⁸ a tɛ̨ą, ŋą́ gíliɲąkiɛ Ną́mu Jesus Kristə kɔlɔn mɛ̨nį kɛnɛ̨ɛ̨ ŋɛ̨i ɓa, ŋą́ yili kəlee kaa a kpɛli. Mąą mɛ̨nį ɓa, ŋą́ą́ ɲéé kulɔ hɛn gəlee hu, ŋą́ą́ gəlee kaa yɛ tulun ŋą hɛn, ə gɛ, ŋą́ Kristə hɔlɔɓo,

⁹ kwa yaa ku yili ku kɛɛ ɓa, hva kɛ a gbɔ́wɔ́ ŋą tələnmo laa, yai ŋą́ ɉɔlɔɓo dɔn bɔ yíí hu, kɛlaa, a tələnmolaai a kulɔ nu laa mɛ̨nį Kristə la, hu, yɛ həɠə Yálá pɔ, gɔwɔ hvilɛnŋąą laa na laa mɛ̨i.

¹⁰ Mɛ̨nįi kpɔ gaa laa, ya ɓaa: Yaa gɔlɔn mɛ̨nį, ɛlɛɛ, ɉuwalawalai gulɔ haa yəi, da nwɔ mɔ̨nɔ̨i ta mįi mɛ̨nį, yɛ́ kɛi yɛ, yaa, ɉaa mɛ̨nį hu;

¹¹ ə gɛ, gɛ pələ a kɛ mą, ə́ pɛli kɛi bɔ, nwun mɛ̨nį hu, haa ɓɛlaa lɔwai.

Gilɛ həɠə ə́ həli dɔlɔ ɓa

¹² Və́ kɛli káá, ŋą́ą́ gəlee hɔlɔɓo, a wala kɛ ti, ŋą́ą́ mɛ̨nį kəlee aa pɛli ɉu, kpaa-o! Kɛlaa, gáá tɔɔi a nwą́nąi gilɛ həɠɛɛ hu, ə gɛ, ŋą́ həli dɔ̨nɔ̨ ɓa, mąąhɔlɔɓo, ɲą́ą́ gbɛli, Jesus Kristə ə ɉón.

¹³ Nąn nonnii, və́ kɛli káá, ŋą́ą́ dɔ̨nɔ̨ hɔlɔɓo kɛa, kɛlaa, mɛ̨nį tɔ̨nɔ̨ ɓə gáá gɛi, ya ɓaa: yiiɠaai ŋą́ą́ tɛɛ ɉu, ŋį́ lɛ̨ą yili ɓa, yii gaa dɔ́wɔ pələ ŋį́ həli mą.

¹⁴ Yili ɓa, gáá gilɛ həɠəi, ə gɛ, gu təli ŋɛ̨i Yálá aa mo yələi Jesus Kristə laa hu, ŋį́ dɔ̨nɔ̨ hɔlɔɓo.

¹⁵ Guɔ yiiɠaai kɛa gwaa gu kpɛlaan ɉee Yálá kɔ́lɔn mɛ̨nį hu, mąąnɛ̨ɛ̨ gu túwɔ́ pələ ə kɛ tii. Akɛ mɛ̨nį taɠaa hu, ká wɔɔ kiliŋąhiɛ kaa a dakpɛli, Yálá kaa lɔ pai ká kilaa ponoi yili hu.

¹⁶ Mɛ̨nį kəlee ə mą kɛ, bələi ŋɛ̨i háákələi ka gu kaa mɛ̨i, ka gu lɛɛ lɔ mɛ̨i.

¹⁷ Ną́n nonnii, 'ká bɔ́ɔ́ kɔ́ɔn, bələi ŋɛ̨i ku ká kalan na, nuąi da kɛ hiɛi ti, ká hvilɛn di pulu.

¹⁸ Ŋą́ą́ ta kɛ mo kaa, yiihu nwɔ̨nɔ̨ gáá moi kaa kpɔ a ɲɛ̨iyá wɔlɔ gɛ́ kaa: nu taɠaa kaa Kristə nwɔ kolɔwa mąą yowo laa túwɔ́ ɓoi.

¹⁹ Di kaa di kpɔɔ nwun na pilii, mąąhɔlɔɓo, di wɔ Yálá ɓaa di kolon. Mɛ̨nįi a di nwumɛ̨, ya ɓə da di kwəinɛ̨ɛ̨ ɉu, ɛlɛɛ, di wɔ kiliŋąhiɛ ka lɔ ɲɛnɛ̨ɛ̨ ŋɛ̨i hu hɛnŋąa diɛ.

²⁰ Kɛlaa gu wɛi, gu kaa a yələkɔlɔn ɉu hee ɓo nuą, gu kaa ɓɛ lɔi mɛ̨i, guɔ gu nwun mąąɓomun Ną́mu Jesus Kristə mąąkpɔn,

²¹ yai pai, gɔlɔ mąąwɛliɛ ŋɛ̨i guɔ, mąą hvalin ɉii a kɔ́lɔ mąąwiai gɛ pələ ə ɓo yɛ nwɛi. A yili kɛ a nwɔ huwalawalai gaa pai heei la hɛn gəlee mɛ̨i.