Filipə 2 - Yálá laawoo hɛɓɛ (dc)

Kristə nwɔ kpɔwɔ mąą yɛɛlaa

¹ Akɛ kani, ká toliɛi Kristə hu, ká hvaŋąlɔɔ wɛlikɛmąą laa hu, ká yee lɔɔ gee hu Kili-Mąąhəɠɛɛ haalai, liinɛ̨ɛ̨ gwəi laa da ɲɛ̨imąąwɛli kaa hu,

² akɛtii, 'ká gwə́inɛ̨ɛ̨ kani, a nɛ̨ɛ̨i 'ká mo a ká kee. Wɛlikɛmąą laa tanɔ̨n ə kɛ ká yəi, ká kiliŋąhiɛ pələ ə kɛ tanɔ̨n, 'ká gɛ pələ kwɛli mą, ká yee ə lɔ gee hu;

³ 'Ká hvo mɛ̨nį lɔpee ta kɛ a wɛli kpɛɛ mąąlaa, a wala kɛ ti, nu ta hvo gbɔwɔ kɛnɛ̨ kiliŋąhiɛ kɛ; kɛlaa, kpɔwɔ mąą yɛɛ laa hu, ka ka ɓɛlaa kaa yɛ, ká tɛɛ-mąąɠaa.

⁴ Nu ta hvo giliŋąhiɛ gbɔwɔ nwɔ tɔlɔ kwɛli mɛ̨nį ɓa, kɛlaa ka ka kiliŋąhiɛ ka ɓɛlaa di wɛi ɓa.

⁵ Mąąnɛ̨ɛ̨ ka wɔ kiliŋąhiɛ ə kɛ lɔ yɛ pələi Kristə nwɛi ə kɛ la.

⁶ Yai, bələi mąn Yálá laa kaa ɲəi, hvo giliŋąhiɛ li da Yálá di pɛli mɛ̨nį ɓa, hvo kąnąn yili ɓa.

⁷ Kɛlaa yaamun, ə gbɔwɔ mąąkpoloon, ə gbɔwɔ kɛ yɛ luwɔ, gɛ pələ ə kɛ yɛ nu, ɛlɛɛ yaan, gbɔwɔ kɛ pələi tii, di kɛ gɔlɔn nɔ, yɛ nu.

⁸ Ə gbɔwɔ mąą yɛɛ, ə lɛɛ woo mu laa kɛ, ə lɛɛ ɉu, ə haa la, ə haa kpɔ la ɓa.

⁹ Yili ɓə gɛ Yálá ə ɉee hɛn gəlee nwun mɛ̨i, laai gɛnɛ̨ dɛɛ laa kəlee ɓa, di ɉee mą,

¹⁰ ya ɓə a gɛ, Jesus laa hu, nu kəlee a pu nwungbə la, di gwɛli hvilɛn mą, yələkɔlɔn ɉu, lɔi mɛ̨i, da lɔi mu;

¹¹ ɛlɛɛ, hįi kəlee diɛ mo, diɛ kɛ: Jesus Kristə ɓə a Ną́mu, Ną́n Yálá ŋą mąąwiɛlaa hu.

Kristalɛa di wɔɔ mąą tíi

¹² Yili ɓa, nwɛ́likɛmąą nuą, bələ ká kɛi lɛɛ nwoo mu laa kɛ la, a yələ kəleei, 'ká lɛɛ lɔ ka yee yili ɓa, yiihu, ə mą kɛ və́ laa ká pɔ, ká túwɔ́ pələ ə ká nwun mąąɓo mɛ̨nį too pono ɲą, káá ɲɔwu la, ká mąą yɛ kpɛlin.

¹³ Mąąhɔlɔɓo, Yálá ɓə a, niiɓa gɛ lii, da gɛ wɛli too káá, yɛ bələi gaa la gwəi a nɛlɛɛ.

¹⁴ 'Ká hvo ká woolaa ka kɛ mɛ̨nį lɔpee ta hu, ka hvo hɛatoo.

¹⁵ Ə gɛ ka kɛ a nuąi hɔn və diɛ, ka kɛ a Yálá lonni leelee, yiiɠaai di mąą kulɔi hvo diɛ yɛnɛ̨ɛ̨, hulu nuą da nu ɲɔ̨nwɔ̨ɔ̨ɠaa lɔwai. Mąąnɛ̨ɛ̨ ka lən di lɔwai yɛ yələkɔlɔn ɉu pɛmɛ̨lɛ̨n-gɔw.

¹⁶ Káái ɓalo woo kaa ká yəi, ka kɛi túwɔ́ ti, gu Ną́mu pai lɔwai, ɲɛ̨́i a pono. Yili ɓə a nɛ yɛ, mɔ̨nɔ̨i ŋą́ mįi, da gólói ŋą́ gɛ, və́ gɛ li kpɛli.

¹⁷ Ɉaláái ká wɔɔ laa na laa a gulɔ, da pɔ tíɓo, akɛ, naa kulɔ hɛn mąą a ɲą́mą, ŋą́ hvaa mą, ŋą́ dɛɛ ká pɔ, a gwə́inɛ̨ɛ̨.

¹⁸ Bələ lɔ ɓə mąąnɛ̨ɛ̨, káá kpɛlimąn ká kwəi ə nɛ̨ɛ̨ la, yɛ ɲą́ą́.

Timote da Epafroditə

¹⁹ Ną́mu Jesus hu, gáá bɔ ŋą́ Timote tɔɔ ka pɔɔli yiihu, a ɉu kpua, ə gɛ ɓɛlɔwai a pənə a paa la a ka mąą mɛ̨nį hukulɔ mą́ą́, ɲą́ą́ gbɛli ŋį́ hvaŋą lɔ hɔlɔɓo.

²⁰ Nui lɔpee ta hvo ɲə́i, kwá yaa kuɔ ká mąą liihɛlɛn ɉee a neelee, ə kulɔ lɔ Timote yaa tɔ̨nɔ̨ gbən bulu.

²¹ Yiiɠaai ti kəlee, di kpɔɔ mɛ̨nį lɔ ɓə da niihɛlɛn Ɉee; di hva di kiliŋąhiɛ Jesus Kristə mąą mɛ̨nį ɓa.

²² Bələi Timote a kulɔ la nwoo ɓa, kaa kpinįi ka gɔlɔn. Da pələi kwa yaa kwa kólo kɛ la, ya ɓə bɔ́ yɛ nón, gɛ́ ɓo yɛ nąn, kuɔ nwɛlɛɛ lɛlɛɛ mąąkɔ̨nwɔ̨.

²³ Ŋą́ pai gbɔ́wɔ́ mɛ̨nį huponoɔ kaai la, nąąlɔwai ɓə gáá pai Timote tɔɔ la ə pa ka pɔ.

²⁴ Kilitɔɔmąą laa kaa ɲə́i gu Ną́mu hu, gɛ́ ɲą́ą́ gbinįi gáá pai ká pɔɔli, ɉu hvo kwɛa li.

²⁵ Epafroditə ŋɛ̨i ká dɔɔ yɛ pa mą́ą́ kpaan gbɛɛ hɛnŋąa laa lɛi, ŋą́ gaa, gɛ́ nɛlɛɛ ɓaa, ŋą́ pənə, ŋą́ dɔɔ, ə pa ka pɔ, gaa a mɛ́lan nɛlɛɛ góló ŋɛ̨i gáá gɛi da gɔi ŋɛ̨i gáá gɔi mąą mɛ̨nį hu;

²⁶ gaa kpɔ bɔ ə ɲɛ̨i tɔɔ káá, niihɛlɛnŋąąi, mąąhɔlɔɓo, kaa kɛ nwɔ ɲɔ̨n mɛ̨nį pələ mɛ̨n.

²⁷ A tɛ̨ą ə ɲɔ̨n gɛ kpɔ tii, ɉaai ə lɛɛ tiikpə, kɛlaa, Yálá ə ɲɛ̨imąąwɛli kaa, yaa tɔ̨nɔ̨ lɔ hvəə, ku nu hveelɛi ɓə ə ku ɲɛ̨imąąwɛli kaa, ə gɛ, nwɔ́ liihɛlɛn da hvo pa pɛlɛ mą.

²⁸ Gáá bɔ ə pənə, pa kɛa ka pɔɔli kpɔ ɉa-ɉa, ə gɛ, ɓɛlɔwai ka gaa la ka kwəi ə nɛɛ ɲą́ą́ gbɛli nwɔ́ liihɛlɛn ə kpɛɛ.

²⁹ Yili ɓa a pa, ka naa kwiɛn a kwəinɛ̨ɛ̨ kɛnɛ̨ɛ̨ gu Ną́mu laa hu, ka gɔlɔn kaa diɛ nu ɲɔ̨nwɔ̨mąnŋaai ti ɓə, mąąnɛ̨ɛ̨ ka di mąąwiɛ.

³⁰ Mąąhɔlɔɓo, ɉaai ə lɛɛ tiikpə Kristə nwɔ kólói mąą mɛ̨nį ə gbɔwɔ kulɔ a haláá, ə gɛ, ɉɛn kɛ ka hva pɛli ɉəɠəi ka hvo paa la bɔ́, ə paa la.