Filipə 1 - Yálá laawoo hɛɓɛ (dc)

Túwɔ́-woo

¹ Ɲą́ą́ Polə kwa Timote Jesus Kristə ŋą tínuą, kuɔ ɓə ɉɛɓɛ́i ŋɛ̨i tɛɛi Kristalɛa diɛ, diɛi di kaa Filipə daai, da di mɛ̨ikaa nuą, ə mą kɛ, di wɔɔ tínuą.

² Nɛ̨ɛ̨laa da liilaa ə kɛ káá, yɛ həɠə gu Ną́n Yálá da gu Ną́mu Jesus Kristə yəi.

Polə ə Yálá hvɛli Filipə daai kalan nɛa diɛ

³ Ŋą́ nwɔ́ Yálá hɛɠɛɛɓo, ɓɛlɔwai lɔpee ka nąą kili a too la ŋą́.

⁴ Yələ kəlee, ŋą́ hvɛli wooɠaa hu, vá lɛ̨ą káá, ɛlɛɛ, ŋą́ vɛliɓoi tii kɛ a gwə́inɛ̨ɛ̨.

⁵ Mąąhɔlɔɓo, kaa kpɔnmąą tɛɛ bɔ́ nwɛlɛɛ lɛlɛɛ laa həliɛ hu, ə həɠə voló tɔlɔɔ ɓa, ə həli la yiihu ɓa.

⁶ Náái na kpɔ gɛ́: Yálái góló lɛlɛɛ ti kɔ́wɔ tɔɔ ká hu, gaa pai lɛɛi mą, ə naa kulɔ, a Jesus Kristə ŋą hvólói.

⁷ Vialaɓoɔi ka mąą liihɛlɛn ə too mą́ą́, ka mąą mɛ̨nį kaa níí hu a hvóló kəlee, mąąhɔlɔɓo, mɛ̨inɛ̨ɛ̨i yálá ə gɛ mą́ą́, ká wɔɔ nąą kaa ɉu. Ə mą kɛ yiihu gáá gaho ŋą, ə mą kɛ, ŋą́ kɛ la gbɔ́ɔ́ ɓa gɛ́ wɛlɛɛ lɛlɛɛ mąąkɔ̨nwɔ̨, gɛ́ naa həli.

⁸ A tɛ̨ą, nwɛlikɛmąą laaii gaa ɲə́i Kristə laa hu ka mąą mɛ̨nį ɓa, Yálá ɓə a gɛla.

⁹ Yii ŋą́ vɛli, ká mąą mɛ̨nį ɓa ya ka: Gɛ́ ka wɔ wɛlikɛmąąlaa hu yɛ kɛnɛ̨ lɔ a yələ kəlee, da yɛ pɛlɛ mą mɛ̨nį kɔ́lɔnŋąą hu,

¹⁰ káá pɛli mɛ̨nįɠaa gulɔ ɉu kɛi, yii nɛlɛɛ, káá gɛ; yili ɓə pai gɛi, ká mąą ə həɠə, ká mąąkulɔi hva kɛ káá, a Kristə ŋą hvóló;

¹¹ yili ɓə a gɛ, ká pilɛ kɛa a tələnmolaai a həɠə Jesus Kristə yəi, yɛ pa gu pɔ, guɔ Yálá mąąwiɛ la, guɔ Naa tɛ.

Polə too mɛ̨nį gaho ɲą, da Nwɛlɛɛ lɛlɛɛ tɛ mɛ̨nį tɔwɔ

¹² Nąn nonnii, gáá bɔ ka gɔlɔn kaa diɛ laa nɔ̨nwɔ̨ yiiɠaai həli mą́ą́, yili aa kɛ a wɛlɛɛ lɛlɛɛ tɛ mɛ̨nį tɔwɔ.

¹³ Dɔɔkwəlii holahiɠaa, da pələ takpɛli nuą, di gɔlɔn diɛ gáá gaho ŋą Kristə mąą mɛ̨nį ɓa.

¹⁴ Gɛ́ mɛ̨nį gaho ɲą, yili aa gu nąn nonnii tamąą di wɔɔ liikpələ ta kɛ mą, gu Ną́mu hu, di hva ɲɔw Yálá lawoo laa həli.

¹⁵ A tɛ̨ą, daɠaa da gɛ hɛn nwɛlilaa da wɛli kpɛɛmąą laa, kɛlaa, daɠaa diɛ Kristə mąą mɛ̨nį laa həli a liinɛ̨ɛ̨ gwəi.

¹⁶ Nuąi da gɛ a wɛlikɛmąą laa, da gɛ a nwɛlikɛmąąlaa, di gɔlɔn diɛ mą: gɛɛ mɔ̨ɔ̨ gaho ŋą, gáá ɓɛ wɛlɛɛ lɛlɛɛ mąąkɔ̨nwɔ̨ mɛ̨nį ɓa.

¹⁷ Diɛi tii, da Kristə mąą mɛ̨nį laa həli a kili ɲɔ̨nwɔ̨ɔ̨, di kwəi kili hvo lɛlɛ li, di kwəi kili ɓaa, di nwɔ́ɔ́ gahoi ŋą mɔ̨nɔ̨ ta kɛ mą.

¹⁸ Kɛlaa, yili hvo a mɛ̨nį ta! Yii a tɛ̨ą ya ɓaa: di gɛ a wɛli kpɛɛ mąą laa, di gɛ lii lɛlɛɛ hu, Kristə mąą mɛ̨nį laa ə həli lɔ, yili ɓə a gwə́inɛ̨ɛ̨.

¹⁹ Mąąhɔlɔɓo, ŋį́ gɔlɔn, yili kaa pai kɛi a málo mɛ̨nį, ka wɔ hvɛli woo háálai, da Jesus Kristə nwɔ Kilii háálai.

²⁰ Yɛ bələi ɲɛ̨́i kaa la dɔwɔ a nwalawalaa, gílitɔɔ la mą, və́ pai nwumɛ̨i, kəlee, nwɔ́ kilitɔɔmąą laa kaa kpɔlɔɔ ɲee tɔ̨nɔ̨ mɛ̨i, yiihu, ə mą kɛ, a yələ kəlee, Kristə laa kaa pai tɛi ŋą́ yɛnɛ̨ɛ̨ hu, a pɛli ə kɛ, vúlú kɔwɔ ɲą, awala kɛ tii, a ɉáá mɛ̨nį.

²¹ Mąąhɔlɔɓo, ŋą́ kɛ vúlú kɔwɔ ɲą, nwɔ́ yɛnɛ̨ɛ̨ ɓaa a Kristə, ŋį́ haa, yili kaa mą́ą́ a tɔ̨nɔ̨ kɛnɛ̨ɛ̨.

²² Kɛlaa, akɛ ŋą́ lɛɛ yɛnɛ̨ɛ̨, ŋą́ pɛli kólo lɛlɛɛɠaa kɛi, ɲą́ą́ hvə ŋą́ níiɓa həɠə.

²³ Gáá mɛ̨nį hveelɛ lɔwai: gáá bɔ ŋį́ li Kristə pɔ, ɛlɛɛ, yili kpɔ ɓə nwɛli kaa mą́ą́.

²⁴ Kɛlaa, ŋį́ lɛɛ nwɔ̨nɔ̨ yɛnɛ̨ɛ̨, yili lɛlɛɛi lɔ nwɔ̨nɔ̨ ka mąą mɛ̨nį ɓa.

²⁵ Yili ɓa, gílí la teɛi gɛ́ diɛ, gáá pai lɛɛi ɓɛ ka kəlee ka pɔ; ə gɛ, ka wɔ kwəinɛ̨ɛ̨ da ka wɔ laa na laa di tɛ tɔwɔ.

²⁶ Yili ɓa, ŋą́ pənə ŋą́ pa ka pɔ, gáái ká mo, mąąwiɛlaai ká yəi Jesus Kristə hu, da yɛ pɛlɛ mą.

²⁷ Yii lɔ mą, ya ɓaa: 'ká wɔ yɛnɛ̨ɛ̨ kɛ pələ ə pɛli Kristə nwɔ wɛlɛɛ lɛlɛɛi pɔ yííɓoi. Yili ɓə a gɛ, ŋą́ pa ka pɔɔli-o, və́ pa ka pɔɔli-o, ŋą́ pɛli woo lɛlɛɛ mɛ̨n ɉii, yɛ hvilɛn na káá, diɛ kɛ: Ká kwəi kaa tanɔ̨n, káá gɔ tɔ̨nɔ̨i kɔ, a ká laa pələ nwɛlɛɛ lɛlɛɛ la;

²⁸ 'ká hvo nɛɛ laa ka yowoɠaa di hvo ka mąą ɲɔw mɛ̨nį ta hu, yili a di kili pu ɉu, diɛ, di kaa nwun na pili pələ mɛ̨i, kɛlaa ka wɛi, ə ɓo a ɓalo pələ. Yili a həɠə Yálá pɔ.

²⁹ Mąąhɔlɔɓo, Yálá háálai ɓə ka kɛ la a Kristə nwɔ tínuą, ka laa mɛ̨nį na yaa tɔ̨nɔ̨ lɔ hvəə, kɛlaa, ə gɛ ka mɔ̨nɔ̨ mį́į́ mąą mɛ̨nį ɓa.

³⁰ Gɔ́ tɔ̨nɔ̨i ŋɛ̨i ká gáá gɛ́ gɔ́i, ɛlɛɛ, ká kili ə ɓo ɉu, káá, gáá ni mąi, káá kpɛli ká da kɔ́.