Ɛsdrasə 9 - Yálá laawoo hɛɓɛ (dc)

Ɉuifəɠaa tamąą di nwɛ̨ą nɛ̨ąą həɠə

¹ Mɛ̨nįɠaai tii kəlee tɛɛ pulu, bɛlɛ nąmįną di pa, diɛ mą́ą́: «Israɛlə lonnii, ɉaláá laa həli nuą, da Levi huwuhu nuą, da nɔi nuą daa kɛ tɔ̨nɔ̨, diɛ ɓaa: Kanaan nuą, Hɛtə nuą, Perizi nuą, Ɉebusə nuą, Amɔn nuą, Moabə nuą, Eziptə nuą, da Amɔrə nuą, da diɛni diɛ Yálá nwąną kala.

² Diɛ, da di lonnii, daa nɛ̨ą həɠə ɓɛ a di nɛ̨ąni, Yálá nwɔ nu huwui hu, da nɔi nuą daa humo a di kee. Bɛlɛ nąmįną, da galanɉonŋąą ɓə di yee lɔ dúwɔ́ pələ ɲɔ̨n tii hu tɔwɔ.»

³ Yili mɛ̨n ŋį́ mo, ŋį́ nwɔ́ həɠəɠaai huɓɛla, ŋį́ nwún nəɠa da gbɛ́lɛ kulɔ a nwun, ŋį́ hee, níí kələn ŋąą gwə́i.

⁴ Nuąi kpɔ Israɛlə nwɔ Yálá mąą mɛ̨nį ə kɛi di lii kulɔ diɛ, di pa di hee gwɛ́lɛ, nuą tii həɠə nuwɔ laa hu, di wɔ nɛ̨ŋɛ̨nŋąą tii mąą mɛ̨nį ɓa. Ŋą́ lɛɛ kpɔ heeni nii kələn gwəi tii hu, ə lɛɛ ɉu, ɲələwulii haláá kulɔi lɔwai ə ɉəli.

Ɛsdrasə ə Yálá hvɛli ɲɔ̨n gɛ nuąi tii mąą mɛ̨nį ɓa

⁵ Yələwulii haláá kulɔi lɔwai, kpɔlɔɔn tii ŋį́ mo, ŋį́ muhəɠə, nwɔ́ həɠəɠaa tii nee ŋį́ ɉuɓɛla, ŋį́ di too gwána, ŋį́ pu nwun gbəla, ŋį́ ɲee haŋą Yai-Laa nwɔ́ Yálá pɔ pələ.

⁶ Ŋą́ Yálá hvɛli, gɛ́ mą: «Nwɔ́ Yálá, nwumɛ̨ kaa ɲɛ̨́i! Ɛlɛɛ, ɲɛ̨́i aa paa! Vá pɛli nwún muhəɠəi ə́ pɔ pələ, yɛ́i ə́ kaa ɓaa nwɔ́ Yálá. Mąąhɔlɔɓo, kuɔ nɛ̨ŋɛ̨nŋąą daa tamą, daa laŋin ku nwun mɛ̨i. Ku wɔ hɔn ɲɔ̨n, ɉu aa kɛnɛ̨, aa tɛ yələkɔlɔn ma.

⁷ Ə həɠə ku nąnni di wɔ lɔwai ɓa, ə həli la háákələi ɓa, túwɔ́ pələ ɲɔ̨n kwaa gulɔ, aa kɛnɛ̨. Kuɔ, ku wɔ tɔɔɓɛlaa, da ku wɔ haláá laa həli nuą, ku kɛ nɛ̨ŋɛ̨nŋąą ɓə gɛ, kuɔ too yɛnɛ̨ɛ̨ tɔɔɓɛlaa yee ŋą, kuɔ kɛ a ɓɔwa kwɛaa kɔ̨nɔ̨n luwɔlaa hu, too mɛ̨i yee kɔ́nma, da nwumɛ̨, yɛ pələi gaa la háákələi.

⁸ Kɛlaa, yiihu, ɉu hvo nii kwɛa li, Yai-Laa kuɔ Yálá aa ku kpəli lɛɛ a vúlu, aa ku heei tɛɛ ku pɔ nwɔ kɛɛnąą maahɛɠɛɛ ɓa. Ku wɔ Yálá, yaa ku ɲɛ̨i pɔ̨nɔ̨, yaa hvaŋą wolo tɛɛ ku pɔ, ku wɔ luwɔlaa hu.

⁹ Mąąhɔlɔɓo, ɓɛlɔwai ku kɛ la luwɔlaa hu, hvo ə́ kili kulɔ li ku hu, ə́ ə́ kiliŋąhiɛ kuɔ, Pɛrsə tɔɔɓɛlaa ɲɛ̨i ɓa, ə́ wɔ wɛlikɛmąąlaa hu, ə́ ku nwun mąąɓo, ə gɛ, ku Yálá hee pɛlɛ́ muhəɠə, kuɔ nwɔ̨nɔ̨ bɛlɛ kpoloon tii muhəɠə a nįnɛ̨, ə́ ku mąą kɔ́nwɔ̨i tɛɛ ku pɔ Ɉerusalɛmə daai, da Ɉuda lɔi hu.

¹⁰ «Yii hu kɛa, ku wɔ Yálá, lə ɓə kwa pɛli moi mɛ̨nįɠaa ŋɛ̨i pulu? Mąąhɔlɔɓo, kwaa ə́ wɔ tíɓoɠaai lɛɛ laa;

¹¹ diɛi tii ə́ di tɛɛ ə́ wɔ tínuą pɔ, a ə́ kwɛi mɛ̨nį hu kulɔ nuą, yɛ́ kɛ diɛ: ‹Nɔi tii ka káá lii ɉu, ka ɉəɠə a ka wɔɔ, gɔhɔɓoi gaa a nɔi nuą kɛ nɛ̨ŋɛ̨n, da mɛ̨nį ɲɔ̨n aa nɔi laahvɛɛ nąą kəlee, a di wɔ túwɔ́ pələ ɲɔ̨n.

¹² Ka hvo ka lonnii nɛ̨ą tɛɛ di lon ɉinąą pɔ, ka hvo di lon nɛ̨ąą həɠə a ka lon ɉinąą di nɛ̨ąni. Ka hvo ka ɲɛ̨i kulɔ di wɔ liilaa da di wɔ kwəinɛ̨ɛ̨ pɔ. Yili ɓə a gɛ, ka hu ə walawala, ka nɔi tɔlɔ kulɔ, ɛlɛɛ, kaa di lɛɛ a kwɛlin yii a kɛ a ka lonnii di wɔ a yələ kəlee.›

¹³ Yili ɓa, mɛ̨nįɠaai kpɔ laa kuɔ, ə kulɔ ku wɔ túwɔ́ pələ ɲɔ̨n da ku wɔ nɛ̨ŋɛ̨nŋąą mąą mɛ̨nį hu. Kɛlaa, Yɛ́i ɓaa ku wɔ Yálá, ə́ ku wɔ nɛ̨ŋɛ̨nŋąą lɛɛ kuɔ a kpɛli, ə́ ə́ kili kulɔ ku wɔ nɛ̨ŋɛ̨nŋąą hu, hvó ku hon ni yɛ pələi ku túwɔ́ la. Ɛlɛɛ, yɛ́ gbəli wolo lɛɛ a vulú, yɛ́ naahɔn mo.

¹⁴ Yili a kɛ tii, kwa pɛli nwɔ̨nɔ̨ mą, ku ə́ wɔ tíɓoɠaai kala, kuɔ too nu ɲɔ̨nwɔ̨ɔ̨ɠaa ŋɛ̨i pɔ hilɛ taai mɛ̨nį hu, a kɛ tii, hvo pai ə́ líiholii ku pɔ, ə́ ku nwun na pili, nu tɔ̨nɔ̨ kpɛli hva lɛɛ?

¹⁵ Yai-Laa, Israɛlə nwɔ Yálá, ə́ tələnmoɔi, háákələi hvólói ŋɛ̨i yee mu, yá ku kaa ku ɓo ni a ku húlú, yɛ́ ɓə nu kpəli woloi ŋɛ̨i kulɔ ɉu. Kwaa pa ə́ lííla a ku wɔ nɛ̨ŋɛ̨nŋąąi, ɛlɛɛ yaan, mɛ̨nį a kɛ ŋɛ̨i, nui lɔpee ta hva pɛli tɔɔi ə́ lííla.»