Ɛsdrasə 7 - Yálá laawoo hɛɓɛ (dc)

Ɛsdrasə kɛ mɛ̨nįɠaa

¹ Mɛ̨nįɠaai tii tɛɛ pulu, Pɛrsə tɔɔmun Artasɛrsɛsə nwɔ tɔɔlaa lɔwai hu; Ɛsdrasə ŋɛ̨i kɛ a Seraya lon, a Azaria lon, a Hilkiya lon,

² Salumə lon, Sadɔkə lon, Ahituvə lon,

³ Amaria lon, Azaria lon, Merayotə lon,

⁴ Zerahia lon Uzi lon, Buki lon,

⁵ Avisua lon, Pinasə lon, Eleazarə lon, ɉaláá laa həli mun gɛnɛ̨ Aarɔn lon,

⁶ Ɛsdrasə tii ə həɠə Babilonə daai. Ə kɛ a hɛɓɛ́ pɛ̨ɛ̨ mun, dɔ́n ɉɛɓɛ́i Yai-Laa, Israɛlə nwɔ Yálá ə dɛɛ Moisə pɔ, ə kɛ a gɔlɔnŋąą. Yɛ pələi nwɛli ə kɛ la nwɔ Yálái ɓa, yii gaa a Yai-Laa, yii kpɔ ə ɉu hvɛli tɔɔmun ma, di gəlee tɛɛ bɔ.

⁷ Israɛlə lonnii tamąą, da ɉaláá laa həli nuą tamąą, da Levi lonnii tamąą, wələ too nuą tamąą, bɛlɛ́ laaləi mąąkpɛ nuą tamąą, da tɔɔmun nwɔ tínuą tamąą də li Ɉerusalɛmə, tɔɔmun Artasɛrsɛsə nwɔ tɔɔlaa gwɛlan mɛ̨ihveelɛ lɔwai.

⁸ Ɛsdrasə da nuąi tii di həli Ɉerusalɛmə a tɔɔmun nwɔ tɔɔlaa gwɛlan mɛ̨ihveelɛ lɔwai, ɲąnin nɔɔli nąą.

⁹ Yaan, ɲąnin dɔlɔɔ nwɔ hvóló tɔlɔɔ, di həɠə Babilonə, ɛlɛɛ ɲąnin nɔɔli nąą nwɔ hvóló dɔlɔɔ yələ ɓə di həli la Ɉerusalɛmə, mąąhɔlɔɓo, nwɔ Yálái yee ə kɛ di mɛ̨i.

¹⁰ Mąąhɔlɔɓo, Ɛsdrasə ə vaŋą lɔ Yai-Laa nwɔ tɔ́n kalan ŋąą ɓa, yɛ bɔ mɛ̨nį kɛ, ɛlɛɛ, yɛ ɉon bələ kalan Israɛlə lonnii diɛ.

¹¹ Tɔɔmun Artasɛrsɛsə ə hɛɓɛ́ tɛɛ ɉaláá laa həli mun da ɉɛɓɛ́ pɛ̨ɛ̨ mun Ɛsdrasə ɓa, yai kɛ a Yai-Laa Israɛlə nwɔ Yálá nwɔ tɔ́nŋąąi kɔ́lɔn mun gɛnɛ̨. Ɉɛɓɛ́i tii hu woo ka:

¹² «Artasɛrsɛsə, tɔɔɓɛlaa di wɔ tɔɔmun, gáá yələkɔlɔn ɉu Yálá nwɔ tɔ́n gɔlɔn mun a haláá laa həli mun Ɛsdrasə túwɔ́ ɓoi, yɛ li la tɔwɔ pələ.»

¹³ «Wóó ka, gɛ̨ diɛ: Nui lɔpee gaa nwɔ́ lɔi hu a Israɛlə mun da, ə kɛ a haláá laa həli nuą, ə kɛ a Levi huwuhu nuą, da kɛ bɔ də li Ɉerusalɛmə, ka diɛni ka li.

¹⁴ Mąąhɔlɔɓo, tɔɔmun da nwɔ kalanɉon mɛ̨ihveelɛi ɓə ə́ tɔɔi, ə́ kaa lii Ɉuda lɔi da Ɉerusalɛmə taa di mɛ̨i kaai, yɛ bələi gaa la ə́ wɔ Yálái nwɔ tɔ́n ɉɛɓɛ́i gaa ə́ yəi ɉu.

¹⁵ Yili pulu, nwali da ɉɛnii tɔɔmun da nwɔ kalanɉonŋąą di kaa dɛɛi Israɛlə nwɔ Yálái pɔ, a gɔ́ hɛnŋąą, yaa nwɔ pɛ́lɛ́i gaa Ɉerusalɛmə; yɛ́ li di laai lɛi;

¹⁶ nwali da ɉɛnii lɔpee ə́ kaa pai ɉɔlɔɓoi Babilonə lɔi hu, da Yálá kɔ́ hɛnŋąąi nɔi lonnii da ɉaláá laa həli nuą kaa pai pai la, a di wɔ Yálá nwɔ pɛ́lɛ́i tii Ɉerusalɛmə nwɔɔ,

¹⁷ mąąnɛ̨ɛ̨ ə́ nįŋɛ̨ hilɛɠaa, ɓɛlaa hilɛɠaa, ɓɛlaa lonnii, da nɛɠɛ hunwɔ̨, ə mą kɛ nɔɔ, ə́ di ya a nwalii tii kulɔi, ka wɔ Yálái ŋą pɛ́lɛ́i mu Ɉerusalɛmə daai.

¹⁸ Ɓɛi kɛa a nɛ̨ɛ̨ kaa, ka ə́ ɓɛlaa, ka nwali kpəli da ɉɛni kpəli lɔ laa, ka gɛ tii a ka wɔ Yálái liiɓa.

¹⁹ Ɉɛnɲąŋąɠaai di kaa pai dɛɛi ə́ pɔ, ə́ wɔ Yálá nwɔ pɛ́lɛ́i mąą mɛ̨nį ɓa, ə́ yiliɠaai laa Yálá hee pɛlɛ́ mu Ɉerusalɛmə daai.

²⁰ Ɉɛn ə́ mąą kpaan a kɛ mą, ə́ wɔ Yálái nwɔ pɛ́lɛ́i mąą mɛ̨nį ɓa, yii mąąnɛ̨ɛ̨ ka gɛ, yá yili hɔ̨nwɔ̨ həɠə dɔɔ kwəlii hɛn gɔw hu.

²¹ Ɲą́ą́ tɔɔmun Artasɛrsɛsə, gáá moi Eufratə ya voló tooi pələ lɔi nwɔ wali pɛlɛ la nuą kəlee diɛ, gɛ́: mɛ̨nįi lɔpee yələkɔlɔn ɉu Yálá nwɔ haláá laa həli mun Ɛsdrasə a vɛli kaa, ka gɛ kpɔlɔ tii.

²² Da pɛli di wali kilə waa haaɓa tɛɛ, mɔ̨nun kilə waa pow haaɓa, lɔɔ litɛlɛ waa nąąn da wulɔ litɛlɛ waa nąąn, ɛlɛɛ da kpolo yii lɔpee yá kɛ bɔ.

²³ Mɛ̨nįi lɔpee yələkɔlɔn ɉu Yálá a mo, mąąnɛ̨ɛ̨ ka gəlee kɛ a mąąhulaa, nwɔ pɛ́lɛ́i mąą mɛ̨nį ɓa, əgɛ nwɔ liiholi hvo pa nee yɛɛ tɔɔmun mɛ̨i, da nonnii, ɛlɛɛ da di wɔ lɔi.

²⁴ Yili pulu, gaa nwɔ̨nɔ̨ moi kaa, ka hvo nii hɔ̨nwɔ̨ mɛ̨nį ɓo, ɉaláá kulɔ nuą diɛ, ə mą kɛ Levi lonnii, da nwələ too nuą, da bɛlɛ́ laaləi mąąkpɛ nuą, da goló kɛ nuą, ɛlɛɛ da Yálá hee pɛlɛ́ mu koló kɛ nuą lɔpee ta.

²⁵ «Yii ɓaa yɛ́ Ɛsdrasə, yɛ́i ŋɛ̨i Yálá aa kili tɛɛ ə́ pɔ da nwɔ tɔ́n, kiti tee nuą da mɛ̨nį ɓo kɛ nuą, diɛi da Eufratə ya voló tooi pələ nuą kəlee mąą mɛ̨nį hutɔɔ, da nuąi kpɔ ə́ wɔ Yálái nwɔ tɔ́n kɔ́lɔn, nuąi di hvo gɔlɔn, ka di mąą kwɛli mą.

²⁶ Nui lɔpee a wala ə́ wɔ Yálái nwɔ tɔ́n da dɔɔmun vaa woo hon a nɛlɛɛ, di mɔ̨nɔ̨ ɓo, di baa, a wala kɛ tii di gbɛ nɔi, a wala kɛ tii, di hɛn gulɔ mą, a wala kɛ tii, di doo gaho ŋa.»

Ɛsdrasə ə Yálá hɛɠɛɛɓo

²⁷ «Mąąwiɛ kaa Yai-Laa ɓa, ku nąnni di wɔ Yálá; Yaai ə hvaa mą, Yai-Laa nwɔ pɛ́lɛ́i gaa Ɉerusalɛmə, ə mąą mɛ̨nį too tɔɔmun nii hu.

²⁸ Aa hvaa mą, tɔɔmun aa ɲɛ̨i lɛlɛɛ hee mą́ą́, da nwɔ ɲɛ̨itɔwɔ nuą, ə mą kɛ nwun nąmįną, diɛi kpɔ di yee walawalaa. Mɛ̨nįi tii ə vaŋą lɔ, ŋį́ Israɛlə kalanɉonŋąą ŋąąkpɔn, kwa diɛni ku pa.»