Ɛsdrasə 6 - Yálá laawoo hɛɓɛ (dc)

¹ Nąąlɔwai, tɔɔmun Dariusə ə mo, ə gɛ di dɔɔ hɛɓɛ́ hu kaa, Babilonə.

² Gɛɛ tii, Ɛkbatanə daai, Medi lɔi hu ɓə, di hɛɓɛ́ yili kaa laa, bɛ̨ɛ̨ ɉu, diɛ kɛ mą:

³ «Tɔɔmun Sirusə nwɔ tɔɔlaa gwɛlan dɔlɔɔ, ə mo yɛ diɛ: ‹Yálá hee pɛ́lɛ́i Ɉerusalɛmə, di kaa pai pənəi di bɛlɛi tii tɔɔ, ə gɛ diɛ haláá kulɔ laa, ɓɛi kɛ a dɔɔi bɔlɔ-pɔlɔ. Dɔɔɉu kaa pai kɛi a yee laa mą pow mɛ̨ida, ɲąą kɛnɛ̨ yee ə ɓo a yee laa mą pow mɛ̨ida.

⁴ Di kaa pai kwɛni haɠaa tɔɔi a ɲɛli haaɓa, di wulu nįnɛ̨ yɛli tɔ̨nɔ̨ tɔɔ. Gəlee hɔ̨nwɔ̨ kaa pai kulɔi tɔɔmun ɲəi bɛlɛ́n.

⁵ Yili pulu, Yálá hee pɛlɛ́ mu hɛnŋąą kpɔ wɔlɔ tɔɔmun Nabukodonosorə ə ɉəɠə yɛ li la Babilonə, yɛi kɛ a hɛni, a wala kɛ tii wali, di kaa pai pai a gəlee Ɉerusalɛmə, di gəlee hee ɉeei Yálá hee pɛlɛ́ mu.›»

⁶ «Yii hu kɛa, Tatnai yai a Eufratə voló tooi pələ nwɔ gbahanama, da Setarə-Bɔznai da di ɓɛlaa, yiiɠaai di kaa a nɔi nwun nąmįną, ka nuąi tii lɛɛ laa, ka hvo hvaa di pɔ.

⁷ Ka nuąi tii lɛɛ laa, di Yálá nwɔ pɛ́lɛ́i tɔɔ, Ɉuifəɠaa di wɔ gbahanama da Ɉuifə kalanɉonŋąą di bɛlɛ́ tɔɔ dɔɔi bɔlɔ ɓa.

⁸ Yii gáá tí la, yɛ hvilɛn na Ɉuifə kalanɉonŋąą diɛ, da Yálá hee pɛlɛ́ tɔɔ mɛ̨nį, ya ka: Dɔɔ hɛn gɔw hu, nįįhɔ̨nwɔ̨ yii a kɛ həɠəi ɲa pulu pələ, gəlee a lɔ bɛlɛi tii tɔɔ mɛ̨nį hu, ə gɛ golói tii hvo pa tɔɔ.

⁹ Hɛnŋąąi kpɔ bɛliɛ di wɔ haláá hɛn ma, yii di kaa pai gulɔi yələkɔlɔn ɉu Yálá ɓa, nįŋɛ̨ gbɔn, ɓɛlaa hilɛ, ɓɛlaa lon, kpolo, lɔɔ da wulɔ, da gəlee tɛɛ Ɉerusalɛmə haláá həli nuą pɔ, yɛ bələi di kaa la bɔ, yələ ɓɔ pələ tɛitɛi, di hvo hvɛɠɛ a hɛn da.

¹⁰ Ə gɛ, diɛ yələkɔlɔn ɉu Yálá liilaa haláá kulɔ, ɛlɛɛ, diɛ Yálá hvɛli tɔɔmun da nonnii di yii hvóló mąą mɛ̨nį ɓa.

¹¹ Nwɔ́ tɔ́n ŋą́ą́ dɔɔ ya ka: Nui lɔpee a nwooi tii dɔ̨nɔ̨ kpɛli kulɔ ŋą, da mąą nu nwɔ pɛlɛ́ hɔlɔɔn dɔ̨nɔ̨ kulɔ ɉu, di ɉɛlɛn mą, ɛlɛɛ, di nwɔ pɛ́lɛ́i kɛ a tulun.

¹² Ɲą́ą́ Dariusə, gɛ́, Yálá yii naa kaa gɛɛnąąi tii, tɔɔmun a wala kɛ tii lɔi lɔpee a muhəɠə nwɔ pɛ́lɛ́i laa ɓa Ɉerusalɛmə daai, Ɲálái tii ə mąą nu nwun na pili. Gɛ́, mɛ̨nįi ŋɛ̨i ŋį́ mo, ə kɛ kpɔlɔ tii, da hvo həɠə mą.»

¹³ Nąąlɔwai, gbahanama Tatnai, yii kɛ ɲa pulu pələ da Setarə-Bɔznai da di ɓɛlaa, di hvilɛn gbɔlɔ tɔɔmun Dariusə wooi tii pulu.

Yálá hee pɛlɛ́ laa həli mɛ̨nį

¹⁴ Ɉuifə kalanɉonŋąą yee ə lɛɛ bɛlɛ́ tɔɔ koló ɓa a nɛlɛɛ, yɛ pələi Yálá kwəi mɛ̨nį hu kulɔ nuą Aze da Ido lon Zakari di mo la; di bɛlɛ́ tɔɔ koló laa kulɔ, yɛ pələi Israɛlə nwɔ Yálá ə mo la; yɛ bələi Pɛrsə tɔɔɓɛlaa Sirusə, Dariusə da Artasɛrsɛsə di mo la.

¹⁵ Di bɛlɛ́ tɔɔlaa kulɔ a Dariusə nwɔ tɔɔlaa gwɛlan mɛ̨ida nąą, a ɲąnin ŋɛ̨i da kɛ mą Adarə, nwɔ hvóló haaɓa yələ.

¹⁶ Israɛlə lonnii, ɉaláá laa həli nuą, da Levi lonnii, ə mą kɛ nuąi ŋɛ̨i həɠə luwɔlaa hu, di Yálá hee pɛlɛ́ laa ɓo hɛli pu kwəinɛ̨ɛ̨ hu.

¹⁷ Yálá nwɔ pɛ́lɛ́i tii laa ɓo mɛ̨nį hu, di nįŋɛ̨ hilɛ nwundɔ̨nɔ̨, ɓɛlaa hilɛ nwun veelɛ ɓɛlaa lonnii nwun nąąn kulɔ a haláá. Ɛlɛɛ, di ɓoli hilɛ pow kɔ́w hveelɛ kulɔ a haláá, Israɛlə huwu pow kɔ́w hveelɛi kɛ nɛ̨ŋɛ̨n maahvaa lɛɛ mɛ̨nį ɓa.

¹⁸ Di ɉaláá laa həli nuą da Levi lonnii hee a di kpulu, yɛ pələi di kɛ koló ə kɛ la, Yálá hee pɛlɛ́ mu Ɉerusalɛmə daai, yɛ pələi Moisə nwɔ hɛɓɛ́i ə gɛ pələ lɛ la.

Pakə hɛli pu mɛ̨nį

¹⁹ Nuąi kpɔ həɠə nuwɔ laa hu di pa, di pakə hɛli pu. Ɲąnįn dɔlɔɔ nwɔ hvóló pow kɔ́w nąą ɲələ,

²⁰ ɉaláá laahəli nuą da Levi lonnii di di mąąhəɠə gee ɓa, di pakə hɛli pu nuąi kpɔ həɠə luwɔlaa hu di pa, di mąą mɛ̨nį ɓa, da ɉaláá laa həli nuą, ə mą kɛ diɛ kpinįi.

²¹ Israɛlə lonnii kəlee di pakə kɔ̨nɔ̨n mįi, ə mą kɛ nuąi kulɔ nuwɔ laa hu di pa, di pa di kaayɔwɔɠaa pɔ, ə mą kɛ nuą di yee kulɔ hali mɛ̨nį hu, da diɛni diɛ kwɛli hvilɛn Yai-Laa Israɛlə nwɔ Yálá ɓa.

²² Di pənə di voló mɛ̨ihveelɛ hɛli ŋɛ̨i da bu a lɛɠɛ yii dɛ hɛn və ɉu, di yili pu gee ɓa a kwəinɛ̨ɛ̨. Mąąhɔlɔɓo, Yai-Laa ə di kwəinɛ̨ɛ̨, ə Asiri tɔɔmun ɲɛ̨i lɛlɛɛ hee diɛ, ə di yee kɔ́n gɛ ɉu, Yálá nwɔ pɛ́lɛ́i tɔɔ mɛ̨nį ɓa, yii gaa a Israɛlə nwɔ Yálá.