Ɛsdrasə 5 - Yálá laawoo hɛɓɛ (dc)

¹ Yələ ta Yálá kwəi mɛ̨nį hukulɔ nuą hveelɛ Aze da Zakari, diɛi kɛ a Ido lonnii, di Yálá kwəi mɛ̨nį ɓo Ɉuifəɠaai ŋɛ̨i kɛ Ɉerusalɛmə daai da Ɉuda lɔi hu diɛ, Israɛlə nwɔ Yálá laa hu.

² Saltiɛlə lon Zorobabɛlə, da Yosadakə lon Ɉosue, di di muhəɠə, Yálá hee pɛ́lɛ́i ŋɛ̨i gaa Ɉerusalɛmə daai, di goló kɔ́wɔ tɔɔ gwəi mɛ̨nį hukulɔ nuą diɛ kpɔn mąą tɛɛ di pɔ.

³ Nąąlɔwai, Eufratə ya voló tooi pələ nwɔ lɔi nąmui ŋɛ̨i da kɛ mą: Tatnai; da Setarə-Bɔznai, ə mą kɛ, da di ɓɛlaa, di pa diɛ nuąi tii kaa, di di mąąni kɛ, diɛ kɛ diɛ: «Gbɛɛ ɓə kɛ kaa, ka Yálá hee pɛlɛ́ tɔɔ, da ɉįi ŋɛ̨i daa ɓa?

⁴ Yii ku kaa bɔ, ya ɓaa; nuąi ka diɛni ka káá golói ŋɛ̨i kɛi, ka di laa ɓo kuɔ.»

⁵ Kɛlaa, Yálá ɲɛ̨i ə kɛ Ɉuifə kalanɉonŋąąi tii mɛ̨i, di hvo pɛli golói tii kpɛlai pələi. Di lɛɛ goló kɛi, ə lɛɛ la ɉu, diɛ tɔɔmun Dariusə woo mąąkpɔn.

Di Ɉuifəɠaa laa ɲɔ̨nwɔ̨ɔ̨ ɓo tɔɔmun Dariusə ɓa

⁶ Ɉɛɓɛ́i nɔi nwun nąmu Tatnai da Setarə-Bɔznai di gɛ, ə mą kɛ, da nɔi nwun nąmįną, diɛi di kaa Afarsakə Eufratə ya voló tooi pələ, diɛ dɛɛ tɔɔmun Dariusə ɓa,

⁷ ɉu woo ka: «Tɔɔmun Dariusə, ə́ yii ə kwɛa kɛi a mo tii Yálái ə kɛ! Ə həli yɛ́!

⁸ «Ku wɔ mɛ̨nį nąmu tɔɔmun, ku kaa ə́ kili pui ɉu, kuɔ yɛ́, kwaa li Ɉuda lɔi hu, Yálá Mɔlɔ nwɔ pɛ́lɛ́i mu; daa bɛlɛi tii tɔɔ a kwɛni mąą haɠaaɠaa, daa wulu lɔ bɛlɛ́ nwąną hu, daa golói tii kɛ a yɛlɛ, aa lɛlɛ di yəi.

⁹ Ku galanɉonŋąą mąąnin gɛ, kuɔ diɛ: Gbɛɛ ɓə bɛlɛ́i ŋɛ̨i tɔɔ mɛ̨nį mąą laa tɛɛ ka pɔ, da ɉįi tɔɔ mɛ̨nį?

¹⁰ Ku pənə nwɔ̨nɔ̨ kuɔ diɛ, ka di laa tɛɛ ku pɔ, ə gɛ, ku pa kɛ golói tii ɲɛ̨itɔwɔ nuą laa ɓo yɛ.

¹¹ Nwoo ŋąąpənəi di dɛɛ ku pɔ ya: ‹Kuɔ ɓə ku kaa a yələkɔlɔn da lɔi, di pɛli Yálá nwɔ koló kɛ nuą, bɛlɛ́i ŋɛ̨i wɔlɔ kɛ ɓɛ, ya ɓə ku kaa pənəi ku dɔɔ. Tɔɔmun gɛnɛ̨ ta ə wɔlɔ kɛ a Israɛlə nuą di wɔ tɔɔmun, ya ɓə bɛlɛi tii tɔɔ ə nąą kulɔ.

¹² Kɛlaa, yii kɛa wɔlɔ ku nąnni di yələkɔlɔn ɉu Yálá liiholi, ə wɔlɔ di kwɛlɛ Babilonə tɔɔmun Nabukodonosorə ɓa, yai ŋɛ̨i kɛ a Kalde mun; yili ə bɛlɛ wolo, ə nuą həɠə, ə li a diɛ Babilonə.

¹³ Kɛlaa, Babilonə tɔɔmun Sirusə nwɔ tɔɔlaa gwɛlan dɔlɔɔ hu, ə mo yɛ, ku pɛlɛ́ tɔɔ Yálá ɓa.

¹⁴ Ya ɓə gɛ, ɉɛnɲąŋąɠaai ŋɛ̨i wɔlɔ kɛ Yálá yəi bɛlɛ́n Ɉerusalɛmə daai, yɛ ɓo a hɛni da wali, Nabukodonosorə ə wɔlɔ ɉəɠə, ə li la Babilonə, ə bu nwɔ haliɠaai yəi bɛlɛ́n. Tɔɔmun Sirusə ə ɉɛnŋąąi tii kulɔ ɉali pɛ́lɛ́i tii mu, nui ŋɛ̨i da kɛ mą Sɛsbasarə yai ə ɉee a nɔi nwun nąmu, ə ɉəɠə ə dɛɛ bɔ.

¹⁵ Yɛ yili ɓa: Ɉɛnɲąŋąɠaai ŋɛ̨i həɠə, ə́ li ə́ ɉee Yálá yəi bɛlɛ́n Ɉerusalɛmə, ɛlɛɛ, di Yálá nwɔ pɛ́lɛ́i tɔɔ, ɓɛi wɔlɔ gaa laa tɔɔ ni.

¹⁶ Nąąlɔwai tii, Sɛsbasarə ə pa ɓɛ Ɉerusalɛmə daa, ə Yálá hee pɛlɛ́ kɔ́wɔ tɔɔ. Yili pulu ɓə kɛa, ku ku yee pɛlɛ la goló ɓa, kuɔ gɛ, kɛlaa, hvo nii kpɛɛ li.›

¹⁷ «Yii hu kɛa, tɔɔmun, akɛ ya hvaa mą, Babilonə daai, dɔɔ hɛɓɛ́i gaa laa, də li di ɉu kaa, akɛ tɔɔmun Sirusə ə wɔlɔ yili mąą laa tɛɛ di pɔ, ə gɛ, di Yálá nwɔ pɛ́lɛ́i tɔɔ Ɉerusalɛmə daai. Yili pulu, yii tɔɔmun a gaa, ə nwɔ kiliŋąhiɛ laa həli kuɔ.»