Ɛsdrasə 4 - Yálá laawoo hɛɓɛ (dc)

Ɉuifəɠaa di yowoɠaa di Yálá hee pɛlɛ́ tɔɔ mɛ̨nį tee mɛ̨i

¹ Ɓɛlɔwai Ɉuda nu huwu da Bɛnɉamɛn huwuhu nuą di yowoɠaa di bələ mɛ̨n na, diɛ kɛ diɛ, nuąi ŋɛ̨i həɠə nuwɔ laa hu, di pa, di kaa Yai-Laa Israɛlə nwɔ Yálá hee pɛlɛ́ tɔɔi,

² di pa di həli Zorobabɛlə ɓa da bɛlɛ nąmįną, diɛ kɛ diɛ: «Ku kaa bɔ, gwa kaa ni gu Yálá hee pɛ́lɛ́i ŋɛ̨i tɔɔ, mąąhɔlɔɓo, kuɔ kpɛli, kwa kɛ kwɛli hvilɛn ɉii ka wɔ Yálái ɓa, ə həɠə Asiri tɔɔmun Asaradɔn nwɔ lɔwai ɓa, yaai pa ɓɛ a kuɔ, kwa kɛ haláá kulɔi Yálá ɓa.»

³ Kɛlaa, Zorobabɛlə da Ɉosue, ə mą kɛ, Israɛlə nuą bɛlɛ nąmįną kəlee, di di woo ŋąąpənə, diɛ mą: Mąą hvo nɛ̨ɛ̨li, gwa kaa ni gu hvo kpɔn ku wɔ Yálái nwɔ pɛ́lɛ́i ɓa, gu hvo dɔɔ. Kuɔ tɔ̨nɔ̨ gbən mə mąąnɛ̨ɛ̨, ku Yai-Laa Israɛlə nwɔ Yálá nwɔ pɛ́lɛ́i tɔɔ, yɛ bələi Pɛrsə tɔɔmun Sirusə ə mąą laa tɛɛ la ku pɔ.

⁴ Nɔi nuą di gɔwɔ tɔɔ kɛa diɛ Ɉuifəɠaa hviikpɛɛ, diɛ di yee kɔ́nwɔ̨n ɉu haa, ə gɛ, di kpəɲan bɛlɛ́ tɔɔ mɛ̨nį hu.

⁵ Nuą tii, di nu hala, ə gɛ, di Yálá hee pɛlɛ́ tɔɔ mɛ̨nį hu kala, di gɛ tii a tɔɔmun Sirusə nwɔ lɔwai, ə həli la Dariusə nwɔ lɔwai ɓa, diɛi kɛ a Pɛrsə tɔɔɓɛlaa.

Di Ɉuifəɠaa laa ɲɔ̨nwɔ̨ɔ̨ ɓo tɔɔmun Asuerusə ɓa

⁶ Tɔɔmun Asuerusə nwɔ tɔɔlaa gɔwɔ tɔɔi lɔwai, di Ɉuifəɠaa maaɲaba lɔ hɛɓɛ́ pɛ̨ɛ̨, diɛi kɛ Ɉuda lɔi hu, da Ɉerusalɛmə daai.

⁷ Tɔɔmun Artasɛrsɛsə nwɔ tɔɔlaa lɔwai, Bislamə, Mitredatə, Taveɛlə, da di ɓɛlaa kəlee, di hɛɓɛ́ pɛ̨ɛ̨ di dɛɛ tɔɔmun ma. Di ɉɛɓɛ́i tii pɛ̨ɛ̨ a Aramə nuą di wɔ hɛɓɛ́ kɔ́w, da di hvaa woo.

⁸ Rehumə, yai kɛ a gbahanama da nwɔ hɛɓɛ́ pɛ̨ɛ̨mun Simsai, di hɛɓɛ́ pɛ̨ɛ̨ Ɉerusalɛmə mąą mɛ̨ni ɓa, di dɛɛ tɔɔmun Artasɛrsɛsə ma, diɛ mą:

⁹ «Rehumə, yii gaa a gbahanama da nwɔ hɛɓɛ́ pɛ̨ɛ̨mun Simsai, ɛlɛɛ, da di ɓɛlaaɠaa, diɛi di kaa a Din, Afarsatakə, Tarpɛlə, Afarasə, Urukə, Babilonə, Susə, Deha da Elamə,

¹⁰ ə mą kɛ, nuąi wɔlɔ mɛ̨nį kɔ́lɔnmun gɛnɛ̨ Asnaparə ə pa a diɛ, ə di hee Samari daai, daɠaa di hee Eufratə ɲa lee koo ɓa, voló tooi pələ, ɓɛlii pələ, yɛ li la tɔwɔ pələ.»

¹¹ Ɉɛɓɛ́i di bɛ̨ɛ̨, ɉu woo ka: «Ə həli ku wɔ tɔɔmun Artasɛrsɛsə ɓa! Nwoo ŋɛ̨i kaa kulɔi ə́ wɔ tínuą da ə́ wɔ koɓitaa yii gaa Eufratə ya voló tooi pələ, di la, yɛ li la tɔwɔ pələ.

¹² «Ku wɔ mɛ̨nį nąmu! Ku kaa ə́ kili pui ɉu, kuɔ yɛ́: Ɉuifəɠaa ŋɛ̨i həɠə ə́ pɔɔli diɛ pa ku pɔ ɓɛ Ɉerusalɛmə daai, di kaa pənəi diɛ nwąnąlɔ taa da gwɛli tee taa ŋɛ̨i tɔɔ; diɛ ɉįi tɔɔ, diɛ pɛlɛ́ tɔɔ bɛlɛ kpoloonŋąą ŋą.

¹³ Tɔɔmun, ə́ kili ə kɛ ɉu, da pənə da daai ŋɛ̨i tɔɔ, di pənə di ɉįi tɔɔ, di hvo pai gɛi, di hvo kulɔ-kulɔ hɛnŋąą kulɔ, ə mą kɛ nįįhɔ̨nwɔ̨; yili yaan a kɛ tii, gaa pai kɛi a pɔn bɛlɛɛ dɔɔ hɛn gɔw ɓa.

¹⁴ Yɛ bələi kuɔi ŋɛ̨i ku kaa la a ə́ yee mu nuą, ku hva pɛli lɛɛi heeni ɓɛlɛ hvo kpɛɛ dɔɔlaa ɓa. Yili ɓə gɛ,

¹⁵ ku kaa bɔ, ɉɛɓɛ́i tii ə́ nąn di wɔ mɛ̨nį pɔlɔɠaa pɛ̨ɛ̨ kaa ɉu, ɉu pili. Gwa ɉɛɓɛ́i tii hu kaa, ə́ kaa pai mɛ̨nį ta pɛ̨ɛ̨ kaai laa daai ŋɛ̨i laa mɛ̨i, diɛ kɛ mą: Kwɛli tee taa li, dɔ̨nɔ̨ hvo mą dɔɔɓɛlaa diɛ, da goɓitaaɠaa. Ɉɛɓɛ́i tii a nɛ yɛ, daai ŋɛ̨i, ɉu nuą di wɔlɔ kɛi di kwɛli tee. Mɛ̨nįi gɛ daa wolɔɔ la ya li.

¹⁶ Tɔɔmun! Ku kaa ə́ kili pui tii ɉu, kuɔ yɛ́: Akɛ da daa ŋɛ̨i tɔɔ, di pənə di hįį tɔɔ mą, yii a kulɔ nąą pulu, ya ɓaa: ə́ wɔ yee pɛli mąą hva kɛ Eufratə ɲa lee koo ɓa lɔiɠaa ŋɛ̨i mɛ̨i, voló tooi pələ.»

Tɔɔmun Artasɛrsɛsə nwɔ woo ŋąąpənə

¹⁷ Tɔɔmun ə nwoo ŋąąpənə kɛ, yɛ diɛ: «Ə həli nɔi nwun nąmu Rehumə ɓa, da nwɔ hɛɓɛ́ kɛmun Simsai, da di ɓɛlaai di heeɛ kaa Samari, da yiiɠaai kpɔ di kaa Eufratə ɲa lee voló tooi pələ: Gáá ka tuwɔ ɓoi kpɔ tii dəŋ.»

¹⁸ «Ɉɛɓɛ́ ŋɛ̨i ka dɛɛ mą́ą́, di mo, di nwoo laa tɛɛ.

¹⁹ Pələi ŋɛ̨i ka mo la, ŋį́ nuą tí, daa ɉɛɓɛ́ɠaa hu kaa, di gaa kpɔlɔ yɛ bələi tii ka mo la daai tii laa mɛ̨i, diɛ kɛ mą: ‹Ə gɔwɔ tɔɔ kpɔ wɔlɔ, daai tii a muhəɠə tɔɔɓɛlaa laa ɓa, yɛ gwɛli tee, nąą lɔ ɓə kwɛli tee mɛ̨nįɠaa da kulɔ laa.›

²⁰ Diɛ tɔɔɓɛlaa huwalawalaa di wɔlɔ di muhəɠə Ɉerusalɛmə daai, di hee Eufratə ya lee voló tooi pələ lɔiɠaai tii kəlee mɛ̨i, diɛ kulɔ-kulɔ hɛnŋąą kulɔ diɛ, da nįįhɔnwɔ.

²¹ Yili ɓə gaa mą, ka mo Ɉuifəɠaai tii diɛ, di di wɔ kolói tii kpəla bələi, di hvo kɛ di kaa pənəi di daai tii tɔɔ, hvo kɛ li ɲą́ą́ ŋɛ̨i, ŋį́ mąą laa tɛɛ di pɔ.

²² Mɛ̨nįi ŋɛ̨i ŋį́ bɛ̨ɛ̨, ka hvo dɔ̨nɔ̨ kpɛli too ka kɔ́wɔ pɔ, ə gɛ, mɛ̨nį ɲɔ̨n tii hvo pa kɛnɛ̨, hvo pɔn bɛlɛ dɔɔ laa ɓa.»

²³ Yii lɔ tɔɔmun Artasɛrsɛsə nwɔ hɛɓɛ́i tii ɉu woo ə həli Gbahanama Rehumə ɓa, da nwɔ hɛɓɛ́ kɛ mun Simsai, da di ɓɛlaa, di di muhəɠə kpɔlɔ tii ɉa, də li di həli Ɉuifəɠaa diɛ Ɉerusalɛmə daai, di di wɔ kolói tii kpəla mą a huwalawala.

Di pənə nwɔ̨nɔ̨ di Yálá hee pɛlɛ́ tɔɔ koló muhəɠə

²⁴ Ɓɛlɔwai di kpəla la Yálá hee pɛlɛ́ tɔɔ mɛ̨nį ɓa Ɉerusalɛmə, ə lɛɛ kpɔ tii, ə lɛɛ la ɉu Pɛrsə tɔɔmun Dariusə nwɔ tɔɔlaa gwɛlan veelɛ lɔwai.