Ɛsdrasə 10 - Yálá laawoo hɛɓɛ (dc)Ɉuifəɠaa di nwɛ̨ą nɛ̨ąą kulɔ lɔwɛi 1 Ɓɛlɔwai Ɛsdrasə ə kɛi Yálá hvɛli la, yɛ hvaa gɛ nɛ̨ŋɛ̨nŋąą diɛ, yɛ wɔlɔ Yálá nwɔ pɛ́lɛ́i laaləi, Israɛlə nu kpulu kɛnɛ̨, hinąą mąn, nɛ̨ąą mąn da nɛapɛlɛɛ di di ŋąąkpɔn gwɛlɛ. Mąąhɔlɔɓo, nɔi lonnii di kɛi ɲɛ̨iya wɔlɔ kpɔ-kpɔɔ ɓo. 2 Ya ɓə, Yehiɛlə lon Sekania, yai kɛ a Elamə lon da, ə mo Ɛsdrasə ɓa, yɛ mą: «Kwa ku hɔn gɛ a Yai-Laa, a huwu takpɛli nɛ̨ąą həɠəi ku mo a ku nɛ̨ąni, kɛlaa ə mą kɛ tii, Israɛlə kilitɔɔi wolo kaa laa. 3 Gwa gu wɔ Yálái ni gu mįnɛ̨ həɠə yiihu, ku ku yee kulɔ nwɛ̨ą nɛ̨ąą kəlee hu da di lonnii, yɛ bələi yɛ́i a ku wɔ mɛ̨nį nąmu, ka nuąi kpɔ da ɲɔw gu wɔ Yálá nwɔ tíɓoi ɓa, ka ku liɛwoo kɛ la. 4 Ə́ muhəɠə, mąąhɔlɔɓo, ə́ mąą mɛ̨nį li, ku kaa ə́ pulu. Ə́ liikpələ gu goló kpala tɔɔ.» 5 Ɛsdrasə ə muhəɠə nąąlɔwai, ə mo ɉaláá laa həli nuą nwunąməną diɛ, da Levi huwuhu nuą, da Israɛlə nu huwu kəlee, di di kwɛla; di gɛ yɛ bələi di mo la. 6 Ɛsdrasə ə həɠə ɓɛi tii ə kɛ laa Yálá nwɔ pɛ́lɛ́i laaləi; ə li Ɛliasivə lon Yehohanan yəi bɛlɛ́n, lɔi ə mo laa, hvo kɔ̨nɔ̨n mįi, hvo ya kpələ. Mąąhɔlɔɓo, nuą ŋɛ̨i həɠə nuwɔ laa hu, ə kɛi di kɛ nɛ̨ŋɛ̨n mąą wɔlɔ ɓo. 7 Di noloɓo Ɉuda lɔi hu, da Ɉerusalɛmə daai diɛ kɛ mą: Nuąi kpɔ həɠə nuwɔ laa hu, gəlee di di ŋąąkpɔn Ɉerusalɛmə daai. 8 Nui lɔpee a wala pa, hvóló haaɓa tɛɛ pulu, yɛ pələi bɛlɛ nąmįną da galanɉonŋąą di mo la, ɲəi hɛnŋąą kəlee a lɛɛ a Yai-Laa nwɔ pɛ́lɛ́i nwɔɔ, ɛlɛɛ, ya kpinįi tii, da naa kulɔ Israɛlə nuą lɔwai. 9 Voló haaɓai tii yee mu, Ɉuda nu huwu da Bɛnɉamɛn nwɛiɠaai di di ŋąąkpɔn Ɉerusalɛmə ɲąnin mɛ̨inąąn ną nwɔ hvóló pow hveelɛ yələ. Nɔi lonnii kəlee di kɛ tɔɔni Yai-Laa líílaa, diɛ kpɛlin, mɛ̨nį tii mąą mɛ̨nį ɓa, da dulɔ mɛ̨nį ɓa. 10 Ɉaláá laa həli mun Ɛsdrasə ə muhəɠə, yɛ diɛ: «Kaa wɔlɔ kulɔ nwoo mu laa kɛ, ɛlɛɛ nwɛ̨ą nɛ̨ąą həɠə mɛ̨nį a ka nɛ̨ąni, aa Israɛlə hɔn ɲɔw da pɛlɛ mą. 11 Yii hu kɛa, ka hvaa ka hɔn ma Yai-Laa ka ną́nni di wɔ Yálái ɲɛ̨i ɓa, ɛlɛɛ, ka túwɔ́ yɛ bələi gaa la bɔ, ka nɔi nuą ka taɠa, ə mą kɛ, nwɛ̨ą nɛ̨ąąɠaai ka yəi, ka di kulɔ lɔwɛi.» 12 Nu kpulu kəlee di tomą diɛ mą: «Tɛ̨ą li! Mąą nɛ̨ɛ̨ ku gɛ yɛ bələi ə́ mo la kuɔ. 13 Kɛlaa, nu kpulu kɛnɛ̨i, ɛlɛɛ, hąmą ka aa lɔ, nuą di hva pɛli lɛɛi ɲɛ̨nɛ̨ɛ̨, yili a həɠə laa, hvóló tɔ̨nɔ̨ hvóló hveelɛ mɛ̨nį hvəli, mąąhɔlɔɓo, kuɔi nɛ̨ŋɛ̨n daaləi tii həɠə, ku tamąąi. 14 Ku ɲɛ̨itɔwɔ nuą di lɛɛ kani ɓɛ gbɔn gəlee laa hu, ɛlɛɛ, nuąi kpɔ nwɛ̨ą nɛ̨ą həɠə ku pɔ taaɠaa, taa tɛitɛi nwɔ kalanɉonŋąą da nwɔ kiti tee nuą di kuu hee diɛ; diɛ pa a volóɠaa tii, ə lɛɛ ɉu, gu wɔ Yálái nwɔ liiholi ə həɠə gu mɛ̨i mɛ̨nįi ŋɛ̨i hu.» 15 Kɛlaa, Asahɛlə lon Yonatan da Tikwa lon Yahzeya di hvo hvaa mɛ̨nįi tii ɓa; ɛlɛɛ, Mesulamə da Levi mun Sabtai di tɔɔ di pulu. 16 Kɛlaa, nuąi həɠə nuwɔ laa hu, di gɛ yɛ bələi di mo la; da ɉaláá laa həli mun Ɛsdrasə ni di nuą həɠə ɉu, a nu kpulu nąmįną, nu kəlee da nwɔ kwəli, di di tɛitɛi di laa ɓo; di hee mɛ̨nį ɓo haɠa ɓa, a ɲąnin bow nąą nwɔ hvóló dɔlɔɔ yələ; əgɛ, di mɛ̨nį mąąkpɛɛ. 17 Ɲąnįn dɔlɔɔ nwɔ hvóló dɔlɔɔ yələ, nuąi kpɔ kɛ daa nwɛ̨ą nɛ̨ąą həɠə, di mąą mɛ̨nį aa kɛ kpɛɛ. Ɉuifəɠaai di hɔn gɛ di laa ka 18 Ɉaláá laahəli nuą lonnii lɔwai, yiiɠaai kɛ daa nwɛ̨ą nɛ̨ąą həɠə diɛ ka: Yosadakə lon Ɉosue da nąn nonnii di wɔ lonnii lɔwai: Maaseya, Eliezɛrə, Yarivə da Gedalia; 19 di di kwɛla diɛ di kaa di yee kulɔi di wɔ nwɛ̨ą nɛ̨ąąi hu, di ɓɛlaa hilɛ kulɔ a haláá di wɔ nɛ̨ŋɛ̨nŋąą mąą hvaalɛɛ mɛ̨nį ɓa. 20 Imɛrə lonnii lɔwai; Hanani da Ɉevadia; 21 Harimə lonnii lɔwai Maaseya, Eliya, Semaya, Yehiɛlə, da Uziya. 22 Pasehurə lonnii lɔwai: Ɛlioenai, Maaseya, Yismaɛlə, Netanɛlə, Yozavadə da Eleasa. 23 Levi huwuhu nuą lɔwai, Yozavadə, Simei, Kelaya, naa ta ɓaa nwɔ̨nɔ̨ Kelita, Petahia, Yehuda da Eliezɛrə. 24 Nwələ too nuą lɔwai: Ɛliasivə. Bɛlɛ́ laaləi mąąkpɛ nuą lɔwai Salumə, Tɛlɛmə da Uri. 25 Israɛlə nuą lɔwai, Pareɔsə lonnii lɔwai: Ramia, Yiziya, Malkiya, Miyaminə, Eleazarə, Malkiya, da Benaya. 26 Elamə lonnii lɔwai: Matania, Ɉekaria, Yehiɛlə, Avdi, Yeremotə, da Eliya. 27 Ɉatu lonnii lɔwai: Ɛlioenai, Ɛliasivə, Matania, Yeremotə, Ɉavadə, da Aziza. 28 Bevai lonnii lɔwai: Yehohanan, Hanania, Zabai, Atlai. 29 Bani lonnii lɔwai: Mesulamə, Malukə, Adaya, Yasuvə, Sealə, da Yeramotə. 30 Pahatə-Moabə lonnii lɔwai: Adna, Kelalə, Benaya, Maaseya, Matania, Besalɛlə, Binui, da Manase. 31 Harimə lonnii lɔwai: Eliezɛrə, Yisiya, Malkiya, Semaya, Simeɔn. 32 Bɛnɉamɛn, Malukə, Semaria, 33 Hasumə lonnii lɔwai: Matenai, Matata, Zabadə, Elifɛlɛtə, Yeremai, Manase, Simei. 34 Bani lonnii lɔwai: Maadai, Amramə, Uɛlə. 35 Benaya, Bedia, Keluhi, 36 Wania, Meremotə, Ɛliasivə, 37 Matania, Matenai, da Yaasai, 38 Bani, Binui, Simei, 39 Selemia, Natan, Adaya. 40 Maknadevai, Sasai, Sarai 41 Azarɛlə, Selemyaiu, Semaria, 42 Salumə, Amaria, Yosɛfə, 43 Nebo lonnii lɔwai; Yeiɛlə, Matitia, Ɉavadə, Ɉevina, Yadai, Yoɛlə, Benaya. 44 Nuą tii kəlee daa kɛ nwɛ̨ą nɛ̨ąą həɠə, daa di yee kulɔ gəlee hu, da di lonnii. |