Ɛsdrasə 1 - Yálá laawoo hɛɓɛ (dc)

Sirusə kwəi mɛ̨nįi ə mo yɛ hvilɛn na Yálá nwɔ pɛ́lɛ́i tɔɔ mɛ̨nį ɓa

¹ Pɛrsə tɔɔmun Sirusə, nwɔ tɔɔlaai gwɛlan dɔlɔɔ hu, mɛ̨nįi wɔlɔ Yai-Laa ə mo gwəi mɛ̨nį hukulɔ mun Ɉeremi laaləi; ə kɛ bɔ ə bɔ mɛ̨nį kɛ. Yai-Laa ə Pɛrsə tɔɔmun Sirusə lii muhəɠə, tɔɔmun ə noloɓo nwɔ lɔi hu nąą kəlee, ə gɛ a hɛɓɛ́; yɛ diɛ:

² «Pɛrsə tɔɔmun Sirusə woo ka: Tɔɔlaai kpɔ ɓɛ lɔi mɛ̨i nąą kəlee, Yai-Laa, yələkɔlɔn ɉu Yálá, aa gəlee tɛɛ bɔ́. Aa dí, yɛ ŋį́ pɛlɛ́ tɔɔ mą, Ɉerusalɛmə daai, Ɉuda lɔi hu.

³ Kaai kpɔ ka káá a Yai-Laa nwɔ nuą, gɛ́ Yálá ə lɛɛ ka pɔ. Ka ka muhəɠə ka li Ɉerusalɛmə daai, Ɉuda lɔi hu, ka pɛlɛ́ tɔɔ laa Yai-Laa ɓa, a Israɛlə nwɔ Yálá; yai gaa Ɉerusalɛmə.

⁴ Ɓɛi lɔpee Israɛlə nuą heeɛ kaa laa, nuąi di kaa gɛɛnąąɠaai tii ɓa, a nɔi lonnii, mąąnɛ̨ɛ̨, di kpɔnmąą tɛɛ Israɛlə nuą pɔ, a wali, hɛni, da taatɛlɛɛɠaa, ə mą kɛ mɛ̨inɛ̨ɛ̨ lɔpee a too di yei, yii da pɛli di Yálá nwɔ pɛ́lɛ́i tɔɔ la Ɉerusalɛmə daai.»

⁵ Nąąlɔwai, bɛlɛ nąmįnąi di kaa Ɉuda nu huwu lɔwai, da Bɛnɉamɛn huwuhu nuą, ə mą kɛ, ɉaláá laa həli nuą da Levi huwuhu nuą, da nuąi kpɔ Yálá nwɔ pɛ́lɛ́i gaa Ɉerusalɛmə daai, dɔɔ mɛ̨nį niihɛlɛn gaa diɛ, gəlee di di muhəɠə diɛ li.

⁶ Di heeyɔwɔɠaai kpɔ kɛ di kwɛlɛ, di mɛ̨inɛ̨ɛ̨ kpɛa-kpɛaa kɛ Israɛlə nuą diɛ, yɛ bələi di wɔ yee pɛli mąą ə kɛ la. Di hɛn ɲąŋąɠaa tɛɛ di pɔ, daɠaa di ɓo a wali kwɛli, daɠaa di ɓo a hɛni. Ə mą kɛ mɛ̨inɛ̨ɛ̨ takpɛliɠaa, da taatɛlɛɛɠaa, da hɛnŋaa yiiɠaai mąąwiaa, mɛlɛ yɛ ɓo mą. Naa gwəi mɛ̨inɛ̨ɛ̨ yiiɠaai di gɛ diɛ, naa kulaa ɉu.

⁷ Ɉɛnŋąą kpɔ wɔlɔ tɔɔmun Nabukodonosorə ə ɉəɠə Yai-Laa hee pɛlɛ́ mu Ɉerusalɛmə daai, ə paa la nwɔ haliɠaai hee pɛlɛ́ mu, tɔɔmun Sirusə ə yili kəlee kulɔ laa, ə dɛɛ di pɔ.

⁸ Pɛrsə tɔɔmun Sirusə, ə mo Mitredatə ɓa, yaa ŋɛ̨i kɛ a ɉɛnŋąą laikɛ mun, ə ɉɛnŋąą tii kulɔ, ə dɛɛ Ɉuda tɔɔmun Sɛsbasarə pɔ.

⁹ Ɉɛnŋąą tii kwɛdɛn ŋąą ka: Hɛni hɛnɲąŋą pow haaɓa, wali hɛnɲąŋą waa tɔ̨nɔ̨, ɓɔwa pow hveelɛ kɔ́w mɛ̨inąąn.

¹⁰ Hɛni kpələ kɔ́wɔ pow haaɓa, wali kpələ kɔ́wɔ nwun nąąn yee tanɔ̨n, da hɛni hɛn ɲąŋą waa tɔ̨nɔ̨ takpɛliɠaa.

¹¹ Ɉɛnŋąą tii kəlee pɛlɛɛ gee ɓa, ə kɛ a hɛn ɲąŋą waa lɔɔli pulu nwun nąąn. Sɛsbasarə ə ɉɛnŋąą tii kəlee həɠə, ɓɛlɔwai di kɛi həɠə la Babilonə lɔi hu, diɛ di pulu pənə Ɉerusalɛmə daai.