Lɛɛ gbɔwɔ ɓa 9 - Yálá laawoo hɛɓɛ (dc)Mɛ̨nį nwąnąą nɔɔli nąą: Daatɛlɛɛɠaa kwəi kulɔ mɛ̨nį 1 Yai-Laa yɛ Moisə ɓa: «'Li, ə́ mo Eziptə tɔɔmu ma, yɛ mą: Yai-Laa Hebreuɠaa di wɔ Yálái woo ka, yɛ: ə́ ɓo nwɔ nu huwui ɓa, di li di kwɛli hvilɛn mą. 2 Yá lənə nwɔ̨nɔ̨ mą, yá wala ɓo diɛ, di hvo li, 3 Yai-Laa, kaa pai kwəikulɔ pɛlɛi ə́ wɔ taatɛlɛɛɠaai kəlee diɛ; ɉooɠaa, ɉoohvaalənŋąą, ɲɔ̨nwɔ̨mɛ̨ɛ̨ɠaa, nįŋɛ̨ɠaa da mɛlaaɠaa gaa pai kɛi a ɲɔ̨n nwala wala. 4 Kɛlaa, Yai-Laa, kaa pai ɓɛlaɓo tooi Israɛlə lonnii di wɔ taatɛlɛɛɠaai da Eziptə nuą di wɛiɠaa lɔwai. Israɛlə lonnii di wɛi dɔ̨nɔ̨ kpɛli hva haa ɉu.» 5 Yai-Laa, yaa kpinįi ə nąąlɔwai lɛ, yɛ diɛ: «Tinąą ɓə gáá gbalo mɛ̨nį tii kɛi la Eziptə lɔi hu.» 6 Mąą yələ laa ɓoɔ, mɛ̨nį tii Yai-Laa ə mo, ə gɛ. Daatɛlɛɛɠaai kpɔ kɛ Eziptə nuą yəi, gəlee di haa. Kɛlaa, Israɛlə lonnii di wɛi dɔ̨nɔ̨ kpɛli hvo haa. 7 Eziptə tɔɔmun ə nuą tɔɔ diɛ li Israɛlə lonnii pɔɔli kaai, nuą di pa diɛ mą, Israɛlə lonnii di wɛi ta hvo haa li. Bələi mąn ə kɛ la tii, ə gili walawala, hvo ɓo diɛ. Mɛ̨nį nwąnąą mɛ̨ida nąą: Tɔɔhɛn 8 Yai-Laa, yɛ Moisə da Aarɔn diɛ: «'Ka li, ka kwɛli kələ mu luwu həɠə ka yee laahvɛɛ hveelɛ, yili ɓə Moisə kaa li bilii ɲələi Eziptə tɔɔmun ɲɛ̨i ɓa. 9 Nuwui ti kaa pai pɛlɛi Eziptə lɔi nąą kəlee. Ə tɔɔ nu kanŋaa da daatɛlɛɛɠaa diɛ a tɔɔhɛn, naa ə kulɔ a pala ɲɔ̨n.» 10 Moisə da Aarɔn di nɛɛmą di gwɛli kəle mu luwu həɠə, di li di tɔɔ tɔɔmun nííla. Moisə ə bili ɲələi, ə tɔɔ nuą da daatɛlɛɛɠaa diɛ a tɔɔhɛn, naa ə kulɔ a pala ɲɔ̨n. 11 Bənən gɛ nuą di hvo pɛli tɔɔi Moisə lííla, dɔɔhɛnŋąą tii kɛ diɛ mąą mɛ̨nį ɓa. Mąąhɔlɔɓo, dɔɔhɛn ə tɔɔ bənən gɛ nuą da Eziptə nuą kəlee diɛ. 12 Kɛlaa Yai-Laa ə tɔɔmun gili walawala, hvo gɛ hvo nwəli tɔɔ Moisə da Aarɔn diɛ, yɛ bələi Yai-Laa ə gbɛa mo la. Mɛ̨nį nwąnąą mɛ̨ihveelɛnąą: Hanwon 13 Yai-Laa yɛ Moisə ɓa: «'Humo tinąą ə́ li tɔɔmun bɔ, yɛ́ mą: Yai-Laa Hebreuɠaa di wɔ Yálái, nwoo ka, yɛ: Ə́ ɓo nwɔ nu huwui ɓa, di li di kwɛli hvilɛn mą. 14 Gbala ə tɔɔ, mɛ̨nį kaa gwə́i gɛ́ pa naai yɛ́, ká ə́ wɔ ɲɛ̨itɔwɔ nuą da ə́ wɔ lɔi hu nuą kəlee kaa. Ə gɛ, ə́ kili ə pu ɉu yɛ́, nu ta hvo ɓɛ lɔi mɛ̨i kwa yaa ku pɛliɛ. 15 Ŋą́ ɲee pɛlɛ kɛ yɛ́ yiihu, ká ə́ wɔ lɔi hu nuą ka kwəi kulɔ ɲɔ̨n ɉəɠə, yɛ ə́ laa aa kpɛɛ lɔi mɛ̨i. 16 Kɛlaa, ŋą́ ə́ lɛɛ a ə́ hvulú, ŋą́ nwɔ́ huwalawala laa lɛ yɛ́, əgɛ Náá ə tɛ lɔi mɛ̨i nąą kəlee. 17 Yáá kpəɲąn nwɔ̨nɔ̨ nwɔ́ nu huwui li mɛ̨nį hu. 18 Ə́ ɲɛ̨i hee laa, tinąą ɓɛlɔwai, gáá pai hanwon gbɛa-kpɛa pui ɓɛ nɔi, yii ɲɔ̨nwɔ̨n mąn və ta pu li, ə həɠə kpɔ Eziptə lɔi ŋɛ̨i kɔ́wɔ tɔɔ yələ ɓa, ə həli la háákələi ɓa. 19 Yili ɓa, nuą tɔɔ di li, daatɛlɛɛɠaai gaa ə́ yəi daa pɛlɛɛɠaa hu, di gəlee nwun mąą kilɛ, ə mą kɛ nuą kpɔ di kaa laa, da di yəi taatɛlɛɛɠaa, ə gɛ, ɉanwon ti a pa pui, hvo pa di paa.» 20 Tɔɔmun nwɔ ɲɛ̨itɔwɔ nuąi taɠaa di kɛ ɉu, mɛ̨nįi ti Yai-Laa ə mąą pamą la diɛ, di gaa a mɛ̨nį walawala, di mo kɛa di pɔ nuą diɛ, diɛ diɛ ka ka mąąkilɛ kɛɛnąą walawalaɠaa ɓa, ka ka yəi taatɛlɛɛɠaa. 21 Nuąi di hvo Yai-Laa wooi ti kaa a mɛ̨nį walawala, di di wɔ tínuą da di wɔ taatɛlɛɛɠaai lɛɛ ɲɛɛkɔwɔ hu, di hvo di nwun mąą kilɛ. 22 Yai-Laa yɛ Moisə ɓa: «'Ə́ yee tɛ ɲələi, hanwon ə pu Eziptə lɔi nąą kəlee, ə pu nuą diɛ, ɉuwɔɠaa, da nɔwɔi kalaɠaa kəlee.» 23 Moisə ə nwɔ tunwɔ̨n tɛ ɲələi, Yai-Laa ə yələgbąnąą ɓɛla da hanwon, ɲələgbąnąą ti ə gbɛa too, yili pulu, Yai-Laa ə hanwon bu nɔi mɛ̨i nąą kəlee. 24 Ə həɠə kpɔ Eziptə lɔi kɔ́wɔ tɔɔ yələ ɓa, ə həli la volói ti ɓa, hanwon da hvo ta pu li a gbuwulu kpɛa kpɛa nwia yɛ yili, ɛlɛɛ yələgbąnąą yɛ gɛ. 25 Eziptə lɔi nąą kəlee pilɛɛ gee mɛ̨i, nuąi kpɔ kɛ ɲɛɛkɔwɔɠaa hu, da ɉuwɔɠaa, ɉanwon ti ə di kɛlɛ, yɛ hihɛnŋąą kala, yɛ wuluɠaa yali. 26 Gosɛn lɔi hu, ɓɛi Israɛlə lonnii di kɛ laa, nąą lɔ ɓə da hvo pu laa. 27 Eziptə tɔɔmun ə Moisə da Aarɔn di təli, yɛ diɛ: «Yii ŋɛ̨i nwɛi, ŋą́ą́ nɛ̨ŋɛ̨n ɉəɠə, tɛ̨ą hvo bɔ́, Yai-Laa ya ɓə tɛ̨ą kaa ɓɔ. Kwa nwɔ́ lɔi hu nuą kəlee kwaa kɛ a hɔn mąą nuą. 28 Ka mą́ą́ nɛ̨ɛ̨mąą hvə Yai-Laa ɓa, ə ɲələgbąnąą da ɉanwon ŋɛ̨i kpəla mą; ŋį́ ka lɛɛ laa, vá kɛa kanąn kaa.» 29 Moisə yɛ mą: «Ya lɔ ɓaa ŋą́ kulɔ daa pulu, gáá pai ɲéé tɛi Yai-Laa pɔ pələ, ɲələgbąnąą kɔ́lɔ kaa pai haai mą, hanwon va kɛa pu, ya ɓə a gɛ, ə́ gɔlɔn yɛ́: Yai-Laa pɔɔ ɓaa lɔi. 30 Kɛlaa, ŋą́ gɔlɔn gɛ́: yɛ́, ká ə́ wɔ ɲɛ̨itɔwɔ nuąi ka hva ɲɔw Hɛn Gəlee Nąmu Yálá ɓa.» 31 Ɉanwon gɛɛ pui, ə ɲee yɛa da kpai yɛaɠaa kala, mąąhɔlɔɓo, kpai aa kɛ wóló, ɲee yaan aa powa. 32 Ɉihɛn ɲiiɠaa ti, di hvo kala, mąąhɔlɔɓo, di wólói lɔwai hvəli kɛ. 33 Moisə ə həɠə tɔɔmun bɔɔli, ə kulɔ daa pulu pələ, ə ɲee tɛ Yai-Laa pɔ pələ ə vɛli. Ɲələgbąnąą da ɉanwon buɔ kɔ́lɔ ə haa mą, dulɔ ə teen. 34 Yii kɛa Eziptə tɔɔmun ə gaa yɛ dulɔ, ɉanwon da ɲələgbąnąą daa kpəla mą, ə pənə nwɔ̨nɔ̨ ə gili walawala da nwɔ ɲɛ̨itɔwɔ nuą kəlee. 35 Eziptə tɔɔmun ə gili walawala, hvo gɛ hvo ɓo Israɛlə lonni diɛ, yɛ bələi Yai-Laa ə mo la Moisə ɓa. |