Lɛɛ gbɔwɔ ɓa 8 - Yálá laawoo hɛɓɛ (dc)1 Yai-Laa yɛ Moisə ɓa: «'Mo Aarɔn ɓa, ə nwɔ tunwɔ̨n ɉaŋą ɲá pɛlɛɛɠaa kəlee mɛ̨i, da bowa kəlee, gbəŋəɠaa di tɛ Eziptə lɔi nąą kəlee.» 2 Aarɔn ə ɲee haŋą Eziptə yáɠaa kəlee mɛ̨i, ɲáɠaa kəlee di tɛ a gbəŋə, ə Eziptə lɔi nąą kəlee kpɛɛ mą. 3 Bənən gɛ nuąi diɛ kpɛli, di gbəŋəɠaa kulɔ, ə hiɛ Eziptə lɔi nąą kəlee. 4 Eziptə tɔɔmun ə li ə Moisə da Aarɔn di təli, yɛ diɛ: «Ka nɛ̨ɛ̨mą hvə Yai-Laa ɓa, ə gbəŋəɠaa ŋɛ̨i mąą kwɛa mą́ą́ kwa nwɔ lɔi hu nuą. A kɛ tii gáá pai ɓoi nwɔ nu huwui ɓa, di li di haláá kulɔ Yai-Laa ɓa.» 5 Moisə yɛ tɔɔmun ma: «Lə yələ ɓə ə́ kaa bɔ ŋį́ Yai-Laa hvɛli la, gbəŋəɠaa mąą ə kwɛa yɛ́ ká ə́ wɔ nuąi kaa, ə lɛɛ lɔ a yii ɲá lee hu?» 6 Tɔɔmun yɛ Moisə ɓa: «Tinąą.» Moisə yɛ mą: «Ŋą́ą́ mɛ̨n, bələi tii ə́ mo la, gáá gɛi tii, ə gɛ, ə́ kili ə pu ɉu yɛ́, nu lɔpee ta hvo laa, yii gaa yɛ Yai-Laa ku wɔ Yálái. 7 Gbəŋəɠaa mąą kaa pai kwɛai ə́ wɔ pɛ́lɛ́i ɓa, ə mą kɛ ə́ wɔ nu kpɛa-kpɛa da nɔi nuą kəlee; ɲa lee hu lɔ ɓə da kaa pai lɛɛi laa.» 8 Moisə da Aarɔn di həɠə tɔɔmun bɔɔli. Moisə ə nɛɛmą, ə nwoo tɛ Yai-Laa ɓa, gbəŋəɠaa ti ə ɲąątɔɔ Eziptə tɔɔmun ma, mąą mɛ̨nį hu. 9 Yai-Laa ə gɛ yɛ bələi Moisə ə ɉu hvɛli la. Gbəŋəɠaa kəlee di haa bɛlɛ́ɠaa mu, gwəliɠaa hu, da ɲɛɛ kɔ́wɔɠaa hu. 10 Di gbɔn gee ɓa a ɉįiɠaa, nɔi kun ə ɲɔ̨n. 11 Yii kɛa Eziptə tɔɔmun ə gaa yɛ, gbəŋəɠaa di hvo kɛa nɔi hu, nɔi aa lɛɛ gbɔwɔ ɓa, ə gili walawala, hvo gɛ hvo nwəli tɔɔ Moisə da Aarɔn di woo ɓa, yɛ bələi Yai-Laa ə gbɛa mo la. Mɛ̨nį nwąną ɉaaɓa nąą: Hįįlon 12 Yai-Laa yɛ Moisə ɓa: «Mo Aarɔn ɓa, ə nwɔ tunwɔ̨n ɉəɠə, ə gɛlɛ muluun ɉu, ə mąą pənə a hįįlon Eziptə lɔi hu nąą kəlee.» 13 Moisə da Aarɔn, di gɛ yɛ bələi di di tí la. Aarɔn ə nwɔ tunwɔ̨n gɛlɛ nɔi ɓa, muluun gəlee mąą ə pənə a hįįlon, di pɛlɛ nuą kɔ́lɔ ɓa, da ɉuwɔɠaa kəlee. Eziptə muluun gəlee ə mąą pənə a hįįlon, nɔi nąą kəlee. 14 Eziptə pənən gɛ nuą kəlee di di ŋąąwala diɛ hįįlon gulɔ, kɛlaa, di hvo pɛli mą. Ɉįilonŋąąi ti di kɛi pɛlɛ nuą diɛ, da ɉuwɔɠaa kəlee. 15 Bənən gɛ nuą diɛ tɔɔmun ma: «Yii nwɛi, Yálá kɛ mɛ̨nį ka.» Ə mą kɛ tii, tɔɔmun ə gili walawala, mɛ̨nįi ŋɛ̨i Moisə da Aarɔn di ɉu hvɛli mą, hvo gɛ, yɛ pələi Yai-Laa ə gbɛa mo la. Mɛ̨nį nwąnąą nąąn nąą: Vɔn 16 Yai-Laa yɛ Moisə ɓa: «Humo kpɔ tinąą, ə́ li Eziptə tɔɔmun bɔ, gaa pai kulɔi yɛ li ɲá kwɛlɛ. Ə́ mo mą, yɛ́ mą: Yai-Laa woo ka, yɛ: 'Ɓo nwɔ́ nuąi diɛ, di li, di kwɛli hvilɛn mą́ą́. 17 Yá wala gɛ, gáá pai moi vɔnŋąą diɛ, di pɛlɛ yɛ́ ká ə́ wɔ nu kpɛa-kpɛai, da ə́ wɔ lɔi hu nuą, da ə́ wɔ pɛ́lɛ́i diɛ; Eziptə pɛlɛ́ɠaa kəlee laa kaa pai hvɛɛi a vɔn, di pɛlɛ nɔi mɛ̨i nąą kəlee. 18 Kɛlaa, mąą yələi tii, da hva həli Gosɛn lɔi hu, ɓɛi nwɔ́ nuąi kaa laa, ə gɛ, ə́ kili ə pu ɉu yɛ́ diɛ, Ɲą́ą́ ɓə gáá a Yai-Laa Gáá nɔi hu. 19 Mɛ̨nį nwąnąą ŋɛ̨i pai laai ə́ wɔ lɔi hu nuą diɛ, da hvo pai laai nwɔ́ nuąi diɛ. Tinąą ɓə yili kaa kɛi la.» 20 Yai-Laa ə gɛ tii. Vɔn gbulu kɛnɛ̨ ə lɔ tɔɔmun ɲəi bɛlɛ́n, nwɔ nu kpɛa-kpɛaa yəi bɛlɛ́n, ə mą kɛ Eziptə nuą kəlee. Vɔn ə kɛ nɔi nąą kəlee, yɛ kɛɛ kala. 21 Tɔɔmun ə Moisə da Aarɔn di təli, yɛ diɛ: «'Ka li ka haláá kulɔ ka wɔ Yálái ɓa ɓɛ nɔi.» 22 Moisə yɛ mą: «Mąą hvo nɛ̨ɛ̨li, ku hvo ɉaláái ti kulɔ ɓɛ nɔi, mąąhɔlɔɓo, ɉaláái ku kaa pai gulɔi Yai-Laa ku wɔ Yálái ɓa, gaa pai kɛi a mɛ̨nį mąąlaɠiɛ Eziptə nuą ɲɛ̨i ɓa. Akɛtii mɛ̨nįi mąąlaɠiɛ Eziptə nuą ɲɛ̨i ɓa, kwa gɛ, di hvo pai ku hɔɔi a kwɛni? 23 Mąąnɛ̨ɛ̨ ku kulɔ ɓɛ nɔi, ku hvóló haaɓa hiɛ kɛ nɔi pun ɉu, ku haláá kulɔ Yai-Laa ku wɔ Yálá ɓa yɛ bələi gaa pai gɛ pələ lɛi la kuɔ.» 24 Tɔɔmun yɛ diɛ: «Gáá hvaai mą, ŋį́ ɓo kaa, ka li ka haláá kulɔ Yai-Laa ka wɔ Yálái ɓa nɔi pun ɉu, kɛlaa, ka hvo li kwɛa la a mɔlɔ. Ka li ka Yálá hvɛli mą́ą́.» 25 Moisə yɛ mą: «Gáá kpɔlɔɔ kulɔi ɓɛ ə́ yəi bɛlɛ́n, ŋį́ li, ŋį́ nwóó tɛ Yai-Laa ɓa. Tinąą vɔnŋąą mąą kaa kwɛai yɛ́, ká ə́ wɔ nu kpɛa-kpɛai, da nɔi nuą kaa. Kɛlaa, hvo yɛlɛ kulɔ ku hu, yɛ lənə nwɔ̨nɔ̨ Israɛlə lonnii li mɛ̨nį ɓa ɉaláái ti kulɔi Yai-Laa ɓa.» 26 Moisə ə kulɔ tɔɔmun yəi bɛlɛ́n, ə li ə nwoo tɛ Yai-Laa ɓa. 27 Bələi ti Moisə ə ɉu hvɛli la, Yai-Laa ə gɛ ti. Vɔnŋąą tii mąą ə kwɛa tɔɔmun ma, da nwɔ nu kpɛa-kpɛaa-o, ə mą kɛ, nɔi nuą. Dɔ̨nɔ̨ kpɛli hvo lɛɛ laa. 28 Bələi mąn ə kɛ la tii, tɔɔmun ə gili walawala, hvo gɛ hvo Israɛlə lonnii lɛɛ laa di hvo li. |