Lɛɛ gbɔwɔ ɓa 7 - Yálá laawoo hɛɓɛ (dc)

¹ Nąąlɔwai, Yai-Laa yɛ Moisə ɓa: «Hvo gɔlɔn yɛ́, ŋą́ą́ ə́ kɛ yɛ Eziptə tɔɔmun nwɔ yálá, Aarɔn yɛ ɓo a ə́ laawoo tɛɛ mun!

² Mɛ̨nįɠaai ŋį́ nɛ yɛ́, yá nɛ ə́ liɛ Aarɔn ɓa, ya ɓə a li ə naa həli Eziptə tɔɔmun ma, ə gɛ, ə Israɛlə lonnii lɛɛ laa, di kulɔ nwɔ lɔi hu.

³ Ə mą kɛ ti, gáá pai Eziptə tɔɔmun gili walawalai, bələi mąn gáá pai kpalo mɛ̨nį kwɛlɛɛn mɛ̨nį tamąą kɛi la nwɔ lɔi hu.

⁴ Kɛlaa hvo pai nwəli tɔɔi ka woo ɓa. Nąąlɔwai, gáá pai nwɔ́ huwalawala laa lɛi Eziptə lɔi ɓa, ŋį́ gɛlɛ. Yili pulu, ŋį́ nwɔ́ nuąi kulɔ Eziptə lɔi hu.

⁵ Eziptə nuą di kaa pai gɔlɔn ɉii diɛ ɲą́ą́ ɓə gáá a Yai-Laa ɓɛlɔwai ŋą́ ɲee haŋą la, gɛ́ nwɔ́ nuąi kulɔ di wɔ lɔi hu.»

⁶ Moisə da Aarɔn di gɛ yɛ bələi Yai-Laa ə di tí la.

⁷ Ɓɛlɔwai di kɛi li mɛ̨nįi tii laa həlii la Eziptə tɔɔmun ma, Moisə kaa kwɛlan ə kɛ a kwɛlan bow mɛ̨ihaaɓa, Aarɔn nwɛi ə ɓo pow mɛ̨ihaaɓa kɔ́w haaɓa.

Eziptə tɔɔmun ə lənə Moisə da Aarɔn di woo ɓa

⁸ Yai-Laa yɛ Moisə da Aarɔn diɛ:

⁹ «Eziptə tɔɔmun a kɛ kaa: ‹'Ka kpalo mɛ̨nį ta kɛ›, yá kɛ Aarɔn ɓa, ‹Ə́ wɔ tunwɔ̨n həɠə, ə́ bili Eziptə tɔɔmun nííla.› A mąą pənə a kaalə.»

¹⁰ Moisə da Aarɔn di li di həli Eziptə tɔɔmun ma, bələi ti Yai-Laa ə di tí la, di gɛ tii. Aarɔn ə nwɔ tunwɔ̨n pili tɔɔmun da nwɔ ɲɛ̨i tɔwɔ nuą di lííla, dunwɔ̨n ə mąą pənə a kaalə.

¹¹ Tɔɔmun ə nɛɛmą ə Eziptə, gilimąą nuą, dɔlukpɛ nuą da bənən gɛ nuą təli, ɛlɛɛ, diɛ kpɛli di da kɛ.

¹² Nu kəlee yɛ nwɔ tunwɔ̨n pili, yɛ mąą pənə a kaalə. Kɛlaa, Aarɔn nwɔ tunwɔ̨n ə di wɛiɠaai kpələ.

¹³ Ə mą kɛ ti, Eziptə tɔɔmun ə gili walawala, hvo nwəli tɔɔ di woo ɓa, yɛ bələi Yai-Laa ə gbɛa mo la.

Mɛ̨nį nwąnąą dɔlɔɔ: Yá mąąpənə a ɲąmą

¹⁴ Yai-Laa yɛ Moisə ɓa: «Eziptə tɔɔmun gili aa walawala, hvo gɛli hvo Israɛlə lonnii lɛɛ laa di hvo li.

¹⁵ 'Humo tinąą, ə́ li ɲalee kwɛlɛ ə́ tɔɔmun mąąkpɔn naa. Dunwɔ̨n ŋɛ̨i kɛ ə́ yəi yɛ mąą pənə a kaalə, 'ɉon ə́ yee pɔ.

¹⁶ A pa, yɛ́ mą: ‹Yai-Laa Hebreuɠaa di wɔ Yálái ɓə dɔ́ɔ́ ə́ pɔ, yɛ ə́ ɓo nwɔ nu huwui ɓa, ə li nɔi pun ɉu, ə kwɛli hvilɛn mą; ya ka ti hvó gɛ li.

¹⁷ Yili ɓa, Yai-Laa yɛ, yii ka yaa ka káá pai tɛɛi ɉu nwɛi, ə́ kaa pai gɔlɔn ɉii, yɛ́ kɛ Yaa lɔ ɓə gaa a Yai-Laa. Gáá ɲá kɛlɛi a dunwɔ̨n ŋɛ̨i, ə mąą pənə a ŋąmą.

¹⁸ Ɉɔwɔlee kəlee di haa, ɲá ə kun, Eziptə nuą di hva pɛli da kpələi.›»

¹⁹ Yai-Laa yɛ Moisə ɓa: «Mo Aarɔn ɓa, yɛ mą: ‹Ə́ wɔ tunwɔ̨n həɠə, ə́ ə́ yee haŋą Eziptə yaɠaa kəlee mɛ̨i, ɲá pɛlɛɛɠaa kəlee da bowa kəlee mɛ̨i, ə mą kɛ, yiiɠaai di yəi heeni ɉɛɲąŋąɠaa hu, gəlee mąą ə pənə a ɲąmą. Ɲąmą ə kɛ nɔi nąą kəlee.›»

²⁰ Bələi tii Yai-Laa ə Moisə da Aarɔn di tí la, di gɛ ti. Aarɔn ə dunwɔ̨n ɉəɠə, ə gɛlɛ ɲá ŋą Eziptə tɔɔmun nííla da nwɔ nu kpɛa-kpɛai. Ɲá lee kɛnɛ̨i ti mąą ə pənə a ŋąmą.

²¹ Ɉɔwɔleeɠaa di haa, ɲá ə kun Eziptə nuą di hvo pɛli da kpələi, ŋąmą yɛ ɓo nɔi nąą kəlee.

²² Eziptə pənən gɛ nuą diɛ kpɛli, di da kɛ. Eziptə tɔɔmun ə gili walawala, hvo gɛ hvo nwəli tɔɔ Moisə da Aarɔn diɛ yɛ bələi Yai-Laa ə gbɛa mo la.

²³ Eziptə tɔɔmun ə pənə ə li ɲəi bɛlɛ́ laaləi, hvo kpɛli gaa a mɛ̨nį walawala.

²⁴ Eziptə nuą di yálɔwaɠaa tee ɲa lee kwɛlɛ, ə gɛ, di yá lɛlɛɛ hɔlɔɓo. Mąąhɔlɔɓo, di hva kɛ pɛli ɲá lee ta kpələi.

²⁵ Ɲá mąą pənəi ŋɛ̨i Yai-Laa ə mo a ɲąmą, hvóló mɛ̨ihveelɛ ɓə ə gɛ ɉu.

Mɛ̨nį nwąnąą veelɛnąą: Gbəŋəɠaa

²⁶ Yai-Laa yɛ Moisə ɓa: «'Li ə́ həli Eziptə tɔɔmun ma, yɛ́ mą: ‹Yai-Laa yɛ Ə́ ɓo nwɔ́ nu huwui ɓa, di li di kwɛli hvilɛn mą́ą́.›

²⁷ Yɛ, akɛ yá lənə mą, gaa pai gbəŋəɠaa pui ə́ wɔ lɔi nąą kəlee.

²⁸ Ɲá lee kaa pai tɛi a gbəŋə, diɛ lɔ ə́ yəi bɛlɛ́n, ɓɛi ya yii laa, diɛ tɛ ə́ laa gbin ŋą. Diɛ lɔ ə́ wɔ nu kpɛa-kpɛa kəlee yəi bɛlɛ́n, da ə́ wɔ lɔi hu nuą kəlee. Da tɛ kpɔ ə́ yəi nopɛi kɛi.

²⁹ Gbəŋəɠaai tii kaa pai kɛi tɛi ə́ kpinį ɓa, ə mą kɛ ə́ wɔ nu kpɛa-kpɛai da ə́ wɔ lɔi hu nuą kəlee diɛ.»