Lɛɛ gbɔwɔ ɓa 5 - Yálá laawoo hɛɓɛ (dc)Moisə da Aarɔn di li Eziptə tɔɔmun nií la 1 Yili pulu, Moisə da Aarɔn di li Eziptə tɔɔmun nií la, diɛ mą: «Mɛ̨nįi Yai-Laa Israɛlə nwɔ Yálá, ə mo ya ka: ‹'Nwɔ́ nuąi lɛɛ laa di li nɔi pun ɉu, di hɛli pu laa náá hu.›» 2 Eziptə tɔɔmun yɛ diɛ: «Gbɛɛ ɓaa Yai-Laa yai ŋą́ nwoo hon ti, gɛ́ ɓo Israɛlə lonnii ɓa? Və́ Yai-Laa kɔ́lɔn, ɛlɛɛ vá pɛli Israɛlə lɛɛi laa hvo li.» 3 Moisə da Aarɔn, diɛ mą: «Hebreuɠaa di wɔ Yálá, aa gbɔwɔ lɛ kuɔ, yɛ kwəli ku hvóló haaɓa hiɛ kɛ nɔi pun ɉu, ə gɛ, ku haláá kulɔ Yai-Laa ɓa, yai gaa a ku wɔ Yálá, kwa wala li, a ku nwun na pili a kwəi kulɔ, a wala kɛ ti, ku lɛɛ kɔ́ hu.» 4 Eziptə tɔɔmun, yɛ Moisə da Aarɔn diɛ: «Lə mɛ̨nį ɓa ka káá hviikpɛɛ tooi Israɛlə nuą hu? 'Ka pənə 'ka li ka kɛ kóló ɓa. 5 Ka tamą mɛ̨nį nɔi ɓə ka káá bɔ ka ka kwɛli tee la, ka góló hu kala?» Eziptə tɔɔmun ə Israɛlə nuą kɛ kóló ta pɛlɛ mą 6 Mąą yələi ti, Eziptə tɔɔmun yɛ góló nwun nąmįną da ɉɛɓɛ́ kɛ nuą diɛ: 7 «Ka hvo kɛa pa a kala di pɔ, diɛ kpinįi di kɛ lii diɛ gwɛli di kpɔwɔ ɓa diɛ bu bɔlɔ hu. 8 Bɔlɔ kɔ́w hiɛ da gulɔ da hva kulɔ mą. Hviɲɛ̨ nuą ka tii, mɛ̨nįi gɛi, diɛ kɛ la mą: Di kaa lii haláá kulɔi Yálá ɓa, yaa li. 9 Gu di kɛ kóló ta kɛ mą, akɛtii góló kɛ kiliŋąhiɛ lɔ ɓə da gɛ, di hva kɛa di kiliŋąhiɛi mɛ̨nį takpɛli ɓa.» 10 Góló nwun nąmįną da ɉɛɓɛ́ kɛ nuą di li diɛ Israɛlə nuą diɛ: «Tɔɔmun yɛ: Di hvo kɛa pai kala tɛɛi ka pɔ. 11 Ka li, kaa kpinįi ka da kwɛli. Kɛlaa ka kɛ kóló ta hvo kulɔ li mą.» 12 Israɛlə lonnii di taɠa Eziptə lɔi nąą kəlee, diɛ kala kwɛli. 13 Góló nwun nąmįnąą di kpɔlu di la, diɛ kɛ diɛ: «Ka gɛ ɉa-ɉa, yii lɔ hiɛ ka gulɔ, yaa lɔ ɓə mąąnɛ̨ɛ̨ ka gulɔ.» 14 Israɛlə nuąi di di hee di ɓɛlaa nwun na, di yiliɠaa hukɛlɛ, diɛ kɛ diɛ: «Lə mɛ̨nį ɓa, voló hveelɛi ŋɛ̨i yee mu, pɔlɔ kɔ́wi kɛ mąąnɛ̨ɛ̨ ka gulɔ, ka hvo gulɔ li?» 15 Góló nwun nąmįnąą ti kɛ a Israɛlə nuą di pa, diɛ Eziptə tɔɔmun ma: «Lə ɓə kɛ yaai, ə́ kaa ə́ wɔ tínuąi hon bələ kɛi ŋɛ̨i? 16 Di hvo kɛa kala tɛɛi ə́ wɔ tínuą pɔ, diɛ kɛ kuɔ: 'Ka pɔlɔkɔw kɛ! Di kaa ə́ wɔ tínuą kɛlɛi; tɛ̨ą hvo ə́ wɔ nuąi pɔ.» 17 Tɔɔmun yɛ diɛ: «Ka hviɲaai, ka hviɲaai! Mɛ̨nįi gɛi kaa kɛ la diɛ: ‹Ka gwəli gu haláá kulɔ Yai-Laa ɓa, yaa li.› 18 'Ka li ka góló kɛ, di hvo kɛa pai kala tɛɛi ka pɔ, kɛlaa bɔlɔkɔwi mąąnɛ̨ɛ̨ kaa gulɔ, yili ɓə ka káá gulɔi.» 19 Góló nwun nąmįnąą kɛ Israɛlə lonnii lɔwai di kulɔ tɔɔmun bɔɔli, a líiholi, mąąhɔlɔɓo, tɔɔmun ə kɛ diɛ: «Bɔlɔkɔwi hiɛ ka gulɔi, yaa lɔ ɓə ka káá kɛi gulɔi.» 20 Kulɔi di mo tɔɔmun bɔɔli, di li di Moisə da Aarɔn di kaa tɔɔni bɛlɛ́ laaləi, diɛ di mąąkpɔn. 21 Pai di mo, diɛ Moisə da Aarɔn diɛ: «Mɛ̨nįi ŋɛ̨i laai kuɔ, ka hɔn ni, kɛlaa kwaa ku wɛi lɛɛ Yai-Laa ɓa. Ka mąą mɛ̨nį ɓa, tɔɔmun da ɲee pɔ nuą di hvo kpɛli bɔ di hvo ku kaa; kaa ku paa ɓɔwa lɔ di yee ɲą.» 22 Moisə ə pənə nwɔ̨nɔ̨, ə nwoo tɛ Yai-Laa ɓa, yɛ mą: «Ną́mu Yálá, lə mɛ̨nį ɓa ə́ mɛ̨nį nwąnąą laa nuąi ŋɛ̨i diɛ? Dɔ́ɔ́ mɛ̨nį nwun maa a lə? 23 Ə həɠə kpɔ ɲələi ŋɛ̨i ŋį́ ə́ wɔ wɛlɛɛ ɓo la Eziptə tɔɔmun ma, gaa lɔ yɛ Ə́ wɔ nuąi laanɔ̨nwɔ̨ ɓo, ɛlɛɛ, hvó di nwun mąąɓoi.» |