Lɛɛ gbɔwɔ ɓa 40 - Yálá laawoo hɛɓɛ (dc)

Bələi mąąnɛ̨ɛ̨ di bɛlɛ́ da ɉaláá laa həli nuą laakwɛlanmo la

¹ Yai-Laa yɛ Moisə ɓa:

² «Ɲąnin dɔlɔɔ, nwɔ hvóló dɔlɔɔ yələ, ya bɛlɛ mąąhəɠɛɛ da gee kaa kələ di hvilɛn ɉi kulɔ.

³ Ə́ mįnɛ̨ kəhi hee mu, ə́ gəhi lɔ ə́ ɉee ɉəɠə ɓɛla pulu pələ.

⁴ Ə́ pa a daɓali, ə́ vilɛn a vilɛn bələ, ə́ pa a nwulɔ nwɔ̨n ɉee hɛn, ə́ nwulɔ nwɔ̨n dɔɔ,

⁵ ɉaláá kulɔ kəhi tii a hɛni, yai gaa a lansan kələn ɉi, ə́ vilɛn mįnɛ̨ kəhi lííla, ə́ ɉəɠə ɓɛla hɛlɛn bɛlɛ́ laaləi.

⁶ Ɉaláá hɛn da gəlee kələn nwɔ taɓali, ə́ vilɛn gee kaa kələ laaləi ɲɛ̨i tɔwɔ.

⁷ Ə́ nuą waa tea hee gee kaa kələ da daɓali di lɔwai, ə́ yá pu ɉu.

⁸ Ə́ gwəli ɲɛn naa, ə́ həɠə ɓɛla hɛlɛn gwəli laaləi.

⁹ «Ə́ mąątí wulɔ həɠə, ə́ da hiɛ bɛlɛ́ ɓa, da mu hɛnŋąą kəlee. Bələ ɓə yá gɛ la a pɛlɛ́ mąąhəɠɛɛ, yaa, da mu hɛnŋąą kəlee, ə́ di laakwɛlanmo, di kɛ a hɛn mąąhəɠɛɛ.

¹⁰ Ə́ nwulɔ ta lɔ haláá kulɔ kəhi ɓa, da ɉɛnŋąą kəlee, ə́ naakwɛlanmo, ɉaláá kulɔi ə kɛ a hɛn mąąhəɠɛɛ kpɔ hva-hva.

¹¹ Ə́ nwulɔ ta hiɛ dea ɓa, da ɉee hɛn, ə naakwɛlanmo.

¹² «Ə́ Aarɔn da nonnii di tɔɔ gee kaa kələ laaləi, ə́ di mąą waa a ya,

¹³ Ə́ ɉaláá kulɔ həɠəɠaa too Aarɔn kwąną, ə́ nwulɔ ta hiɛ mą, ə́ naakwɛlanmo, ə kɛ nwɔ́ kólói ɓa.

¹⁴ Ə́ nonnii kpɛlimąn di təli, ə́ ɉəɠə too di kwąną.

¹⁵ Ə́ di mąątí yɛ bələi ə́ gɛ la a di nąn, ə gɛ, diɛ pɛli nwɔ́ haláái kulɔi, a kɛ ti, nwulɔi ti ya ɉiɛ diɛ, yili ɓə a ɉaláá kulaa mąą laa tɛɛ di pɔ a kwɛlan gəlee mɛ̨nį.»

Moisə ə Yálá hee pɛlɛ́ tɔɔ

¹⁶ Moisə ə ɲee pɛlɛ góló ɓa, ə gɛ kpɔlɔ yɛ bələi Yai-Laa ə dí la.

¹⁷ Gwɛlan veelɛnąą, ɲąnin nwɔ hvóló dɔlɔɔ yələ, di bɛlɛ́ tɔɔ.

¹⁸ Moisə ə bɛlɛ́ haŋą ə dɔɔ, ə daŋą hvilɛn, ə naaŋąɠaa laa, ə nwulu ɓɛlaaɠaa laa mɛ̨i, ə Nɔ̨nwɔ̨ɠaa hvilɛn gɛa.

¹⁹ Ə ɉəɠə ɓɛla kɛnɛ̨ pɛlɛ gəlee nwun mɛ̨i, ə gələ mɛ̨i kpulu, yɛ bələi Yai-Laa ə dí la.

²⁰ Gwɛni ɓɛlaɠaai Yálá ə díɓoɠaa pɛ̨ɛ̨ mą, ə di laa mįnɛ̨ kəhi hu, ə gəhi kpəŋə wuluɠaa lɔ mą, ə naa kalan bɛlɛ mɛ̨i.

²¹ Ə li, ə gəhi hee bɛlɛ́ mąąhəɠɛɛ mu, ə ɉəɠə ɓɛla hɛlɛn dɔwɔ pələ, yɛ pələi Yai-Laa ə dí la.

²² Ə daɓali hvilɛn gee kaa kələ mu, bɛlɛ́ mąąhəɠɛɛ ɲələi pələ, ɉəɠə ɓɛla tɔwɔ,

²³ ə́ nɛɠɛɠaa laa gee kwɛlɛ, Yai-Laa lííla, yɛ bələi Yai-Laa ə dí la.

²⁴ Ə́ nwulɔ nwɔ̨n ɉee hɛn vilɛn gee kaa kələ mu daɓali lííla, bɛlɛ́ ɉɛɠɛɛ pələ.

²⁵ Ə́ nwulɔ nwɔ̨nŋąą tɔɔ, Yai-Laa lííla, yɛ bələi Yai-Laa ə dí la.

²⁶ Ɉaláá kəhii ti a ɉɛni, ə́ ɉee gee kaa kələ mu, ɉəɠə ɓɛla ɲɛ̨i tɔwɔ.

²⁷ Ə lansan kələn mɛ̨i, yɛ bələi Yai-Laa ə dí la.

²⁸ Ə ɉəɠə ɓɛla hɛlɛn bɛlɛ́ laaləi.

²⁹ Yili pulu, ə Yai-Laa mąąwiɛ haláá kulɔ kəhi hvilɛn gee kaa kələ laaləi, ə Yálá mąąwiɛ haláá kulɔ laa da Yálá kɔ́ halááɠaa, yɛ bələi Yai-Laa ə dí la.

³⁰ Ə nuą waa tea hee gee kaa kələ da ɉaláá kulɔi di lɔwai, ə́ yá pu ɉu, nuą waa mɛ̨nį ɓa.

³¹ Nąą ɓə Moisə, Aarɔn da nonnii, di kɛi di yeeɠaa da di kɔ́wɔɠaa mąą waa laa.

³² Ɓɛlɔwai di kɛi lɔ la gee kaa kələ mu, da ɓɛlɔwai da kɛ la ɉaláá kulɔi, da di mąą waa yɛ bələi Yai-Laa ə Moisə tí la.

³³ Ə gala tɔɔ bɛlɛ́ da ɉaláá kulɔi diɛ, ə doo gee hu, ə gala laaləi həɠə ɓɛlai hɛlɛn. Bələ ɓə Moisə ə ɲee laa kulɔ la.

Yai-Laa nwɔ mąąwiɛ ə ɉəɠə pɛlɛ́ laa hvɛɛ

³⁴ Túlɔ kpinįn ə pɛlɛ gee kaa kələ mɛ̨i, Yai-Laa nwɔ mąąwiɛ ə bɛlɛ́ laa hvɛɛ.

³⁵ Moisə hvo kɛi pɛli lɔi gee kaa kələ mu, mąąhɔlɔɓo, túlɔ kpinįn ə kɛ bɛlɛ́n, aa naa hvɛɛ a Yai-Laa nwɔ mąąwiɛ.

³⁶ Dúlɔ kpinįn a muhəɠə kɛ bɛlɛ́ mɛ̨i, Israɛlə lonnii da bələ həɠə, ɉiɛ kɔ́wɔ tɔɔ li, bələ ɓə di kɛi gɛ la.

³⁷ Kɛlaa, dúlɔ kpinįn a wala nii muhəɠə, di hva di muhəɠə, da nąą mąą kpɔn.

³⁸ Yai-Laa nwɔ túlɔ kpinįn a kɛ bɛlɛ́ mɛ̨i hvóló ŋą, kpinį a pɛlɛ, nwɔ̨n yɛ ɓo ɉu. Israɛlə lonnii kəlee di kɛi gaa ɓɛlɔwai di kɛ la ɉiɛ hu.