Lɛɛ gbɔwɔ ɓa 4 - Yálá laawoo hɛɓɛ (dc)Yálá ə nwɔ huwalawalalaa lɛ Moisə ɓa 1 Moisə ə Yálá woo ŋąąpənə yɛ mą: «Israɛlə nuą di hvo lii laai nwóó la, mąąhɔlɔɓo, di kaa lii kɛi mą́ą́: ‹Yai-Laa, hvo kɛ gbɔwɔ lɛ li yɛ́!›» 2 Yai-Laa, yɛ Moisə ɓa: «Lə ɓə tii ə́ yee ŋąi?» Moisə yɛ mą: «Tunwɔ̨n ni.» 3 Yɛ nwɔ̨nɔ̨ Moisə ɓa: «'Ɓo mą ə́ doo nɔi ɓa.» Moisə ə ɓo mą ə doo, dunwɔ̨n ə mąąpənə a kaalə. Moisə ə tɛ bulu, ə tɔɔ. 4 Kɛlaa, Yai-Laa, yɛ nwɔ̨nɔ̨ mą: «Ə́ yee mąą yɛɛ, ə́ gaaləi tii hon a nwon.» Moisə ə ɲee mąą yɛɛ, ə gaalə hon, ə mąą pənə ɲəi a tunwɔ̨n. 5 Yai-Laa, yɛ Moisə ɓa: «Yá li, yili ɓə yá gɛ Israɛlə nu huwu ɲɛ̨i ɓa, ya ɓə a gɛ di gɔlɔn diɛ ŋį́ gbɔ́wɔ́ lɛ yɛ́, ɲą́ą́ ŋɛ̨i gáá a di nąnni Abrahamə, Isaakə da Ɉakɔbə di wɔ Yálá.» 6 Yai-Laa yɛ nwɔ̨nɔ̨ mą: «Ə́ yee pɛlɛ ə́ lii pɔ.» Moisə ə ɲee pɛlɛ nii pɔ, hvólóɲɔ̨n ə ɲee kwələ kpɔ yɛ yee hunwɔ̨. 7 Ə pənə yɛ Moisə ɓa: «'Pənə ə́ ə́ yee pɛlɛ ə́ lii pɔ.» Moisə ə ɲee pɛlɛ nii pɔ, gɛɛ ɲee həɠəi nii pɔ, ɲee ɲąą ə pɛli a nɛlɛɛ, yɛ bələi tii mɛlan ə kɛ la. 8 Yai-Laa, yɛ nwɔ̨nɔ̨ mą: «Da wala laa ə́ la, di hvo gwɛlɛɛn mɛ̨nį dɔlɔɔ woo mɛ̨n, da laa gwɛlɛɛn mɛ̨nį bulu ɓa woo la. 9 Da wala laa gwɛlɛɛn mɛ̨nį hveelɛi tii la, di hvo di wəli tɔɔ yɛ́, ɲá lee ti ta haɠa, ə́ bu nɔi ɓa, ɲái tii a mąą pənə a ɲąmą.» Yálá ə Aarɔn kɛ a Moisə lawoo tɛɛmun 10 Moisə yɛ Yai-Laa ɓa: «Ną́mu nɛ̨ɛ̨ Yɛ́, náá wiai mą́ą́, va pɛli hvaai, háákələi mɛ̨nį hvəli, və́ wala nwóó hukulɔ, gbaɠala kaa Yɛ́, yili hvo gɔwɔ tɔɔ li a volói Ə́ kɛi hvaa la Ə́ wɔ tímun bɔ.» 11 Yai-Laa yɛ mą: «Gbɛɛ ɓə laaləi kɛ nu ɓa? A wala kɛ ti, gbɛɛ ɓə a nu kɛ a muugbɛ, a wala kɛ ti wəli tínímun? Gbɛɛ ɓə a nu ɲɛ̨ilon gɛ ɉu, awala kɛ tii ə gɛ, a ɲɛ̨ipumun? Kɛlɛi Ɲą́ą́ Yai-Laa, ɲą́ą́ ɓə! 12 Yii hu, 'həɠə ə́ li; Ɲą́ą́ Lɔ Gáá ə́ pɔ, mɛ̨nįi mąąnɛ̨ɛ̨ ə́ mo, Ŋą́ bu ə́ la.» 13 Moisə yɛ mą: «Nąmu nɛ̨ɛ̨ Yɛ́, nu takpɛli tɔɔ ə mo Ə́ yəi, ɲą́ą́ hvəi.» 14 Yai-Laa lii ə holi Moisə pɔ, yɛ mą: «Kɛlɛi ə́ liɛ Aarɔn kaa laa-e, yai ŋɛ̨i a Levi? Gíli kaa ɉu gɛ́ naa kpan ɉu teei. Aarɔn kaa hɔlɔɔmun bələ ɓa yɛ pa ə́ laakwiɛn ɉii; a pa ə́ kaai, gwəi kaa pai nɛ̨ɛ̨i. 15 Ya həli mą, mɛ̨nį kəlee hukulɔ mą ə́ ə́ woo pu na. Ɲą́ą́ Gáá Lɔ ə́ laaləi pɔ ka yaa, mɛ̨nį mąąnɛ̨ɛ̨ ka gɛ, ŋą́ nɛ kaa. 16 Aarɔn ɓə pai ə́ laa yəli kɛi nuą diɛ, ya ɓə pai kɛi a ə́ laaləi yɛ́ ɓo a nwɔ Yálá. 17 Yii ɓaa dunwɔ̨n ŋɛ̨i, 'ɉon ə́ yee ŋą, ya ɓə ə́ kaa pai kwɛlɛɛn mɛ̨nįɠaa kɛi la.» Moisə ə pənə ə li nwɔ nuą pɔ 18 Moisə ə bulu pənə ə li mɔlɔ́ Ɉetro pɔ yɛ mą: «Hvo kɛ li ŋį́ bulu pənə ŋį́ li gááyɔwɔɠaa pɔ, diɛi di kaa Eziptə lɔi hu, ə gɛ, ŋį́ di mɛ̨i kaa, akɛ di kaa ni a di hvulú.» Ɉetro yɛ Moisə ɓa: «'Li, ə́ hiɛ ə nɛ̨ɛ̨.» 19 Moisə ə lɛɛ Madian Yai-Laa yɛ mą: «'Pənə ə́ li Eziptə, hvó gaai, nuąi kɛi kɛ di ə́ paa, da haa.» 20 Moisə ə nɛ̨ą da nonnii həɠə, ə di hee hoohvaalən bulu, di tɛɛ diɛ li Eziptə. Yálá nwɔ tunwɔ̨n ə ɓo ɲəi. 21 Yai-Laa yɛ Moisə ɓa: «Lii ə́ kaa moi Eziptə, gwɛlɛɛn mɛ̨nįɠaa kpɔ ŋą́ gɛ sə tɛɛ ə́ pɔ, ə́ kaa lii gɛi Eziptə tɔɔmun nííla. Kɛlaa Gáá pai gili walawalai, hvo lii hvaai mą, hvo ɓo Israɛlə lonnii diɛ. 22 Yá li, yá kɛ Eziptə tɔɔmun ma: ‹Mɛ̨nii Yai-Laa ə mo ya ka, yɛ: Nón dɔlɔɔ ka ŋɛ̨i a Israɛlə. 23 Ŋą́ą́ mo yɛ́, 'ɓo nón ma ə li ə tí mą́ą́; ya ka hvó gɛi hvó ɓo mą hvo li! Yili ɓa, gáá ə́ lon ɉulɔnu dɔlɔɔ paai.›» 24 Moisə kɛɛ bələ pɔ, kpinį ə pɛlɛ diɛ di tɔɔ, Yai-Laa ə pɛlɛ Moisə ɓa, yɛ kɛ ə baa. 25 Moisə nɛ̨ą Sipora ə kwɛni ɲąąliɛ ta həɠə, ə non ɉee la kɛ́nɛ̨ ɓa, ə gbuwɔ hee ɉilɛ ɲɛ̨itɔwɔ, yɛ mą: «Ə́ kaa a ɉílɛ yii ŋą́ą́ nwun mąąɓo a ɲąmą.» Ɉilɛtaa ŋɛ̨i gu yəi gu ɲąmą puɔ gee hu. 26 Yai-Laa ə ɓo Moisə ɓa. Sipora yɛ kɛa diɛ: «Ɲąmą hilɛtaai ka» gɛ́nɛ̨i tii ə ɉee mąą mɛ̨nį ɓa. 27 Yai-Laa yɛ Aarɔn ɓa: «'Li ə́ ə́ ləɠə Moisə laakwiɛn nɔi pun ɉu.» Aarɔn ə li da nəɠə di kwiɛn Yálá nwɔ yeei ɓa, ə nɛ̨nɛ̨ɓo 28 Mɛ̨nįi kpɔ Yai-Laa ə mo Moisə ɓa, ə gəlee ɓo Aarɔn ɓa, ə mą kɛ gwɛlɛɛn mɛ̨nįɠaai gaa lii gɛi. 29 Moisə da Aarɔn di bɛlɛ gee ɓa, di li di Israɛlə kalanɉonŋąą kəlee ɲąąkpɔn. 30 Mɛ̨nįɠaa kpɔ Yai-Laa ə mo Moisə ɓa, Aarɔn ə gəlee laa həli galanɉonŋąą diɛ, Moisə ə gwɛlɛɛn mɛ̨nįɠaa kəlee kɛ Israɛlə lonnii ɲɛ̨i ɓa. 31 Di kəlee di laa na, yii kɛa di gaa diɛ kɛ mɔ̨nɔ̨i tii di kaa mįi Yai-Laa aa nąą kaa, aa nwɔɔ nąą kɛ ɉu, di kəlee di pu di kpəlin na di kwɛli hvilɛn. |