Lɛɛ gbɔwɔ ɓa 39 - Yálá laawoo hɛɓɛ (dc)

Ɉaláá kulɔ nuą mąą həɠəɠaa

¹ Ɉəɠə pɛ̨ɛ̨ tii a viliiɓoɔ gbuluɔ mu tɛɠiɛ, gbɔluɔ gbələ tətə, di ɉɔlɔn a ɉaláá kulɔ həɠəɠaa, diɛ haláá kulɔ la Yálá nwɔ pɛ́lɛ́i mu. Di Aarɔn nwɔ haláá kulɔ həɠəɠaai kɛ yɛ bələi Yai-Laa ə Moisə tí la.

² Di Gəɠə mɛ̨i həɠə pala a hɛni yá həɠə, a bɛ̨ɛ̨, viliiɓoɔ, gbɔluɔ mu tɛɠiɛ, gbɔluɔ gbələ tətə, a yeekali walawalaa.

³ Di hɛni pu, diɛ dee a gali bɛlɛɛ, diɛ nɔ ɲeekaliɠaa tii lɔwai, viliiɓoɔ gbɔluɔ mu tɛɠiɛ, gbɔluɔ gbələ tətə, di bala kpɔ a yɛlɛ.

⁴ Di gbulɔn ɉɛn gɛ a həɠə ɓɛla hveelɛ, gbulɔn ŋąą nwəli laɠaa.

⁵ Ɉąąi yili yɛlii ti kɛ mą, da yaa di kanąn ŋąą kɛ di kee ɓa, diɛ ɓo a huwu tɔ̨nɔ̨, yɛ bələi Yai-Laa ə Moisə tí la.

⁶ Di kwɛni ɓɛla hveelɛ pɛli, di nwəli la laa a hɛni, di Israɛlə lonnii laa pɛ̨ɛ̨ ɉu;

⁷ di bɛlɛ gilɛn ɉəɠə kalan ɲą, a Israɛlə lonnii kili too ɲą hɛn, yɛ bələi Yai-Laa ə Moisə tí la.

Gəŋə mɛ̨i həɠə

⁸ Di gəŋə mɛ̨i həɠə ɓɛla pala kpɔ a yɛlɛ, yɛ bələi lɔ di ɉəɠə mɛ̨i həɠə pɛli la, a viliiɓoɔ gbɔluɔ mu tɛɠiɛ, gbɔluɔ gbələ tətə, a yee kali walawala, ɛlɛɛ, di mąą pu a hɛni.

⁹ Gəŋə mɛ̨i həɠə nąą kəlee pɛliɛ kɛ a gee, di ɲali gee ɲą, gwɛa yee ə ɓo a yee tɔɔ mą tɔ̨nɔ̨, ŋąą kɛnɛ̨ yee ə ɓo a yee tɔɔ mą tɔ̨nɔ̨.

¹⁰ Di kuwo-kwɛni pɛlɛ mą a ɲɛli nąąn, ɲɛli dɔlɔɔ, di sardoanə, topazə, da emerodə kwɛniɠaa pɛlɛ mą.

¹¹ Ɲɛli veelɛnąą, di eskarbuklə, lazulitə, da ɉaspə kwɛniɠaa pɛlɛ ma.

¹² Ɲɛli ɉaaɓa nąąn, di agatə, kornalinə, da ametistə kwɛniɠaa ɓə di bɛlɛ mą.

¹³ Ɲɛli nąąn nąą, di krisolitə, bərilə, da onisə kwɛniɠaa pɛlɛ mą, gwɛni tɛi-tɛiɠaa kəlee mąą tínɛ̨nŋąą a hɛni.

¹⁴ Gwɛniɠaa tii di kɛ a Israɛlə lonnii laa, pow kɔ́w hveelɛi, yɛ bələi di laa ə kɛ la, ganąn ŋąą ma, yɛ nu a ɲee pɔɔ lɛɛ hɛn ma, gəlee tɛitɛi da naa, yɛ bələi di kɛ la a nu huwu pow gɔw hveelɛ.

¹⁵ Di gilɛn ɉəɠə ɲɛli pala, a hɛni yɔwɔn ɉuwaa hva-hva.

¹⁶ Mɛ̨i pələ yɛli kpulɔn ɉi tii, di gbono hveelɛ pɛli a hɛni, di doo mą.

¹⁷ Di ɉɛni yɔwɔn tii kpulɔn gɛa gilɛn ɉəɠə wəli laɠaa, ɉɛni gbono hveelɛi tii hu.

¹⁸ Di ɲɛli tɛɛ bulu, di gbulɔn ɉəɠə mɛ̨i həɠə ɲɛliɠaa diɛ.

¹⁹ Di hɛni gbono hveelɛ kɛ, di ɉɛlɛn gilɛn ɉəɠə wəli la hveelɛi ɓa, ɓɛ pələi tii a hee ɉəɠə mɛ̨i həɠə ɓa ɉu pələ.

²⁰ Di hɛni gbono hveelɛ pɛli nwɔ̨nɔ̨ di ɉɛlɛn gilɛn ɉəɠə wəli la, ɉəɠɛɛ pələ, ɲɛ̨i tɔwɔ, gbulɔn ɲɛli mɛ̨i pələ.

²¹ Di gilɛn ɉəɠə nwɔ gbonoɠaai kpulɔn ɉəɠə mɛ̨i həɠə nwɔ gbonoɠaai diɛ, a yeekali kpɔluɔ mu tɛɠiɛ; əgɛ ə pɛli kanąn ɉi ɉəɠə mɛ̨i həɠə ɓa, hvo tumun mɛ̨i yɛ bələi Yai-Laa ə Moisə tí la.

Ɉaláá həɠə takpɛliɠaa

²² Həɠə pala nuą, di Aarɔn nwɔ həɠə kwɛai pala, a viliiɓoɔ.

²³ Di ɉəɠə kɔn dee, di ɉu pɛlɛ, di ɉɔlɔn a nwalawalaa, əgɛ hvo pa pɛli ɓɛla gɔn ɉu.

²⁴ Di wulu ɓá mąąnįnįnŋąą hɛlɛn ɉəɠə kɔ́wɔ la, daɠaa hviliiɓoɔ, gbɔluɔ mu tɛɠiɛ, daɠaa kpɔluɔ gbələ tətə.

²⁵ Di talanən bɛlɛɛ pɛli a hɛni huwaa hva-hva di ɉɛlɛn nwulu ɓá mąąnįnįnŋąą tɛitɛi lɔwai di dínɛ̨n mą di doo gee hu.

²⁶ Da talanən dɔ̨nɔ̨ hɛlɛn, di wulu ɓá mąąnįnįn dɔ̨nɔ̨ hɛlɛn, yɛ bələi Yai-Laa ə Moisə tí la.

²⁷ Yili pulu, həɠə pala nuą di Aarɔn da nonnii di mąą həɠəɠaa pala a yeekalə walawala.

²⁸ Di di nwuɔ̨ ɓɔlɔɠaa pala, da mɔlɔ mąąpu hɛnŋąą, da bɛlɛnŋąą, a yeekali hu walawalaa.

²⁹ Di hąą yili kɔ́lɔɠaa pala a yeekali hu walawalaa, viliiɓoɔ gbɔluɔ mu tɛɠiɛ, gbɔluɔ gbələ tətə, ə kɛ a həɠə mąąpu nuą di wɔ yɛlɛ kóló, yɛ pələi Yai-Laa ə Moisə tí la.

³⁰ Di kalan bɛli a hɛni huwaa hva-hva, mɛla ɲą kɛnɛ̨, yɛ wulu powa a kɛi holoon, naakwɛlanmo hɛn ni; di hɛɓɛ́ pɛ̨ɛ̨ maą, diɛ mą: «Naakwɛlan moɔi Yai-Laa ɓa.»

³¹ Yili pulu, di ɲɛli kɛ mą, a viliiɓoɔ, diɛ gbulɔn na mɔlɔ mɛ̨i, yɛ bələi Yai-Laa ə Moisə tí la.

Di góló kəlee lɛ Moisə ɓa

³² Bələ ɓə di gee kaa kələ tɔɔ kóló kəlee laa kulɔ la, Israɛlə lonnii kəlee, di góló kɛ yɛ bələi Yai-Laa ə Moisə tí la.

³³ Di pa a gələ Moisə pɔ, gələ da mu hɛnŋąą, daŋąɠaa, nwulu ɓɛlaɠaa, naaŋąɠaa, nɔ̨nwɔ̨ɠaa, da gbonoɠaa.

³⁴ Mɛ̨i kpulu hɛn kɛ a ɓɛlaa hilɛ kɔ́lɔi di gbɔlu, da huwɔ kɔ́lɔ paa, ɛlɛɛ, da ɉəɠəi kɛi gələ ɓɛla ɓo ɉu hveelɛ.

³⁵ Mįnɛ̨ kəhi da gbəŋə wuluɠaa, ə pɛlɛ la naa kalan ma.

³⁶ Nɛɠɛ laa taɓali da gwɛlɛ hɛnŋąą, ɛlɛɛ, da ɉaláá lɛɠɛ.

³⁷ Nwɔ̨n ɉee hɛn kɛ a hɛni huwaa hva-hva, da gwɛlɛ hɛnŋąą, ə mą kɛ, nwɔ̨n ɉee wulɔ.

³⁸ Ɉaláá kulɔi kɛ a hɛni, mąątí wulɔ, lansan, ɛlɛɛ, ɉəɠə ɓɛlai kɛ pɛlɛ ni bɛlɛ́ laaləi.

³⁹ Ɉaláá kulɔi a ɓala kwɛli, gwɛli hɛ̨ąn kɛ a ɓala kwɛli, da gbəŋə kwɛliɠaa, ə mą kɛ gwɛlɛ hɛnŋąą kəlee, dea kɛnɛ̨ da ɉee hɛn.

⁴⁰ Gwəli mąą kpɛlaan ɉəɠə ɓɛlaɠaa, Nɔ̨nwɔ̨ɠaa, da di kɔ́wɔ hvilɛn ɉi, gwəli laaləi həɠə ɓɛla, da ɉɛlɛn ɉɛnŋąą, gbɔn nwuluɠaa, da góló kɛ hɛnŋąąi kɛ laa gee kaa kələ mu.

⁴¹ Ɉaláá kulɔ həɠəɠaa diɛ ɓaa: Ɉaláá laa həli mun gɛnɛ̨ Aarɔn nwɔ həɠəɠaai, ɉəɠəɠaai nonnii da doo di kwąną diɛ di kɛ kóló kɛ ɉu.

⁴² Bələi kpɔlɔ Yai-Laa ə Moisə tí la, bələ kpɔlɔ ɓə Israɛlə lonnii di gɛ la.

⁴³ Moisə ə gólóɠaa tii kaa, di gɛ kpɔlɔ yɛ bələi Yai-Laa ə Moisə tí la. Moisə ə nɛɛ mą ə lúwɔ́ too diɛ.