Lɛɛ gbɔwɔ ɓa 38 - Yálá laawoo hɛɓɛ (dc)

Ɉaláá kulɔi da nuą mąą waa yá pui

¹ Yili pulu, di ɉaláá kulɔi pɛli a kpitili wulu, gwɛa yee ə ɓo a yee laa mą lɔɔli, ɲąą kɛnɛ̨ yee ə ɓo a yee laa mą lɔɔli, nąą kəlee pɛliɛ a gee, ɛlɛɛ, dɔɔmɛ̨i ə ɓo a yee laa mą haaɓa.

² Di mįnɛ̨ɠaa tɔɔ nwəli la nąąn ma, di ɓala kwɛli yá hiɛ mą.

³ Di ɉaláá kulɔi hɛnŋąą pɛli a ɓala kwɛli; gəgənŋąą, goagoaɠaa, nuwu pu hɛnŋąą, deaɠaa mįnɛ̨ɠaa da nwɔ̨n ɉəɠə hɛnŋąą.

⁴ Di kwɛli hɛ̨ąn bɛli a ɓala kwɛli, yɛ tumɔ̨ kɛ pələ, di naa ɉaláá kulɔi nwəli kwɛlɛ, ə həɠə nɔi ɓa, ə tɛ ɉąąi.

⁵ Di gbono nąąn bɛli gwɛli hɛ̨ąn nwəli la nąąn ma a ɓala kwɛli, diɛ pɛli gbəŋə wulu lɔi ɉu.

⁶ Di gbəŋə wuluɠaai tii kɛ a kpitili wulu, di ɓala kwɛli yá hiɛ mą.

⁷ Di nwuluɠaai tii lɔ gbonoɠaa hu, ɉaláá kulɔi wəli laɠaa ɓa, di nwolo lɛɛ mu pələ.

⁸ Yili pulu, di nuą mąąwaai kɛ a ɓala kwɛli hɛnɲąŋą, di ɉee hɛn gɛ a ɓala kwɛli, nɛ̨ąąi kɛi di ɲąąkpɔn gee kaa kələ laaləi, di wɔ gááɉuɠaai ɓə di ɉəɠə, diɛ nuą mąąwaa hɛnɲąŋą pɛli la.

Bɛlɛ́ mąą həɠɛɛ mąą kwənąn ɉɛnŋąą

⁹ Yili pulu, di bɛlɛ́ mąą həɠɛɛ mąą kwənąn, Negɛvə, ɉɛɠɛɛ pələ, bɛlɛ́ mąą kwənąn ɉɛn tii ə kɛ a yeekali hu walawalaaɠaa, ə ɓo a yee laa mą nwun dɔ̨nɔ̨.

¹⁰ Nɔ̨nwɔ̨ɠaa da di kɔ́wɔ hvilɛn ɉɛnŋąą di kɛ a ɓala kwɛli, daŋąɠaa di kɛ a wali kwɛli.

¹¹ Ɲa nwuɔ̨ pələ, ə ɓo a yee laa mą nwun dɔ̨nɔ̨, da di lɔ̨nwɔ̨ pow hveelɛi, da di kɔ́wɔ hvilɛn ɉɛnŋąą, gəlee diɛ ɓo a ɓala kwɛli, daŋąɠaa di kɛ a wali kwɛli.

¹² Gboloyá ɓa pələ, nwɔ kwənąn ə ɓo a yee laa mą pow lɔɔli, di lɔ̨nwɔ̨ ə ɓo pow, da di kɔ́wɔ hvilɛn ɉii pow, daŋąɠaa di ɓo a wali kwɛli.

¹³ Voló həɠəi, ɲánwuɔ̨ pələ, yee laa mą pow lɔɔli.

¹⁴ Gwənąn bələ tɔ̨nɔ̨ ə kɛ a yee laa mą pow kɔ́w lɔɔli, da di lɔ̨nwɔ̨ haaɓa, di kɔ́wɔ hvilɛn ɉɛnŋąą haaɓa.

¹⁵ Bələ tɔ̨nɔ̨i tii ɓa, gɛ pələ ə ɓo nwɔ̨nɔ̨ tii bɛlɛ́ laaləi kəlee, həɠə ɓɛla yee laa mą pow kɔ́w lɔɔli, da nɔ̨nwɔ̨ haaɓa da di kɔ́wɔ hvilɛn ɉɛnŋąą haaɓa.

¹⁶ Ɉəɠə ɓɛlaɠaai tii kɛ nąą mąą tínɛ̨nŋąą la, gəlee di kɛ a yeekali hu walawalaa.

¹⁷ Nɔ̨nwɔ̨ɠaa kɔ́wɔ hvilɛn ɉɛnŋąą di kɛ a ɓala kwɛli, da daŋąɠaai kɛ diɛ, diɛ ɓo a wali kwɛli, di ton na hee hɛnŋąą diɛ ɓo a wali kwɛli. Nɔ̨nwɔ̨ɠaa kəlee yiliɛ kɛ di kee ɓa a taŋąɠaa, yiiɠaai kɛ a wali kwɛli.

¹⁸ Bɛlɛ́ laaləi həɠə ɓɛla, ə kɛ a həɠə mąą puɔ. Viliiɓoɔ gbɔluɔ mutɛɠiɛ, gbɔluɔ gbələ tətə, a yeekali walawalaa; gwɛa yee ə ɓo a yee laa mą pow hveelɛ, dɔɔmɛ̨i ə ɓo a yee laa mą lɔɔli, yɛ bələi lɔ gwəli hąąi nwɔ həɠəi ɲąą kɛnɛ̨ pələ kaa la.

¹⁹ Nɔ̨nwɔ̨ nąąn da di kɔ́wɔ hvilɛn ɉɛnŋąą, di kɛ a ɓala kwɛli, gbonoɠaa di ɓo a wali kwɛli, di ton na hee hɛnŋąą daŋąɠaa, di kɛ a wali kwɛli.

²⁰ Bɛlɛ́ kɔ́wɔ hvilɛn ɉɛnŋąą da mąą tínɛ̨n gwənąn vilɛn ɉɛnŋąą, di kɛ a ɓala kwɛli.

Ɉɛnŋąąi lɔ góló hu di lononŋąą ka

²¹ Ɉɛnŋąąi kpɔ lɔ bɛlɛ́ kóló hu, a mįnɛ̨ pɛlɛ́ kóló, Moisə ə mo di nonon, yili ə kɛ a Levi lonnii nwuɔ̨ kóló, ɉaláá laa həli mun Aarɔn lon Itamarə ɓə kɛ nąą ɲɛ̨i tɔwɔ.

²² Besalɛlə Uri lon, ə ɓo a Hurə mąnįn, yai a Ɉuda huwuhu mun, mɛ̨nįɠaai kpɔ Yai-Laa ə Moisə tí la, ə gəlee kɛ.

²³ Nui kɛ bɔ, ya ɓaa Ahisamakə lon Oholiavə, yai kɛ Dan huwuhu, ə kɛ a kwɛni mąą haɠamun, yɛlɛ kɛmun, a həɠə mąąpumun, yɛ bɛ̨ɛ̨ ɲɛ̨i kɛ a viliiɓoɔ, a gbɔluɔ gbələ tətə, a mutɛɠiɛ ɲɛ̨itɔɔ, a yeekali walawala.

²⁴ Ɉɛnii kpɔ lɔ góló hu, a bɛlɛ́ mąąhəɠɛɛ tɔɔ hɛni, yɛ ə kɛ a yii di Yálá kɔ́ la, ə kɛ a: kilə nwun mɛ̨ihaaɓa, kilə pow mɛ̨ihveelɛ kɔ́w mɛ̨ihveelɛ da da, yɛ bələi ɉɛnŋąą kɔ́ɔn bələ ə kɛ la bɛlɛ́ mąąhəɠɛɛ mu.

²⁵ Nwalii nɔi lonnii di paa la, diɛi di di lonon, ə kɛ a kilə waa haaɓa, kilə pow kɔ́w mɛ̨ihveelɛ da da, yɛ bələi ɉɛnŋąą kɔ́ɔn bələ ə kɛ la bɛlɛ́ mąąhəɠɛɛ mu.

²⁶ A kɛ ti, nu tɔ̨nɔ̨ kilə kpulɔ wali hu, mąąhɔlɔɓo, ɉinąąi kpɔ di di lonon, ə həɠə kwɛlan bow hveelɛ ɓa, ə li la bulu pələ, di kɛ a nu waa nwun mɛ̨ida, nu waa haaɓa, pulu nwun nɔɔli yee lɔɔli.

²⁷ Di nwali kilə waa haaɓa, həɠə, əgɛ di bɛlɛ́ lɔ̨nwɔ̨ɠaa kɔ́wɔ hvilɛn ɉɛnŋąą nwun dɔ̨nɔ̨ pu la, da ɉəɠə ɓɛla hɛlɛn ɉɛnŋąą, kilə pow haaɓa, gɔwɔ hvilɛn ɉɛn dɔ̨nɔ̨.

²⁸ Gbəlii tii lɛɛ, di gbonoɠaa pɛli la, di da lɔ bɛlɛ́ ton na hee hɛnŋąą diɛ, da daŋąɠaai di kɛi ɉəɠə ɓɛla hɛlɛn ɲɛliɠaa lɔ ɉu.

²⁹ Mala kwɛlii di Yálá kɔ́ la, ə kɛ a kilə waa hveelɛ, kilə nwun dɔ̨nɔ̨ ɲee hveelɛ kɔ́w nąąn.

³⁰ Di gee kaa kələ laaləi pɛli a mala kwɛlii tii, da ɉaláá kulɔ taɓali, da galai ŋɛ̨i kɛ gwɛli ɲɛ̨i tɔwɔ, da ɉaláá kulɔ taɓali kwɛlɛ hɛnŋąą kəlee.

³¹ Nwuluɠaai di gwəli mąą tínɛ̨n na, da gwənąn naaləi kpon vilɛn ɉii, da gwəli tɔɔ wulu kəlee, ə mą kɛ bɛlɛ́ wuluɠaa, di kulɔ mala kwɛlii ti hu.