Lɛɛ gbɔwɔ ɓa 37 - Yálá laawoo hɛɓɛ (dc)

Bɛlɛ́ mu hɛnŋąą

¹ Besalɛlə ə mįnɛ̨ kəhi pɛli a kpitili wulu, gwɛa yee ə ɓo a yee laa mą hveelɛ da gbulɔ, ɲąą kɛnɛ̨ yee ə ɓo a yee laa mą tɔ̨nɔ̨ da gbulɔ, dɔɔ mɛ̨i ə ɓo a yee laa mą tɔ̨nɔ̨ da gbulɔ.

² Ə hɛni yá lɔ mą, nąą kəlee ɉu pələ da gɔlɔ ɓa, ə gwɛlɛ laa a hɛni.

³ Ə gbono nąąn bɛli a hɛni, a gɔwɔ nąąn nwɔɔ, ɓɛ pələ gbono hveelɛ, ɓɛ pələ gbono hveelɛ.

⁴ Ə gbəŋə wulu hveelɛ pɛli a kpitili, ə hɛni yá lɔ mą.

⁵ Di nɔ mįnɛ̨ kəhi nwɔ gbonoɠaa hu, diɛ gəhi kpəŋə la.

⁶ Di gəhi laa kalan bɛli a hɛni huwaa hva-hva, gwɛa yee ə ɓo a yee laa mą hveelɛ da gbulɔ, ɲąą kɛnɛ̨ yee ə ɓo a yee laa mą tɔ̨nɔ̨ da gbulɔ.

⁷ Ə mąąkpɛ malakaɠaa hveelɛ pɛli a hɛni, ə di tɔɔ gəhi laa kalan nwəli la hveelɛi ɓa.

⁸ Di dɔ̨nɔ̨ tɔɔ nwəli la ɓɛ pələ, di dɔ̨nɔ̨ tɔɔ nwəli la ɓɛ pələ, di kanąnŋąą gəhi laa kalan ma, nwəli la hveelɛi ɓa.

⁹ Di ɲɛ̨i heɛ gəhi laa kalan mɛ̨i di koon yɛ mɛ̨i kpulu.

Yálá kɔ́ taɓali

¹⁰ Yili pulu, di taɓali pɛli a kpitili wulu, gwɛa yee ə ɓo a yee laa mą hveelɛ, ɲąą kɛnɛ̨ yee ə ɓo a yee laa mą tɔ̨nɔ̨, dɔɔmɛ̨i ə ɓo a yee laa mą tɔ̨nɔ̨ da gbulɔ.

¹¹ Di hɛni yá lɔ mą, di gwɛlɛ laa a hɛni.

¹² Di ɉee hɛn gɛ mu a yee ɓa ŋą tɔ̨nɔ̨ di hɛni yá lɔ mą di gwɛlɛ laa a hɛni.

¹³ Di gbono nąąn bɛli a hɛni, di di hee nwəli la nąąn ma, gɔwɔ nąąn gwɛlɛ.

¹⁴ Gbonoɠaai tii lɛɠɛɛ kɛ ɉee hɛn gwɛlɛ, diɛ pɛli gbəŋə wuluɠaa lɔi ɉu.

¹⁵ Di gbəŋə wuluɠaa pɛli a kpitili wulu, di hɛni yá lɔ mą, ə gɛ diɛ daɓali kpəŋə la.

¹⁶ Di daɓali ɲą hɛnŋąą pɛli a hɛni gəgənŋąą, gbələkɔɔɠaa da Yálá kɔ́ lɔɔ pu hɛnŋąą.

Nwulɔ nwɔ̨n ɉee hɛn

¹⁷ Yili pulu, di nwulɔ nwɔ̨n ɉee hɛn bɛli a hɛni huwaa hva-hva, di bɛli, gɔwɔ da gbinį, da gɔnŋąą, gbulɔn naɠaa di kanąnŋąą di kee ɓa, diɛ ɓo lɔ tanɔ̨n.

¹⁸ Gɔn mɛ̨idai, ɉaaɓa ə kɛ bələ tɔ̨nɔ̨, ɉaaɓa ə ɓo bələ tɔ̨nɔ̨.

¹⁹ Gɔn mɛ̨idai tii dɛitɛi kəlee gbulɔn ə kɛ ɉu haaɓa, nwun ə ɓo ɲą yɛ yee powa.

²⁰ Gbini nwɛi, gbulɔn ə kɛ ɉu nąąn, di nwun ə ɓo di ɲą yɛ yee powa.

²¹ Gɔn veelɛ tɛitɛi kəlee mu, gbulɔn dɔ̨nɔ̨ ə kɛ laa.

²² Gbini, gɔnŋąą da gbulɔnŋąą kəlee, di di pu lɔ tanɔ̨n a hɛni huwaa hva-hva.

²³ Di nwɔ̨n ɉee hɛn mɛ̨ihveelɛ pɛli da nwɔ̨n ɉəɠə hɛnŋąą, ə mą kɛ nuwu kələ hɛnŋąą; gəlee ə ɓo a hɛni huwaa hva-hva.

²⁴ Di nwɔ̨n ɉee hɛn da bɔ hɛnŋąą kəlee pɛli a hɛni huwaa hva-hva, kilə pow haaɓa.

Ɉɛn gun nɛ̨ɛ̨ kələn ɉi

²⁵ Yili pulu, ə ɉɛn gun nɛ̨ɛ̨ kələn ɉii pɛli a kpitili wulu, gwɛa yee ə ɓo a yee laa mą tɔ̨nɔ̨, ɲąą kɛnɛ̨ yee ə ɓo a yee laa mą tɔ̨nɔ̨, nąą kəlee pɛliɛ a gee, dɔɔmɛ̨i ə ɓo a yee laa mą hveelɛ da mįnɛ̨ɠaa kəlee di puɔ lɔ kɛ tanɔ̨n.

²⁶ Di hɛni huwaa hva-hva yá hiɛ daɓali ɓa, mįnɛ̨ɠaa kpɛli mąn, di gwɛlɛ laa a hɛni di dinɛ̨n mą di doo gee hu.

²⁷ Di gbono hveelɛ pɛli a hɛni, di nɔ nwəli kwɛlɛ hveelɛi ɓa, diɛ pɛli gbəŋə wuluɠaa lɔi ɉu.

²⁸ Di gbəŋə wuluɠaa pɛli a kpitili wulu, di hɛni yá hiɛ mą.

²⁹ Di mąątí wulɔ mąąhəɠɛɛ pɛli, da lansan da gələn, nwulɔ pɛli nuą kɛ kóló li.