Lɛɛ gbɔwɔ ɓa 36 - Yálá laawoo hɛɓɛ (dc)

¹ Besalɛlə, Oholiavə, da nuąi kpɔ Yai-Laa ə di kɔ́ a kili mɛ̨nį kɔ́lɔn ŋąą da yɛlɛ, di pɛli bɛlɛ́ mąą həɠɛɛ nwɔ kóló kɛ pələ kɔ́lɔn ɉi. Mąąnɛ̨ɛ̨ di mɛ̨nį kəlee kɛ, yɛ bələi Yai-Laa ə mo la.

² Moisə ə Besalɛlə da Oholiavə təli, da nuąi kpɔ Yai-Laa ə di kɔ́ a kili, di kəlee di kɛi pa góló ɓa, a di kwəinɛ̨ɛ̨, diɛ góló kɛ.

³ Ɉɛnŋąąi kpɔ Israɛlə lonnii di paa la bɛlɛ́ mąą həɠɛɛ mąą mɛ̨nį ɓa, di ɉon Moisə yəi, diɛ gólóɠaa kɛ la, kɛlaa, nuą di kɛi lɔ pa a da kɛnɛ̨ yələwala pɔ tɛitɛi kəlee.

⁴ Ya ɓə ɲɛlɛ kóló kɛ nuąi kɛi góló huwui tamąąi tii kɛ bɛlɛ́ mąą mɛ̨nį ɓa, di kəlee di həɠə góló kɛɛnąą di pa,

⁵ diɛ Moisə ɓa: «Yii nuą daa paa la, aa kɛnɛ̨ aa tɛɛ, yii ku kaa bɔ mą, aa tɛɛ gólóɠaai Yai-Laa ə vaa ɓo diɛ.»

⁶ Moisə ə mo, di ɉukulɔ daa kwəi nuą diɛ, diɛ kɛ diɛ: «Nɛ̨ą da hinąą, nu ta hvo kɛa pa a hɛn da bɛlɛ́ mąą həɠɛɛ mąą mɛ̨nį ɓa.» Nuą di kpəla kɛa paa ɓa a hɛnŋąą.

⁷ Ɉɛnŋąą di paa la, da pɛli kɛ gólóɠaa kɛi, gbəli yɛ lɛɛ.

Bɛlɛ́ mąąhəɠɛɛ

⁸ Nuąi kpɔ kɛ di yɛlɛɛ góló kɛ nuą lɔwai, di bɛlɛ́ tɔɔ, di bɛli, di dɔɔ a həɠə ɓɛla pow, gwəlɛɛ, gbɔluɔ mu tɛɠiɛ, viliɓoɔ, gbɔluɔ gbələ tətə, di mąąkpɛ malakaɠaa mąą nįnįn gɛ mą.

⁹ Ɉəɠə ɓɛla tɔ̨nɔ̨ kwɛa pələ ə kɛ a yee laa mą pow hveelɛ kɔ́w mɛ̨ihaaɓa, ɉəɠə ɓɛla tɔ̨nɔ̨ ɲąą kɛnɛ̨ pələ ə ɓo a yee laa mą nąąn, ɉəɠə ɓɛla kəlee kɛ pələ ə kɛ lɔ ti.

¹⁰ Di ɉəɠə ɓɛla lɔɔli hee gee la di nɔɔli takpɛliɠaa hee lɔ tii gee la.

¹¹ Ɉəɠə ɓɛla lɔɔli dɔlɔɔ ti nwɔ həɠə ɓɛla kpəlii tii di gbulɔn ɲɛli kɛ a yeekali kpɔluɔ mu tɛɠiɛ, di gɛ lɔ tii a ɉəɠə ɓɛla veelɛnąą.

¹² Ɉəɠə ɓɛla tɔlɔɔ kpulɔn ɲɛli ə kɛ pow lɔɔli, ə ɓo lɔ nwɔ̨nɔ̨ tii veelɛnąą ɓa.

¹³ Di ɉəɠə ɓɛla kpɛa-kpɛa hveelɛi tii hee gee la, a ɉəɠə kpulɔn gwɛliɠaa, gəlee ə kɛ lɔ yɛ həɠə ɓɛla tɔ̨nɔ̨.

¹⁴ Yili pulu, di həɠə ɓɛla pow kɔ́w tɔ̨nɔ̨ pala a ɓolu ləɠa di gɛ a ɉəɠə pɛlɛ́ veelɛnąą, yili ɓə kɛi Yálá hee pɛlɛ́ mɛ̨i kpulu.

¹⁵ Ɉəɠə ɓɛlai tii dɔ̨nɔ̨ gbən dɔɔ ɉu a kɛ a yee laa mą pow haaɓa, ɲąą kɛnɛ̨ yee ə ɓo a yee laa mą nąąn. Bow kɔ́w tɔ̨nɔ̨i tii kəlee ə kɛ a bɛliɛ a gee.

¹⁶ Di ɉəɠə ɓɛla nɔɔli hɔlɔɔn gee la, di pənə di mɛ̨idai ti hɔlɔɔn gee la.

¹⁷ Di yɛli pow lɔɔli hɛlɛn ɉəɠə ɓɛla gbəliɠaa wəlila a ɲɛli pow lɔɔli, di veelɛnąą nwɛi kɛ ti nwɔ̨nɔ̨ pow lɔɔli.

¹⁸ Di wolo bɛlɛɛ pow lɔɔli pɛli ɉəɠə ɓɛla wəli la a ɓala kwɛli, ə gɛ, ɉəɠə ɓɛla kpɛa-kpɛa hveelɛi tii, diɛ pɛli di yee tooi gee hu, gəlee di kɛ a həɠə ɓɛla tɔ̨nɔ̨.

¹⁹ Di ɓɛlaa hilɛ kɔ́lɔ kpɔlu da huwɔ kɔ́lɔ paa, di bɛlɛ ɉəɠə pɛlɛ́ veelɛ nąą tii mɛ̨i, ə kɛ a mɛ̨i kɛ hɛn.

²⁰ Di wulu ɓɛlaɠaa pɛli a kpitili, ə kɛ a ɉəɠə pɛlɛ́ ɉee mu hɛn.

²¹ Nwulu ɓɛla tɛitɛi kəlee tɔɔ ɉu ə kɛ a yee laa mą pow, ɲąą kɛnɛ̨ pələ yɛ ɓo a yee laa mą tɔ̨nɔ̨ da gbulɔ.

²² Nwulu ɓɛla kəlee ɲin ɉu kulaa kɛ, diɛ pɛli pilii di kee hu. Bələ ɓə di gɛ la a ɉəɠə pɛlɛ́ nwɔ wulu ɓɛlaɠaa kəlee.

²³ Di wulu ɓɛla pow hveelɛ pɛli ɉəɠə pɛlɛ́ ɉɛɠɛɛ pələ.

²⁴ Nwulu ɓɛla pow hveelɛi tii, di kɔ́wɔ ə kɛ di mu hveelɛ a wali kwɛli yɛ pɛli ɲin ɉu kulɔi hveelɛi ti ɓa.

²⁵ Ɉəɠə pɛlɛ́ ɲələi pələ, di wulu ɓɛla pow hveelɛ kɛ laa,

²⁶ gəlee tɛitɛi kɔ́wɔ yɛ ɓo mu hveelɛ hveelɛ a wali kwɛli.

²⁷ Ɉəɠə pɛlɛ́ voló tooi pələ, gbon ɲa pələ, di wulu ɓɛla mɛ̨ida kɛ laa,

²⁸ ə pɛlɛ wulu ɓɛla hveelɛ ɓa, ə kɛ ɉəɠə pɛlɛ́ gbon bələ nwəli la hveelɛi tii mąą mɛ̨nį ɓa.

²⁹ Nwulu ɓɛla hveelɛi ti lɔwai kulaai kɛ gee ɓa a nɛlɛɛ, kɛlaa, ɲələi pələ nwun ɉeɛ gee ɓa gbono tɔ̨nɔ̨ hu. Bələ ɓə di gɛ la a gəlee hveelɛi.

³⁰ Ɉəɠə pɛlɛ́ gbon bələ, wulu ɓɛla mɛ̨ihaaɓa ɓə kɛ laa, gɔwɔ yɛ ɓo pow kɔ́w mɛ̨ida, a wali kwɛli.

³¹ Di naaŋąɠaa haɠa a kpitili wulu, di nɔɔli laa bələ tɔ̨nɔ̨ nwɔ wulu ɓɛlaɠaai kɔ́wɔ mu,

³² di nɔɔli laa ɓɛ pələ bələ tɔ̨nɔ̨, di nɔɔli takpɛli laa voló tooi pələ.

³³ Naaŋą yii ŋɛ̨i pai kɛi ɉąąi, gaa pai laai nwulu ɓɛlaɠaa kəlee hąąi.

³⁴ Di hɛni ya hiɛ nwulu ɓɛlaɠaai tii kəlee diɛ da naaŋąɠaa, diɛ ɓə pai kɛi lɔi ɉɛni gbonoɠaai tii hu.

³⁵ Di həɠə ɓɛla ta pɛli a viliiɓoɔ da gbɔluɔ-mutɛɠiɛ, ɛlɛɛ həɠə ɓɛla kpɔluɔ gbələ tətə, viliiɓoɔ, diɛ ɓo a yeekali huwalawalaa, di mąąkpɛ malakaɠaa mąąnįnįn ɉəɠə mą a yɛlɛ.

³⁶ Di dɔɔmu nąąn bɛli a kpitili wulu, di hɛni yá lɔ mą. Dalanən bɛlɛɛɠaai tii kɛ mą, yɛ ɓo a hɛni, di gɔwɔ kɛ mu nąąn, a wali kwɛli.

³⁷ Di həɠə takpɛli pala a bɛ̨ɛ̨ viliiɓoɔ, gbɔluɔ mu tɛɠiɛ yɛ ɓo ɉu, gbɔluɔ gbələ tətə, a yeekali walawala di mąąpu.

³⁸ Nɔ̨nwɔ̨ lɔɔli tii, da di ton na hee hviɲɛɠaa, da di wɔ talanənŋąą, hɛni yá lɔɔ gəlee ɓa da gɔwɔ lɔɔli tii gaa a ɓala kwɛli.