Lɛɛ gbɔwɔ ɓa 35 - Yálá laawoo hɛɓɛ (dc)

Ɉəɠə pɛlɛ́ tɔɔ mɛ̨nį Hviitɔɔ yələ

¹ Moisə ə Israɛlə lonnii kəlee ŋąąkpɔn, yɛ diɛ: «Mɛ̨nįɠaai Yai-Laa ə mo yɛ gu gɛ, diɛ ka:

² Hvoló mɛ̨ida yee mu, nuą da di mąą kóló kəlee kɛ, voló mɛ̨ihveelɛ yələ, a kɛ ka yəi a hvóló mąąwiaa, a Sabatə, a Yai-Laa nwɔ hvįįtɔɔ yələ. Nui lɔpee a kóló kɛ a mąą yələi, da baa.

³ Ka hvo kɔ̨nɔ̨n ɲili nwɔ̨n ɉee ka yəi bɛlɛ́n a vįitɔɔ yələ, ɓɛi lɔpee ka kɛ laa.»

Israɛlə lonnii di Nįįhɔ̨nwɔ̨ kulɔ

⁴ Moisə yɛ Israɛlə lonnii diɛ, mɛ̨nįi Yai-Laa ə mo ya ka:

⁵ «Ka hɛnŋąą kulɔ a Yai-Laa nwɔɔ. Nui gwəinɛ̨ɛ̨, ə naa gwəi mɛ̨inɛ̨ɛ̨ kɛ Nąmu ɓa: hɛni, wali kwɛli, ɓala kwɛli,

⁶ həɠə ɓɛla kpɔluɔ mutɛɠiɛ, gbɔluɔ gbele tətə, viliiɓoɔ, gwəlɛɛ, ɓooli ləɠa,

⁷ Ɓɛlaa hilɛ kɔ́lɔ, di gbɔlu, nini kɔ́lɔ həɠə da kpitili,

⁸ nwɔ̨n ɉee wulɔ, hɛn gun nɛ̨ɛ̨ɠaa a mąątí wulɔ pɛli hɛn, da lansan,

⁹ berilə kwɛni da kwɛni lɛlɛɛ a gilɛn ɉəɠə mąą pu la da gəŋə mɛ̨i həɠə.

¹⁰ Ɛlɛɛ, yɛlɛ kɛ nuąi kpɔ ka lɔwai, di pa, kólóɠaai Yai-Laa ə vaa ɓo, di gɛ, diɛ ɓaa:

¹¹ Bɛlɛ́ lon da gələ, mɛ̨i kpulu həɠə ɓɛla kpulɔn ɉɛnŋąą, bɛlɛ́ tɔɔ wuluɠaa, nwulu yiiɠaai da di laa di ɓɛlaa mɛ̨i, nwulu hɔlɔnŋąą, da di hvilɛn ɉiiɠaa.

¹² Mįnɛ̨ kəhi da gbəŋə wuluɠaa, naa kalan da ɉəɠə ɓɛlai da bɛlɛ ɲɛ̨i tɔwɔ.

¹³ Daɓali da gbəŋə wuluɠaa, gwɛlɛ hɛnŋąą kəlee da ɉaláá lɔpɛin.

¹⁴ Nwɔ̨n ɉee hɛn da gwɛlɛ hɛnŋąą, nwulɔ nwɔ̨n ɉee hɛn da nwɔ wulɔ.

¹⁵ Lansan haláá kulɔ kəhi, da gbəŋə wuluɠaa, mąątí wulɔ, lansan di kaa pai gələn ɉi, da ɉəɠə ɓɛlai da ɉɛlɛn bɛlɛ́ laaləi.

¹⁶ Ɉaláá hɛn da gəlee kələn gulɔ kəhi, da gɛɛli dɔɔ ɲɛ̨i tɔwɔ a ɓala kwɛli, gbɔnŋąą da gwɛlɛ hɛnŋąą kəlee, gəgən da gɔwɔɠaa;

¹⁷ ɉəɠə ɓɛlaɠaa da ɉɛlɛn ɉaláá kulɔi ɲɛ̨i tɔwɔ, nwulu, da ɉu hon nwuluɠaa, da ɉəɠə ɓɛlai a kɛ gala laaləi;

¹⁸ bɛlɛ́ tɔɔ wuluɠaa, gwəli tɔɔ wuluɠaa da ɲɛliɠaa,

¹⁹ ɉaláá həɠəɠaai da kɛ góló kɛi ɉu, ɲokolo həɠəi a Aarɔn da nonnii di wɔɔ, yai da gɛ diɛ bɛlɛ́ mąąhəɠɛɛ mu.»

²⁰ Israɛlə lonnii kəlee di həɠə Moisə lííla.

²¹ Yili pulu, nui lɔpee nąą wɛli ə kɛ mą, nui lɔpee kɛ naa gwəi mɛ̨inɛ̨ ə kɛ ɲəi, di paa la a Yai-Laa kɔ́ hɛn; Gəlee di kɛ a gee kaa kələ góló kɛ hɛn, da díɓoɠaa pai kɛi mu mąą mɛ̨nį kəlee ɲɛ̨i kulɔ mɛ̨nį, da ɉaláá həɠəɠaa pɛli mɛ̨nį.

²² Hinąą da nɛ̨ąąi kɛ di kwəinɛ̨ɛ̨, di kɛi pa a di wəlii kwɛliɠaa, gbonoɠaa da kwɛɛnŋąą, gəlee di ɓo a hɛni, diɛ Yai-Laa kɔ́ la.

²³ Nuąi kpɔ həɠə kpɔluɔ mu tɛɠiɛ ə kɛ di yəi, da gbɔluɔ gbələ tətə, da mahiɓoɔ, da həɠə kwəlɛɛ pə-pə, ɓolu ləɠa, ɓɛlaa kɔ́lɔ həɠəi di gbɔlu, da nini kɔ́lɔ həɠəɠaa, di kɛi pa a diɛ.

²⁴ Nuąi kpɔ da pɛli kɛ pai a hɛn Yai-Laa pɔ, di kɛi pa a: wali kwɛli, ɓala kwɛli. Nuąi kpɔ kpitili wulu ə kɛ di yəi, di kɛi paa la gólóɠaa tii kɛ mɛ̨nį ɓa.

²⁵ Nɛ̨ąi kɛ di wəlɛɛ yee pɛnɛ̨, di kɛi yee pɛnɛ̨ diɛ paa la, yee kpɔluɔ mu tɛɠiɛ, gbɔluɔ gbələ tətə, mahiɓoɔ, gwəlɛɛ pə-pə.

²⁶ Nɛ̨ąi kɛ di wəlɛɛ ɓolu ləɠa pɛnɛ̨i, di kɛi bɛnɛ̨.

²⁷ Galanɉonŋąą diɛ pa a berilə kwɛniɠaa da kwɛniɠaa mąą haɠaa lɛlɛɛɠaa, gilɛn ɉəɠə mąą pu mɛ̨nį ɓa, da gəŋə mɛ̨i həɠə.

²⁸ Ə mą kɛ ɉɛn gun nɛ̨ɛ̨ɠaa da nwulɔ nwɔ̨n ɉee mɛ̨nį ɓa, mąątí wulɔ da lansan.

²⁹ Ɉinąą mąn nɛ̨ąą mąn, diɛi kpɔ kɛ di kwəinɛ̨ɛ̨, di kɛi di muhəɠə, diɛ pa a hɛnŋąą, gólói Yai-Laa ə Moisə tí la gɛ mɛ̨nį ɓa. Diɛi kɛ di kwəinɛ̨ɛ̨ Yai-Laa pɔ a Israɛlə lon gɛ pələ kpɔ-kpɔ.

Besalɛlə da Oholiavə di di yee pɛlɛ góló ɓa

³⁰ Moisə yɛ Israɛlə lonnii diɛ: «Yai-Laa aa Uri lon Besalɛlə həɠə ɉu, yai gaa a Hurə mąnįn, Ɉuda huwuhu mun.

³¹ Aa gɔ́ a Yálá nwɔ Kilii, ə gɛ, mɛ̨nį hu kpɛ kili, nwun gɛ ɉulaa, da mɛ̨nį kɔ́lɔn ŋąą, yɛ pɛli yɛlɛ kɛi la.

³² Yɛ yɛlɛ kóló kulɔ, yɛ hɛni kóló kɛ, wali kwɛli da ɓala kwɛli,

³³ kwɛni mąąhaɠaa, wulu haɠaa da yɛlɛ kóló lɔpee gəlee.

³⁴ Yálá aa mɛ̨nį ɲąąlɛ kili tɛɛ bɔ, yaa da Oholiavə Ahisamakə lon Dan huwuhu mun.

³⁵ Aa di kɔ́ a mɛ̨nį kɔ́lɔn gili kɛnɛ̨, diɛ pɛli kóló huwui lɔpee gəlee kɛi a yɛlɛ, kwɛni haɠa kóló, ganą hee kóló, diɛ pɛli həɠə palai a ɲɛ̨i pɛ̨ɛ̨, a viliiɓoɔ, a gbɔluɔ mu tɛɠiɛ, gbɔluɔ gbələ tətə, gwəlɛɛ pə-pə, da yɛlɛ huwui lɔpee gəlee kɛ nuą di wɔ kóló.»