Lɛɛ gbɔwɔ ɓa 34 - Yálá laawoo hɛɓɛ (dc)Yálá ə pənə ə mįnɛ̨ kwɛni ɓɛla takpɛliɠaa tɛɛ Moisə pɔ 1 Yai-Laa yɛ Moisə ɓa: «Kwɛni ɓɛla hveelɛ mąą haɠa yɛ́ kpinįi, yɛ bələi dɔlɔɔɠaa di kɛ la, nwooi lɔ tii kɛ dɔlɔɔ ɓa, diɛi tii ə́ di wolo, ŋį́ pənə ŋį́ bɛ̨ɛ̨. 2 Ə́ kɛ pələ pɛli, tínąą ə́ tɛ Sinai yee nwuɔ̨ yələwala pinɛ̨ɛ̨, ə́ tɔɔ nííla laa ɲee nwuɔ̨. 3 Nu takpɛli hvo lɛɛ ə́ pɔ, mąą hvo nɛ̨ɛ̨li di hvo nui lɔpee kaa ɲee ɓa, ə mą kɛ taatɛlɛɛ ɓə, ə tikpə ə kɛnɛ̨, da hvo naa mįi laa ɲee ɓa.» 4 Moisə ə kwɛni ɓɛla hveelɛ haɠa, yə pələi dɔlɔɔɠaa di kɛ la, ə humo, ə muhəɠə, yɛ bələi Yai-Laa ə mo la mą. Gwɛni ɓɛla hveelɛi tii diɛ ɓo ɲəi. 5 Yai-Laa ə yɛɛ tulɔ kpinįn ɉu, ə tɔɔ laa, Moisə, ə dəli a naa yɛ mą: «Yai-Laa.» 6 Yai-Laa ə tɛɛ Moisə lííla, yɛ mą: «Náá ɓaa a: Yai-Laa, ɲą́ą́ ɓə a Yai-Laa. Gáá a Yálá líi nɛ̨ɛ̨ gwəi, ɲɛ̨imąąwɛli kaa Yálá, yai níí hva holi ɉa, yɛ kulɔ nwoo ɓa, a tɛ̨ą ɓo Yálá. 7 Yɛ mɛ̨inɛ̨ɛ̨ kɛ mąnįn bulu mąnįn waa tamąą ɓa, yɛ nuą kɛ nɛ̨ŋɛ̨n da di wɔ kulɔ nwoo mu laa mąąhvaalɛɛ. Kɛlaa, a mɛ̨nį ɲɔ̨n gɛ mun ɉutɔɔ, a lon gaa nuą di wɔ túwɔ́ pələ ɲɔ̨n gwələ kulɔ di lonnii diɛ, da di mąnįnni diɛ.» 8 Moisə ə nɛɛmą ə pu nwungbəla, ə gwɛli hvilɛn. 9 Yɛ mą: «Yai-Laa nwɔ́ mɛ̨nį Nąmu, akɛ kpɔ ŋą́ą́ ə́ líí hon, Yɛ́ ɓo ku lɔwai, kwa nu huwu nwun nwalawalaa ŋɛ̨i, kɛlaa, ku wɔ túwɔ́ pələ ɲɔ̨n da ku wɔ nɛ̨ŋɛ̨n mąąhvaalɛɛ, ɛlɛɛ, ə́ ku kɛ kɛa a ə́ kwɛlin.» Di pənə di mįnɛ̨ pu nįnɛ̨ kɔ́lɔi 10 Yai-Laa yɛ Moisə ɓa: «Gu kaa mįnɛ̨ həɠəi ə́ wɔ nuąi kəlee ɲɛ̨i ɓa, gáá pai mɛ̨nį kpɛa-kpɛa kɛi, yii ɲɔ̨nwɔ̨mąn hvo ta kɛ li yɛnɛ̨ɛ̨, lɔi ta hu. Ɛlɛɛ, nuą kpɔ ka kwɛlɛ, di kaa pai gbaɠala kaai, diɛ kɛ Yai-Laa kɛ kóló ɲɛ̨i mąą ɲɔwuɔ ɓə, a yai gáá pai gɛi yɛ́. 11 Mɛ̨nii gáá moi yɛ́ háákələi, ə́ kili lɛɛ ɉu a nɛlɛɛ. Gáá pai Amɔrə nuą, Kanaan nuą, da Hɛtə nuą, da Perizi nuą, da Hivi nuą, ɛlɛɛ da Ɉebusə nuą kpɛi ka tɔwɔ. 12 Ka gɛ a nɛlɛɛ, nɔi ɲɛ̨i ka kaa lɔi ɉu, ka ɉu nuą ka hvo mįnɛ̨ həɠə, yili a nei kɛ a hɛlɛn ka tɔwɔ. 13 Kɛlaa, mąąnɛ̨ɛ̨ ka di wɔ haláá kulɔiɠaa kala, ka di wɔ haláá kwɛniɠaa taɠa, nwuluɠaai da kɛ gɔi, ka gəlee pɔn. 14 Ə́ həli kaa, ka hvo kwɛli hvilɛn hali ɓa, mąąhɔlɔɓo, Yai-Laa ‹Toloɔi›, Yálá toloɔ li. 15 Ka nɔi tii hu nuą ka hvo yɛnɛ̨ɛ̨ pɛlɛ gee ɓa, da kɛi nei pa túwɔ́ pələ ɲɔ̨n gulɔi, diɛ haláá kulɔ di wɔ haliɠaai diɛ, da nei ka təli, kaa di wɔ haláá kɔ̨nɔ̨n ta mįi. 16 Akɛ ka di lonnii nɛ̨ąą həɠə kaa dɛɛ ka lonnii pɔ a di nɛ̨ąni, nɛ̨ąą tii da kɛi túwɔ́ pələ ɲɔ̨n gulɔi da di wɔ haliɠaai, di kaa pai dúwɔ́ pələ ɲɔ̨n tii lɔi ka lonnii yee pɔ, da diɛni diɛ gɛ, da di wɔ haliɠaai. 17 «'Hvo Yálá mąą nįnįn bɛli. 18 «Ka ka yee kanąn lɛɠɛi dɛ hɛn və ɉu nwɔ hɛli ɓa. Hvóló mɛ̨ihveelɛ yee mu lɛɠɛi dɛ hɛn və ɉu, kaa mįi, yɛ bələi ŋą́ mo la kaa ŋą́ guu hee a Abibə ɲąnįn, mąąhɔlɔɓo, ɲąnįn tii ɓə ka kulɔ la Eziptə lɔi hu. 19 «Lon ɉinąą dɔlɔɔɠaa kəlee kaa a nwɔ́ɔ́, ə kɛ a nu kan, ə kɛ a taatɛlɛɛ; a mɛ̨nį kili too ɲą pələ. 20 Kɛlaa, hoohvaalən non dɔlɔɔ nwɛi, yá nwun mąąɓo a ɓɛlaa, yá wala nwun mąąɓo, ə́ gɔn ɲali. Ka ka lon ɉinąą tɔlɔɔɠaa nwun mąąɓo. «Mąą hvo nɛ̨ɛ̨li ka hvo pa Nííla a ka yeehvowolo. 21 «Ka kóló kɛ hvóló mɛ̨ida yee mu, mɛ̨ihveelɛ yələ, ka ka hvįįtɔɔ, ə kɛ a kɛɛ hįį lɔwai, ə kɛ a ɉihɛn gulɔ lɔwai, mąąnɛ̨ɛ̨ ka ka hvįįtɔɔ. 22 «Mąąnɛ̨ɛ̨ ka nɔwɔ mɛ̨ihveelɛ hɛli pu a ɉihɛn dɔlɔɔ kulɔi lɔwai, ɛlɛɛ, ka mɔ̨nun dee hɛli pu, a gwɛlan naa kulɔi lɔwai. 23 «Mąąnɛ̨ɛ̨ ɉinąą kəlee di pa Yai-Laa Israɛlə nwɔ Yálá lííla gee mɛ̨i haaɓa, kwɛlan dɛitɛi kəlee yee mu. 24 Mąąhɔlɔɓo, ŋį́ nuą di wɔ lɔiɠaai kulɔi di yəi, gɛ́ ka wɔ lɔi hu kɛnɛ̨, nu hvo pai hɔlɔɓoi, yɛ ɲɛ̨i kulɔ ka wɔ lɔi pɔ, ɓɛlɔwai ka káá pai kɛi la Yai-Laa lííla gee mɛ̨i haaɓa kwɛlan dɔ̨nɔ̨ ɲee mu. 25 «'Hvo taatɛlɛɛ haláá kulɔ mą́ą́ a lɛɠɛ yii dɛ hɛn gaa ɉu. Mąą hvo nɛ̨ɛ̨li taatɛlɛɛɠaai da baa a pakə hɛli, da hvo lɛɛ yələ hvo ɓɔ mą. 26 «Mąąnɛ̨ɛ̨ ka pa a ka wɔ lɔi hu wulu ɓá dɔlɔɔ Yai-Laa ka wɔ Yálá yəi bɛlɛ́n. Ka hvo ɓolu lon ɲili nee ŋįnįya hu.» 27 Yai-Laa yɛ Moisə ɓa: «Nwooɠaai ŋɛ̨i pɛ̨ɛ̨, mąąhɔlɔɓo, mįnɛ̨i gwa yɛ́ gu kaa ɉəɠəi, ə mą kɛ kwa Israɛlə lonnii, ɉu wooɠaa li.» 28 Moisə da Yai-Laa di kɛ gɛɛnąąi tii ɓa, hvóló pow nąąn kpinį pow nąąn ɲee mu, hvo kɔ̨nɔ̨n mįi, hvo yá kpələ. Ə mįnɛ̨ hu wooɠaa pɛ̨ɛ̨ a Dɔ́n bow tii. Moisə ə pənə ə ɲee yɛɛ 29 Moisə həɠɛɛ Sinai yee ɓa yɛ yɛɛ, gwɛni ɓɛla hveelɛi ŋɛ̨i Dɔ́n bɛ̨ɛ̨ mą, yɛ ɓo ɲəi. Gili hvo kɛ ɉu yɛ kɛ ɲɛ̨ilai ə kɛi lən, ɓɛlɔwai da Yai-Laa di kɛi lonon kɛ la. 30 Aarɔn da Israɛlə lonnii di Moisə kaa, ɲɛ̨ilai yɛ lən, di ɲɔw, di hvo kɛi lɛɠɛ mą. 31 Moisə ə di təli, kɛlaa, Aarɔn da nuą ɲɛ̨i tɔwɔ nuą lɔ ɓə pa bɔ, Moisə ə nwoo hukulɔ diɛ. 32 Yili pulu Israɛlə lonnii kəlee di lɛɠɛ mą, mɛ̨nįɠaai kpɔ Yai-Laa ə mo mą Sinai yee nwuɔ̨, ə gəlee hukulɔ diɛ. 33 Ɓɛlɔwai Moisə ə kpɛɛ la a nwoo hukulaa diɛ, ə həɠə pɛlɛ ɲɛ̨ilai. 34 Kɛlaa, a kɛi kɛ lɔ Yai-Laa lííla da yaa diɛ pələ ɓo, a ɉəɠə həɠə ɲɛ̨i, ə lɛɛ ɉu ə kulɔ, a pənə kɛa a kulɔ, mɛ̨nįɠaai di kɛi mo mą, ə kɛi mo Israɛlə lonnii diɛ. 35 Moisə ɲɛ̨ilai ə kɛi lɔ lən Israɛlə lonnii ɲɛ̨i ɓa; Moisə ə pənə ə ɉəɠə yɛɛ ɲɛ̨i, ə lɛɛ ɉu yɛ pənə yɛ li da Yai-Laa diɛ mɛ̨nį ɓo. |