Lɛɛ gbɔwɔ ɓa 30 - Yálá laawoo hɛɓɛ (dc)

Lansan haláá kulɔi

¹ «Yili pulu, ə́ haláá kulɔi pɛli a kpitili wulu ɓɛla, diɛ lansan kələn nąą.

² Gwɛaa yee ə kɛ a yee laa mą tɔ̨nɔ̨, ŋąą kɛnɛ̨ pələ ə kɛ a yee laa mą tɔ̨nɔ̨; nąą kəlee ə kɛ a bɛliɛ a gee. Dɔɔmɛ̨i ə kɛ a yee laa mą hveelɛ, ə́ mįnɛ̨ɠaa kɛ mą, di kpanwoɔ mą.

³ Ə́ hɛni yá hiɛ mą, mɛ̨i pələ da goo ɓa, ə mą kɛ, mįnɛ̨ɠaa ɓa; ə́ hɛni pɛlɛ mą, ə́ mąą tínɛ̨n na ə́ doo gee hu.

⁴ Ə́ gbonoɠaa pɛli a hɛni, goo ɓa hveelɛi ɓa, ɉɛnii ŋɛ̨i ə́ mąą tínɛ̨n na, gɔwɔ mu. Ə́ gbonoɠaa kpanwo laa gɔwɔ hveelɛi ɓa, yili ɓə di kaa pai kɛi gbəŋə wuluɠaa lɔi ɉu, diɛ gbəŋə la.

⁵ Yá nwulukpiɛɠaa ti pɛli a kpitili, ə́ hɛni yá lɔ diɛ.

⁶ Ɉəɠə ɓɛlai ti a kɛ pɛlɛ ni mįnɛ̨ kəhi mɛ̨i, ɲɛ̨itɔwɔ ɓə ya vilɛn nąą, gəhi laakalan ɲɛ̨i tɔwɔ, ɓɛi ti ɲą́ą́ gwa yɛ́ gwa gu kee kaa laai.

⁷ Nąą ɓə Aarɔn kaa pai kɛi lansanŋaa kələn ɉii laa yələ wala pɔ tɛitɛi kəlee, ɓɛlɔwai a kɛ nwulɔ nwɔ̨nŋąą təŋą yalii la, nąąlɔwai ɓə a lansan kələn na.

⁸ Aarɔn a pa nwulɔ nwɔ̨nŋąą təŋa yalii, yələwulii pɔ, a lansan kələn; gaa pai kɛi a hɛn gun nɛ̨ɛ̨ yii a kɛ a yələ kəlee mɛ̨nį Yai-Laa lííla.

⁹ Lansan lúwɔ́ hvo mą, di hvo da kələn naa, haláá hɛn yii da gəlee kələn, di hvo da kulɔ laa, ə mą kɛ, Yálá kɔ́ haláá, ɛlɛɛ, ka hvo lɔɔ pu ɉaláá kulɔi ti ɓa.

¹⁰ Kwɛlan dɛitɛi kəlee yee mu, Aarɔn a nɛ̨ŋɛ̨n mąąhvaalɛɛ haláá kulɔ lɔ tanɔ̨n, ə ɲąmą hiɛ ɉaláá kulɔi mįnɛ̨ɠaa diɛ. Ɉaláá tii da gulɔ tanɔ̨n kwɛlan dɛitɛi yee mu a nɛ̨nŋɛ̨n mąąhvaalɛɛ haláá, ɲąmą ta ɓə mąąnɛ̨ɛ̨ ə́ ɉaláá kulɔi mąąhəɠə la. Kwɛlan gəlee mɛ̨nį li, lansan haláá kulɔi a kɛ a kɛɛnąą mąąhəɠɛɛ gəlee ɓa a Yai-Laa nwɔɔ.»

Nįįhɔ̨nwɔ̨i mąąnɛ̨ɛ̨ di gulɔ Yálá hee pɛlɛ́ ɓa

¹¹ Yai-Laa yɛ Moisə ɓa:

¹² «Bɛlɔwai ə́ kaa pai Israɛlə lonnii laa pɛ̨ɛ̨i la a nuą lonon ɲələ, mąąnɛ̨ɛ̨ nu tɛitɛi kəlee ə nwɔ yɛnɛ̨ɛ̨ nwun mąąɓo hɛn dɛɛ Yai-Laa pɔ, ɓɛlɔwai di kaa pai naa pɛ̨ɛ̨i la, ə gɛ, mɛ̨nį nwąnąą hvo pa həli diɛ a nonon ɓo kɛ yələ.

¹³ Wali lɔɔli, yɛ bələi gaa la Yálá hee pɛlɛ́ mu, a wali leelee, ya ɓə nui lɔpee di kaa pai nonon ɉii a gulɔ, a wali kɔ́w lɔɔli a nįįhɔ̨nwɔ̨, a Yai-Laa nwɔɔ.

¹⁴ Hulɔnui lɔpee gəlee, gaa kwɛlan a həli pow hveelɛ ɓa, mąąnɛ̨ɛ̨ di nonon, ɛlɛɛ, ə nįįhɔ̨nwɔ̨ kulɔ Yai-Laa ɓa.

¹⁵ Nįįhɔ̨nwɔ̨ kulɔ mɛ̨nį Yai-Laa ɓa a ka wɔ yɛnɛ̨ɛ̨ nwun mąąɓo mɛ̨nį, hɛn gɔw nąmįną di wɛi hva kɛnɛ̨ hvo tɛɛ wali kɔ́w lɔɔli ɓa; ɛlɛɛ yeehowolo nuą di wɛi hva too wali lɔɔli mu.

¹⁶ Ya Nįįhɔ̨nwɔ̨i tii hon Israɛlə lonnii yəi, ə́ dɛɛ gee kaa pɛlɛ́ mąą mɛ̨nį ɲɛ̨i kulɔ mɛ̨nį ɓa. Yili ɓə pai gɛi Yai-Laa yɛ gili lɛɛ Israɛlə lonnii hu, yɛ ka wɔ yɛnɛ̨ɛ̨ nwun mąąɓo.»

Nuą mąąhəɠə hɛnɲąŋą

¹⁷ Yai-Laa yɛ Moisə ɓa:

¹⁸ «Yá pu hɛnɲąŋą pɛli a bala kwɛli, gɔwɔ yɛ ɓo a ɓala kwɛli, nuą mąą waa mɛ̨nį ɓa. Ya ɉee gee kaa kələ da ɉaláá kulɔi di lɔwai; ɛlɛɛ, ə́ yá pu ɉu.

¹⁹ Nąą ɓə Aarɔn da nonnii da di yee mąą waa laa, da di kɔ́wɔɠaa.

²⁰ Da kɛi lɔ gee kaa kələ mu, da di mąą waa a yá; ə gɛ, di hvo pa haa. Awala kɛ ti, da kɛi lɛɠɛ ɉaláá kulɔi, da di waa, di hvo tɛɠa ɉaláá kulɔ, awala kɛ ti haláá hɛn gələn mɛ̨nį ɓa a Yai-Laa nwɔɔ.

²¹ Mąąnɛ̨ɛ̨ di di yee ɓa waa da di kɔ́wɔ ɓa, ə gɛ, di hvo pa haa. Bələ ɓə di kaa pai kɛi gɛi la, ɉəɠə mąą hvo mą, yaa da ɉuwu di yəi a kwɛlan gəlee.»

²² Yai-Laa yɛ Moisə ɓa:

²³ «Wulɔ kun nɛ̨ɛ̨ɠaa həɠə a ɉuwu tamąą, diɛ ɓaa: Mirə wulɔ gəgən ɉu lɔɔli, sinamomə wulu kɔlɔ kilə hveelɛ da gbulɔ, hvəən gunnɛ̨ɛ̨ kilə hveelɛ da gbulɔ;

²⁴ da kasə wulu kɔlɔ kilə lɔɔli, yɛ bələi gɔɔn bələ kaa la Yálá hee pɛlɛ́ mu, ə́ ɉumo a olivə wulɔ litɛlɛ mɛ̨ida.

²⁵ Ə́ di pɛli a wulɔ mąąhəɠɛɛ yɛ bələi mąątí wulɔ pɛli mun a gɛ la. Yili ɓə pai kɛi a mąątí wulɔ mąąhəɠɛɛ.

²⁶ Ə́ da hiɛ gee kaa kələ ɓa da mįnɛ̨ kəhi,

²⁷ da ɉaláá kulɔi, ə mą kɛ, mɛ̨i hɛnŋąą kəlee. Nwulɔ nwɔ̨n ɉee hɛn da gwɛlɛ hɛnŋąą kəlee, ə mą kɛ, ɉaláá kulɔi tii da lansan kələn nąąi.

²⁸ Ɓɛi ŋɛ̨i da ɉaláá kəlee kələn nąą da gwɛlɛ hɛnŋąą kəlee, nuą mąą waa hɛn ɲąŋą da gɔwɔɠaa,

²⁹ di kɛ a hɛn mąąhəɠɛɛɠaa, di mąąhəɠɛɛ kpɔ hva-hva. Hɛn nɔpee pai tunwɔ̨n ɉi diɛ, a kɛ a mąąhəɠɛɛ.

³⁰ Ə́ nwulɔi tii ta hiɛ Aarɔn da nonnii diɛ, ə́ di laakwɛlanmo mą́ą́, di kɛ a nwɔ́ haláá kulɔ nuą.

³¹ «Mo Israɛlə lonnii diɛ, yɛ́ diɛ: ‹Nwulɔ mąąhəɠɛɛ kaa a yələ kəlee wulɔ, Nwɔ́ɔ́ li.

³² Mąą hvo nɛ̨ɛ̨li nu ta hvo mąątí a da. Mąąhɔlɔɓo, Mą́ą́ mɛ̨nį ɲɛ̨i kulɔ wulɔ li, ɛlɛɛ, ka hvo yili ɲɔ̨nwɔ̨mąn da pɛli tii a ka wɔɔ.

³³ Akɛ nu ta a nwulɔi tii ɲɔ̨nwɔ̨mąn bɛli, yɛ ɉiɛ nu ta ɓa, mąąnɛ̨ɛ̨ di gulɔ Israɛlə lonnii lɔwai.›»

³⁴ Yai-Laa yɛ Moisə ɓa: «Hɛnŋąą kun nɛ̨ɛ̨ɠaa kwɛli, a wulu kɔ́lɔ kun nɛ̨ɛ̨ɠaa, di kɛnɛ̨ yee pɛliɛ a gee.

³⁵ Wulɔ kun nɛ̨ɛ̨ pɛli la, yɛ pələi mąątí wulɔ pɛli mun a gɛ la, kpolo yɛ ɓo mą, a nɛlɛɛ mąąhəɠɛɛ.

³⁶ Ya mɛla ɓo ɉu, ə́ bələ tɔ̨nɔ̨ hunwɔ̨ kpɔ kpə-kpə, ə́ da wolo kpɛŋɛ̨n mįnɛ̨ kəhi lííla, gee kaa kələ mu, da ɓɛi gu kaa pai kɛi gu kee kaai laa. A kɛ ka yəi a hɛn mąąhəɠɛɛ kpɔ hva-hva.

³⁷ Ɉɛn gun nɛ̨ɛ̨ ti ə́ kaa pai bɛli, nu ta hvo da pɛli a nwɔɔ. Mąąnɛ̨ɛ̨ ə kɛ ə́ ɲɛ̨i ɓa a hɛn mąąhəɠɛɛ.

³⁸ Nui a bɔɔ kɔ́ɔn gɛ, yɛ gun mo, mąąnɛ̨ɛ̨ di gulɔ Israɛlə lonnii lɔwai.»