Lɛɛ gbɔwɔ ɓa 3 - Yálá laawoo hɛɓɛ (dc)Yálá ə gbɔwɔ lɛ Moisə ɓa nwɔ̨n nən ɉu 1 Moisə ə kɛ mɔlɔ́ Ɉetro nwɔ taatɛlɛɛɠaa pulu. Ɉetro ɓə kɛ a Madian haláá laa həli mun. Moisə ə lɛɛ daatɛlɛɛɠaa pulu ə li kpɔ a diɛ nɔi pun bulu pələ, Yálá nwɔ yeei ɓa Horɛbə. 2 Nąą ɓə Yai-Laa nwɔ malaka ə gbɔwɔ lɛ laa mą nwɔ̨n nən gɛnɛ̨ hu wulu lon da ɓa. Moisə ɲɛ̨i ə kɛ nwului tii ɓa, nwɔ̨n yɛ ɓo mą nąą kəlee, kɛlaa, hvo kɛi gələn. 3 Moisə yɛ mą: «Gáá tinɛ̨n ɉi, ŋį́ li ŋį́ gwɛlɛɛn mɛ̨nįi ŋɛ̨i mąą kpɛɛ; lə ɓə kɛ yai nwɔ̨n gaa nwulu lon tii hu, hvo gələn ɉii.» 4 Yii kɛa Yai-Laa ə gaa, yɛ Moisə kaa pai gɛɛnąą tii, ə dəli nwɔ̨n nən ɉu, yɛ mą: «Moisə! Moisə!» Yili yɛ mą: «Ɲą́ą́ ka!» 5 Yálá yɛ mą: «'Hvó kɛ ə́ kaa lɛɠɛi ɓɛ. 'Gɔlɔ kulɔ ə́ kɔ́wɔ ŋą. Mąąhɔlɔɓo, ɓɛi tii ə́ kaa laa, lɔi mąąhəɠɛɛ li. 6 Ɲą́ą́ ɓə gáá a ə́ nąn nwɔ Yálá, Abrahamə nwɔ Yálá, Isaakə nwɔ Yálá, da Ɉakɔbə nwɔ Yálá.» Moisə ə ɲee pɛlɛ ɲɛ̨i, mąąhɔlɔɓo, ə kɛi ɲɔw ɲɛ̨i heei Yálá ɓa. 7 Yai-laa yɛ mą: «Bələi di kaa nwɔ́ nuąi mɔ̨nɔ̨ ɓoi la Eziptə, ŋą́ą́ nąą kaa, ŋą́ą́ di wɔlɔ woo mɛ̨n, di mɔ̨nɔ̨ ɓo nuą yee mu. Ŋą́ą́ di wɔ mɔ̨nɔ̨i kaa. 8 Ŋą́ pa, ŋį́ di kulɔ Eziptə nuą yee mu. Ŋą́ li a diɛ nɔi ŋąą kɛnɛ̨ɛ̨ lɛlɛɛ tii hu, ɓɛi hɛn gəlee a lɛlɛ laa. Nɔi tii ɓə: Kanaan nuą, Hɛtə nuą, Amɔrə nuą, Perizi nuą, Hivi nuą, da Ɉebusə nuą di kaa ɉu. 9 Yii hu, yii kɛa Israɛlə lonnii wɔlɔ woo aa too nwə́lii, mɔ̨nɔ̨i Eziptə nuą kaa naai diɛ, ŋą́ą́ gaa; 10 Gáá kɛa ə́ tɔɔi yiihu, ə́ li Eziptə tɔɔmun bɔ, ə́ nwɔ́ nu huwui a Israɛlə lonnii, ə́ di kulɔ laa.» Yálá ə naa leelee lɛ Moisə ɓa 11 Moisə yɛ Yálá ɓa: «Gbɛɛ ɓaa ɲą́ą́, yai, ŋą́ li tɔɔi Eziptə tɔɔmun nií la, gɛ́ Israɛlə lonnii kulɔ Eziptə?» 12 Yálá yɛ Moisə ɓa: «Gáá ə́ pɔ. Yá pa Israɛlə nu huwu kulɔi Eziptə, ɲeei ŋɛ̨i ɓa ɓə ka tí laa Yálá ɓa; yili pɔ pələ ɓə yá gɔlɔn na yɛ́ ɲą́ą́ ɓə ə́ tɔɔ.» 13 Moisə yɛ Yálá ɓa: «Lii ŋɛ̨i gáá moi Israɛlə lonnii pɔi, gáá lii kɛi diɛ: ‹Ka nąnni di wɔ Yálá ɓə dɔ́ɔ́ ka pɔ›, da kɛ mą́ą́: ‹Naa ɓaa a gbɛɛ, ŋą́ kɛ diɛ lə?›» 14 Yálá yɛ Moisə ɓa: «Náá ɓaa a: ‹Yai Gaa Lɔ A Yaa›, yá li, yá kɛ diɛ, nui ŋɛ̨i naa ɓa a: ‹ƝĄ́Ą́ LƆ, ya ɓə dɔ́ɔ́ ka pɔ.›» 15 Yálá yɛ́ nwɔ̨nɔ̨ Moisə ɓa: «Lii ə́ kaa moi yá kɛ Israɛlə lonnii diɛ: Yai-Laa, ka nąnni di wɔ Yálá, Abrahamə nwɔ Yálá, Isaakə nwɔ Yálá, da Ɉakɔbə nwɔ Yálá, ya ɓə dɔ́ɔ́ ka pɔ. Náá ka tii a yələ kəlee mɛ̨nį, ya ɓə da vɛ́li ɉu. 16 'Li, ə́ Israɛlə kalanɉonŋąą ŋąąkpɔn, yɛ́ diɛ: Yai-Laa ka nąnni di wɔ Yálá, Abrahamə nwɔ Yálá, Isaakə nwɔ Yálá, da Ɉakɔbə nwɔ Yálá, ə gbɔwɔ lɛ mą́ą́, yɛ mą́ą́: Mɛ̨nii ŋɛ̨i Eziptə nuą daa naa káá, ŋą́ą́ nąą kaa, gáá gɛ́ mɛ̨nį kɛi ɉu. 17 Ya ɓə, Ŋą́ kɛ Gáá ka kulɔi mɔ̨nɔ̨i tii hu, Ŋą́ li a káá Kanaan lɔi hu, ɓɛi Hɛtə nuą, Amɔrə nuą, Perizi nuą, Hivi nuą, da Ɉebusə nuą di kaa laa, ɓɛi tii hɛn gəlee da lɛlɛ laa. 18 Di kaa pai di wəli tɔɔi ə́ woo ɓa; ka diɛni ka bɛlɛ gee ɓa, ka li Eziptə tɔɔmun bɔ, kaa mą: Yai-Laa, Hebreuɠaa di wɔ Yálá, aa gbɔwɔ lɛ kuɔ pɔ̨nɔ̨ŋą, yiihu, hvo kɛli kwə li, ku hvóló haaɓa hiɛ kɛ nɔi pun ɉu, ku haláá kulɔ laa ku wɔ Yálái a Yai-Laa mą. 19 Gíli kaa ɉu, gɛ́ Eziptə tɔɔmun hvo pai hvaai mą ka hvo li, hvo kɛli yee tɔɔ gwąną mɛ̨nį laa a too ɉu. 20 Gáá pai mɛ̨nį laai Eziptə lɔi ɓa, a kwɛlɛɛn mɛ̨nį tamąą kɛi gáá pai moi ɉu. Yili kɛɛ pulu ɓə di kaa pai ɓoi la kaa, kaa li. 21 Ka muhəɠəi lɔwai, Ŋą́ gɛ ka wɛli ə too Eziptə nuą diɛ; ka hva həɠə laa a ka yeehvowolo. 22 Ka kɛi li, nɛ̨ą kəlee di hɛnŋąą hvɛli di hee yɔwɔɠaai a Eziptə nɛ̨ąą diɛ, ɉɛnŋąą tii da kɛ a wali kwɛli, hɛni, ə mą kɛ, həɠə, ka ka lonnii mąą yili la. Bələ ɓə ka káá pai Eziptə nuą mąą kpoloon ɉi la.» |