Lɛɛ gbɔwɔ ɓa 28 - Yálá laawoo hɛɓɛ (dc)

Ɉaláá həli nuą mąą həɠəɠaa

¹ «Ə́ liɛ Aarɔn lɛɠɛ yɛ́, da nonnii, Israɛlə lonnii lɔwai di kɛ a nwɔ́ haláá laa həli nuą, diɛ ɓaa: Aarɔn, Nadavə da Avihu, Eleazarə, da Itamarə.

² Yokolohəɠə pɛli ə́ liɛ Aarɔn ɓa, a haláá kulɔ həɠə yɛ mąąɲinɛ̨n gɛ mą.

³ Nuąi ŋą́ą́ di laa hvɛɛ a mɛ̨nį kɔ́lɔn gili, di yɛlɛɛ, mo diɛ, di Aarɔn nwɔ həɠəɠaai pɛli, ə gɛ, Aarɔn ə kɛ a nwɔ́ haláá laa həli mun.

⁴ Ɉəɠəɠaai mąąnɛ̨ɛ̨ di ɉɔlɔɔn, gɛ pələ ka: Gəŋə mɛ̨i həɠə, kilɛn ɉəɠə, həɠə kwɛaa da mɛ̨i həɠə mąą puɔ gɔwɔ la, nwuɔ̨ ɓɔlɔ, da ɉąą yili həɠəɓɛla. Di haláá kulɔ həɠəɠaa pɛli ti ə́ liɛ Aarɔn da nonnii diɛ, diɛ haláá kulɔ la mą́ą́.

⁵ Ɉəɠə mąąpu nuą da mąąpu a yeekali kpɔluɔ mu tɛɠiɛ, gbɔluɔ gbələ tətə, viliɓoɔ da hɛni.

Ɉəɠə mɛ̨i həɠə

⁶ «Da gəɠə mɛ̨i həɠə mąąpu a hɛni, ɲeekali yɛ ɓo a viliiɓoɔ, gbɔluɔ mu tɛɠiɛ gbɔluɔ gbələ tətə di gɛ a yɛlɛ.

⁷ Gbulɔn ɲɛli a kɛ a naa galan ŋą, gbulɔn ŋąą galan bulú.

⁸ Ɉəɠə mɛ̨i həɠəi tii, da ɉu hon ɉəɠə ɓɛla mąąpu a hɛni, ɲeekali ə ɓo a viliiɓoɔ, a gbɔluɔ mu tɛɠiɛ a gbɔluɔ gbələ tətə, a yeekali walawalaa.

⁹ Ə́ kwɛni ɓɛla lɛlɛɛ tɛɠiɛ hveelɛ həɠə, ə́ Israɛlə lonnii laa pɛ̨ɛ̨ mą.

¹⁰ Ɉuwu heei bow kɔ́w hveelɛi tii, ə́ mɛ̨ida laa pɛ̨ɛ̨ gwɛni tɔ̨nɔ̨ ɓa, ə́ mɛ̨ida laa pɛ̨ɛ̨ gwɛni veelɛnąą ɓa.

¹¹ Ə́ kaa pai Israɛlə lonnii laa pɛ̨ɛ̨i gwɛni ɓɛla hveelɛi mɛ̨i, yɛ bələi kwɛni haɠamun nwəlɛɛ a gɛ la, bɔɔ yɛ lɛɛ gwɛni ɓa. Di gbulɔn galan ŋą yɛli hveelɛi ɓa yai ɉɛniyá lɔɔ mą.

¹² Ə́ gwɛni ɓɛla hveelɛi tii kpulɔn gəŋə mɛ̨i həɠə yɛli ɓa, gwɛniɠaai tii da kɛ a Israɛlə lonnii pow kɔ́w hveelɛi kili too ŋą hɛn. Bələ ɓə di laa a kɛ la hɛlɛn ni Aarɔn ɓa Yai-Laa lííla, a ka nąą kili too ŋą hɛn.

¹³ Yá gwɛni laa hɛn veelɛi tii pɛli a hɛni.

¹⁴ Ə́ yɔwɔn bɛlɛɛ hveelɛ pɛli a hɛni leelee, yá di pɛli yɛ da kɛi mąąnin gɔw pɛnɛ̨ɛ̨, yili pulu, ə́ ɲɔwɔn bɛnɛ̨ɛ̨i tii lɔ gbonoɠaa hu.

Gilɛn ɉəɠə

¹⁵ «Yɛlɛ kɛ nuą da gilɛn ɉəɠə pala a kiti tee həɠə, da bala a yeekali walawala, yɛ bələi lɔ ti da gəŋə mɛ̨i həɠə mąąpu la, a hɛni, yee, viliiɓoɔ, gbɔluɔ mu tɛɠiɛ, gbɔluɔ gbələ tətə.

¹⁶ Da ɲali gee ŋą, gwɛa pələ da goloon ɉu di pɛli a di kee a yee tɔɔ mą tɔ̨nɔ̨.

¹⁷ Ə́ kuwo-kwɛni pɛlɛ mą a ɲɛli nąąn, diɛ ɓaa: sardoanə, topazə, da emerodə, ɲɛli dɔlɔɔ li.

¹⁸ Ɲɛli veelɛnąą nwɛiɠaai ka: eskarbuklə, lazulitə da ɉaspə.

¹⁹ Ɲɛli ɉaaɓanąą: Agatə, kornalinə, da ametistə.

²⁰ Ɲɛli nąąn nąą; krisolitə, berilə, da onisə, da bɛlɛ mą, di nwəli la laa a hɛni.

²¹ Gwɛniɠaai tii tɛitɛi kəlee kaa pai kɛi a Israɛlə lonnii pow kɔ́w hveelɛi laa, gəlee kaa pai kɛi a kɔ́lɔn ɉɛn, a Israɛlə lonnii pow kɔ́w hveelɛi laa.

²² «Yɔwɔnŋąą pɛli, a hɛni leelee, ə́ di pɛnɛ̨ɛ̨ yɛ mąąləngɔw a gilɛn ɉəɠə nwɛi.

²³ Gbono hveelɛ pɛli a hɛni, ə́ ɉɔlɔɔn gəŋə mɛ̨i ɓɛ pələ da ɓɛ pələ.

²⁴ Ə́ ɲɔwɔn bɛnɛ̨ɛ̨ hveelɛi tii kpulɔn gbono hveelɛi tii diɛ.

²⁵ Ɲɔwɔn bɛnɛ̨ɛ̨ɠaa kpulɔn nwɔ̨nɔ̨ gbono hveelɛ ɓa, ə́ di kpulɔn gilɛn ɉəɠə yɛliɠaa ɓa, ɲɛ̨i tɔwɔ pələ.

²⁶ Ə́ gbono hveelɛ pɛli a hɛni, ə́ di hɔlɔɔn ɓɛ pələ da ɓɛ pələ.

²⁷ Ə́ gbono hveelɛ pɛli a hɛni, ə́ di lɔ gilɛn ɉəɠə yɛli hveelɛi ɓa, ɉɛɠɛɛ pələ, ɲɛ̨i tɔwɔ pələ ɓɛi tii ɲɛliɠaa hɔlɔɔn ŋąą laa, nąą kwɛlɛ, ɉəɠə mɛ̨i həɠə nwɔ həɠə ɓɛlai mɛ̨i pələ.

²⁸ Ə́ gilɛn ɉəɠə da ɉəɠə mɛ̨i həɠə di wɔ gbonoɠaai yili di kee ɓa a həɠə ɓɛla lon da, gbɔluɔ mu tɛɠiɛ, ə gɛ, gilɛn ɉəɠə ə lɛɛ ɉəɠə mɛ̨i həɠə ɓa, ɛlɛɛ hva pɛli dumun ɉii ɉəɠə mɛ̨i həɠə mɛ̨i.

²⁹ Aarɔn a kɛi pa lɔi ɓɛi mįnɛ̨ pɛlɛ lon mu, Israɛlə lonnii laa a kɛ gəŋə la giti yɛli ɓa, a kili too ŋą hɛn a yələ kəlee mɛ̨nį Yai-Laa ɲɛ̨i ɓa.

³⁰ Ə́ Yai-Laa nwɔ kpɛɛn doo giti həɠə hu, mąąnɛ̨ɛ̨ di kɛ Aarɔn kəŋə la, ɓɛlɔwai a kɛi lɔ la Yai-Laa lííla, a kɛ ti, Israɛlə lonnii di wɔ kitii a kɛ lɔ Aarɔn kəŋə la a yələ kəlee ɓɛlɔwai gaa la Yai-Laa lííla.

Ɉaláá həɠə takpɛliɠaa

³¹ «Yili pulu, ə́ ɉəɠə mɛ̨i həɠə nwɔ həɠə kwɛa pɛli a həɠə kpɔluɔ mu tɛɠiɛ.

³² Nwolo ɓɔ ɉąąi, nu nwun yɛ pɛli tɛɛi laa, di mąąpu gɔn ma di doo gee hu, da bala diɛ ɲeekali pili-pili gee hu, ɉu hvo pa ɓɛla.

³³ Ɉəɠə wəliɠaa ɓa, ə́ wulu ɓaɠaa mąą nįnįn gɛ mą a gbɔluɔ mu tɛgiɛ, viliiboɔ, gbɔluɔ gbələ tətə. Ə́ gɛ ti nwəliɠaa ɓa, ə́ doo gee hu. Ɛlɛɛ, ə́ talanən bɛlɛɛɠaa kɛ nwulu ɓáɠaa lɔwai.

³⁴ Yá dalanən dɛitɛi kɛ nwulu ɓá tɛitɛi lɔwai a hɛni, ə kɛ ti ɉəɠə wəli la kəlee ɓa.

³⁵ A kɛ Aarɔn ɓa, ɓɛlɔwai a kɛi ɉaláá kulɔ la, dalanən nwoo yɛ tɔɔ, ɓɛlɔwai gaa pai kɛi lɔi la Yai-Laa lííla, mįnɛ̨ pɛlɛ́ lon mu da gulɔi lɔwai, əgɛ hvo pa nei haa.

³⁶ «Yili pulu, ə́ hɛni pu, ə́ bɛli a mɛla ŋą kɛnɛ̨ yɛ wulu powa mąąnįnįn, ə́ bɛ̨ɛ̨ yɛ da kɛi hɛn ɉaɠa, yɛ ɓo a Yai-Laa nwɔɔ.

³⁷ Ə́ bɛlɛ həɠə ɓɛla ta ɓa, gbɔluɔ mu tɛɠiɛ, ə ɓo nwuɔ̨ ɓɔlɔ ɓa, ɲɛ̨i tɔwɔ pələ.

³⁸ Ɉɛn tii ɓə pai kɛi Aarɔn tɔwɔla, ɓɛlɔwai a kɛ pai la ɲą́ą́ Yai-Laa nííla. Ɉɛn tii haalai, haláá hɛnŋąąi Israɛlə lonnii da naa həli mą́ą́, ŋą́ ɲéé hee mu, ə mą kɛ daa hɔn ɲɔ̨n da kɛ, níí holiɛ ɉu.

³⁹ «Yili pulu, ə́ ɉəɠə mu həɠə mąąpu, ə́ nwuɔ̨ ɓɔlɔ pɛli a gwəlɛɛ, ə́ hąą yili kɔ́lɔ pɛli a ɓala mąąpuɔ.

Aarɔn lonnii mąą həɠə

⁴⁰ «Ə́ həɠə pɛli a Aarɔn lonnii di wɔɔ, ə́ hąą yili kɔ́lɔ pɛli diɛ; yili pulu, ə́ ɓɔlɔɠaa pɛli diɛ, yɛ di mąąɲinɛ̨n gɛ diɛ.

⁴¹ Ə́ ɉəɠəɠaa tii kɛ ə́ liɛ Aarɔn da lonnii diɛ, ə́ nwulɔ mąą həɠɛɛ hiɛ diɛ, ə́ ɉaláá kulaa mąą laa tɛɛ di pɔ, ə́ di hee a nwɔ́ haláá laa həli nuą.

⁴² Ə́ dɛmą pɛli diɛ a həɠə ɓɛla kwəlɛɛ pə-pə, ə gɛ nuą di hvo pa di kpuwulu kaa, bɛlɛnŋąąi tii da həɠə di nįŋɛ̨i ə yɛɛ di wəla mɛ̨i.

⁴³ Aarɔn da nonnii da bu diɛ, ɓɛlɔwai da kɛi lɔ la gɛɛnąą mąąhəɠɛɛ ɓa a wala kɛ ti da kɛi lɛɠɛ ɉaláá kulɔ taɓali ɓa, haláá kulɔ mɛ̨nį ɓa, mįnɛ̨ pɛlɛ́ lon mu. Di hvo pa nɛ̨nŋɛ̨n ɉəɠə, di hvo haa. Yələ kəlee tɔ́n ga tii Aarɔn da ɉuwuɠaa kəlee di mąą mɛ̨nį ɓa.