Lɛɛ gbɔwɔ ɓa 27 - Yálá laawoo hɛɓɛ (dc)

Ɉaláá kulɔi

¹ «Yá haláá kulɔi ta pɛli a kpitili wulu ɓɛla, ɉaláá kulɔi dɔɔ ɉu ə kɛ a yee laa mą lɔɔli, ɲąą kɛnɛ̨ɛ̨ a yee laa mą lɔɔli, dɔɔ mɛ̨i ə ɓo a yee laa mą haaɓa.

² Yá mįnɛ̨ɠaa tɔɔ nwəli nąąn gəlee ɓa, gąnąn ŋąą mą. Ə́ ɓala kwɛli yá hiɛ mą.

³ Ɉaláá kulɔ hɛnɲąŋąɠaai tii kəlee pɛli a ɓala kwɛli, ə́ da pɛli a luwu kələ hɛn, ə́ da kɛ a gwoa-gwoa, ə́ da kɛ a ɲąmą taɠa hɛnɲąŋą, ə́ da kɛ a mįnɛ̨ ɲin ɉu kulaa, ə́ da kɛ a nwɔ̨n ɉəɠə hɛn.

⁴ Yá gala tɔɔ mą a ɓala kwɛli, ə́ bala pələ kɛ yɛ tumɔ nwəli la nąąn ma, ə́ gbonoɠaa hee laa, diɛ ɓo a ɓala kwɛli.

⁵ Yá gala tɔɔ ɉaláá kulɔi ɓa, ə́ gɛ a ɓala kwɛli bala pələ ə kɛ yɛ tumɔ, gwɛa yee ə kpəla ɉaláá kulɔi hąąi.

⁶ Yá kpitili wulu ɓɛla mąą haɠa, ə ɓala kwɛli ya hiɛ mą, ə kɛ a ɉaláá kulɔi nwɔɔ.

⁷ Nwulu mąą haɠaa hveelɛi tii ɓə pai kɛi a ɉaláá taɓali kpəŋə hɛn, yii da nɔ gbonoɠaa ti hu diɛ gbəŋə la.

⁸ Yá ɉaláá kulɔi pɛli, ə́ mu lɛɛ mą, yɛ bələi ŋį́ gbaɠala lɛ la yɛ́ ɓɛ ɲee ɓa.

Gwəli hąąi kɛ pələ

⁹ «Həɠə ɓɛla ta pɛli, ə́ bɛlɛ gala ɓa, ə yɛɛ nąą kəlee, ə gwəli ɲɛn dɔɔ. Da bala a yeekali walawala, ɉɛɠɛɛ pələ həɠə ɓɛla kwɛa yee a kɛ a yee laa mą nwun dɔ̨nɔ̨.

¹⁰ Bələ tɔ̨nɔ̨ nwɔ wulu hɔlɔɔn bow hveelɛ da di hvilɛn ɉɛn bow hveelɛ, gəlee diɛ ɓo a ɓala kwɛli, gbonoɠaa da ɉəɠə ɓɛla lɔ kwɛli hɔlɔɔnŋąą diɛ ɓo a wali kwɛli.

¹¹ Bələ lɔ ɓə nwɔ̨nɔ̨ ɲələi pələ a kwɛa la, a yee laa mą nwun dɔ̨nɔ̨ həɠə ɓɛla, da nwɔ wulu hɔlɔɔn bow hveelɛi da di hvilɛn ɉɛn bow hveelɛ diɛ ɓo a ɓala kwɛli, nwulu hɔlɔɔnŋąą di wɔ gbono da gwɛli hɔlɔɔn bɛlɛɛɠaa, di ɓo a wali kwɛli.

¹² Gwəli ɲąą kɛnɛ̨ pələ ka pai kɛi; voló tooi gboloyá tənən ma pələ, ɉəɠə ɓɛla ə ɓo ɉu a yee laa mą pow lɔɔli, di wɔ wulu hɔlɔɔn pow da vilɛn ɉɛn pow.

¹³ Gwəli ɲąą kɛnɛ̨ pələ voló həɠəi bələ ə ɓo a yee laa mą pow lɔɔli.

¹⁴ Yee tɔɔ ɉu pow gɔw lɔɔli həɠə ɓɛla, a kɛ bɛlɛ́ laaləi bələ tɔ̨nɔ̨ da nwɔ wulu hɔlɔɔn ɉaaɓa, da nwulu hɔlɔɔn vilɛn ɉɛn haaɓa.

¹⁵ Bələ tɔ̨nɔ̨ yee laa mą pow gɔw lɔɔli həɠə ɓɛla, da wulu hɔlɔɔn ɉaaɓa, da di hvilɛn ɉɛn haaɓa.

¹⁶ Gwəli laa kpulu həɠə ɓɛlaɠaa da kwɛa a yee laa mą pow hveelɛ, gbɔluɔ mu tɛɠiɛ viliiɓoɔ, gbɔluɔ gbələ tətə, diɛ ɓo a yeekali walawalaa mąą puɔ, ɛlɛɛ, wulu hɔlɔɔn nąąn, da di hvilɛn ɉɛn nąąn.

¹⁷ Nwulu hɔlɔɔnŋąą di tinɛ̨nŋąą gwəli ɓa, da kɛ a di yilɛɛ di kee ɓa a wali kwɛli, di wɔ gbonoɠaa diɛ ɓo a wali, di hvilɛn ɉiiɠaa diɛ ɓo a ɓala kwɛli.

¹⁸ Gwəli kwɛa pələ kaa pai kɛi a yee laa mą nwun dɔ̨nɔ̨, ɲąą kɛnɛ̨ pələ ə ɓo a yee laa mą pow lɔɔli, dɔɔmɛ̨i ə ɓo a yee laa mą lɔɔli, nwulu hɔlɔɔn vilɛn ɉiiɠaa da kɛ a ɓala kwɛli.

¹⁹ Bɛlɛ́ mu hɛnŋąą kəlee, nąą kolo kɛ hɛnŋąą, nwulu hɔlɔɔn da gwəli wulu hɔlɔɔnŋąą kəlee, da kɛ a ɓala kwɛli.

Nwɔ̨n ɉee wulɔ

²⁰ «Mąąnɛ̨ɛ̨, ə́ mo Israɛlə lonnii diɛ, di pa a wulɔ nwunu ə́ pɔ, nwɔ̨n ɉee mɛ̨nį ɓa, ə kɛ a wulɔ lɛlɛɛ, yii a nwulɔ nwɔ̨n naahɔnmo a nɛlɛɛ, ə gɛ, nwɔ̨n ə kɛ lɔ lən ɉii a yələ kəlee.

²¹ Ɓɛi gu kaa pai kɛi gu kee kaai laa, ɉəɠə ɓɛla ŋɛ̨i hɛlɛn ni mįnɛ̨ kəhi lííla, mo Aarɔn da nonnii diɛ, di nwulɔ nwɔ̨n ɉee nííla yɛ lən, a yələwulii da yələwala, Yai-Laa lííla. Yili ɓə pai kɛi a Israɛlə lonnii di wɔ kóló, mąą hva hvalin, yɛ ɓo a yələ kəlee mɛ̨nį.