Lɛɛ gbɔwɔ ɓa 26 - Yálá laawoo hɛɓɛ (dc)

Gee kaa kələ

¹ «Gee kaa kələ kɛ pələ ka: Akɛ a həɠə ɓɛla, bɛ̨ɛ̨ ɲɛ̨i ə ɓo pow, gəlee, a yeekali walawalaa, dɛɠiɛ mu kpɔluɔ, gbɔluɔ gbələ tətə da viliiɓoɔ. Mąąnɛ̨ɛ̨ ə́ mąąkpɛ malakaɠaa pɛli, diɛ mɛ̨i kaa, di pɛliɛ a yɛlɛ.

² Ɉəɠə ɓɛla tɛitɛi kəlee kwɛa yee ə ɓo a yee laa mą pow hveelɛ kɔ́w mɛ̨ihaaɓa, ɲąą kɛnɛ̨ɛ̨ yee ə ɓo a yee laa mą nąąn.

³ Ɉəɠə ɓɛla pow tii, ya nɔɔli lɔɔli hee gee la.

⁴ Həɠə ɓɛla tɛɠiɛ mu kpɔluɔ laa dɔlɔɔ nwɔ həɠə ɓɛla gbəli wəli la, ə́ ɲɛli lɔi kɛ mą, ə́ pənə ə́ gɛ tii ɉəɠə ɓɛla veelɛnąą dɔlɔɔ wəli la.

⁵ Ya ɉəɠə kpulɔn ɲɛli kɛ pow lɔɔli, ɉəɠə ɓɛla dɔlɔɔ ɓa, yili pulu, ə́ ɉəɠə kpulɔn ɲɛli kɛ lɔ nwɔ̨nɔ̨ tii pow lɔɔli yiiɠaai tii tənən ma, ə gɛ ɉəɠə ɓɛla hveelɛi tii diɛ ɲɛli hee di kee la.

⁶ Ə́ ɉəɠə kpulɔn gwɛli kɛ pow lɔɔli, diɛ ɓo a hɛni, ə́ ɉəɠə ɓɛlaɠaa kpulɔn gɛa gee ɓa a gwɛliɠaai tii, a kɛ tii, ɉəɠə pɛlɛ́ laa aa kulɔ.

⁷ «Yili pulu, ə́ həɠə ɓɛlaɠaa pɛli a ɓolu ləɠa, yɛ́ pɛli bɛlɛi ɉəɠə pɛlɛ́ mɛ̨i, ə kɛ yɛ kələ lon, ya ɉəɠə ɓɛlaɠaai tii kɛ pow kɔ́w tɔ̨nɔ̨.

⁸ Ɉəɠə ɓɛla tɔ̨nɔ̨ kwɛa pələ ə kɛ a yee laa mą pow haaɓa, ɲąą kɛnɛ̨ a yee laa mą nąąn, bow kɔ́w tanɔ̨n tii gəlee kɛnɛ̨ pələ a kɛ tanɔ̨n.

⁹ Ɉəɠə ɓɛla lɔɔli hee gee la a dee, ə mɛ̨ida hee gee la a dee, ə́ ɉəɠə ɓɛla mɛ̨idanąą yali gee ŋą bɛlɛ́ laaləi.

¹⁰ Ɉəɠə kpulɔn ɲɛli pow lɔɔli kɛ ɉəɠə ɓɛla tɔ̨nɔ̨ wəli la, yii a kɛ a ɉəɠə ɓɛla heɛ gee la gbɛla mąą, ə́ yɛli pow lɔɔli kɛ, yii a kɛ ɉəɠə ɓɛla heɛ gee la veelɛnąą gbɛla mąą wəli la.

¹¹ Ə́ ɉəɠə kpulɔn gwɛli pow lɔɔli kɛ a kwɛli kpɔlu ə́ ɲɛliɠaa lɔ gwɛliɠaa hu, ɉəɠə pɛlɛ́ mɛ̨i kpulu kələ da mɛ̨i kpulu həɠə ɓɛlaɠaa di kɛ lɔ ɉu tɔ̨nɔ̨.

¹² Gələ pɛli həɠə ɓɛla ta kaa pai lɛɛi a gbəli, ə́ ɉəɠə ɓɛla kpəlii tii yali ɉąąi, ə́ gbuwɔ tɔ̨nɔ̨ pɛlɛ bɛlɛ́ kpon bələ.

¹³ Yee laa mą tɔ̨nɔ̨ kaa pai lɛɛi a gbəli, da ɉəɠə ɓɛla hon a gweai pələ, gaa pai hɛlɛn ɉii bɛlɛ́ koo ɓa ɓɛ pələ da ɓɛ pələ, yɛ bɛlɛ́ mɛ̨i kpulu.

¹⁴ 'Həɠə pɛli a ɓɛlaa hilɛ kɔ́lɔ, di gbɔlu, ə́ həɠə takpɛli pɛli a nįŋɛ̨ kɔ́lɔ ə́ bɛlɛ mɛ̨i.

¹⁵ «Yili pulu, ə́ bɛlɛ́ lɔ̨nwɔ̨ pɛli a kasia ə́ dɔɔ mu,

¹⁶ nwulu tɛitɛi kwɛa yee a kɛ a yee laa mą pow, ɲąą kɛnɛ̨ɛ̨ a yee laa mą tɔ̨nɔ̨ da gbulɔ.

¹⁷ Ya di haɠa, yɛ́ ɉee gee la hveelɛ hveelɛ, ə́ gɛ tii a bɛlɛ́ lɔ̨nwɔ̨ kəlee.

¹⁸ Bɛlɛ́ wuluɠaai tii, ya bow hveelɛ pɛli ɉəɠə pɛlɛ́ mɛ̨i ɉɛɠɛɛ pələ.

¹⁹ Ə́ gɔwɔ pow nąąn bɛli, a wali kwɛli, a nwulu pow hveelɛi tii kɔ́wɔ hvilɛn ɉii; gɔwɔ hveelɛ yɛ ɓo a wulu tɔ̨nɔ̨ nwɔɔ, yɛ́ di lɔ di haɠai hveelɛi ɓa, ə́ gəlee kɛ lɔ tii.

²⁰ Ɉəɠə pɛlɛ́ ɲələi pələ bələ tɔ̨nɔ̨ pɛlɛ́ lɔ̨nwɔ̨ pow hveelɛ ɓə a kɛ laa.

²¹ Ə́ gɔwɔ pɛlɛɛɠaa kɛ mą pow nąąn, gəlee yɛ ɓo a wali kwɛli, bɛlɛ́ lɔ̨nwɔ̨ tɔ̨nɔ̨ nwɛi a kɛ mu hveelɛ.

²² Bɛlɛ́ kpon bələ, voló tooi bələi tii, pɛlɛ́ lɔ̨nwɔ̨ mɛ̨ida ɓə a kɛ laa.

²³ Bɛlɛ́ kpon bələ lɔ̨nwɔ̨ veelɛ tɔɔ laa nwəli la hveelɛi tii ɓa bɛlɛ́n bələ.

²⁴ Bɛlɛ́ lɔ̨nwɔ̨ kəlee, gɔwɔ tɔɔi bələ a kɛ a daɠaa gee ɓa, kɛlaa, di nwun nɔi yɛ ɓo tanɔ̨n, gbono tɔ̨nɔ̨ hu. Veelɛi tii di kaa pai kɛi di kee ɓa, diɛ ɓə pai kɛi yɛ bɛlɛ́ dɔɔ mu nwəli la.

²⁵ Bɛlɛ́ lɔ̨nwɔ̨ a kɛ mɛ̨ihaaɓa, gɔwɔ yɛ ɓo mą hveelɛ hveelɛ, gəlee yɛ ɓo a wali kwɛli.

²⁶ «Yá kpitili ɓɛla lɔɔli mąą haɠa, ə kɛ a bɛlɛ́ lɔ̨nwɔ̨ yiiɠaai da kɛ bələ tɔ̨nɔ̨, di wɔ naaŋą.

²⁷ Ə́ nɔɔli mąą haɠa nwɔ̨nɔ̨, ə kɛ a bələ tɔ̨nɔ̨ nwɛi, ə́ pənə ə́ nɔɔli mąą haɠa, ə kɛ a voló tooi pələ nwɛi.

²⁸ Ɉąąi nwɔ naaŋą, a həɠə bɛlɛ́ bələ tɔ̨nɔ̨, ə li bələ tɔ̨nɔ̨.

²⁹ Bɛlɛ́ lɔ̨nwɔ̨ɠaai tii, da hɛni yá lɔ mą, ə mą kɛ di wɔ naaŋąɠaa kəlee, gbonoɠaai tii diɛ kpɛli di kɛ a hɛni yii bɛlɛ́ naaŋąɠaa kaa pai kɛi lɔi ɉu.

³⁰ Bələi tii di bɛlɛ́ tɔɔ pələ lɛ la yɛ́ ɲee nwuɔ̨, 'dɔɔ kpɔlɔ tii.

³¹ «Ɉəɠə ɓɛlai ɲɛ̨i da ɉɛlɛn bɛlɛ́ laaləi, mo yɛlɛ kɛ nuą diɛ, di bala, a yeekali wala wala, ə ɓo a gbɔluɔ mu tɛɠiɛ, daɠaa kpɔluɔ gbələ tətə da ɲɛ̨i hvilii ɓoɔ. Yili pulu, di mąąkpɛ malakaɠaa mąą nįnįnŋaa kɛ ɉu a yɛlɛ.

³² Yá ɉɛlɛn kpitili wulu ɓɛla nąąn ma, hɛni yá lɔɔ mą, ɉəɠə hɛlɛn daŋąɠaa diɛ ɓo a hɛni, nwulu ɓɛlaaɠaai tii kɔ́wɔ a kɛ mu a wali kwɛli.

³³ Yá ɉəɠə ɓɛlai tii hɛlɛn daŋąɠaa mu pələ. «Ɉəɠə ɓɛlai tii pulu pələ ɓə da gəhi hee la, yái mįnɛ̨ həɠə hɛnŋąą kaa ɉu. Ɉəɠə ɓɛlai tii ɓə pai kɛi a gɛɛnąą hveelɛi tii lɔwai tɔɔ hɛn, diɛ ɓaa: kɛɛnąą mąąhəɠɛɛ, da gɛɛnąą mąąhəɠɛɛ nwɔ kɛɛnąą mąąhəɠɛɛ.

³⁴ Ɓɛi Yálá kaa laa heeni, nąą ɓə yá mįnɛ̨ kəhi laa wulun bɛlɛ laa na.

³⁵ Da daɓali hvilɛn ɉəɠə ɓɛla pulu pələ, di nwulɔ nwɔ̨n ɉee hɛn dɔɔ dənən ma ɉɛɠɛɛ pələ, ə́ daɓali hvilɛn ɲələi pələ.

³⁶ «Bɛlɛ laaləi nwɔ həɠə ɓɛlai, həɠə pala nuą da həɠə takpɛli pala a yeekali walawala ɉumɔɔ a gbɔluɔ mu tɛɠiɛ, gbɔluɔ gbələ tətə, da viliiɓoɔ.

³⁷ Da kpitili wulu ɓɛla lɔɔli mąą haɠa, di hɛni yá lɔ mą, yili ɓə di kaa pai ɉəɠə ɓɛla hɛlɛn ɉii mą a taŋą pɛlɛɛ, daŋąɠaa diɛ ɓo a hɛni. Nwulu ɓɛla lɔɔli tii, yá ɓala kwɛli pu, ə kɛ a gɔwɔ lɔɔli.