Lɛɛ gbɔwɔ ɓa 25 - Yálá laawoo hɛɓɛ (dc)

Yálá mąąwiɛ pɛlɛ́ mąą mɛ̨nį

¹ Yai-Laa yɛ Moisə ɓa:

² «'Mo Israɛlə lonnii diɛ, di di yee ɲąąkpɔn di mą́ą́ mɛ̨nį kɛ la. Nuąi kpɔ yili mąą lii kaa di kwəi, ɉɛn da paa la, ka ɉon di yəi.

³ Ɉɛnŋąą ka ɉon di yəi diɛ ka: Hɛni, wali kwɛli, ɓala kwɛli.

⁴ Həɠə muleeɓoɔ, həɠə kpɔluɔ, həɠə kpɔluɔ mu tɛɠiɛ, həɠə kwɛlɛɛ, ɓolu ləɠa həɠə;

⁵ Ɓɛlaa kɔ́lɔɠaai daa gbɔlu, nini kɔ́lɔ həɠəɠaa, kpitili wulu ɓɛlaɠaa;

⁶ Labon dɔɔ wulɔ, nu mąąti wulɔ, hąmą;

⁷ Diamąn lɛlɛɛɠaa da ɉaláá kulɔ həɠəɠaa mąą pu hɛn.

⁸ Mąąnɛ̨ɛ̨ ə́ kɛɛnąą mąą həɠɛɛ pɛli mą́ą́, gɛ́ pɛli lɛɛi ka lɔwai.

⁹ Gáá pai bɛlɛ́ tɔɔ pələ lɛi yɛ́ da mu hɛnŋąą kəlee, mąąnɛ̨ɛ̨ ka gɛ kpɔlɔ ɲą́ą́lee yɛ bələi gáá pai nɛi la yɛ́.

Ɉaláá pɛlɛ́ mu hɛnŋąą

¹⁰ «Kəhi lon bɛli a kpitili wulu, gwɛa a yee laa mą hveelɛ da gbulɔ; goloon ɉu ə ɓo a yee laa mą tɔ̨nɔ̨ da gbulɔ, dɔɔ mɛ̨i ə ɓo a yee laa mą tɔ̨nɔ̨ da gbulɔ.

¹¹ Ə́ hɛniyá lɔ mą ɉu pələ da gɔlɔ ɓa pələ, ə́ mąą pu a hɛni, ə́ doo gee hu.

¹² Gbono nąąn bɛli a hɛni, ə́ di lɔ gɔwɔ nąąn mu, ɓɛ pələ gbono hveelɛ, ɓɛ pələ gbono hveelɛ.

¹³ Wulu kpiɛn bɛli a kpitili wulu, ə́ di mąą pu a hɛni.

¹⁴ Ə́ nwulu kpiɛnŋąąi tii lɔ gbonoɠaa hu gəhi koo ɓa, gbəŋə wuluɠaa li.

¹⁵ Mąąnɛ̨ɛ̨ nwulu kpiɛnŋąąi tii di lɛɛ lɔ gbonoɠaa hu, di hva di kulɔ laa.

¹⁶ Gwɛni ɓɛlaɠaai gáá pai dɛɛi ə́ pɔ, yá naa gəhi hu.

¹⁷ «Yili pulu, ə́ gəhi laawulun bɛli a hɛni hu waa, gwɛa a yee laa mą hveelɛ da gbulɔ, goloon ɉu ə ɓo a yee laa mą tɔ̨nɔ̨ da gbulɔ.

¹⁸ Ə́ mąąkpɛ malaka hveelɛ mąą nįnįn bɛli a hɛni, ə́ di hee gəhi laa kalan mɛ̨i bələ hveelɛi.

¹⁹ Ə́ malaka tɔ̨nɔ̨ kɛ gəhi bələ tɔ̨nɔ̨, ə́ dɔ̨nɔ̨ kɛ bələ tɔ̨nɔ̨, ə́ di kanąn naa kalan ma.

²⁰ Malakaɠaa koon ə kɛ a ɉaŋąą dɔɔ di mɛ̨i, diɛ di koonŋąą pɛlɛ gəhi laa kalan mɛ̨i; da kɛ a di tɔɔ di kee tənən ma, di ɲɛ̨i heɛ gəhi laa kalan mɛ̨i.

²¹ Ə́ gəhi laa kalan bɛlɛ gəhi mɛ̨i, mįnɛ̨ kwɛni ɓɛlai gáá pai dɛɛi ə́ pɔ, ə́ naa gəhi hu.

²² Nąą ɓə gu kaa pai kɛi gu kee kaai laa, ŋą́ kɛ gəhi laa kalan mɛ̨i, malaka hveelɛi tii mįnɛ̨ kəhi mɛ̨i di lɔwai. Mɛ̨nįɠaai gáá pai kɛi ə́ tí la, a Israɛlə lonnii mąą mɛ̨nį, gɛ́ di ɓo laa yɛ́.

Yálá kɔ́ lɛɠɛ laa taɓali

²³ «Yili pulu, ə́ taɓali pɛli a kpitili, gwɛa a yee laa mą hveelɛ, goloon ɉu ə ɓo a yee laa mą tɔ̨nɔ̨, dɔɔmɛ̨i ə ɓo a yee laa mą tɔ̨nɔ̨ da gbulɔ.

²⁴ Ə́ hɛniyá pu mą, ə́ mąą tínɛ̨n ə́ doo gee hu a hɛni.

²⁵ Ə́ ɉu yili hɛn gɛ mą a nu yee ɓaa ɲąą tɔ̨nɔ̨, ə́ ɉu yili hɛnŋąą tii mąą pu a hɛni ə́ doo gee hu.

²⁶ Ə́ gbono nąąn bɛli mą a hɛni, ə́ gbonoɠaa tii lɔ gɔwɔ nąąn mu.

²⁷ Ɉu yili hɛnŋąą tii kwɛlɛ ɓə ya gbonoɠaa lɔ laa, diɛ pɛli daɓali kpəŋə wulu kpiɛnŋąą lɔi di hu.

²⁸ Yá nwulu kpiɛnŋąą ti kɛ a kpitili wulu, ə́ hɛniyá lɔ diɛ, daɓali kpəŋə hɛnŋąą li.

²⁹ Ə́ gəgənŋąą pɛli da kpələ kɔ́ɔɠaa, da yá pu hɛnɲaŋąɠaa, ə́ di hee mɛ̨i; nɔɔ da nwulɔ pu hɛnɲaŋąɠaa li, yá di kɛ a hɛni.

³⁰ Ə́ gɔ́ lɛɠɛ kpinįnŋąą laa nííla a yələ kəlee, daɓalii ti ŋą.

Nwulɔ nwɔ̨n ɉee hɛn

³¹ «Ka wulɔ nwɔ̨n ɉee hɛn bɛli a hɛni huwaa hva-hva, ka ɉɛnii tii pu, gɔwɔ da gbinį, da nwulɔ pu kpowoɠaa, da nwulu powa mąą nįnįnŋąą di kɛ a di lɔɔ di kee hu, di ɓo tɔ̨nɔ̨.

³² Gɔn a kɛ mą mɛ̨ida, gɔn ɉaaɓa ə kɛ bələ tɔ̨nɔ̨, ɉaaɓa ə ɓo bələ tɔ̨nɔ̨.

³³ Gɔn dɔlɔɔ, gbulɔn a kɛ ɉu haaɓa, gbulɔnŋąą mąą pu pələ ə ɓo yɛ yee powa a kɛi hvólóon, mɛ̨idai tii kəlee di kɛ lɔ ti.

³⁴ Gbini leleei tɔɔni ɉamąi, gbulɔn a kɛ ɉu nąąn, di mąą pu pələ ə ɓo yɛ yee powa a kɛi hvólóon.

³⁵ Gbulɔn dɔ̨nɔ̨ a kɛ gɔn veelɛ tɔlɔɔi tii mu, gbulɔn dɔ̨nɔ̨ ə ɓo veelɛi a kɛ nąą pulu mu. Yili pulu, gbulɔn dɔ̨nɔ̨ ə ɓo gɔn gbəli hveelɛi tii mu, bələ ɓə nwɔ̨n ɉee hɛn gɔn mɛ̨idai tɔɔ pələ kaa pai kɛi la.

³⁶ Gbulɔnŋąą da gɔnŋąą di kaa pai kɛi a di kpɔnŋąą ɉamąi nwɛi ɓa, mąąnɛ̨ɛ̨ gəlee ə kɛ a gbuwulu tɔ̨nɔ̨, yɛ ɓo a hɛni hu waa hva-hva.

³⁷ Ə́ wulɔ nwɔ̨n gbowo mɛ̨ihveelɛ pɛli, ə́ ɉee nwulɔ nwɔ̨n ɉee hɛn gɔn mɛ̨ihveelɛi tii nwuɔ̨, da kɛi lən, diɛ di tɔwɔ pələ pɔ̨nɔ̨.

³⁸ Nwɔ̨n dəŋą yali hɛnŋąą da nwɔ̨n dəŋą pu hɛnŋąą, di kɛ a hɛni hu waa.

³⁹ Nwulɔ nwɔ̨n ɉee hɛn tii, da gwɛlɛ hɛnŋąą, di pɛli hɛni ə kɛ a kilə pow haaɓa.

⁴⁰ Moisə, bələi ti gɛ pələ ə lɛ la yɛ́ ɲee ton na, 'gɛ ti.