Lɛɛ gbɔwɔ ɓa 23 - Yálá laawoo hɛɓɛ (dc)

Tələnmo yíi da mąąwɛli nuą hon bələ

¹ «‹Mɛ̨nii hvó nwun gɔlɔn, hvó ɉukulɔ; nui a ɉɔn gɛ, hvó tɔɔ bulu.

² Hvó hvilɛn mɛ̨nį ɲɔ̨n gɛ nuą kpulu pulu. Hvo ə́ laa too kiti mɛ̨nį hu, nu kpului tɛ̨ą hvo bɔ, hvo tɔɔ di pulu.

³ Hvó nwɔ̨nɔ̨ tɔɔ mąąwɛlimun bulu lɔ tii kiti hu.

⁴ «‹Ya kulɔ ə́ yowo nwɔ nįŋɛ̨ mɛ̨i, a wala kɛ ti, nwɔ hoohvaalən, yii aa lan; 'li la bɔ.

⁵ Nui ə́ wɛli kpɛɛ mą, ya nwɔɔ hoohvaalən gaa a too tiɛ̨ mu, hvó tɔɔ kwɛa la, kpɔnmąą tɛɛ bɔ ka yaa ka diɲɛ̨ pɛli.

⁶ «‹Hvó mąąwɛlimun vulu kiti hu.

⁷ Ə́ mąą kwɛa lɛɛ kiti ɓa. Hvó tələnmomun baa da nu haŋąą. Mąąhɔlɔɓo, nui a ɉɔn gɛ, hvá kɛ mą: dələnmoɔi.

⁸ Hvó ə́ yee hee nɔgwəi hɛn mu. Mąąhɔlɔɓo, nɔgwəi hɛn a mɛ̨nį kɔ́lɔnmun ɲɛ̨i kpinį mą, yɛ tələnmo nuą di wɔ tələnmolaa kpəlaan.

Vįitɔɔ kwɛlan da vįitɔɔ yələ

⁹ «‹Hvó hee nwɛ̨ą mɛ̨i. Kaa kpinįi, mɛ̨nįi a laa nwɛ̨ą ɓa, ka gɔlɔn. Mąąhɔlɔɓo, kaa kpinįi ka kɛ a nwɛ̨ą Eziptə lɔi hu.

¹⁰ «‹Kwɛlan mɛ̨ida yee mu, ya tíi kɛ ə́ pɔ yɛa, yɛ́ má hɔlɔɓo.

¹¹ Kɛlaa, gwɛlan mɛ̨ihveelɛ lɔwai, ɉupaa, ə́ nɛɛ lɔ ti, ə́ wɔ lɔi hu yeehowolo nuą di gɛ a di kɔ̨nɔ̨n; yii da nɛɛ laa, lɔwɔ huwɔɠaa di mįi, gɛ lɔ ti a ə́ wɔ olivə yɛa da ə́ wɔ viɲə yɛa.

¹² «‹Hvoló mɛ̨ida yee mu, ə́ kɛ kóló kɛ. Kɛlaa, vóló mɛ̨ihveelɛ yələ, ə́ túwɔ́ ə́ ə́ hvįįtɔɔ, ə́ wɔ nįŋɛ̨i da ə́ wɔ hoohvaalən di di hviitɔɔi, ɛlɛɛ, ə́ wɔ luwɔ nɛ̨ą lon da nwɛ̨ą di di hvina kulɔ.

¹³ «‹Mɛ̨niɠaa kpɔ ŋą́ mo kaa, ka gəlee hon a nɛlɛɛ, ka hvo kwɛli hvilɛn haliɠaa diɛ, nu ta hvo kpɛli di laa mɛ̨n ka la.

Hɛli hvolóɠaa

¹⁴ «‹Kwɛlan dɛitɛi yee mu, mąąnɛ̨ɛ̨ ka mą́ą́wiɛ hɛli pu a hɛli haaɓa.

¹⁵ Lɛɠɛi dɛ hɛn və ɉu, ka mąą hɛli pu, hvóló mɛ̨ihveelɛ yee mu, lɛɠɛi dɛ hɛn və ɉu, ka mįi, yɛ bələi ŋą́ Dɔ́n naa laa ka mɛ̨i, gɛ́ guu hee a Abibə ɲąnin, mąąhɔlɔɓo, nąąlɔwai ɓə ka kulɔ la Eziptə lɔi hu. Mąą hvo nɛ̨ɛ̨li, nuą da kɛi pa nííla, nu ta hvo pa a ɲee howolo.

¹⁶ Ka mɔ̨nun dee hɛli pu, ka kɛ kólóɠaa da ɉɛnŋąąi ka ɉin ka pɔ yɛa, di ɓá dɔlɔɔ-tɔlɔɔ hɛli li. Gwɛlan naa kulɔi lɔwai, ɉɛnŋąąi ka ɉin, ka kɛi di ɓáɠaa pui kɛ, ka yili ɉɛli pu.

¹⁷ Gwɛlan dɛitɛi yee mu, nɔi nuą kəlee da pa di tɔɔ di Nąmu Yai-Laa lííla gee mɛ̨i haaɓa.

¹⁸ «‹Mąą hvo nɛ̨ɛ̨li, ka hvo taatɛlɛɛ ɲąmą laa həli mą́ą́ a haláá, bɛlɛɛ lɛɠɛi dɛ hɛn gaa ɉu mą. Taatɛlɛɛ yii da dɛɛ bɔ́ a ɉɛli yələ, mąą hvo nɛ̨ɛ̨li hvo yii, hvo lɛɛ ɉu yələ hvo ɓɔ.

¹⁹ Ka pa a ka wɔ hihɛn má dɔlɔɔ-tɔlɔɔɠaa Yai-Laa ka wɔ Yálái yəi bɛlɛ́n. Ka hvo ɓolu lon ɲili nee ɲįnįya hu.

Nuą lɔ mɛ̨nį Kanaan lɔi hu

²⁰ «‹Gáá pai malaka ta hvilɛn ɉii ka tɔwɔ, yɛ ɲɛ̨i kɛ kaa bələ pɔ, ə lɛɛ ɉu ka həli ɓɛi ŋį́ naa pɛli a ka wɔɔ.

²¹ Ka mąąwiɛ, ka ka wɛli tɔɔ nwoo ɓa, ka hvo tɔɔ na, hvo pai ka wɔ kulɔ nwoo mu laa mąąhvaalɛɛi, mąąhɔlɔɓo, nwɔ́ heeɓolaa kəlee kaa ɲəi.

²² Kɛlaa, ka ka wəli tɔɔ nwoo ɓa, mɛ̨nįi gáá moi kaa ka gɛ, gáá pai kɛi a ka yowoɠaa di yowo, gɛ́ tɔɔ nuąi da tɔɔ ka la, di la.

²³ «‹Nwɔ́ malakai kaa pai kɛi hvilɛni ka tɔwɔ, gaa pai lii a kaa Amɔrə nuą, Hɛtə nuą, Perizi nuą, Kanaan nuą, Hivi nuą, da Ɉebusə nuą di wɔ lɔi hu; ɛlɛɛ, gáá pai di kpɛɛi yɛnɛ̨ɛ̨.

²⁴ Kɛlaa, mąą hvo nɛ̨ɛ̨li ka hvo kwɛli hvilɛn di wɔ haliɠaai diɛ, kaa tí diɛ. Mɛ̨nįɠaai nuąi tii da gɛ, ka hvo da kɛ. Kɛlaa yaamun, mąąnɛ̨ɛ̨ ka di wɔ haliɠaai kala, ka di wɔ haláá kulɔiɠaa wolo.

²⁵ Yai-Laa ka wɔ Yálái ɓə ka káá pai kɛi kwɛli hvilɛn ɉii mą, ka gɛ tii, gáá pai lúwɔ́ tooi ka kɔ̨nɔ̨n ma, da ka wɔ yáɠaai diɛ, gɛ́ ɲɔ̨n mąą kwɛa kaa.

²⁶ Ka wɔ lɔi hu nɛ̨ɛ̨nu ta lɔpee yəi hvo pai kalai, da hvo pai kɛi a kpomą nɛ̨ą, gáá pai ka yii hvóló hu kwɛai.

²⁷ «‹Gáá ka mąą tin dooi, nɔi ŋɛ̨i ka káá pai lii ɉu, nąą nuą hu ə pu diɛ, ka yowoɠaa da pu ka tɔwɔ.

²⁸ Gáá pai kwɛinŋaa tɔɔi di li, di Hivi nuą Kanaan nuą da Hɛtə nuą kpɛ ka tɔwɔ.

²⁹ Və́ pai di kpɛi kwɛlan dɔ̨nɔ̨ yee mu, ə gɛ, lɔwɔ huwɔɠaa di hvo pa tamą, di hvo kɔ́ pɛlɛ kaa.

³⁰ Gáá pai di kpɛi ka tɔwɔ a bɛlɛ-pɛlɛɛ, ə lɛɛ ɉu, ka kpulu hu ə kɛnɛ̨ ka nɔi nąą kəlee laahvɛɛ.

³¹ Gáá pai ka wɔ lɔi hu kɛnɛ̨i, ə həɠə veengbɔ̨nɔ̨ gboloyá ɓa, ə həli la Filisti nuą diɛ, ə həɠə nɔi pun ma, ə həli la ɲá lee kɛnɛ̨ ɓa; ɓɛlɔwai gáá pai nɔi ti hu nuą lɔi la ka yee mu, ka di kpɛ ka tɔwɔ.

³² Ka diɛni ka hvo mįnɛ̨ həɠə, ə mą kɛ di wɔ haliɠaai.

³³ Di hvo pai lɛɛi ka wɔ lɔi hu, ə gɛ di hvo pa nɛ̨ŋɛ̨n nɔ ka yee pɔ gwa kaa ni gu lɔwai, ka hvo kwɛli hvilɛn di wɔ haliɠaai diɛ. Yili hvo pa kɛ a hɛlɛn dɛɛ ka tɔwɔ.›»