Lɛɛ gbɔwɔ ɓa 22 - Yálá laawoo hɛɓɛ (dc)

¹ «‹Nwuɔ̨mun a lɛɛ pɛlɛ́ wolo ɓɔi mą a kpinį, da gɛlɛ, a haa, mąą hvo nɛ̨ɛ̨li di hvo gwələ kulɔ.

² Kɛlaa, kɛɛ hu a kɛ a bonɔɔ, hvóló yɛ hɔɔ, da ɲąmą kwələ kulɔ. Nu a nwuɔ̨ kɛ, a nwuɔ̨ mɛ̨nį kpɛɛ; hɛn da a wala kɛ nwuɔ̨mun ɲəi, yɛ pɛli mąą mɛ̨nį kpɛɛi la, mąąnɛ̨ɛ̨ di nɔwɔtɔɔ di nwuɔ̨ mɛ̨nį kpɛɛ la.

³ «‹Daataatɛlɛɛi tii di nwuɔ̨, yɛ ə kɛ a nįŋɛ̨, yɛ ə kɛ a hoohvaalən yɛ ə kɛ a ɓɛlaa, da gaa nwuɔ̨mun ɲəi a vulú, mąąnɛ̨ɛ̨ ə yili ɲɔ̨nwɔ̨nmąn veelɛ tɛɛ a bɔɔi.

Lɔi mɛ̨nį

⁴ «‹Akɛ nu ta a nwɔ taatɛlɛɛ hvilɛn ɲəi gbomoi, yɛ gɔ̨nɔ̨n gwɛli laa, daatɛlɛɛi tii a pili tíi takpɛli hu ə nąą kala, mąąnɛ̨ɛ̨ ə bɔɔ kulɔ ɉu a nwɔ tíi nɛlɛɛmun gɛɛnąą, a wala kɛ ti nwɔ hihɛn nɛlɛɛmun gɛɛnąą.

⁵ «‹Nwɔ̨n a pili nu ta yəi lɔwɛi, ə kɛɛ kala, ə kɛ a mɔ̨nun boloon, ə kɛ a mɔ̨nun gələɠaa, awala kɛ tii, hihɛn ɲɛa, nui nwɔ̨n doo, a ɉɛnŋąą tii kələn bɔɔ kulɔ ɉu.

⁶ «‹Nu a hɛn da tɛɛ mɛlanmun bɔ yɛ naaikɛ, yɛ ə kɛ a wali, yɛ ə kɛ a hɛn nɔpee ta, da ɉɛnŋąąi tii nwuɔ̨ ɲee kɛ mąąmun ɲəi, da nwuɔ̨mun ɉon, mąąnɛ̨ɛ̨ nwuɔ̨mun ə ɉɛnŋąąi tii pɔɔ kulɔ ɉu gee mɛ̨i hveelɛ.

⁷ Da wala nwuɔ̨mun ɉon, bɛlɛ́ nąmu a lɛɠɛ Yálá lííla ə gwɛla, əgɛ, nuą di gaa diɛ hvo ɲee kpɛlaan ni a mɛlan nwɔ hɛngɔwi.

⁸ Mɛ̨nįi lɔpee hɛa a too ɉu, yɛ ə kɛ a nįŋɛ̨ mɛ̨nį, yɛ ə kɛ a hoohvaalən mɛ̨nį, yɛ ə kɛ a ɓɛlaa mɛ̨nį, yɛ ə kɛ a həɠə mɛ̨nį, awala kɛ tii hɛn nɔpee da pili mɛ̨nį, ɉɛa too nuą hveelɛi tii da pa Yálá lííla, nui a lɛɛ a ɉon, a mɛlan ɲee kulɔ ɉu gee mɛ̨i hveelɛ.

⁹ «‹Nu a taatɛlɛɛ ta tɛɛ mɛlan bɔ yɛ mɛ̨i kaa, yɛ ə kɛ a hoohvaalən, yɛ ə kɛ a nįŋɛ̨, yɛ ə kɛ a ɓɛlaa, awala kɛ ti, taatɛlɛɛ lɔpee ta; daatɛlɛɛ tii a haa, a wala kɛ ti, ə mąą nwąną, a wala kɛ tii, di nwuɔ̨, di hvo gaa li,

¹⁰ mąąnɛ̨ɛ̨, nu hveelɛi tii di di kwɛla Yai-Laa ɲɛ̨i ɓa, diɛ kɛ di ta hvo ɲee kpɛlaan ni a mɛlan ɉɔlɔɓo hɛn. Mąąnɛ̨ɛ̨, daatɛlɛɛ nąmu ə ɲee hee giti huwui ti mu, mɛlan va bɔɔ kulɔ ɉu.

¹¹ Kɛlaa, akɛ di nwuɔ̨ gwɛlɛ, a daatɛlɛɛ bɔɔi tɛɛ nąmu pɔ.

¹² Akɛ lɔwɔ huwɔ ta ɓə wolo mą, nui tii a pa a gbəli, ə kɛ a mąą kɛla, bɔɔi kulɔ mɛ̨nį hva kɛ ɉu.

¹³ «‹Nu ta a taatɛlɛɛ hvɛli mɛlan ma, daatɛlɛɛ ə mąą nwąną, a wala kɛ ti, ə haa nąmu pulu, nui vɛli a bɔɔi kulɔ ɉu.

¹⁴ Yili a kɛ ti daatɛlɛɛ nąmu ɲɛ̨i ɓa, di hva bɔɔ kulɔ ɉu. Akɛ di wali mɛ̨nį ɓo vɛlii lɔwai, daatɛlɛɛ ə mą haa, nwalii di vaaɓo, a dɛɛ.

Nu mɛ̨nį mąą tɔ́n

¹⁵ «‹Nɛ̨ɛ̨non mąąɲaŋąą hvo ni hulɔnu mɛ̨nį kɔ́lɔn, nu ta a ŋąąhɛn, a gbalaa laa; mąąnɛ̨ɛ̨ ə ɉɔ̨nwɔ̨ tɛɛ gaa-nuą pɔ, ə ɉəɠə a nɛ̨ą.

¹⁶ Nɛ̨ɛ̨nu nąn a wala hvaa mą, ɉulɔnui ti a nɛ̨ɛ̨non nwɔ nɛ̨ɛ̨gbɛla laai ɉɔ̨nwɔ̨ kulɔ.

¹⁷ «‹Hvo tɔlikpɛ nɛ̨ɛ̨nu lɛɛ yɛnɛ̨ɛ̨.

¹⁸ «‹Nui a laa a taatɛlɛɛ ta, da mąą nu paa.

¹⁹ «‹Nui a haláá kulɔ haliɠaa diɛ, akɛ Yai-Laa hvəi, da mąą nu paa.

²⁰ «‹'Hvo ə́ yee pənə nwɛ̨ą hu, mąąhɔlɔɓo, kaa kpɛli ka kɛ a nwɛ̨ąą Eziptə lɔi hu.

²¹ 'Hvo mɛ̨nį ɲɔ̨n naa kalanin da təlilon diɛ.

²² Yá di hon a wea pələ, da wɔlɔ, ŋą́ di woo mɛ̨n,

²³ ŋą́ nííholi ka pɔ, ŋą ka nwun napili a kɔ-kɔ ɓɔwa, ka nɛ̨ąni da lɛɛ a kalaninŋąą ka lonnii di lɛɛ a təlilɛa.

²⁴ «‹Ya kwələ tɔɔ nɔi lon da ɓa, yɛ ɓo a yeehvowolomun, yai ka yaa ka káá ka kee pɔ, hvo kɛ mą: «Tɔ̨nɔ̨ laa mɛ̨i, yɛ́ və.»

²⁵ «‹Ya ə́ heeyɔwɔ ta ŋią biliɉu hon ɲəi a tolaa, pənə ə́ dɛɛ bɔ, gɛɛ yələ hvo wulu.

²⁶ Mąąhɔlɔɓo, ɲii həɠə lɔ ka tii; ɉəɠəi tii ɓə a gɔlɔ mąą kpulu la. Ya ɉəɠə ɲəi, lə ɓə a bɛlɛ mɛ̨i? A wɔlɔ mą́ą́, ŋą́ nwə́li tɔɔ nwɔlɔ woo ɓa, mąąhɔlɔɓo, nwɛ́i, ŋą́ nu ɲɛ̨imąąwɛli kaa.

²⁷ «‹Hvo mɛ̨nį ɲɔ̨n mo Yálá ɓa, nuąi ɲɛ̨itɔwɔ laa kaa di yəi ka lɔwai, hvo da nɛ̨ŋɛ̨n naa.

²⁸ «‹Ə́ wɔ hihɛnŋąąi da pɔlɔ, ya da ya kulɔ, hvo dɛɛ haliɠaa pɔ, akɛ ɲą́ą́ hvəi. Ya ə́ lon ɉulɔnu dɔlɔɔ tɛɛ bɔ́.

²⁹ «‹Bələ lɔ ɓə yá gɛ la a ə́ wɔ nįŋɛ̨ da ə́ wɔ ɓɛlaaɠaa, a lɛɛ nee pɔ hvóló mɛ̨ihveelɛ yee mu, voló mɛ̨ihaaɓa yələ, ə́ dɛɛ bɔ́.

³⁰ «‹Mąąnɛ̨ɛ̨, ka mąą ə həɠə mą́ą́ mɛ̨nį ɓa. Lɔwɔ huwɔ ta a wolo taatɛlɛɛ ta ɓa kpomói, ka hvo mįi, ka bili yilɛɠaa diɛ.