Lɛɛ gbɔwɔ ɓa 20 - Yálá laawoo hɛɓɛ (dc)

Yálá nwɔ tɔ́n bow

¹ Yálá ɓə nwooɠaa ŋɛ̨i kəlee ɓo, yɛ diɛ:

² «Ɲą́ą́ gáá a Yai-Laa, ka wɔ Yálá, yai ka kulɔ Eziptə luwɔlaa hu.

³ «Yálá takpɛli hvo kɛ ka yəi, ə kulɔ Ɲą́ą́ búlú.

⁴ «Mąą nįnįn ɉaɠaa lɔpee ta hvo kɛ ka yəi, ə mą kɛ a yələkɔlɔn ɉu hɛn da kulɔmąą, ə mą kɛ, a lɔi mɛ̨i hɛn da, da yái hɛn da yii gaa lɔi mu gulɔmąą.

⁵ 'Hvó pɛlɛ da lííla, hvo kwɛli hvilɛn diɛ; Mąąhɔlɔɓo, ɲą́ą́ Yai-Laa ka wɔ Yálá, gáá a Yálá tolɔɔ, nuąi da yowolaa kulɔ a ɲą́ą́, ŋą́ gwələ kulɔ di lonnii diɛ, da yiliɠaai di wɔɔ mąnįn bulu mąnįnŋąą diɛ.

⁶ Kɛlaa, nuąi da nwɛ́lila kɛ diɛ lɛɛ nwɔ́ tɔ́n nwooɠaa pulu, ŋą́ mɛ̨inɛ̨ɛ̨ kɛ di lonnii diɛ, da di mąnįn bulu mąnįnŋąą diɛ gee mɛ̨i waa tamąą.

⁷ «'Hvó Yai-Laa ə wɔ Yálá laa ɓo kpɛli-kpɛli. Mąąhɔlɔɓo, nui a naa ɓo kpɛli-kpɛli, Yai-Laa a mąą nui hutɔɔ.

⁸ «'Ə́ kili lɛɛ vįitɔɔ yələ hu, Yálá nwɔɔ li.

⁹ 'Ya ə́ mąą kóló kɛ hvóló mɛ̨ida yee mu.

¹⁰ Kɛlaa, voló mɛ̨ihveelɛ yələ, hvįįtɔɔ yələ li, Yai-Laa ə́ wɔ Yálái nwɔɔ li. 'Hva kólói lɔpee ta kɛ a mąą yələ, ə kɛ a yɛ́ kpinįi, ə kɛ a ə́ lon ɉulɔnu, ə kɛ a ə́ lon nɛ̨ɛ̨nu, ə kɛ a ə́ wɔ luwɔ hilɛ da ə́ wɔ luwɔ nɛ̨ą, da ə́ yəi taatɛlɛɛɠaa, ə mą kɛ nwɛ̨ąi gaa ə́ yəi bɛlɛ́n.

¹¹ Mąąhɔlɔɓo, Yai-Laa ə yələkɔlɔn, lɔi, gboloyá, da ɉu hɛnŋąą kəlee pɛli hvóló mɛ̨ida yee mu, kɛlaa, ə vįitɔɔ a voló mɛ̨ihveelɛ yələ. Yili ɓə gɛ, Yai-Laa ə lúwɔ́ too vįitɔɔ yələi ti ɓa, ə gɛ a hvóló mąąhəɠɛɛ.

¹² «'Ə́ lee da ə́ nąn di mąąwiɛ; ya ɓə a gɛ, nɔi ŋɛ̨i Yai-Laa ə́ wɔ Yálá ə dɛɛ ə́ pɔ, ə́ yíi ə kwɛa ɉu.

¹³ «'Hvó nu paa.

¹⁴ «'Hvó wɛli kɛ.

¹⁵ «'Hvó nwuɔ̨ kɛ.

¹⁶ «'Hvó kɛla hvaa ɲɔ̨nwɔ̨ɔ̨ ɓo a ə́ ɓɛlan gaalon naa.

¹⁷ «'Ə́ ɲɛ̨i hvo kulɔ ə́ ɓɛlan gaalon nwɔ pɛ́lɛ́i pɔ, ə́ ɲɛ̨i hvo kulɔ nɛ̨ą pɔ, ə mą kɛ, a nwɔ luwɔ hilɛ da nwɔ luwɔ nɛ̨ą; ə kɛ a nwɔ nįŋɛ̨, ə mą kpɛli kɛ a nwɔ hoo hvaalən. Ə́ ɲɛ̨i hvo kulɔ ɲəi hɛn lɔpee ta pɔ.»

¹⁸ Israɛlə nu huwu kəlee di ɲələgbąnąą tíŋąą tii mɛ̨n, da dulu woo, diɛ nwɔ̨n nən gaa, da nwɔ̨n nulu, yɛ kulɔ ɲee hu, di kulɔ pulu, di mąą yɛ kpɛlin.

¹⁹ Diɛ Moisə ɓa: «Mąąnɛ̨ɛ̨, yɛ́ kpinįi ə́ hvaa ku pɔ, kwa pɛli ku yili mɛ̨n. Kɛlaa, Yálá hvo kɛ gaa mɛ̨nį ɓoi kuɔ, ku hvo pa ləi haa.»

²⁰ Moisə yɛ diɛ: «Ka hvo ɲɔw, ka hu kɔ́ɔn mɛ̨nį ɓə Yálá ə paa la, ə gɛ, ka ɲɔw mą, ɛlɛɛ, ka hvo pa ləi nɛ̨ɲɛ̨n ɉəɠə.»

²¹ Nuą di tɔɔ kwɛa la, Moisə ə mąą lɛɠɛ dulɔ kpinįn ɉuwiaa tii ɓa, ɓɛi Yálá ə kɛ laa.

Ɉaláá kulɔ pələ

²² Yai-Laa yɛ Moisə ɓa: «Mɛ̨nįi ŋɛ̨i ɓo Israɛlə lonnii diɛ, yɛ diɛ: ‹Kaa kpinįi kaa gaa, kaa diɛ: Yələkɔlɔn ɉu ɓə ŋą́ lɛɛ laa, gɛ́ pələ ɓo kaa.

²³ Mąą hvo nɛ̨ɛ̨li, ka hvo mą́ą́ mɛ̨nį kɛ yɛ halii di bɛli a wali kwɛli, awala kɛ ti, a hɛni. Ɛlɛɛ, mąą hvo nɛ̨ɛ̨li ka hvo ɉaliɠaa tii ta pɛli.

²⁴ Ka nwɔ́ haláá kulɔi pɛli a pɔlɔ, kaa haláá kulɔ laa mą́ą́, a haláái da gəlee kələn, da ponaa kulɔ haláá, a ka wɔ taatɛlɛɛɠaai bɛlɛ-pɛlɛɛɠaa da gbɛa-kpɛaɠaa, ɓɛi lɔpee gáá pai hvaai mą, diɛ náá mąąwiɛ laa. Ŋą́ pa ka pɔ, gɛ́ lúwɔ́ too kaa.

²⁵ Kɛlaa, ka kɛ bɔ ka haláá kulɔi pɛli mą́ą́ a kwɛni, mąą hvo nɛ̨ɛ̨li, ka hvo gwɛni mąą haɠa, mąąhɔlɔɓo, kwɛli pɔɔ a kɛ mą, a kɛ ti, kaa mąąliɓi.

²⁶ Ka hvə nwɔ́ haláá kulɔi tɛ yələi kwɛaa la, di hvo pa ɉaláá laa həli mun gbuwulu kaa.›»