Lɛɛ gbɔwɔ ɓa 2 - Yálá laawoo hɛɓɛ (dc)Moisə hɔlɔɓo mɛ̨nį 1 Levi yəi bɛlɛ́n mun da, ə Levi lon nɛ̨ɛ̨nu ta həɠə a nɛ̨ą. 2 Nɛ̨ɛ̨nui ti, ə koo həɠə, ə naayɛɛ a hulɔnu. Ə gaa yɛ non ti lɛlɛɛi, ə noo ɲąnįn ɉaaɓa yee mu. 3 Yii kɛa ə gaa, yɛ hva pɛli nooi a ɉu kwɛaa, ə kpɔ́lɔ́ ta həɠə, ə mɔ̨nwɔ̨ hiɛ mą nąą kəlee, ə nokoloi tii laa ɉu. Ə li, ə ɉee Nilə-ɲa lee kwɛlɛ veen ɉu. 4 Nokoloi ti mąąhala ə lɛɛ tɔɔni nąą kwɛlɛ, əgɛ, mɛ̨nįi pai kɛi a nəɠə, ə nąą kaa. 5 Eziptə tɔɔmun lon nɛ̨ɛ̨nu ə həɠə, yɛ li nwaai ɲa lee hu. Nwɔ tínɛ̨ąą diɛ hiɛ ɲa kwɛlɛ. Tɔɔmun non ə gbɔ́lɔ́i tii kaa heeni veen ɉu, yɛ nwɔ tímun ma: 'Li ə́ ɉəɠə ə́ paa la. 6 Pai di mo la, ə gbɔ́lɔ́ la həɠə, ə nokoloi tii kaa laani ɉu, yɛ wɔlɔ. Mąąwɛli ə ɉon, yɛ diɛ: «Hebreu ta lon ga!» 7 Nokoloi ti mąąhala yɛ tɔɔmun non ma: «Ə́ kaa bɔ ŋį́ li, ŋį́ kɔ̨nwɔ̨lee nįnɛ̨ ta kwɛli Hebreu nɛ̨ąą lɔwai, ə nokoloi ŋɛ̨i kulɔ ɉu ə́ yəi?» 8 Yɛ mą: «Ee! Ŋą́ą́ hvaa mą.» Nɛ̨ɛ̨non ə li, ə mo nokoloi nee ɓa. 9 Tɔɔmun non yɛ nɛ̨ɛ̨nui ɓa: «Nokoloi ŋɛ̨i həɠə, ə́ li la, ə́ gulɔ ɉu. Gáá pai ə́ hvɛla kulɔi.» Nɛ̨ɛ̨nui ə li a non, ə gulɔ ɉu. 10 Naa kulɔi ə mo ɲįnį ɓa, ə ɉəɠə, ə li la tɔɔmun non pɔ. Tɔɔmun non ə nokoloi tii həɠə a non, ə naa hee a: Moisə. Mąąhɔlɔɓo, yɛ diɛ: «Ŋį́ nwun mąąɓo ya yəi.» Moisə ə pu yɛ li Madian lɔi hu 11 Moisə kɛnɛ̨ɛ kɛa, yələ ta, ə həɠə yɛ li kulɔi niɛni mɛ̨i, bɔlɔtɛ kóló ɓa. Ə Eziptə mun da kaa, yɛ Hebreu tɔ̨nɔ̨ kɛlɛ, diɛi tii a niɛni. 12 Moisə ə ɲɛ̨i laa gwɛlɛ, hvo nu takpɛli kaa. Ə nɛɛmą, ə Eziptə mun ti paa, ə bowa loo ɲɛ̨ą mu. 13 Bulu ɓa yələ laa ɓoɔ, ə pa, ə Hebreu hveelɛ kaa, diɛ gɔ́ a di kee. Nui ŋɛ̨i tɛ̨ą hvo kɛ bɔ, yɛ yili ɓa: «Lə mɛ̨nį ɓa, ə́ kaa ə́ kaayɔwɔ kɛlɛi?» 14 Yili yɛ Moisə ɓa: «Gbɛɛ ɓə ə́ kɛ a ku lɔwai mɛ̨nįɠaa hutɔɔmun? Gaa ə́ kwəi bələi ti wɛi ə́ Eziptə mun ti paa la, ə́ kaa pai báái ti?» Yii kɛa Moisə ə gaa yɛ nuą kili aa pu mɛ̨nįi ti hu, ə ɲɔw. 15 Tɔɔmun yaa kpinį, ə mɛ̨nį ti bələ mɛ̨n, ə kɛi Moisə paa pələ kwɛli. Nąąlɔwai, Moisə ə pu, ə li ə mąąkilɛ Madian lɔi hu, yálɔwa ta ə kɛ laa, ə hee gwɛlɛ. 16 Ɉaláá laa həli mun ŋɛ̨i kɛ Madian, nonnii nɛ̨ąą di kɛ mɛ̨ihveelɛ, nɛ̨ąą tii di pa ya haɠai di bu daatɛlɛɛɠaa kpələi, di naahvɛɛ, di nąn nwɔ taatɛlɛɛɠaai kpələ mɛ̨nį ɓa. 17 Kɛlaa, taatɛlɛɛ mɛ̨i kaa nuą takpɛliɠaa, di kɛ a hinąą di pa, di nɛ̨ąąi ti kpɛ; ə kɛ lɔ tii, Moisə ə pa ə tɔɔ di pulu, ə yá tɛɛ nɛ̨ɛ̨lɛai ti di wɔ taatɛlɛɛɠaai pɔ, di di kpələ. 18 Nɛ̨ɛ̨lɛai ti di pənə di pa di nąn Reuɛlə pɔ. Yili yɛ diɛ: «Lə ɓə kələi kɛ, yai ka pa ŋɛ̨i ɉa?» 19 Nonnii diɛ mą: «Eziptə hulɔnu ta ka tii, ɓɛlɔwai daatɛlɛɛ mɛ̨i kaa nuąi ti a ɉinąą, di kpəɲan na ku tɔwɔ, ya ɓə tɔɔ ku pulu, ə yá haɠa ə dɛɛ ku wɔ taatɛlɛɛɠaai pɔ, di di kpələ.» 20 Di nąn yɛ diɛ: «Nu kpɔ kaa mį? Lə mɛ̨nį ɓa, ka nɛɛ laa kaa pa? 'Ka li ka dəli, ə pa, gwa diɛni gu kɔ̨nɔ̨n mįi.» 21 Pai Moisə ə mo, ə lɛɛ ɉulɔnui tii pɔɔli. Yili yaan, ə non Sipora tɛɛ Moisə pɔ a nɛ̨ą. 22 Nɛ̨ɛ̨nui tii ə lon ɉulɔnu kaa, Moisə ə naa hee a Gɛrsɔmə, mukulaa ɓaa «Toonwun ma.» Mąąhɔlɔɓo, ŋą́ą́ kɛ a toonwun mamun nwɛ̨ą lɔi hu. Yálá ə Moisə kɛ a Israɛlə nwun mąąɓomun 23 Kwɛlan damąą kulaa ɉu, Eziptə tɔɔmun ə haa. Kɛlaa ə mą kɛ tii, Israɛlə lonnii di kɛli lɔ mɔ̨nɔ̨ mįi nuwɔlaa hu, diɛ wɔlɔ. Di wɔlɔ woo ə həli Yálá ɓa. 24 Yálá ə di wɔlɔ woo mɛ̨n, ə pənə ə nwɔ mįnɛ̨i hu nwun. Yai wɔlɔ da Abrahamə, Isaakə da Ɉakɔbə ni di ɉəɠə. 25 Yálá ə ɲɛ̨i hee Israɛlə lonnii diɛ, di mąąwɛli ə ɉon. |