Lɛɛ gbɔwɔ ɓa 19 - Yálá laawoo hɛɓɛ (dc)

Yálá da Israɛlə di mįnɛ̨ həɠə Yálá ə kɛ bɔ da Israɛlə di mįnɛ̨ həɠə

¹ Israɛlə lonnii kulaa Eziptə lɔi hu, ɲąnin ɉaaɓa tɛɛ pulu, di həli Sinai nɔi pun ɉu.

² Di həɠə Refidimə, diɛ li Sinai nɔi pun ɉu, Israɛlə lonnii di di wɔ ɓuwui pɛlɛ nɔi pun ɉu, ɲee tənən ma.

³ Moisə nwɛi, ə tɛ, Yálá pɔ pələ da yaa di di kee kaa. Yai-Laa ə lɛɛ ɲee hu, ə Moisə təli, yɛ mą: «Mɛ̨nįɠaai ŋɛ̨i hukulɔ Ɉakɔbə yəi bɛlɛ́n nuą diɛ, ə́ díɓoi ŋɛ̨i laa həli Israɛlə lonnii diɛ, yɛ́ diɛ:

⁴ ‹Mɛ̨nii ŋą́ naa Eziptə ɓa, kaa kpinįi ka gaa, bələi ŋį́ ka kpəŋə la, Kuwɔ́ koon ɉu, gɛ́ pa a kaa bɔ́ pələ.

⁵ Ə həɠə yiihu ɓa, ka ka wəli tɔɔ nwóó ɓa, kaa lɛɛ nwɔ́ mįnɛ̨i pulu, ka kɛ a gwɛ́lin gɛnɛ̨mun, nu huwuɠaa kəlee lɔwai; mąąhɔlɔɓo, ɲą́ą́ ɓə lɔi kəlee kaa a nwɔ́ɔ́.

⁶ Ka wɛi, gáá pai ka kɛi a nwɔ tɔɔlaa hu haláá laa həli nuą, a nu huwu mąąhəɠɛɛ.› Nwooɠaai mąąnɛ̨ɛ̨ ə́ mo Israɛlə lonnii diɛ, diɛ ka ti.»

⁷ Moisə ə pa, ə nɔi kalanɉonŋąą təli, ə nwooɠaai ti kəlee ɓo diɛ, yɛ bələi Yai-Laa ə dí la.

⁸ Nu kpɔn gəlee ə nwoo mu hon a gee, diɛ mą: «Mɛ̨nįɠaai kpɔ Yai-Laa ə mo, ku kaa pai gəlee kɛi.» Moisə ə nuą woo laa həli Yai-Laa ɓa.

⁹ Yai-Laa yɛ Moisə ɓa: «Gáá pai ŋį́ həli kpɔ yɛ́ tulɔ kpinįn ɉuwia hu, nɔi lonnii diɛ pɛli nwóó mɛ̨n ɉii, ɓɛlɔwai gáá pai kɛi pələ ɓoi la yɛ́, diɛ pɛli laai ə́ la a yələ kəlee.» Moisə ə nɔi lonnii woo laa həli Yai-Laa ɓa.

Moisə da Yálá di di kee kaa Sinai yee nwuɔ̨

¹⁰ Yai-Laa yɛ Moisə ɓa: «Li ə́ mo Israɛlə lonnii diɛ, di di mąąhəɠə háákələi da tinąą; di di mąą həɠəɠaa waa.

¹¹ Di kɛ pələ ə kɛ a bɛliɛ a voló haaɓa yələ, mąąhɔlɔɓo, voló haaɓa yələ ɓə Yai-Laa kaa pai yɛɛi la Sinai yee nwuɔ̨, nɔi lonnii kəlee ɲɛ̨i ɓa.

¹² Ɓɛi mąąnɛ̨ɛ̨ nuą di kpəla laa, nąą lɛ diɛ, yɛ diɛ: ‹Ka lii hvo kpələ, ka hvo tɛ ɲee ɓa, ka hvo kpɛli tunwɔ̨n ɲee koo mu.› Nui lɔpee a tunwɔ̨n ɲee ɓa, da baa.

¹³ Nui a gulɔ nwəlii, a ɉɔn ɲɔ̨n tii kɛ, nu ta hvo ɲee tunwɔ̨n mąą nu ɓa, kɛlaa, da ɉɔɔ a kwɛni ə haa, a wala kɛ ti, da mon a tonwą; ə kɛ a taatɛlɛɛ, ə mą kɛ a nu kan, mąą hvo nɛ̨ɛ̨li hvo lɛɛ yɛnɛ̨ɛ̨. Ɓɛlɔwai dulu woo kaa pai tɔɔi la, nu taɠaa kaa pai tɛi ɲee ɓa.»

¹⁴ Moisə ə ɲee yɛɛ, ə pa nuą pɔ. Ə nuą mąąhəɠə, di di mąą həɠəɠaa waa.

¹⁵ Yɛ nuą diɛ: «Gɛɛ hvóló haaɓa hvo tɛɛ, mąąnɛ̨ɛ̨, ka mąą mɛ̨nį kəlee ə kɛ a bɛliɛ ɉu, nu ta hvo laa nɛ̨ą kwɛlɛ.»

¹⁶ Voló haaɓa yələ, yələwala pɔ, yələ gbąnąą tín ə tɔɔ, mąną-mąną ə gɛ, tulɔ kpinįn ɉuwia ə yɛɛ ɲee ɓa, tulu woo kɛnɛ̨ yɛ tɔɔ, nɔi lonnii kəlee diɛ kpɛlin ɓɛi di kɛ laa tɔɔni.

¹⁷ Moisə ə mo nuą diɛ, di kulɔ ɓɛi di kɛ laa, diɛ li Yai-Laa laakwiɛn ɉi, di tɔɔ ɲee kɔ́wɔ la.

¹⁸ Sinai yee ə kɛ lɔ a nwɔ̨n nulu. Mąąhɔlɔɓo, Yai-Laa aa kɛ yɛɛ laa nwɔ̨n ɉu, nwɔ̨n nulu ə kɛi tɛ yɛ kpaɠa nwɔ̨n nulu, ɲee yɛ kpɛlin gbɔ kɛnɛ̨.

¹⁹ Dulu woo ta lɔ ɓə kɛi pɛlɛ mą, ɓɛlɔwai Moisə ə kɛi hvaa la, Yálá yɛ bulu pənə, yələ gbąnąą woo hu.

²⁰ Yai-Laa ə lɛɛ Sinai yee tɔ́n na, Ə Moisə təli, Moisə ə tɛ.

²¹ Yai-Laa yɛ Moisə ɓa: «Yɛɛ, ə́ mo nuą diɛ, yɛ diɛ: ‹Di hvo kpuluun, diɛ kɛ di li Yai-Laa pɔ gaa mɛ̨nį ɓa; da gɛ ti, da ləi haa.

²² Ə mą kɛ ɉaláá laa həli nuąi da kɛ di mąą lɛɠɛi Yai-Laa ɓa a bɔlɔ, mąąnɛ̨ɛ̨ di di mąąhəɠə; ə gɛ, Yai-Laa hvo pa nəi níiholi di pɔ.›»

²³ Moisə yɛ Yai-Laa ɓa: «Nuą di hva pɛli tɛi Sinai yee ɓa; hvó gaai, yɛ́ kpinįi yáá ku kilaa pɔ̨nɔ̨, yɛ́ mą́ą́: ‹Yɛli too ɲee ɓa, ə́ ɲɛ̨n naa, ɛlɛɛ, kɛ nuą diɛ: Ɲą́ą́ Yálá mą́ą́həɠɛɛi.›»

²⁴ Yai-Laa yɛ Moisə ɓa: «Pənə ə́ yɛɛ, yɛ́ ka Aarɔn ka tɛ. Kɛlaa, ɉaláá laa həli nuą da nɔi nuą, di hvo kɛ di kaa kpuluun ɉi, diɛ tɛ Yai-Laa pɔ; ə gɛ, hvo pa ləi níiholi di pɔ hvo di kɛlɛ!»

²⁵ Moisə ə ɲee yɛɛ nuą pɔ, ə nwoo hukulɔ diɛ, yɛ bələi di mo la mą.