Lɛɛ gbɔwɔ ɓa 17 - Yálá laawoo hɛɓɛ (dc)Masa da Meriba yá 1 Israɛlə lonnii kəlee di həɠə Sin nɔi pun ɉu, diɛ kɛa li a bɛlɛɛ-pɛlɛɛ, yɛ bələi Yai-Laa ə kɛi di tənən dɔɔ la. Di tɔɔ Refidimə, kɛlaa, yá hvo kɛ laa, yii nuą da gbələ. 2 Nuą di hvaa pələ Moisə pɔ, diɛ kɛ mą: «Yá tɛɛ ku pɔ, ku ku kpələ la!» Moisə yɛ diɛ: «Ka káá hvaa pɛlɛi mą́ą́, lə mɛ̨nį ɓa? Lə mɛ̨nį ɓa, ka káá Yai-Laa hukɔɔn ɉii?» 3 Kpələ wɛli ə nuą hon gɛɛnąą tii ɓa, diɛ hvaa di nwun ɉu Moisə ɓa, diɛ kɛ mą: «Ə́ ku kulɔ Eziptə lɔi hu lə mɛ̨nį ɓa? Akɛti, ku lɛɛ mɛ̨nį laa kuɔ haa a kpələ wɛli ɓə, kuɔ, ku lonnii da ku wɔ taatɛlɛɛɠaa?» 4 Moisə ə nwoo tɛ Yai-Laa ɓa, yɛ mą: «Lə ɓə ŋą́ pɛli gɛi nu kpului ŋɛ̨i mąą mɛ̨nį ɓa? Ɉu hvo pai kwɛai, diɛ pa ɉɔ́ɔ́i a kwɛni, ə gɛ, di báá.» 5 Yai-Laa yɛ Moisə ɓa: «Tɛɛ nuą tɔwɔ, ə́ Israɛlə kalanɉonŋąą taɠaa hvilɛn ə́ pɔ, dunwɔ̨n tii ə́ ɲá lee kɛlɛ la, ɉon ə́ yee pɔ; ɛlɛɛ, ə́ li. 6 Gáá pai kɛi ə́ ɲɛ̨itɔwɔ, Horɛbə yee ɓa, gwɛni kpuwulu mɛ̨i; ya pa laa, ə gwɛni kɛlɛ. Yá kaa pai kulɔi ɉu, di di kpələ la.» Həlii di mo ɲee ɓa, Moisə ə gɛ tii. Israɛlə kalanɉonŋąą ɲɛ̨i ɓa, yɛ bələi Yai-Laa ə mo la mą. 7 Ə gɛɛnąą tii laa hee a: Masa da Meriba, yili mukulaa ɓaa: «hukɔɔn.» Mąąhɔlɔɓo, Yai-Laa hukɔɔn Israɛlə lonnii di mo di hvaa tee, mąą mɛ̨nį ɓa. Diɛ kɛ mą: «Akɛti, Yai-Laa kaa lɔ ku lɔwai ɓəi, a wala kɛ tii, hvo ɓɛ?» Amalɛkə nuą di kɔ́ pɛlɛ Israɛlə ɓa 8 Amalɛkə nuą di pa di kɔ́ pɛlɛ Israɛlə ɓa Refidimə. 9 Moisə yɛ Ɉosue ɓa: «Nuą həɠə, tinąą ka diɛni ka li ka Amalɛkə nuą laakwiɛn a kɔ́. Ɲą́ą́ nwɛ́i, gáá pai kɛi tɔɔni ɲee tɔ́na, dunwɔ̨n Yálá ə dɛɛ bɔ́, yɛ ɓo ɲə́i.» 10 Ɉosue ə gɛ, yɛ bələi Moisə ə mo la mą, ə kulɔ yɛ li kɔ́ pɛlɛi Amalɛkə nuą diɛ. Moisə, da Aarɔn, da Hurə di tɛ ɲee tɔ́na. 11 Ɓɛlɔwai Moisə a ɲeeɠaa tɛ la ɲələi, gɔ́ a nɛ̨ɛ̨ Israɛlə nuą diɛ. Kɛlaa, ɲee hu a haa a ɲɛɛ, Amalɛkə nuą da hvaŋą hɔlɔɓo Israɛlə mɛ̨i. 12 Yii kɛa Moisə yeeɠaa hu ə haa kpɔ kɛnɛ̨, di kwɛni kpuwulu ta həɠə, di nɔ mu, ə hee mɛ̨i. Aarɔn da Hurə di di yee hee Moisə yeeɠaa mu, nu tɔ̨nɔ̨ ə lɛɛ ɓɛ pələ, dɔ̨nɔ̨ ə lɛɛ ɓɛ pələ. Bələ ɓə Moisə yeeɠaa di lɛɛ la a dɛɛ ɲələi, ə lɛɛ ɉu, hvóló kɔ́w ə too. 13 Ɉosue yee ə tɛɛ Amalɛkə nuą diɛ, ə nu tamąą paa a ɓɔwa kwɛaa. 14 Yai-Laa yɛ Moisə ɓa: «Mɛ̨nį ŋɛ̨i pɛ̨ɛ̨ hɛɓɛ́ hu, ə kɛ a kili too ɲą hɛn, ɛlɛɛ, ə́ mo Ɉosue ɓa, yɛ mą: ‹Gáá pai Amalɛkə nuą laa kulɔi yɛnɛ̨ɛ̨, ŋį́ di laa waa yələkɔlɔn mu.›» 15 Moisə ə haláá kulɔi ta pɛli, ə nąą la hee a: «Yai-Laa nwɔ́ kɔ́kuláá.» 16 Moisə yɛ diɛ: «Yii daa di muhəɠə Yai-Laa nwɔ tɔɔ kpəlin ma a kɔ́, gaa kɛa a kɔ́ Yai-Laa da Amalɛkə nuą di lɔwai a yələ kəlee mɛ̨nį.» |