Lɛɛ gbɔwɔ ɓa 16 - Yálá laawoo hɛɓɛ (dc)Maanə da lɔwɔ haɉali 1 Israɛlə lonnii di həɠə Elimə, di həli Sin nɔi pun ɉu, Elimə da Sinai di lɔwai. Di kulaa Eziptə lɔi hu, ɲąnin veelɛnąą nwɔ hvóló pow kɔ́w lɔɔli yələ li kɛ. 2 Israɛlə lonnii kəlee, di kɛi hvaa di nwun ɉu, Moisə da Aarɔn diɛ, nɔi pun ɉu. 3 Israɛlə lonnii diɛ diɛ: «Yai-Laa ə li kpɛli kɛ ku paa Eziptə lɔi hu, ɓɛlɔwai ku kɛ la heeni ləɠiɠaa kwɛlɛ, naahvɛɛ a huwɔ, kuɔ kɔ̨nɔ̨n mįi a ku liiɓa! Ka pa a kuɔ nɔi pun ŋɛ̨i hu, nu kpului ŋɛ̨i kəlee haa mɛ̨nį ɓa a pulu!» 4 Yai-Laa yɛ Moisə ɓa: «Gáá pai kɔ̨nɔ̨n dɛɛi ka pɔ yɛ həɠə yələi. Nuą kaa pai kɛi kulɔi a yələ kəlee, diɛ hvóló tɛitɛi kɔ̨nɔ̨n ɉəɠə, gáá pai ka hukɔɔn ɉii ti, akɛ di kaa pai hiɛi a nwɔ́ tɔ́n nwooi, a wala kɛ ti, a kɛ di hvo pai hiɛi la! 5 Voló mɛ̨ida yələ, gɔ̨nɔ̨n da ɉəɠə, da hvóló tɔ̨nɔ̨ nwɔ pɛlɛ́ mą, a voló mɛ̨ihveelɛ yələ nwɛi.» 6 Moisə da Aarɔn diɛ Israɛlə lonnii diɛ: «Háákələi yələwulii pɔ, ka káá pai gɔlɔn ɉii, kaa diɛ; Yai-Laa ɓə ka kulɔ Eziptə lɔi hu. 7 Yələwala pɔ, ka káá pai Yai-Laa nwɔ mąąwiɛ kaai. Mąąhɔlɔɓo, mɛ̨nįɠaai ka kɛi mo ka nwun ɉu, Yai-Laa aa mɛ̨n. Lə ɓaa kuɔ, yai ka li hvaai ka nwun ɉu kuɔ?» 8 Moisə yɛ diɛ: «Yai-Laa kaa pai huwɔ tɛɛi ka pɔ háákələi yələwulii pɔ, ka mįi, yələwala pɔ, ka pilɛ a ka liiɓa. Mąąhɔlɔɓo, Yai-Laa aa ka woo mɛ̨n, kaa hvaa ka nwun ɉu. Lə ɓaa kuɔ? Kuɔ hvəi ka káá hvaai ka nwun ɉu kuɔ, Yai-Laa ɓə!» 9 Moisə yɛ Aarɔn ɓa: «'Mo Israɛlə lonnii kəlee diɛ, yɛ diɛ: Ka ka ŋąąkpɔn Yai-Laa lííla, mąąhɔlɔɓo, hvaai ka káá moi ka nwun ɉu, Yai-Laa aa mɛ̨n.» 10 Ɓɛlɔwai Aarɔn ə kɛi bələ ɓo la Israɛlə lonnii kəlee diɛ, ə tinɛ̨n ə ɲɛ̨i hee nɔi pun ɉu pələ, ə Yai-Laa nwɔ mąąwiɛ kaa tulɔ kpinįn ɉu. 11 Yai-Laa yɛ pələ ɓo Moisə ɓa, yɛ kɛ mą: 12 «Ŋą́ą́ Israɛlə lonnii woo mɛ̨n, diɛ hvaa di nwun ɉu, mo diɛ, yɛ diɛ: Hvitili ɓa, ka káá pai huwɔ mįi, yələwala pɔ, ka káá pai pilɛi kɔ̨nɔ̨n ɉu a ka liiɓa; ka káá pai gɔlɔn ɉii, kaa, Ɲą́ą́ Yai-Laa, ɲą́ą́ ɓə a ka wɔ Yálá.» 13 Mąą yələwulii, lɔwɔ haɉaliɠaa di pa di pɛlɛ muwu la di nąą kpɛɛ mą. Ɛlɛɛ, yələwala pɔ, luwuluwu hu wiaa ə pɛlɛ muwu kwɛlɛ nąą kɔ́lɔ kəlee. 14 Nuwuluwu kɛɛ həɠeen ɉi, hɛn da ə lɛɛ pɛlɛ ni nɔi ɓa a gɔw pɛlɛɛ-pɛlɛɛ yɛ mɔ̨nun ɲin. 15 Israɛlə lonnii di gaa, diɛ kɛ di kee ɓa: «Man hu?» Mukulaa ɓaa: «Lə ɓaa yii?» Mąąhɔlɔɓo, di hvo kɛ ɉɛn ti kɔ́lɔn. Moisə yɛ diɛ: «Gɔ̨nɔ̨n Yai-Laa ə dɛɛ ka pɔ yaa li. 16 Bələi Yai-Laa ə mąą tɔ́n naa la, bələ ka: ‹Yii nu tɛitɛi kəlee a pɛli mįi, ə ɉəɠə. Nu tɔ̨nɔ̨, kəgən ŋąą tɔ̨nɔ̨, yɛ bələi ka wɔ nu kwɛni kaa la ka yəi bɛlɛ́n.›» 17 Israɛlə lonnii di gɛ ti. Di ɉəɠə, nu taɠaa di ɉəɠə tiikpə, daɠaa di ɉəɠə kɛnɛ̨. 18 Gɔɔn di mo gəgən ɉu, nui ɉəɠə kɛnɛ̨, nwɛi hvo tɛɛ mɛlaa di wɛi ɓa, nui ɉəɠə tiikpə, nwɛi hvo too mɛlaa di wɛi mu. Yii lɔ nu tɛitɛi a pɛli mįi, yaa lɔ ɓə kɛ ɲəi. Mannə mąą mɛ̨nį kɛ pələ 19 Moisə yɛ diɛ: «'Da hvo lɛɛ ka yəi yələ hvo ɓɔ.» 20 Nu taɠaa di hvo di wəli tɔɔ Moisə woo ɓa. Di da hee di kwɛlɛ ə lɛɛ ɉu yələ ə ɓɔ, kolo ə pu ɉu, gun yɛ tɛ Moisə ə níiholi di pɔ. 21 Ə həɠə ɲələ ɓa, yii lɔ nu tɔ̨nɔ̨ a pɛli mįi, ya ɓə di kɛi ɲɛɠɛ yələwala kəlee. Hvóló a kulɔ, gbəli ə kɛi həɠeen. 22 Voló mɛ̨ida yələ, da manə yɛɠɛ a hvóló hveelɛ nwɔɔ, nu tɛitɛi kəlee nwɔ kəgən ɉu hveelɛ. Gwəli nąmįną, di pa di di woo hukulɔ Moisə ɓa. 23 Moisə yɛ diɛ: «Yai-Laa ɓə mo ti, tinąą ɓaa túwɔ́ hvoló, hvįįtɔɔ yələ li. Volói ti kaa a Yai-Laa nwɔɔ. Kɔ̨nɔ̨n mąąnɛ̨ɛ̨ ə mɔ̨n ka mɔ̨n, yii mąąnɛ̨ɛ̨ ə yili, ka ɲili. Gbəli a lɛɛ, ka ɉee a tinąą nwɔɔ.» 24 Di da hee, ə lɛɛ ɉu yələ ə ɓɔ, yɛ bələi Moisə ə mo la, hvo luwun, kolo hvo pu ɉu. 25 Moisə yɛ diɛ: «Ka yili mįi háákələi! Háákələi ɓaa Yai-Laa hvįįtɔɔ yələ, ka hvo kələi pai manə kaai. 26 Hvóló mɛ̨ida yee mu, ka pɛli mą ka da yɛɠɛ, kɛlaa, voló mɛ̨ihveelɛ yələ, gaa a túwɔ́ yələ, da hva kɛ laa.» 27 Voló mɛ̨ihveelɛ yələ, nu taɠaa di kulɔ, diɛ kɛ di li di da yɛɠɛ, kɛlaa di hvo hɛn da kaa. 28 Yai-Laa, yɛ Moisə ɓa: «Ka káá pai lɛɛi ka nwun gulɔi nwɔ́ tɔ́n nwooɠaa da nwɔ́ tiɓoɠaa mu, ə lɛɛ ɉu mįnɛ̨ lɔwai? 29 Mąąnɛ̨ɛ̨ ka gɔlɔn kaa Yai-Laa aa túwɔ́ hvoló tɛɛ ka pɔ, ə gɛ ka ka hvįįtɔɔ. Yili ɓə gɛ, voló mɛ̨ida yələ, a hvóló hveelɛ kɔ̨nɔ̨n dɛɛ ka pɔ. Yili ɓa, nu kəlee ə lɛɛ ɉeei, nu ta hvo kulɔ bɔɔli a voló mɛ̨ihveelɛ yələ.» 30 Nuą di di hvįįtɔɔ a voló mɛ̨ihveelɛ yələi ti. 31 Israɛlə lonnii di ɉɛn ti laa hee a mannə. Mannə ə kɛ yɛ mąlaan ɲa, gbuwulu kɛɛ, gwəlɛɛ, nɛ̨ɛ̨ nu la yɛ da nwɔmįi pɛli a kwɛin nwulɔ. 32 Moisə yɛ nuą diɛ: «Mɛ̨nįi Yai-Laa kaa moi, ya ka: ‹Ka da həɠə a kəgən ɲąą tɔ̨nɔ̨, ɛlɛɛ, ka naai gɛ, ka huwuhu nuą mąą mɛ̨nį ɓa, ə gɛ, manə ŋį́ ka kɔ̨nɔ̨n gɛ la nɔi pun ɉu, ɓɛlɔwai ŋį́ ka kulɔ la Eziptə lɔi hu, diɛ pɛli gaai.›» 33 Moisə yɛ Aarɔn ɓa: «Hɛn ɲąŋą ta həɠə, ə́ manə kəgən ɉu tɔ̨nɔ̨ həɠə, ə́ bu ɉɛnɲąŋąi ti hu, yili pulu, ə́ ɉee Yai-Laa lííla, ka naa hɔn mo ka huwu hu nuą mąą mɛ̨nį ɓa.» 34 Yɛ bələi Yai-Laa ə Moisə tí la, Aarɔn ə manə tii hee mįnɛ̨ kəhi hu gwɛni ɓɛlaɠaai lɔwai, diɛ di ɲɛ̨i kɛ laa mą. 35 Israɛlə lonnii di manə mįi kwɛlan bow nąąn ɲee mu, ə lɛɛ ɉu, di həli Kanaan lɔi ɲɛ̨in ma. 36 Hvóló tɛitɛi kɔ̨nɔ̨n ə kɛ a tuku tɔ̨nɔ̨ ɓɛlaɓoɔ ɉu pow, di ɉeei tɔ̨nɔ̨ həɠə. |