Lɛɛ gbɔwɔ ɓa 14 - Yálá laawoo hɛɓɛ (dc)Eziptə tɔɔmu ə hvilɛn Israɛlə lonnii pulu yɛ di kpɛ 1 Yai-Laa ə mo Moisə ɓa, yɛ mą: 2 «'Mo Israɛlə lonnii diɛ, di pənə di pa, di di wɔ ɓuwui pɛlɛ Pi-Hahirotə, Migdolə da gboloyá di lɔwai; Baalə-Sefɔn tənən ma, gboloyá kwɛlɛ pələ. 3 Eziptə tɔɔmun gaa pai kɛi diɛ: ‹Israɛlə lonnii daa lan nɔi pun ɉu.› 4 Gáá pai Eziptə tɔɔmu gili walawalai, ə hvilɛn ka pulu. Nąąlɔwai ɓə, gáá pai nwɔ́ yee tɛɛmąąlaa lɛi la Eziptə tɔɔmun da nwɔ kɔlaɠai diɛ. Yili pɔ pələ ɓə Eziptə nuą kəlee da gɔlɔn na diɛ, ɲą́ą́ ɓə gáá a Yai-Laa.» Israɛlə lonnii di gɛ yɛ bələi di di tɔɔ la. 5 Di mo Eziptə tɔɔmun ma diɛ mą: Israɛlə lonnii daa pu. Eziptə tɔɔmun da nwɔ ɲɛ̨itɔwɔ nuą kəlee, di wɔ kiliŋąhiɛ mąą ə hvalin, diɛ kɛ mą: «Lə ɓə ŋɛ̨i gu gɛ a gu kpɔwɔi? Lə mɛ̨nį ɓa gu Israɛlə lonnii lɛɛ laa, diɛ kulɔ gu yəi luwɔlaa hu?» 6 Tɔɔmun ə nwɔ hooɠaai kpulɔn nwotolo ɓa, ə di hąą yili, da nwɔ kɔ́kulááɠaai, di tɛɛ diɛ li. 7 Ə kɔ́ kɔ́ wotolo nwun mɛ̨ida həɠə, da Eziptə wotolo kəlee; gəlee tɛitɛi, kuláá yɛlɛɛ haaɓa haaɓa di ɓo ɉu. 8 Yai-Laa ə Eziptə tɔɔmun gili walawala, ə həɠə ə hvilɛn Israɛlə lonni pulu. Yaan, Israɛlə lonnii kɛɛ kulɔi Eziptə lɔi hu, di hvo pu. 9 Eziptə nuą di hvilɛn di pulu, di li di həli diɛ, ɓɛi di di wɔ ɓuwui pɛlɛ la Pi-Hahirotə, gboloyá kwɛlɛ, Baalə-Sefɔn tənən ma Eziptə tɔɔmun nwɔ kɔlaɠai da nwɔ wotoloɠaai kəlee di kɛ laa. 10 Eziptə tɔɔmun nɛɠɛɛ kɛa diɛ, Israɛlə lonnii di Eziptə nuą kaa di pulu diɛ pa, di kəlee di ɲɔw kpɔ kɛnɛ̨, di di woo tɛ Yai-Laa pɔ pələ. 11 Diɛ Moisə ɓa: «Akɛtii kámą ɓə hvo kɛ Eziptə lɔi hu, yai ə́ kuɔ həɠə ku pa haai ɓɛ nɔi pun ɉu? Lə ɓə ŋɛ̨i ə́ gɛ a kuɔi, yɛ́ ku kulɔ Eziptə lɔi hui? 12 Ku kɛɛ Eziptə lɔi hu, kɛlaa nwooi ku mo yɛ́, ya ka; ku kɛ yɛ́: ‹Ku lɛɛ ɓɛ ku koló kɛ Eziptə nuą diɛ. Mąąhɔlɔɓo, ku lɛɛ di yee mu hviɛlaɓoɔi, ku haa nɔi pun ɉu ɓa.›» 13 Moisə yɛ diɛ: «'Ka hvo ɲɔw! Ka hee tin ka ka ɲɛ̨i hee! Yai-Laa, kaa háákələi pai ka nwun mąąɓoi. Mąąhɔlɔɓo, Eziptə nuąi ŋɛ̨i kələi ka káá di kaai, ka hvo kɛa pai di kaai tɔ̨nɔ̨ kpɛli. 14 Yai-Laa, a ka mąą kɔ̨nwɔ̨, yili ɓa, nu kəlee ə mɛ̨i haa.» Israɛlə lonnii di gboloyá teen di kɔ́wɔ ŋą 15 Yai-Laa yɛ Moisə ɓa: «Lə mɛ̨nį ɓa, ə́ kaa ə́ woo kulɔi mą́ą́? 'Mo Israɛlə lonnii diɛ, di di muhəɠə, di li. 16 Ə́ wɛi, ə́ wɔ tunwɔ̨n tɛ yələi, ə́ gboloyá kɛlɛ la, pələ ə laa ɉu, nuą di tɛɛ la a di kɔ́wɔ mąą kpalaa. 17 Ɲą́ą́n, gáá pai Eziptə nuą kili walawalai, di lɛɛ ka pulu, nąą ɓə gáá pai nwɔ́ huwalawala mąąwiɛ lɛi laa Eziptə tɔɔmun, nwɔ kɔlaɠai da nwɔ wotoloɠaa diɛ, ə mą kɛ a nwɔ hoo mɛ̨i nuą kəlee. 18 Eziptə nuą kaa pai gɔlɔn ɉii diɛ ɲą́ą́ ɓə gáá a Yai-Laa, ɓɛlɔwai gáá pai nwɔ́ huwalawala laa mąąwiɛi lɛi la Eziptə tɔɔmun, nwɔ wotoloɠaai da ɉoo mɛ̨i nuą diɛ.» 19 Yálá nwɔ malakai kɛ vilɛn ŋąą Israɛlə lonnii ɲɛ̨i tɔwɔ, ə tɛɛ di pulu pələ, ə mą kɛ dulɔ kpinįn tii kɛ di tɔwɔ yaa kpɛli. 20 Ə lɔ Israɛlə lonnii da Eziptə nuą di lɔwai. Dulɔ kpinįn tii kɛ di lɔwai, bələ tɔ̨nɔ̨ ə kɛ a kɛɛ pɔ̨nɔ̨, bələ tɔ̨nɔ̨ yɛ ɓo a kpinį, yili ɓə gɛ, gbulu hveelɛi tii di hvo lɛɠɛ di kee ɓa, gbinįi tii hu. 21 Moisə ə ɲee haŋą gboloyá mɛ̨i, Yai-Laa ə ɓo hvaŋą kɛnɛ̨ ta ɓa, yɛ həɠə voló kulɔi pələ. Vaŋąi tii ə gboloyá ɓɛlaɓo ɉu hveelɛ a kpinį, di tɛɛ pələ hu ə kpala. 22 Israɛlə lonnii di gboloyá teen a di kɔ́wɔ mąą kpalaa, gboloyá tɔɔ di yee kəlee hu yɛ hįi. 23 Eziptə nuąi tii kpɔ kɛ di pulu, di lɛɛ di pɔ, di lɔ ɲa lɔwai. Tɔɔmun nwɔ hooɠaai, nwɔ wotoloɠaai, da nwɔ hoo mɛ̨i nuą kəlee di lɔ ɲái. 24 Yələɓoi lɔwai, Yai-Laa kɛ dulɔ kpinįn ɉu da nwɔ̨n nən, ə tinɛ̨n ə ɲɛ̨i ɲɔ̨nwɔ̨ɔ̨ hee Eziptə nuą diɛ, ə di hu pu diɛ. 25 Nwotoloɠaa kɔ́wɔ ə kanąn diɛ, Ɉooɠaa di hvo kɛi pɛli ɲalai. Eziptə nuą diɛ mą: «'Ka gu gu pulu pənə, gu həɠə Israɛlə lonnii pulu. Mąąhɔlɔɓo, Yai-Laa ɓə dɔɔ di pulu, yɛ di wɔ kɔ́i kɔ́.» 26 Yai-Laa yɛ Moisə ɓa: «'Ə́ yee haŋą gboloyá mɛ̨i, ɲá ə laa Eziptə nuą, di wɔ wotoloɠaai, ə mą kɛ di wɔ hoo mɛ̨i nuą kəlee mɛ̨i.» 27 Moisə ə ɲee haŋą. Yələwala pɔ, gboloyá ə pənə ə laa naai. Eziptə nuąi ŋɛ̨i kɛi pu, daɠaa di kwiɛn a ɲá, Yai-Laa ə di mąą wəleen, di pu ɲai. 28 Ɲá ə pənə ə hiɛ di mɛ̨i, diɛ, di wɔ wotoloɠaai da tɔɔmun nwɔ hoo mɛ̨i nuąi, diɛ kpɔ tii lɛɛ Israɛlə pulu di lɔ ɲái, dɔ̨nɔ̨ kpɛli hvo kulɔ. 29 Yii ɓaa Israɛlə lonnii di wɛi, di ɲá teen, a di kɔ́wɔ mąą kpalaa, ɲá tɔɔ di yee kəlee hu yɛ hįi. 30 Volói tii ɓə Yai-Laa ə Israɛlə lonnii nwun mąąɓo la, ə di kulɔ Eziptə nuą yəi. Ɛlɛɛ, Israɛlə lonnii ɲɛ̨i heɛ Eziptə nuą diɛ, diɛ haa gboloyá hu. 31 Bələi Yai-Laa ə nwɔ sə mɛ̨nį kɛ la, yɛ Israɛlə lonnii kulɔ Eziptə nuą yəi, di nąą kaa, di ɲɔw Yai-Laa ɓa, di laa na; di laa nwɔ̨nɔ̨ nwɔ tímun Moisə la. |