Lɛɛ gbɔwɔ ɓa 13 - Yálá laawoo hɛɓɛ (dc)

Tɔ́n vilɛn ŋąą lon dɔlɔɔɠaa mąą mɛ̨nį ɓa

¹ Yai-Laa yɛ Moisə ɓa:

² «Lon ɉinąą dɔlɔɔɠaa kpɔ Israɛlə nuą kaa pai ɉɔlɔɓoi, da di yəi taatɛlɛɛ non dɔlɔɔɠaa kəlee, ka bili gee mɛ̨i, di kɛ a nwɔ́ɔ́.»

³ Moisə ə mo nuą diɛ, yɛ diɛ: «Volói ŋɛ̨i Yai-Laa ə ka kulɔ la Eziptə lɔi hu, luwɔlaa hu, ka ka kili lɛɛ ɉu, mąąhɔlɔɓo, nwɔ huwalawala yee ɓə ə ka kulɔ la laa. Mąą hvólói ti a həli, lɛɠɛ yii dɛ hɛn gaa ɉu, nu ta hvo mįi.

⁴ Mɔ̨nun dee ɲąnin ŋɛ̨i a Abibə, ɉu ɓə ka kulɔ la a háákələi yələ.

⁵ «Ɓɛlɔwai Yai-Laa kaa pai ka lɔi la Kanaan lɔi hu; ɓɛi Hɛtə nuą, Amɔrə nuą, Hivi nuą da Ɉebusə nuą di kaa laa. Nɔi tii ɓə wɔlɔ ə naakwɛlanmo ka kalaɓɔlɔni diɛ, yɛ gaa dɛɛi di pɔ. Ɓɛi hɛn gəlee da lɛlɛ laa. Ɉɛlii ti ɓə ka bu a ɲąnin ti da volói ti.

⁶ Hvóló mɛ̨ihveelɛ yee mu, lɛɠɛ yii dɛ hɛn və ɉu, ya ɓə ka kɛ mįi. Voló mɛ̨ihveelɛ yələ, ka yili pu a hɛli Yai-Laa laa hu.

⁷ Volóɠaai ti hu ka wɔ lɔi nąą kəlee piliɛ gee mɛ̨i, mąą hvo nɛ̨ɛ̨li lɛɠɛ yii dɛ hɛn gaa ɉu hvo kɛ ka yəi, ə mą kɛ, lɛɠɛ tɛ hɛn.

⁸ «Ka kɛi ɉɛlii ti pu, mąąnɛ̨ɛ̨ ka ɉukulɔ ka lonnii diɛ, kaa diɛ: ‹Ku kulɔi ŋɛ̨i Yai-Laa ə mo luwɔlaa hu Eziptə, mąą hɛlii ka ŋɛ̨i ku kaa bui.›

⁹ Ɉɛlii ti pu mɛ̨nį ka yəi, gaa a kili lɛɛ ɉu, ka doo ka yee ɓa, ka da yili ka ɲɛ̨i mɛ̨i; əgɛ, Yai-Laa nwɔ tɔ́n nąą kili hvo pa kpɛɛ ka ɲą. Mąąhɔlɔɓo, ya ɓə ka kulɔ luwɔlaa hu a nwɔ huwalawalai hɛn da hva tɔɔ na.

¹⁰ «Kwɛlan nwoo kwɛlan ka ɉɛlii ti pu a voló leelee.

¹¹ Ɓɛlɔwai Yai-Laa a lɔ la a kaa Kanaan lɔi hu, yɛ bələi ə naakwɛlanmo la ka kalaɓɔlɔni diɛ, a nąą tɛɛ ka pɔi;

¹² Ka lon ɉinąą dɔlɔɔɠaa kəlee tɛɛ Yai-Laa pɔ, ə mą kɛ a ka yəi taatɛlɛɛ lon dɔlɔɔɠaai a ɉilɛ, nwɔɔ li.

¹³ Akɛ a hoohvaalən non dɔlɔɔ, ya nwun mąąɓo a ɓɛlaa lon, awala kɛ tii, ya gbowola kalan nwolo. Yii ɓaa nu kanŋaa di wɛi, ka pɛli ka di nwun mąąɓo.

¹⁴ «Ka lonnii da ka mąnįn kɛ tinąą tɔwɔ pələ, diɛ kɛ mą: ‹Lə mɛ̨nį ɓa ka káá gɛi ti?› Ka kɛ diɛ: ‹Yai-Laa nwɔ huwalawalai hɛn da hva tɔɔ na, ɉaalai hu ɓə ə ku kulɔ la luwɔlaahu Eziptə.

¹⁵ Eziptə tɔɔmun ə ganąn bili ku mɛ̨i, hvo kɛi gɛ ku hvo kulɔ nwɔ lɔi hu. Nąąlɔwai, Yai-Laa ə Eziptə nuą lon dɔlɔɔɠaa kəlee paa, ə mą kɛ di yəi taatɛlɛɛ lon dɔlɔɔɠaa kəlee. Mɛ̨nįi gɛi kuɔ huwɔ lon dɔlɔɔɠaa tɛɛ Yai-Laa pɔ, kuɔ lon ɉinąą dɔlɔɔɠaa nwun mąąɓo yaa li.›

¹⁶ «Yili kaa pai kɛi a bɛ̨ɛ̨ huwɔ kɔ́lɔ palaa hu, ɲiliɛ ə́ nwun ma da ə́ ɓonwon ma, ə kɛ a kili lɛɛ ɉu hɛn, yii a nɛ yɛ Yai-Laa, nwɔ huwalawalai hɛn da hva tɔɔ na, ɉaalai hu ɓə ə gu kulɔ la Eziptə.»

Israɛlə lonnii kulɔ mɛ̨nį Eziptə

¹⁷ Ɓɛlɔwai Eziptə tɔɔmun ə ɓo la Israɛlə lonnii diɛ, diɛ li, Yálá hvo hvaa mą, di hvo tɛɛ Filisti lɔi hu pələ; bələi mąn bələ yili kpuai kɛ la. Mąąhɔlɔɓo, ə gaa yɛ, da tɛɛ laa pələ, kɔ́ kaa lii heei diɛ, di ɲɔw, di pənə di pulu diɛ li Eziptə lɔi hu.

¹⁸ Yili ɓə gɛ, Yálá ə di ɲɛ̨i tinɛ̨n, di tɛɛ a nɔi pun ɉu pələ, veegbɔnɔ̨ gboloyá pɔ pələ. Israɛlə lonnii kpulu hu kɛnɛ̨i kpɔ kɛ diɛ həɠə Eziptə.

¹⁹ Moisə ə mo, di Ɉosɛfə kɔ́wɠaa həɠə, diɛ li la. Mąąhɔlɔɓo, Ɉosɛfə ə wɔlɔ kɛ niɛni diɛ, ka ka kwɛla, kaa diɛ: «Yálá a pa ka kulɔi ɓɛ, ka gɔ́wɠaa həɠə, ə lɛɛ ka yəi, ka li la!»

²⁰ Israɛlə lonnii di həɠə Sukotə daai, di li di di wɔ taai pu Etamə nɔi pun gwɛlɛ.

²¹ Hvóló a kulɔ, Yai-Laa, a kɛ hvilɛn ni di tɔwɔ a tulɔ kpinįn, yɛ di tənən dɔɔ, kpinį a pɛlɛ yɛ ɓo a nwɔ̨n nən yɛ di mąąpono gbinį hiɛ kɛɛ hu.

²² Dulɔ kpinįn da nwɔ̨n nən, di mąą hvo kɛi kwɛa diɛ, a kpinį da hvóló.