Lɛɛ gbɔwɔ ɓa 12 - Yálá laawoo hɛɓɛ (dc)

Israɛlə ə kulɔ Eziptə Pakə hɛli

¹ Yai-Laa ə hvaa Moisə da Aarɔn di pɔ Eziptə lɔi hu, yɛ diɛ:

² «Ɲąnin ŋɛ̨i ɓə pai kɛi a ka wɔ kwɛlan ɲąnin dɔlɔɔ. Kaa gwɛlan gɔwɔ tɔɔ mą.

³ Ka li ka mo Israɛlə lonnii diɛ, kaa diɛ: «Ɲąnin ŋɛ̨i nwɔ hvóló pow yələ, kwəli nąmįną tɛitɛi kəlee di ɓɛlaa lon ɉon a bɛlɛ́ laa;

⁴ akɛ mɛlaa lon a kɛnɛ̨ a tɛɛ bɛlɛ́n nuą diɛ, pɛlɛ́ takpɛli a kɛ di kwɛlɛ, da diɛni da bɛlɛ gee ɓa, di nuą lonon, diɛi da pɛli ɓɛlaa lon dɔ̨nɔ̨ mįi di gbɛɛ.

⁵ Mɛlaa lon, di kaa pai gɛi la, mąąnɛ̨ɛ̨ ə kɛ a ɉilɛ, aa kwɛlan dɔ̨nɔ̨ kɛ, kpɛɠii hvo kɛ mą, gɔlɔi pɔ̨nɔ̨ɔ̨, ka pɛli ka ɉəɠə ɓɛlaa lonnii, awala kɛ tii, ɓolu lonnii lɔwai.

⁶ Ka ɉon, a lɛɛ ka yəi, ə lɛɛ ɉu, ɲąnin nwɔ hvóló pow gɔw nąąn ɲələ, yələwulii pɔ, nu kəlee ə nwɛi paa.

⁷ Di ŋąmą hiɛ bɛlɛ́ laaləi mɛ̨i, da gwɛlɛ pələ kəlee hveelɛi, ɓɛi ti da mɛlaa mįi laa bɛlɛ́n.

⁸ «Mąą kpinįi ti hu, da mɛlaa lon mɔ̨n, di mįi a lɛɠɛi dɛ hɛn və ɉu, ɛlɛɛ, di mįi a kala nwąną.

⁹ Ɉuwɔ nąą ta hvo lɛɛ a nwunu kaa mįi, ka hvo nwɔ̨nɔ̨ da yili. Kɛlaa, ka nąą kəlee mɔ̨n: Nwun galən gɔwɔ kwąną da gwəi hɛnŋąą kəlee, ka mɔ̨n.

¹⁰ Ka hvo da lɛɛ laa yələ hvo ɓɔ mą. Akɛ da a lɛɛ yələ a ɓɔ, ka yili kələn.

¹¹ Bələi ka káá pai mįi la, bələ ka; ka kɛi mįi, nu kəlee a yala tɔɔ ɉąą, ka kɔlɔ lɔ ka kɔ́wɔ ŋą, hiɛ tunwɔ̨n ɉon ŋąą ka yee pɔ ka mįi a mąąhulaa. «Yili ɓə pai kɛi a Yai-Laa nwɔ pakə hɛli.

¹² «Mąą kpinįi ti hu, gáá pai tɛɛi Eziptə lɔi nąą kəlee, lon dɔlɔɔɠaai kpɔ di kaa nɔi, ə kɛ a nu ə kɛ a daatɛlɛɛɠaa, ŋį́ gəlee paa. Ɉaliɠaai kpɔ gaa di yəi, nwɔ́ kiti kaa pai həlii gəlee ɓa Eziptə lɔi hu. Ɲą́ą́ ɓə gáá a Yai-Laa.

¹³ «Kɛlaa ka wɛi, ɲąmąi tii ɓə pai kɛi a ka wɔ pɛlɛ́ɠaai kɔ́lɔn ɉɛn. Ŋą́ ɲąmąi tii kaa, ŋą́ laŋįn ka mɛ̨i, mɛ̨nį nwąnąąi pai laai Eziptə lɔi ɓa, da hva həli la kaa.

¹⁴ «Kwɛlan nwoo kwɛlan, mɛ̨nį lɛlɛɛi ŋɛ̨i ŋą́ą́ gɛ kaa, ka kɛ kpɔlɔ ɉɛli pui, ɲą́ą́ Yai-Laa náá hu. Gaa pai kɛi ka mɛ̨i a tɔ́n, hva ɉəɠə mą.

Lɛɠɛi dɛ hɛn və ɉu mąą hɛli

¹⁵ «Hvóló mɛ̨ihveelɛ yee mu, lɛɠɛi dɛ hɛn və ɉu, ya ɓə ka kɛ mįi. Ə gɔwɔ tɔɔ vóló dɔlɔɔ ɓa, lɛɠɛ tɛ hɛn da hvo lɛɛ bɛlɛ́n, ka gəlee kulɔ laa. Vóló mɛ̨ihveelɛi tii yee mu, nui lɔpee a lɛɠɛ tɛɛ mįi, da naa kulɔ Israɛlə lonnii laa pɔ.

¹⁶ Vóló dɔlɔɔ yələ, da vóló mɛ̨ihveelɛ yələ, ka ka ŋąąkpɔn Yálá líí la. Vólóɠaa ti yee mu, kóló lɔpee ta hva kɛ, hvo kɛ li lɔ, kɔ̨nɔ̨n mąąnɛ̨ɛ̨ ka mįi, yili mɛ̨nį.

¹⁷ «Ka ka yee kanąn lɛɠɛi dɛ hɛn və ɉu nwɔ hɛli ɓa. Mąąhɔlɔɓo, ɲələ ɓə ŋį́ ka kulɔ la Eziptə lɔi hu. Ka ka yee kanąn vólói tii ɓa, kaa ɉɛli pu la a kwɛlan nwoo kwɛlan, gaa pai kɛi ka mɛ̨i a tɔ́n hva ɉəɠə mą.

¹⁸ «Ɲąnin dɔlɔɔ nwɔ hvóló pow kɔ́w nąąn ɲələ, yələwulii pɔ, lɛɠɛi dɛ hɛn və ɉu, ka lɛɛ mįi, ə lɛɛ ɉu, nwɔ hvóló pow hveelɛ kɔ́w tɔ̨nɔ̨ ɲələ yələwulii.

¹⁹ «Hvóló mɛ̨ihveelɛ yee mu, lɛɠɛ tɛ hɛn da hvo kɛ ka yəi bɛlɛ́n, nui lɔpee a kɔ̨nɔ̨n da mįi lɛɠɛ tɛ hɛn ə ɓo ɉu, da naa kulɔ Israɛlə lonnii laa pɔ; ə kɛ a Israɛlə lonnii ta, ə kɛ a nwɛ̨ą.

²⁰ «Lɛɠɛ kpɔ dɛ hɛn gaa ɉu, ka hvo da mį́i, ɓɛi lɔpee ka káá laa heeni, ka hvo lɛɠɛ tɛɛ mįi.»

Pakə kɔ̨nɔ̨n bɛli pələ

²¹ Moisə ə Israɛlə kalanɉonŋąą kəlee təli, yɛ diɛ: «'Ka li, pɛlɛ́ kəlee ə taatɛlɛɛ ta hon, ka gulɔ a pakə haláá.

²² 'Ka isopə kpinįn ɉəɠə, daatɛlɛɛ ɲąmąi ti ka bu ɉɛɲąŋą hu, ka nɔ ɉu, ka ɉiɛ gbon mɛ̨i da gwɛlɛ hveelɛi ɓa; ə həɠə nąąlɔwai ɓa, ɛlɛɛ ɉu yələwala, nu ta hvo kulɔ ɲəi bɛlɛ́n.

²³ Yai-Laa, kaa pai tɛɛi ə Eziptə kɛlɛ, a ɲąmą kaa bɛlɛ́ laaləi mɛ̨i da gwɛlɛ hveelɛi ɓa, a tɛɛ bɛlɛ́ laaləi, hva hvaa mą, Kɛɛkalamun hvo nąą kala.

²⁴ 'Ka ka yee kanąn mą, kaa, ka ka lonnii a yələ kəlee mɛ̨nį.

²⁵ «Nɔi ŋɛ̨i Yai-Laa ə naakwɛlanmo kaa, ka pa lɔi ɉu, ka ka yee kanąn ɉɛlii ti ɓa, kaa bu a kwɛlan gəlee.

²⁶ «Ka lonnii da pa kɛi kaa: ‹Ɉɛlii ŋɛ̨i mukulaa ɓaa lə?›

²⁷ Ka kɛ diɛ: ‹Yai-Laa nwɔ pakə haláá li, yai ku gulɔ mą, ɓɛlɔwai ə kɛi Eziptə nuą kɛlɛ la, yɛ Israɛlə nwɔ pɛ́lɛ́i nwun mąąɓo.›» Israɛlə lonnii kəlee di pɛlɛ nɔi ɓa, di kwɛli hvilɛn.

²⁸ Israɛlə lonnii kəlee di li, di di yee pɛlɛ goló ɓa, di gɛ kpɔlɔ yɛ bələi Yai-Laa ə Moisə da Aarɔn di tí la.

Mɛ̨nį nwąnąą gbəli: lon dɔlɔɔɠaa haa mɛ̨nį

²⁹ Kwiihɛ̨ą ɓɛlaɓoɔ, Yai-Laa, ə Eziptə lon dɔlɔɔɠaa kəlee paa, ə gɔwɔ tɔɔ tɔɔmun non dɔlɔɔ ɓa, yai kɛi pa mąąhvalin ɉii, ə həli la nuwɔɠaa kəlee diɛ, diɛi kɛ gaho pɛlɛ́ mu; da daatɛlɛɛɠaa kəlee di lon dɔlɔɔɠaa.

³⁰ Mąą kpinįi ti hu, tɔɔmun ə muhələ, yaa da nwɔ ɲɛ̨itɔwɔ nuą, ə mą kɛ Eziptə nuą kəlee. Wɔlɔ woo ə kɛ pɛlɛ́ kəlee mu, mąąhɔlɔɓo, pɛlɛ́ ta hvo kɛ laa yii haa hvo too mu.

³¹ Mąą kpinįi ti hu, tɔɔmun ə nɛɛmą, ə Moisə da Aarɔn di təli, yɛ diɛ: «'Ka ka muhəɠə! 'Ka kulɔ nwɔ́ nuąi lɔwai, kaa ka Israɛlə lonnii. 'Ka li ka kwɛli hvilɛn Yai-Laa ɓa, yɛ bələi ka mo la.

³² Ka ka wɔ taatɛlɛɛɠaai kəlee həɠə, yɛ bələi ka mo la, ka li. Yili pulu, ka Yálá hvɛli ə lúwɔ́ too mą́ą́.»

³³ Eziptə nuą di Israɛlə lonnii mąąwələən di kulɔ mɛ̨nį ɓa nɔi, mąąhɔlɔɓo di kɛi kɛ diɛ: «Ku kəlee ku kaa pai haai!»

³⁴ Yili ɓə gɛ, Israɛlə lonnii, di wɔ lɛɠɛ kpɔlɔɠaai hvo pɛli tɛi di yəi, di ɉəɠə diɛ li la. Di bu kɛa di mąą həɠəɠaa hu, di naa di nwuɔ̨.

³⁵ Bələi ti Moisə ə mo la Israɛlə lonnii diɛ, di gɛ ti. Nu kəlee ə hɛnɲąŋą hvɛli Eziptə nuą diɛ, yai kɛ a wali kwɛli, hɛni da həɠəɠaa.

³⁶ Yai-Laa ə Israɛlə lonnii wɛli too Eziptə nuą diɛ, di hɛnŋąą tɛɛ di pɔ. Bələ ɓə di Eziptə nuą mąą kpoloon na.

³⁷ Israɛlə lonnii di həɠə Ramsɛsə daai, di hvilɛn bələ ɓa, diɛ li Sukotə daai pələ. Di kɛ a nu waa nwun mɛ̨ida ɲɔ̨nwɔ̨mąn yiiɠaai kɛi hiɛ di kɔ́wɔ ŋą di hvo nɛ̨ąą da lɛapɛlɛɛɠaa di lonon.

³⁸ Nu huwu tamąą di lɛɛ di pɔ, da diɛni diɛ li, da taatɛlɛɛ kpulu kɛnɛ̨.

³⁹ Nɛɠɛ kpɔlɔi ti kɛ di yəi diɛ həɠə la Eziptə lɔi hu, di kɛi kɛa bɛli bələ ɓa a nwɔ̨nmii. Mąąhɔlɔɓo, di hvo lɛɛ laa hvo tɛ. Ɓɛlɔwai di di kpɛ la Eziptə lɔi hu, di hvo pɛli bələ pɔ kɔ̨nɔ̨n ɉəɠəi.

⁴⁰ Gwɛlan Israɛlə lonnii di gɛ Eziptə, ə kɛ a kwɛlan nwun nąąn kwɛlan bow haaɓa.

⁴¹ Gwɛlan nwun nąąn gwɛlan bow haaɓai ti yee mu, voló tɔ̨nɔ̨i ŋɛ̨i lɔ ɓə Yai-Laa nwɔ kɔlaɠai ə kulɔ la Eziptə lɔi hu.

⁴² Gbinii tii Yai-Laa ə lɛɛ la a ɲɛ̨i, yɛ di kulɔ Eziptə lɔi hu, mąą kpinįi kaa a Yai-Laa nwɔɔ; gbinįi tii a ɉəli, mąąnɛ̨ɛ̨ Israɛlə lonnii kəlee di lɛɛ a di ɲɛ̨i.

Pakə hɛli pu pələ

⁴³ Yai-Laa yɛ Moisə da Aarɔn diɛ: «Bələi mąąnɛ̨ɛ̨ ka pakə hɛli pu la, bələ ka: «‹Mąą hvo nɛ̨ɛ̨li nwɛ̨ą lɔpee hvo da mįi.

⁴⁴ «‹Kɛlɛɛ, luwɔi ka ɲa a wali, ka ɉee kɛ́nɛ̨ ɓa a pɛli da mįi.

⁴⁵ «‹Nwɛ̨ą da wali kwɛlimun, di mąą hvo nɛ̨ɛ̨li di hvo da mį́i.

⁴⁶ «‹Ka gɔ̨nɔ̨n tii mįi pɛlɛ́n, ɉuwɔ ta hvo kulɔ ɲɛnɛ̨ɛ̨, 'ka hvo gɔw ta hu yali.

⁴⁷ «‹Israɛlə nu huwu kəlee, mąąnɛ̨ɛ̨ di ɉɛlii ti pu.

⁴⁸ «‹Nwɛ̨ąi gaa ka yəi bɛlɛ́n, a kɛ bɔ ka diɛni ka ɉɛlii tii pu a Yai-Laa mąąwiɛ mɛ̨nį, hvo kɛ li di, ɉinąą hee kɛ́nɛ̨ ɓa. Yili pulu ɓa ɓə ka diɛni ka pɛli ka ɉɛli pu la gee ɓa; ə kɛ lɔ yɛ nɔi lon da. Kɛlaa nui gɛ́nɛ̨ hvo kɛ li hvo da mįi.

⁴⁹ «‹Dɔ́n dɔ̨nɔ̨ ti kaa lɔ tii nɔi lonnii mɛ̨i, da nwɛ̨ąi heeni ka kɔ́wɔ mɛ̨i.›»

⁵⁰ Mɛ̨nįɠaa kpɔ Yai-Laa ə Moisə da Aarɔn di tí la, Israɛlə lonnii di gɛ tii.

⁵¹ Volói tii ɓə, Yai-Laa ə Israɛlə lonnii kulɔ la Eziptə lɔi hu da di huwu kəlee.